Toyelake Ɛlɛmbɛ Wa Kristo
“Nyembaneli wetshu anyu, dia nyu nshidiya elembe wa Kristu.”—NGALATIYA 6:2.
LO RWANDA, Ɛmɛnyi wa Jehowa wele wa Hutu la wa Tutsi wakadje nsɛnɔ yawɔ lo wâle di’onto l’onto kokɛ onyande oma l’odiakanelo wa l’asa dibila woshidi anto oshiki lo wodja ɔsɔ atete ndoko edja. Ɛmɛnyi wa Jehowa wa l’osomba wa Kobe, lo wodja wa Japon, wanɛ wakavusha ase nkumbo yawɔ lo didimu dia nkɛtɛ diakalanya diangɔ efula ndo diakayake anto efula waki la kandji l’asolo l’ɔtɛ w’oshishelo ɔsɔ. Koko, vɔ wakonɛ esadi eto dia tokimanyiya akina wakôkala wâle la didimu sɔ dia nkɛtɛ. Eelo, diɛnyɛlɔ di’ɔlɔ efula di’oma l’andja w’otondo mɛnyaka ɔnɛ ɛlɛmbɛ wa Kristo wekɔ lo sala olimu ɛlɔ kɛnɛ. Vɔ wekɔ la nkudu ka mamba katshutshuya anto dia vɔ sala kɛnɛ kele ɔlɔlɔ.
2 L’etena kakɔ kâmɛ kɛnɛ, pɔlɔfɛsi ya lo Bible yata dikambo dia “nshi y’ekumelu” yekɔ lo takotshama. Anto efula wekɔ la ‘efanelo k’anto wamamema Nzambi’ koko ‘mangunaka nkudu k’omamemelo akɔ.’ (2 Timote 3:1, 5) Djekoleko lo Lokristokristo, ɔtɛmwɛlɔ mongaka mbala efula oko tshapa tsho, koko aha dui di’oma ka tshina di’otema. Onde vɔ salaka ngasɔ l’ɔtɛ w’ɔnɛ ekɔ wolo efula di’onto ndjela ɛlɛmbɛ wa Kristo? Kema. Yeso totondokoka tosha ɛlɛmbɛ wahatakoke ndjela. Lɔ kondjela ɛtɛkɛta ɛnɛ wakasambiyama oma le Nzambi: “Nyembaneli wetshu anyu, dia nyu nshidiya elembe wa Kristu.” (Ngalatiya 6:2) Sho ‘kotshaka ɛlɛmbɛ wa Kristo’ lam’ɛmbanɛso wetsho aso, koko aha lo mbokoya Afarisɛ ndo lo mbahɛka anangɛso eshikɔ wa wahahɛ.
3 Adjango tshɛ wa Kristo Yeso wekɔ l’atei w’ɛlɛmbɛ wa Kristo—oyadi didjango dia sambisha ndo mbetsha anto, nama sso diaso pudipudi ndo ɔlɔlɔ, mona dia mbidja wɔladi l’asaso la onyaso onto, kana minya mindo oma l’etshumanelo. (Mateu 5:27-30; 18:15-17; 28:19, 20; Enyelo 2:14-16) Mɛtɛ, Akristo wekɔ l’ɔkɛndɛ wa kitanyiya adjango tshɛ wa lo Bible wakawadjɛ wanɛ watayele Kristo. Koko aha lâsɔ ato mbokome dikambo. Ɔlɔngɔswamelo wa Jehowa, ndo etshumanelo tshɛ, pombaka mbidja adjango amɔtshi wahombama ndo kongɛ weoho ɛmɔtshi wa mbidjaka awui l’ɔnɔngɔ dia mbewɔ ofukutanu. (1 Koreto 14:33, 40) Akristo hawokoke sangana kâmɛ naka ndoko ɛlɛmbɛ washikikɛ etena, dihole ndo woho wahomba losanganya salema! (Heberu 10:24, 25) Kamba kâmɛ l’adjango w’ɛlɔlɔ wakadje wanɛ wele la lowandji l’atei w’ɔlɔngɔswamelo ekɔ nto yoho mɔtshi yakokaso kotsha ɛlɛmbɛ wa Kristo.—Heberu 13:17.
