Tɛmpɛlɔ Ka Woke Ka Lo Nyuma Kaki Jehowa
“Shu teko la olombedi a ladiku a wuhu oso, . . . ukambi wa lu etemwelo ndu lu luudu la dipema la mete, lakahiki [Jehowa], aha untu.”—HEBERU 8:1, 2.
OMA lo ngandji k’efula kokande anto, Jehowa Nzambi akakimɔ olambo ɔmɔtshi dia minya pɛkato y’andja w’otondo. (Joani 1:29; 3:16) Dia nde sala dui sɔ, nde akahombe mbɔsa lɔsɛnɔ l’Ɔnande l’enondo oma l’olongo ko lidja l’otema w’osekaseka w’emuma w’Ose Juda wakawelɛka Mariya. Ondjelo wa Jehowa akalembetshiya Mariya hwe ɔnɛ diemi diayangayɛ ntshɔ nɛ, ɔna layotɔ ‘ayelamɛ ɔnɛ okilami, Ɔna Nzambi.’ (Luka 1:34, 35) Ondjelo akatɛ Yɔsɛfu, omambedi wa Mariya, ɔnɛ Mariya ambotshɔ diemi dia Yeso lo dihindo, ndo nde akawewoya ɔnɛ ɔna akɔ layondota ‘ayoshimbɛ anto ande oma lo pɛkato yawɔ.’—Mateu 1:20, 21.
2 Lam’akayolaka Yeso, ondo nde mɛtɛ akashihodiaka awui amɔtshi w’endana la eotwelo kande ka lo dihindo. Nde akeyaka ɔnɛ She lele l’olongo akawosha olimu wakandahombe sala lanɛ la nkɛtɛ, olimu wa shimbɛ nsɛnɔ y’anto. Ɔnkɔnɛ, lam’akandakome opalanga wa suke l’ɛnɔnyi 30, Yeso akaye le Joani, omvutshi wa Nzambi, dia ndjobatizama l’Ɔkɛdi wa Jɔrɔdana.—Mako 1:9; Luka 3:23.
3 Yeso akalɔmbaka wonya wakandabatizamaka. (Luka 3:21) Aha la tamu, oma l’etena kɛsɔ ka lo lɔsɛnɔ lande mbakandakotsha ɛtɛkɛta wofundami l’Osambu 40:6-8, oko wakayodiɛnyaka ɔpɔstɔlɔ Paulo l’ɔkɔngɔ diko ate: “We kunanga elambu la eshasha, keli we akanongoswela dimba.” (Heberu 10:5) Ɔsɔku mbakɛnya Yeso dia nde akeyaka ɔnɛ Nzambi ‘konanga’ elambo wa nyama tetemala nambwama lo tɛmpɛlɔ ka la Jerusalɛma. Koko, nde akeyaka ɔnɛ Nzambi akalɔngɔsɔla demba di’onto la kokele lo dikambo diande, nde Yeso, dia nde dilambola oko olambo. Dui sɔ diakahombe minya ohomba wa nyomolambolaka nyama nto. Dia nde mɛnya saki kande k’oma k’ɛse otema ka ndjaɔtɔnganyiya la lolango la Nzambi, Yeso akatetemala nɔmba ate: “Enda, dimi lambuya, dia ndjutsha lulangu laye, we [Nzambi, NW], uku akawafundela lu wombo a buku.” (Heberu 10:7) Ande ɛnyɛlɔ ka dimɛna efula ka dihonga ndo ka ndjakimɔ aha la nyanga wahɔ ande kakatshike Yeso lushi lɔsɔ lo dikambo dia wanɛ tshɛ wakakoke ndjoyala ambeki ande l’ɔkɔngɔ diko lee!—Mako 8:34.
4 Onde Nzambi aketawɔ dɔmbɛlɔ diakalɔmbaka Yeso lam’akandabatizamaka? Totshike ɔpɔstɔlɔ ɔmɔtshi wakasɔnɔla Yeso atokadimole: “Lam’akabatizama Jesu, kem’edja ndi akatumbi uma l’ashi. Nyulungi, ulungu akadihwama, ku ndi akenyi [n]yuma ka [Nzambi, NW] ayahulo uku fudu k’inga, akayuwahema. Ku diui diakayi uma l’ulungu ati: On’ami la ngandji one, ndi atongenyangenyaka ololo.”—Mateu 3:16, 17; Luka 3:21, 22.