4 Koko, Akristo wa mɛtɛ hawotshike di’ɔtɛmwɛlɔ awɔ ndjâla oko dikongɛ dimɔtshi di’ɛlɛmbɛ di’anyanya. Vɔ hawokambɛ Jehowa paka l’ɔtɛ w’ɔnɛ onto ɔmɔtshi kana ɔlɔngɔswamelo ɔmɔtshi mbatɛka dia vɔ sala ngasɔ. Koko, ngandji mbâtshutshuya dia vɔ tɛmɔla Nzambi. Paulo akafunde ate: ‘Ngandji ka Kristo ntɔhɛhiyaka.’ (2 Koreto 5:14) Yeso akadjangɛ ambeki ande dia vɔ mbokana ngandji. (Joani 15:12, 13) Ngandji k’aha la nyanga wahɔ ayɛ wɛmɛ koko w’akina mbele etshina k’ɛlɛmbɛ wa Kristo, ndo tɔ mpɛhiyaka kana tshutshuyaka Akristo wa mɛtɛ lo dihole diakɔna tshɛ diewɔ, oyadi lo nkumbo kana l’etshumanelo. Ɛsɔ tênde nganɛ wasalema dui sɔ.
L’Atei a Nkumbo
5 Ɔpɔstɔlɔ Paulo akafunde ate: “Nyu waumi, nyulangi wadienyu, uku akalangi Kristu ekelizia, akandayakimo dikambu diato.” (Efeso 5:25) Etena kokoya omi Kristo, kokande wadiɛnde ngandji ndo kayadjande lo dihole diande, nde kotshaka dui di’ohomba dia l’ɛlɛmbɛ wa Kristo. Lâdiko dia lâsɔ, Yeso akɛnya ngandji kakandokaka ana w’akɛnda lo sɛkɛ, nde akawaɛmbɛ l’anya, akawâhɛ anya ndo akâtshɔkɔla. (Mako 10:16) Ambutshi wakotsha ɛlɛmbɛ wa Kristo ndo vɔ lawɔ mɛnyaka ngandji kokawɔ anawɔ. Mɛtɛ, ambutshi amɔtshi mbokaka wolo mbokoya ɛnyɛlɔ ka Yeso lo dikambo sɔ. Amɔtshi kombekɛ kɛnɛmɔla asolo awɔ. Nyu ambutshi, tanyotshikake tokanyi ta ngasɔ nyoshimba nyu mɛnya ananyu ngandji kawaokanyu! Aha wɛ mbeya tsho ɔnɛ lekɔ lo mboka anami ngandji kete lâsɔ ambokoka. Vɔ pombaka mbeya dui sɔ ndo vɔ lawɔ. Ndo vɔ hawotodieya naka wɛ hasadi woho wa mbaɛnya ngandji kawaokayɛ.—Ɛdika la Mako 1:11.
6 Koko, ana wekɔ l’ohomba w’ɛlɛmbɛ, kɛsɔ mɛnyaka ɔnɛ ambutshi awɔ pombaka mbidja adjango ndo keketshaka adjango akɔ asɔ mbala mɔtshi oma lo ohokwelo. (Heberu 12:7, 9, 11) Koyanga mbediɔ ngasɔ, ana pombaka kimanyiyamaka yema yema dia mɛna ɔnɛ ambutshi wekɔ lo mbidja ɛlɛmbɛ ɛsɔ nɛ dia vɔ mbaokaka ngandji. Ndo vɔ pombaka mbeya ɔnɛ ngandji mbele ɔkɔkɔ woleki ɔlɔlɔ wâtshutshuya dia vɔ monga l’okitanyiya le ambutshi awɔ. (Efeso 6:1; Kolosai 3:20; 1 Joani 5:3) Oyango w’ombutshi wele la shɛnɔdi ele mbetsha ana dia vɔ kamba la ‘yimba’ yawɔ ɔnɛ kele l’ɔkɔngɔ diko, kawoyɔsake tɛdikɔ t’ɛlɔlɔ l’akambo awɔ vamɛ. (Romo 12:1; ɛdika la 1 Koreto 13:11.) Lo wedi okina, ɛlɛmbɛ hawohombe tɛkɔnya efula kana ohokwelo monga wolo efula. Paulo ekɔ lo mbuta ate: ‘Nyu ambutshi w’apami, tanyokiyake ananyu nkɛlɛ di’aha vɔ ndjɔkɔmɔ etema.’ (Kolosai 3:21; Efeso 6:4) Naka ɛlɛmbɛ wa Kristo wekɔ lo dihole dia ntondo lo nkumbo k’otondo, kete ndoko ohokwelo wayoshamaka la nkɛlɛ ka tshambandeko kana la ntɛngɔ ya kandji. Lo nkumbo ka ngasɔ, ana ndjaokaka dia wekɔ lo lotui tshitshi ndo wekɔ lo keketshama, vɔ hawoyaoke oko wanɛ wɛ̂na pâ la wetsho kana wɔnywama.—Ɛdika l’Osambu 36:7.