5 Woho waketawɔ Nzambi demba dia Yeso oko olambo akɛnyaka ɔnɛ, lo yoho ya lo nyuma, elambwelo koleki kɛnɛ ka lo tɛmpɛlɔ ka la Jerusalɛma woke kambeta la ntondo. Elambwelo ka mɛtɛ mɛtɛ kakawalambolaka elambo kaki didjidji di’elambwelo ka lo nyuma kele “lulangu” la Nzambi kana kɛnɛ kakandalɔngɔsɔla dia mbetawɔ lɔsɛnɔ la Yeso l’onto oko olambo. (Heberu 10:10) Diɔ diakɔ diakakoke ɔpɔstɔlɔ Paulo fundɛ anyande Akristo ate: “Shu teko la [elambwelo, NW], kaheyi wane watutshaka ulimu wa luudu la dipema [kana tɛmpɛlɔ] nde loko.” (Heberu 13:10) Kɛdikɛdi, Akristo wa mɛtɛ wekɔ lo kondja ɛlɔlɔ oma l’olambo woleki woke wadimanya pɛkato, olambo wakatone ɛlɔmbɛdi w’Ase Juda.
6 Woho wakakitama Yeso nyuma k’ekila akɛnyaka ɔnɛ l’etena kɛsɔ, Nzambi ambotonga ɔlɔngɔswamelo w’otondo wa tɛmpɛlɔ ka lo nyuma, lɛnɛ akamba Yeso oko Ɔlɔmbɛdi wa Lâdiko. (Etsha 10:38; Heberu 5:5) L’ɛlɔmbwɛlɔ ka nyuma k’ekila, ombeki Luka akɛnya ɔnɛ ɔnɔnyi ɔsɔ wakasalema dikambo sɔ dia mamba waki ‘ɔnɔnyi wa dikumi l’atanu wa lowandji laki Tibɛriyo Kayisa.’ (Luka 3:1-3) Ɔnɔnyi ɔsɔ mbɔtɔnɛka l’ɔnɔnyi 29 T.D.—mingu 69 y’ɛnɔnyi kokele, kana ɛnɔnyi 483, tatɛ oma l’etena kakadje Nkumekanga Aratashasha didjango dia vɔ nyomohika pele dia Jerusalɛma. (Nehemiya 2:1, 5-8) Lo ndjela pɔlɔfɛsi, “Mɛsiya Ɔnɔmbɔdi” akahombe ndja l’ɔnɔnyi ɔsɔ wakatama la ntondo. (Danyɛlɛ 9:25, NW) Ase Juda efula mɛtɛ wakeyaka dikambo sɔ. Luka ekɔ lo kɔndɔla ɔnɛ ‘anto wakakongɛka’ dia mɛna Mɛsiya, kana Kristo, tshɛkɛta ya lo Hɛbɛru la ya lo Grɛkɛ yele la kitshimudi yakɔ ɔtɔi: “okitami.”—Luka 3:15.
7 Wonya wakabatizamaka Yeso, dihole diodjashi Nzambi l’olongo diakakitama nyuma k’ekila, kana diakakitshama lânde, oko “Dihole Dioleki Ekila” lo tɛmpɛlɔ ka woke ka lo nyuma. (Danyɛlɛ 9:24, NW) “Luudu la dipema la mete [kana tɛmpɛlɔ], lakahiki [Jehowa], aha untu” lakatatɛ kamba olimu. (Heberu 8:2) Ndo nto, oma lo batismu kande ka l’ashi ndo la nyuma k’ekila, onto lakawelɛka Yeso Kristo akotɔ nto oko Ɔna Nzambi la lo nyuma. (Ɛdika la Joani 3:3.) Dui sɔ diakɛnyaka nto ɔnɛ, l’etena kakandashikikɛ, Nzambi akahombe ndjêlɛ Ɔnande dia nde kalola l’olongo, lɛnɛ akandahombe tokamba olimu lo lonya l’omi la She oko Nkumekanga la oko Ɔlɔmbɛdi wa Lâdiko “uku Melekizedeke pundju.”—Heberu 6:20; Osambu 110:1, 4.
Dihole Dioleki Ekila dia l’Olongo
8 Lushi lakabatizama Yeso, kiti ka diolelo kaki Nzambi ka l’olongo kakayala l’akambo w’eyoyo. Woho wakasɔnama olambo w’onto la kokele dia dimanya pɛkato y’andja akɛnyaka hwe ɔnɛ ekila ka Nzambi tshikitana efula la eongelo ka pɛkato kele l’anto. Kɛtshi ka Nzambi kakatombe sɛkɛ lo yoho yele, l’etena kɛsɔ, nde akɛnya ɔnɛ nde mbetawɔka anto tutsha nkɛlɛ kande kana mbokana la nde nto. Ɔsɔku mbakayala kiti ka Nzambi ka l’olongo oko etenyi ka tɛmpɛlɔ kakatokomɛ l’ɔhɔngɔ, lɛnɛ akɔtɔka ɔlɔmbɛdi wa lâdiko mbala ɔtɔi l’ɔnɔnyi la dikila dia nyama dia todimanya pɛkato lo yoho ya didjidji.
9 Dihɔndɔ diakakakitolaka Dihole di’Ekila la Dihole Dioleki Ekila diaki didjidji dia demba dia Yeso di’emunyi. (Heberu 10:19, 20) Diɔ diaki oko lokombo lakashimbaka Yeso dia nde mbɔtɔ lɛnɛ ele She lam’akinde oko onto lanɛ la nkɛtɛ. (1 Koreto 15:50) Etena kakavu Yeso, “dihondo [di’okombɔ] diakahanemi lu etemwelo, diakate betshi pendi, uma ladiku pulu ndu l’esi.” (Mateu 27:51) Dikambo sɔ diakɛnya lo yoho ya diambo ɔnɛ kɛnɛ kambosekɛka Yeso mbɔtɔ l’olongo kambomɔ. L’ɔkɔngɔ wa nshi shato, Jehowa Nzambi akasale dihindo dimɔtshi dia mamba. Nde akolola Yeso oma lo nyɔi, aha oko onto okovɔ lele l’emunyi la dikila, koko oko etongami ka lo nyuma kele la lotombo ‘kasɛna pondjo pondjo.’ (Heberu 7:24) L’ɔkɔngɔ wa nshi akumi anɛi, Yeso akadɛ l’olongo ko akɔtɔ lo “Dihole Dioleki Ekila” dia mɛtɛ, “dia menama lu ashu a [Nzambi, NW] dia dikambu diasu.”—Heberu 9:24.
10 Onde Nzambi aketawɔ nɛmɔ dia dikila dia Yeso diakatshulwama dia dimanya pɛkato y’andja? Eelo, nde aketawɔ. Dikambo sɔ diakɛnama mɛtɛ nshi 50 l’ɔkɔngɔ w’eolwelo ka Yeso, lo lushi la difɛstɔ dia Pɛntɛkɔsta. Nyuma k’ekila kaki Nzambi kakaholwɛ ambeki wa Yeso 120 wakatshumana kâmɛ la Jerusalɛma. (Etsha 2:1, 4, 33) Oko Yeso Kristo, Ɔlɔmbɛdi awɔ wa Lâdiko, vɔ wakakitama nyuma dia monga oko ‘ɛlɔmbɛdi w’ekila, dia nambolaka elambo wa lo nyuma’ lo tɛmpɛlɔ ka Nzambi ka lo nyuma. (1 Petero 2:5) Lâdiko dia lâsɔ, akitami asɔ wakatonge wodja w’oyoyo, ‘wodja w’ekila’ waki Nzambi wokengami l’Isariyɛlɛ wa lo nyuma. Tatɛ oma l’etena kɛsɔ, pɔlɔfɛsi tshɛ y’awui w’ɛlɔlɔ w’endana l’Isariyɛlɛ, ɛnyɛlɔ oko daka dia “sheki y’uyuyu” diofundami lo Jeremiya 31:31, yakahombe kotshama le etshumanelo k’Akristo w’akitami, “Isariyɛlɛ wa Nzambi” wa mɛtɛ.—1 Petero 2:9; Ngalatiya 6:16, NW.