7 Amɔtshi wambotshɔka dia tênda Bɛtɛlɛ ya l’andja w’otondo mbutaka ɔnɛ ahole wa ngasɔ wekɔ diɛnyɛlɔ di’ɛlɔlɔ diɛnya woho wahomba ɛlɛmbɛ mbidjamaka lo nkumbo aha lo yoho yambɔtɛkɔya. Kânga mbele Bɛtɛlɛ ndola l’epalanga w’anto, atshunda wa ngasɔ kɛndakɛndaka oko nkumbo.a Elimu wasalema lo Bɛtɛlɛ wekɔ weoho efula ndo nɔmbaka ɛlɛmbɛ efula mɛtɛ ndeka ndo wɛnɛ wahombama lo nkumbo. Koko, dikumanyi dialɔmbɔla lo mvudu, lo bilɔ, la lo taandjo ta Bɛtɛlɛ, ndjatshutshuyaka dia ndjela ɛlɛmbɛ wa Kristo. Vɔ hawɛnyi ɔnɛ ɔkɛndɛ awɔ ele paka dia nɔngɔsɔla elimu eto ko pe, koko vɔ keketshaka ndo ehamelo ka lo nyuma la “ɔngɛnɔngɛnɔ wa Jehowa” l’atei w’anyawɔ akambi. (Nehemiya 8:10, NW) Diɔ diakɔ diayatshutshuyawɔ dia salaka akambo lo yoho yasungana ndo yakeketsha anyawɔ, ndo vɔ salaka tshɛ dia salaka akambo lo yoho yakoka. (Efeso 4:31, 32) Lâsɔ mɛtɛ, hatokoke mamba lo mboka ɔnɛ nkumbo ya Bɛtɛtɛ mbeyamaka efula lo yimba y’ɔngɛnɔngɛnɔ yele lɔkɔ!
L’Atei w’Etshumanelo
8 Ndo l’atei w’etshumanelo oyango aso ele dia keketshana onto la onyande lo yimba ya ngandji. (1 Tesalonika 5:11) Ɔnkɔnɛ, Akristo tshɛ pombaka ndjalama ɔlɔlɔ di’aha mbahɛ anyawɔ wetsho lo mbafundɛka tokanyi tawɔ hita lo akambo wahomba onto ndamɛ mbɔsa tɛdikɔ. Tena dimɔtshi, amɔtshi fundɛka la Société Watch Tower mikanda dia mbɔlɔmba tɛdikɔ tɔmɔtshi lo awui wele oko kanyi yahomba monga lawɔ lo dikambo dia wa filmɛ mɔtshi, di’abuku amɔtshi, ndo kânga dia diangɔ dimɔtshi diakɛnya l’ana w’akɛnda. Koko, la Société bu la dikimɔ dia sɛdingola diangɔ dia ngasɔ ko mbɔsa tɛdikɔ tɔmɔtshi lo kɛnɛ k’endana ladiɔ. Tena efula, ɔsɔ ekɔ awui wahomba onto ndamɛ kana ɔtɛ a nkumbo mbɔsa tɛdikɔ, tɛdikɔ totumbi oma lo ngandji kokande awui wa lo Bible. Amɔtshi wekɔ la mbekelo ka mbɔsa tokanyi tasha la Société la alako amɔtshi ko vɔ mbakadimola oko ɛlɛmbɛ. Oko ɛnyɛlɔ, lo Tshoto y’Etangelo y’Asase a Ndjoko 15, 1996 (lo Falase), wakatondja sawo dimɔtshi dia dimɛna efula diakeketsha dikumanyi dia vɔ mendaka ɛkɔkɔ wa l’etshumanelo mbala la mbala. Onde sawo sɔ diaki l’oyango wa mbidja ɛlɛmbɛ ɛmɔtshi? Kema. Kânga mbele wanɛ wakoka ndjela alako asɔ kondjaka ɛlɔlɔ efula, dikumanyi dimɔtshi bu l’akoka wa sala dui sɔ. Lo yoho yakɔ yâmɛ, sawo dia “Wembola w’Oma le Ambadi” diakatombe lo Tshoto y’Etangelo ya Mɔmbi 1, 1995 (lo Falase), diakatɔhɛmɔla di’aha sho kitshakitsha nɛmɔ di’etena ka batismu lo ntsha awui wa tshambandeko, ɛnyɛlɔ oko lo sala alambo wambotamba olelo kana weoho ɛmɔtshi wa sɛlɛmɔnyi. Amɔtshi wakɔshi dako sɔ di’oshika ko vɔ dinanula polo ndo lo yɛdikɔ yambotamba olelo, wakadje ndo ɔlɛmbɛ ɔnɛ ekɔ kɔlɔ tomanɛ mukanda w’ekeketshelo l’etena ka ngasɔ!