Awui Akina wa lo Tɛmpɛlɔ ka Nzambi ka lo Nyuma
11 Kânga mbele Dihole Dioleki Ekila diaki didjidji dia “ulungu,” lɛnɛ odjashi Nzambi lo kiti kande ka diolelo, awui akina tshɛ wa lo tɛmpɛlɔ ka Nzambi ka lo nyuma mbɔtɔnɛka l’akambo wa lanɛ la nkɛtɛ. (Heberu 9:24) Lo tɛmpɛlɔ kaki la Jerusalɛma, sɛkɛ dimɔtshi di’ɛlɔmbɛdi diakikɔ l’etei, lo sɛkɛ diakɔ mbaki ndo elambwelo kakawalambolaka elambo la dɔnga dia woke di’ashi wakɔsaka ɛlɔmbɛdi dia ndjaɛdia la ntondo ka sala olimu w’ekila. Akambo asɔ wekɔ didjidji dia na lo tɛmpɛlɔ ka Nzambi ka lo nyuma?
12 Lo dikambo dia Yeso Kristo, sɛkɛ di’ɛlɔmbɛdi dia l’etei diaki didjidji dia eongelo kande k’onto laha la pɛkato ndo k’Ɔna Nzambi la kokele. Oma lo mbetawɔ kele lawɔ l’olambo wa Yeso, ambeki wa Kristo w’akitami wambelamɛ ɔnɛ akanga a losembwe. Ɔnkɔnɛ, Nzambi kokaka mbaɔsa oko anto waha la pɛkato. (Romo 5:1; 8:1, 33) Lâsɔ sɛkɛ sɔ diekɔ nto didjidji di’eongelo k’onto la losembwe kakawasha ɔm’ɔmɔ la l’atei w’ɛlɔmbɛdi w’ekila la ntondo ka Nzambi. Koko, Akristo w’akitami wekekɔ anto wele bu kokele ndo vɔ kokaka sala pɛkato. Dɔnga di’ashi dia lo sɛkɛ diekɔ didjidji dia Dui dia Nzambi diɔsa Ɔlɔmbɛdi wa Lâdiko dia tɛdiaka ɛlɔmbɛdi w’ekila yema yema. Oma lo woho wetawɔwɔ mbɛdiama ngasɔ, vɔ waya la ɛnamelo ka ngaingai kalɛmiya Nzambi ndo kakotola wanɛ wele l’andja oya l’ɔtɛmwɛlɔ wa pudipudi.—Efeso 5:25, 26; ɛdika la Malaki 3:1-3.
Dihole di’Ekila
13 Etenyi ka ntondo ka tɛmpɛlɔ kekɔ didjidji dia eongelo koleki kɛnɛ ka lo sɛkɛ dia tɛmpɛlɔ. Lo dikambo dia Yeso Kristo, onto la kokele, etenyi kɛsɔ ekɔ didjidji dia eotwelo kande ka hende oko Ɔna Nzambi la lo nyuma lahomba kalola dia tɔsɛna nto l’olongo. L’ɔkɔngɔ wa vɔ mbelamɛ ɔnɛ akanga a losembwe oma lo mbetawɔ kawɔ lo dikila dia Kristo diakatshulwama, ambeki w’akitami kondjaka ɛlɔlɔ ndo vɔ lawɔ oma l’olimu ɔsɔ wa lânde wasala nyuma ka Nzambi. (Romo 8:14-17) Lo tshimbo ya ‘ashi [mbuta ate, batismu kawɔ] la nyuma,’ vɔ ‘wambotɔ nto’ oko ana wa Nzambi wa lo nyuma. Ɔnkɔnɛ, vɔ wekɔ l’elongamelo ka mbolɔ dia tɔsɛna l’olongo oko ana wa Nzambi wele l’alemba wa lo nyuma, naka vɔ tshikala la kɔlamelo polo ndo lo nyɔi.—Joani 3:5, 7; Enyelo 2:10.