9 Tôhɔ nto ɔnɛ, naka sho nangaka “ɛlɛmbɛ wa kokele wele wa lotshungɔ” monga lo dihole dia ntondo l’atei aso, kete sho pombaka mbetawɔ ɔnɛ nkum’otema y’Akristo tshɛ bu woho ɔtɔi. (Jakoba 1:25) Onde sho pombaka mboka nkɛlɛ naka anto wambɔsɔnɔla awui awɔ vamɛ wahɔnyɔla kɛnɛ kata Afundelo? Kema. Naka tambosala ɔsɔku, kete todja diatɔnelo. (1 Koreto 1:10) Lam’akandatolakaka di’aha sho nomboyaka onyaso Okristo, Paulo akate ate: “Kuyanga ndi kemadi, kuyanga ndi kokwe, oso eli dikambu dia uwandji andi. Mete ndi ayemala, ne dia [Jehowa] la wulu wa mbemadia.” (Romo 14:4) Sho kokaka ndjonyangiya Nzambi naka sho tɛkɛtaka kɔlɔ lo lokombo la onyaso lo dikambo di’awui w’endana la nkum’otema k’onto ndamɛ.—Jakoba 4:10-12.
10 Tôhɔ nto ɔnɛ dikumanyi diekɔ l’ɔkɛndɛ wa nama lemba l’ɛkɔkɔ wa Nzambi. (Etsha 20:28) Vɔ wekɔ dia tokimanyiyaka. Hatohombe mengenga dia ntshɔ le wɔ dia tâlɔmba alako, nɛ dia vɔ wekɔ ambeki wa Bible ndo wambohotɔ awui wofundami l’ekanda waki la Société Watch Tower. Etena kɛna dikumanyi dionga diakoka konya onto lo nde mɔnyɔla awui w’Afundelo, vɔ mboshaka alako wahombama aha la mboka wɔma. (Ngalatiya 6:1) Ase etshumanelo ndjelaka ɛlɛmbɛ wa Kristo lam’akambawɔ kâmɛ l’elami ɛsɔ w’ɛkɔkɔ walangawɔ efula, wanɛ walɔmbɔla l’atei awɔ.—Heberu 13:7.
Dikumanyi Kitanyiyaka Ɛlɛmbɛ wa Kristo
11 Dikumanyi diekɔ la mposa k’efula ka kotsha ɛlɛmbɛ wa Kristo l’atei w’etshumanelo. Vɔ mɛnyaka anto akina mboka l’olimu w’esambishelo ka lokumu l’ɔlɔlɔ, vɔ ndakanyaka awui w’oma lo Bible dia munanda etema w’anto ndo, oko wewɔ elami woludi la ngandji ndo la lɔsɛngɔ, vɔ tɛkɛtaka la ‘wanɛ wambɔkɔmɔ etema.’ (1 Tesalonika 5:14) Vɔ mbewɔka waonga wahasungana le Okristo watanema l’atei w’ɛtɛmwɛlɔ efula wa Lokristokristo. Mɛtɛ, andja ɔnɛ wekɔ lo talana esadi esadi, ndo dikumanyi mbeyaka monga la lonyangu l’efula lo dikambo di’ɛkɔkɔ oko akayala la Paulo; koko vɔ hawosale awui wa tshambandeko la ntondo k’ekiyanu ɛsɔ.—2 Koreto 11:28.