14 Wanɛ wakatɛmɔlaka Nzambi l’andja wa tɛmpɛlɔ kɔmɛnaka ɛlɔmbɛdi wakakambaka olimu l’etei ka Dihole di’Ekila diaki lo tɛmpɛlɔ ka lanɛ la nkɛtɛ. Woho akɔ wâmɛ mbele ndo Akristo w’akitami, vɔ wekɔ la eongelo kɛmɔtshi ka lo nyuma kele efula k’atɛmɔdi wa Nzambi, wanɛ wele l’elongamelo ka sɛna pondjo pondjo lo paradiso ka la nkɛtɛ, bu latɔ kana hawokimane fundo. Ekundji k’atala ka paonyi ka lo luudu la dipɛma ekɔ didjidji di’osase wele l’Akristo w’akitami. Olimu wakamba nyuma ka Nzambi, wate kana esɔ ka l’atala, ngamulaka osase lo Bible. Ewo kakondja Akristo oma lo dikambo sɔ, vɔ hawoyaombɛtɔ vamɛ. Koko vɔ ndjelaka dui dia Yeso lakate ate: ‘Osase w’andja mbenyu. . . . Osase anyu wahɛtɛ la ntondo k’anto, kele wɛnyi etsha anyu w’ɛlɔlɔ ndo watombole Shɛnyu lele l’olongo.’—Mateu 5:14, 16.
15 Dia vɔ tshikalaka l’osase ɔsɔ, Akristo w’akitami pombaka ndɛka lo dihole diakɛnyamaka lo didjidji oma lo mapa wa lo mɛsa wa mapa wa lɛɛnya. Kiɔkɔ ya ntondo yakondjawɔ mma dia lo nyuma ele Dui dia Nzambi diayatshutshuyawɔ dia mbala ndo kana ladiɔ yimba lushi tshɛ. Yeso akalake nto dia mbashaka “mbu ya nde lu tena diayo” lo tshimbo ya “[ɔhɔmbɔ wa kɔlamelo ndo wa kɛsɔ, NW].” (Mateu 24:45) “Ɔhɔmbɔ” ɔsɔ kɛdikɛdi olui w’Akristo tshɛ w’akitami wele lanɛ la nkɛtɛ lo etena kakɔna tshɛ. Kristo ekɔ lo kamba l’olui ɔsɔ w’akitami dia mbewoyaka awui w’endana l’ekotshamelo ka pɔlɔfɛsi ya lo Bible ndo dia mbisha alako wa lo tena diasungana wɛnya woho wakoka onto kamba l’awui wa lo Bible lo lɔsɛnɔ la nshi nyɛ la lushi la lushi. Ɔnkɔnɛ, Akristo w’akitami wekɔ lo ndɛ diangɔ sɔ tshɛ dia lo nyuma la lowando. Koko dia vɔ sukɛ nsɛnɔ yawɔ ya lo nyuma, vɔ hawohombe mbidja ewo ka Nzambi lo timba la l’etema awɔ oto ko pe. Yeso akate ate: “Ma diami, dieli ntsha lulangu la one lakantumi, la dia nshidiya ulimu andi.” (Joani 4:34) Woho akɔ wâmɛ mbôka ndo Akristo w’akitami ɔlɔ lo ndjatshutshuyaka lushi tshɛ dia sala lolango la Nzambi lakashile mɛnama.
16 La pindju ndo la dikɔlɔ, ɔlɔmbɛdi ɔmɔtshi akatshumbɛka Nzambi tshɔ lo elambwelo ka tshɔ lo Dihole di’Ekila. L’etena kakɔ kâmɛ, atɛmɔdi akina wele bu ɛlɔmbɛdi wakalɔmbaka Nzambi wonya wakawemalaka lo asɛkɛ wa l’andja ka tɛmpɛlɔ. (Luka 1:8-10) Bible nembetshiyaka ɔnɛ: ‘Tshɔ kɛdikɛdi alɔmbɛlɔ w’ekilami.’ (Enyelo 5:8) Davidi, omembi w’esambu, akafunde ate: “Dɔmbɛlɔ diami dialɔngɔswame oko tshɔ la ntondo kayɛ.” (Osambu 141:2, NW) Ndo Akristo w’akitami mbɔ̂sa diɛsɛ diawɔ dia sawolaka la Jehowa lo dɔmbɛlɔ lo tshimbo ya Yeso Kristo la nɛmɔ efula. Alɔmbɛlɔ w’ɛlɔlɔ w’oma k’ɛse otema wekɔ oko tshɔ yele l’opumu wa dimɛna efula. Akristo w’akitami tombolaka Nzambi ndo lo weoho ekina, lam’akambawɔ l’ɛlɔmɔ awɔ dia ndakanya anto akina. Etetemalo kawɔ la ntondo k’asui ndo kɔlamelo yawɔ l’atei w’ehemba ngɛnyangɛnyaka Nzambi mɛtɛ.—1 Petero 2:20, 21.
17 Lushi l’Ekesanelo, ɔlɔmbɛdi wa lâdiko wa l’Isariyɛlɛ akahombaka mbɔtɔ lo Dihole Dioleki Ekila ko totshumba tshɔ lo dɔnga dimɔtshi dia paonyi diele l’akalanga wa dja. Dui sɔ diakahombaka salema la ntondo ka nde mbela dikila di’elambo wa pɛkato. Dia kotsha didjidji sɔ dia pɔlɔfɛsi, onto lakawelɛka Yeso akalame kɔlamelo yande tshɛ le Jehowa Nzambi la ntondo ka nde ndjolambola lɔsɛnɔ lande oko olambo wa komelo lo dikambo dia pɛkato yaso. Lo yoho shɔ mbakandɛnya ɔnɛ onto la kokele otokoka nama kɔlamelo yande le Nzambi oyadi ehemba kana ɛhɛnyɔhɛnyɔ akɔna tshɛ wakawêla Satana. (Tukedi 27:11) Lam’akandahembama, Yeso akakambe la dɔmbɛlɔ ‘la delo dia wolo ndo l’asɔi lo asho, ko dɔmbɛlɔ diande diakokɛma dikambo nde akokaka Nzambi wɔma.’ (Heberu 5:7) Lo yoho shɔ mbakandatombola Jehowa oko Omboledi w’andja w’otondo wakoka ndo wasungana. Nzambi akafute Yeso lo mbôlola oma lo nyɔi otsha lo lɔsɛnɔ laha la komelo l’olongo. Lam’ende lo dihole sɔ dia lâdiko, Yeso ekɔ lo mbidja yimba lo ɔkɔkɔ wa hende wakandaye la nkɛtɛ, ɔkɔkɔ akɔ ko: mbokanya akanga a pɛkato wele la ndjatshumuya vɔ la Nzambi.—Heberu 4:14-16.
Lotombo Loleki Woke la lo Tɛmpɛlɔ ka Nzambi ka lo Nyuma
18 Jehowa akalake ɔnɛ: “Lutumbu la l’okongo la luudu lone layuleka la ntundu wuki.” (Hangai 2:9) Lam’akandolola Yeso oko Nkumekanga kahavɔkaki pondjo ndo oko Ɔlɔmbɛdi wa Lâdiko, Jehowa akela lotombo la mamba lo tɛmpɛlɔ kande ka lo nyuma. Kakianɛ, Yeso ekɔ l’akoka wa mbisha “panda ka pundju le wane tshe watûkitanyiaka.” (Heberu 5:9) Anto wa ntondo wakayala l’okitanyiya ɔsɔ ele ambeki 120 wakalongola nyuma k’ekila lo Pɛntɛkɔsta ka l’ɔnɔnyi 33 T.D. Dibuku di’Enyelo diakate ɔnɛ lofulo l’ana asɔ wa l’Isariyɛlɛ wa lo nyuma pombaka monga tshɛtshɛ 144 000. (Enyelo 7:4) L’ɔkɔngɔ wa nyɔi, efula ka l’atei awɔ wakahombe ndala lo diombo di’anto tshɛ aha la mbeya ndoko dui ko kongɛka etena kayonga Yeso Nkumekanga. Tena diakatama lo pɔlɔfɛsi ka lo Danyele 4:10-17, 20-27 mɛnyaka ɔnɛ ɔnɔnyi wa 1914 mbele etena kakahombe Yeso tatɛ mbolɛ l’atei w’atunyi ande. (Osambu 110:2) Ɛnɔnyi akumi amɔtshi la ntondo, Akristo w’akitami wakakongɛka ɔnɔnyi ɔsɔ l’asolo walomɔlomɔ. Ta dia ntondo di’andja w’otondo la fɔnu yakayoyaka le anto l’ɔkɔngɔ wa ta diakɔ akɛnyaka ɔnɛ Yeso mɛtɛ akahema l’okudi oko Nkumekanga lo 1914. (Mateu 24:3, 7, 8) Yema l’ɔkɔngɔ wa dikambo sɔ, lam’akakoke etena ka ‘elombwelo tatɛ lo luudu la Nzambi,’ Yeso akahombe ndjokotsha daka diakandalake ambeki ande w’akitami wakalale djɔ lo nyɔi ɔnɛ: “Dimi layukalula la ndjunyulungula.”—1 Petero 4:17; Joani 14:3.
19 Aha anto tshɛ wa l’atei w’ɛlɔmbɛdi w’ekila 144 000 mbambodjama djembetelo ya komelo ndo mbambotshumanyema lo luudu lawɔ la l’olongo. Atshikadi wa l’atei awɔ wêke la lɔsɛnɔ lanɛ la nkɛtɛ lo eongelo ka lo nyuma kɛnyama lo didjidji oma lo Dihole di’Ekila, mangana la Nzambi k’ekila kele la wedi wa ‘dihɔndɔ di’okombɔ,’ kana lokombo lele alemba awɔ wa l’emunyi. Etena kavɔ anto asɔ la kɔlamelo tshɛ, vɔ mbolwamaka mbala kakɔ ɔtɔi oko ditongami dia lo nyuma diahavɔkaki pondjo dia tosangana kâmɛ la wanɛ wele l’atei wa 144 000 wambôshilaka koma l’olongo.—1 Koreto 15:51-53.
20 Lam’ele ɛlɔmbɛdi efula wekɔ lo kamba kâmɛ l’Ɔlɔmbɛdi wa Lâdiko ndo wa woke l’olongo, tɛmpɛlɔ ka Nzambi ka lo nyuma kambonyomokondja lotombo efula. L’etena kɛnɛ, atshikadi w’ɛlɔmbɛdi w’ekila wekɔ lo sala olimu w’ohomba efula la nkɛtɛ. Lo tshimbo y’esambishelo kawɔ, Nzambi ekɔ lo ‘sutshasutsha wedja tshɛ’ la ekotshamelo ka tɛdikɔ takandɔshi, oko akatama lo Hangai 2:7. L’etena kakɔ kâmɛ, miliyɔ y’atɛmɔdi wa Nzambi wolembetshiyami oko “diango di’ushinga a wulu dia wedja” wekɔ lo pongomɔ oya lo asɛkɛ wa la nkɛtɛ wa lo tɛmpɛlɔ ka Jehowa. Naa dihole diele l’anto asɔ l’atei w’ɔlɔngɔswamelo w’ɔtɛmwɛlɔ wa Nzambi, ndo lotombo lakɔna layaye lakokaso nongamɛ lo dikambo dia tɛmpɛlɔ kande ka woke ka lo nyuma na? Tayokadimola wembola ɛsɔ lo sawo diayela.
[Study Questions]
1. Naa yɛdikɔ yoludi la ngandji yakɔshi Nzambi lo dikambo di’akanga a pɛkato?
2. Yeso akandasale lam’akinde l’ɛnɔnyi suke la 30, ndo lande na?
3. (a) Yeso akandalange nembetshiya lam’akandate ate: “We kunanga elambu la eshasha”? (b) Naa ɛnyɛlɔ ka mamba kakatshikɛ Yeso wanɛ tshɛ walanga monga ambeki ande?
4. Ngande wakɛnya Nzambi ɔnɛ nde ambetawɔ woho wamboyakimɔ Yeso ndamɛ oko olambo?
5. Elambwelo ka lo tɛmpɛlɔ ka mɛtɛ mɛtɛ aki didjidji dia na?
6. (a) Dikambo diakɔna di’ohomba efula diakasalema lam’akabatizama Yeso? (b) Tshɛkɛta Mɛsiya kana Kristo alembetshiyayɔ?
7. (a) Etena kakɔna kakakite Nzambi “Dihole Dioleki Ekila” nyuma k’ekila, ndo dui sɔ akadialembetshiyaka? (b) Dui diakɔna nto diakakomɛ Yeso wonya wakandabatizamaka?
8. Akambo akɔna w’eyoyo wakayala la kiti ka Nzambi ka l’olongo?
9. (a) Dihɔndɔ diakakakitolaka Dihole di’Ekila la Dihole Dioleki Ekila diaki didjidji dia na? (b) Ngande wakalekana Yeso dihɔndɔ di’okombɔ dia lo tɛmpɛlɔ ka Nzambi ka lo nyuma?
10. (a) Kakɔna kakasalema l’ɔkɔngɔ wa Yeso kimɔ nɛmɔ di’olambo ande le She lele l’olongo? (b) Okitamelo wa nyuma k’ekila akawalembetshiyaka le ambeki wa Kristo?
11, 12. (a) Sɛkɛ di’ɛlɔmbɛdi aki didjidji dia na lo dikambo dia Yeso, ndo lo dikambo di’ambeki ande w’akitami? (b) Dɔnga di’ashi ekɔ didjidji dia na, ndo ngande wakambawɔ ladiɔ olimu?
13, 14. (a) Dihole di’Ekila dia lo tɛmpɛlɔ ekɔ didjidji dia na lo dikambo dia Yeso la ambeki ande w’akitami? (b) Ekundji k’atala ka paonyi ekɔ didjidji dia na?
15. Mapa wa lo mɛsa wa mapa wa lɛɛnya ekɔ didjidji dia na?
16. Olimu wakawasalaka lo mɛsa walambolawɔ tshɔ ekɔ didjidji dia na?
17. Awui akɔna wakendanaka l’ekotshamelo ka pɔlɔfɛsi kakɛnyamaka lo wɔtwɛlɔ wa ntondo w’ɔlɔmbɛdi wa lâdiko lo Dihole Dioleki Ekila Lushi l’Ekesanelo?
18. Ngande wakela Jehowa lotombo la mamba lo tɛmpɛlɔ kande ka lo nyuma?
19. Ngande wayɔtɔ atshikadi wa 144 000 lo Dihole Dioleki Ekila dia l’olongo?
20. Naa olimu w’ohomba efula wasala atshikadi w’ɛlɔmbɛdi w’ekila etena kɛnɛ, ndo etombelo akɔna wamboyala oma lɔkɔ?
[Caption]
[Wembola]
[Caption on page 24]
[Diombwɛlo di’osato wa lo lɛkɛ 24]
Lam’akakitama Yeso nyuma k’ekila lo 29 T.D., tɛmpɛlɔ ka woke ka lo nyuma kaki Nzambi kakamɛ kamba olimu
[Caption on page 25]
Wembola w’Ovuswelo
◻ Naa ɛnyɛlɔ ka mamba kakatotshikɛ Yeso l’ɔnɔnyi 29 T.D.?
◻ Ɔlɔngɔswamelo akɔna wakatatɛ kamba olimu l’ɔnɔnyi 29 T.D.?
◻ Dihole di’Ekila la Dioleki Ekila ekɔ didjidji dia na?
◻ Ngande wambotombwama tɛmpɛlɔ ka woke ka lo nyuma?