12 Oko ɛnyɛlɔ, Okristo ɔmɔtshi mbeyaka monga la saki ka tɔlɔmba ekumanyi kɛmɔtshi kanyi lo dikambo di’ohomba diahalembetshiyami l’Afundelo kana dialɔmba dia mbɛdika awui wotshikitanyi w’Akristo. Ondo l’olimu wakambande, wambôlaka dia mbosha dihole dia woke diele la difuto di’efula koko l’ɔkɛndɛ woleki woke. Kana, ombutshi a pami wele bu ombetawudi mbeyaka nɔmba ɔnande la pami lele Okristo dui dimɔtshi diakoka monga la shɛngiya l’olimu ande w’Okristo. L’akambo wa ngasɔ, ekumanyi kakɔ ayoyakimɛ di’aha mbisha tokanyi tande hita. Koko, nde ayokoka mbufola Bible ndo kimanyiya onto akɔ dia nde kana lomba lo ndjela awui w’endana la dikambo sɔ. Nde mbeyaka kamba la Index des publications de la Société Watch Tower, naka wekɔ, dia nde mɛna kɛnɛ kakate “ɔhɔmbɔ wa kɔlamelo ndo wa kɛsɔ” lo dikambo diakɔ l’atei wa Tshoto y’Etangelo ndo l’ekanda ekina. (Mateo 25:45, NW) Ko ahomba salema naka l’ɔkɔngɔ diko ko Okristo akɔ amboyɔsa yɛdikɔ mɔtshi yele ondo ekumanyi kakɔ hayiɛnyi ɔlɔlɔ na? Naka yɛdikɔ yakɔ hayɔnyɔla awui kana ɛlɛmbɛ wa lo Bible mbala kakɔ ɔtɔi, kete Okristo akɔ ayɛna ɔnɛ ekumanyi kakɔ nɛmiyaka lotshungɔ l’onto ndamɛ la mbɔsa tɛdikɔ ta ngasɔ, êya ate “untu l’untu ayemba wutshu andi ndame.” Koko, Okristo akɔ pombaka mbohɔka ɔnɛ “untu tshe ayuna diango diakandune.”—Ngalatiya 6:5, 7.
13 Lande na katosalaka dikumanyi diahotɔ akambo yoho shɔ na? Ɛkɔkɔ ɛmɔtshi ehende wâtshutshuya dia vɔ sala ngasɔ wekɔ. Ntondotondo, Paulo akatɛ etshumanelo kɛmɔtshi ɔnɛ nde bu ‘owandji lâdiko dia mbetawɔ kawɔ.’ (2 Koreto 1:24) Wonya wakimanyiyande ɔnango dia nde kana l’Afundelo lomba ndo dia nde ndamɛ mbɔsa yɛdikɔ oma l’ewo kande, ekumanyi ekɔ lo mbokoya dionga dia Paulo. Nde mbeyaka ɔnɛ lowandji lande lekɔ l’elelo, oko wakeyaka Yeso ɔnɛ lowandji lande laki l’elelo. (Luka 12:13, 14; Jude 9) Koko, dikumanyi mbishaka anto alako w’ɛlɔlɔ l’otema ɔtɔi, alako wa wolo ndo wotumbi oma l’Afundelo, l’etena kahombama. Ɔkɔkɔ wa hende ele, ekumanyi ekɔ lo ndowanya onyande Okristo. Ɔpɔstɔlɔ Paulo akate ate: “Mbu ya nde ya wulu ndjalaka ne dia etshundju w’antu, wane wambekela, la wambuyala la tumba ta ntshikitanya ololo la kolo.” (Heberu 5:14) Ɔnkɔnɛ, dia sho koma etshundju w’antu, sho pombaka kamba la yimba yaso, aha mendɛka nshi tshɛ di’onto ɔmɔtshi tɛnya kɛnɛ kahombaso sala. Lam’ɛnyande onyande Okristo woho wa nde kana l’Afundelo lomba, lo yoho shɔ ekumanyi ekɔ lo mbokimanyiya dia nde pama.
14 Sho kokaka monga la mbetawɔ ɔnɛ Jehowa Nzambi, oma lo nyuma kande k’ekila, ayɔsɛngiya etema w’atɛmɔdi wa mɛtɛ. Diɔ diakɔ diele Akristo wambotshunda wɔɔngɔ munandaka etema w’anangɛwɔ, mbasɛngasɛngaka ndo mbasɛngasɛnga oko akasalaka ɔpɔstɔlɔ Paulo. (2 Koreto 8:8; 10:1; Filemona 8, 9) Paulo akeyaka ɔnɛ anto wa kɔlɔ, koko aha anto w’ɛlɔlɔ, mbaleka monga l’ohomba w’ɛlɛmbɛ efula dia mbalamaka lo mboka k’ɔlɔlɔ. (1 Timote 1:9) Nde aki la mbetawɔ le anango, koko nde kombakanɛka kɔlɔ kana mbaewewɔ. Nde akafundɛ etshumanelo kɛmɔtshi ate: “Shu teko la elungamelu le Khumadiondjo dikambu dianyu.” (2 Tesalonika 3:4) Mɛtɛ, mbetawɔ ka Paulo, wɛkamu ande, ndo woho wakandɛkɛka otema le wɔ aki la shɛngiya y’efula le Akristo asɔ. Ɛlɔ kɛnɛ, dikumanyi la emendji wêteta wekɔ l’eyango a woho ɔsɔ. Apami asɔ wa kɔlamelo mɛtɛ wekɔ tshondo y’ekeketshelo le anyawɔ, lam’alamawɔ lemba l’ɛkɔkɔ wa Nzambi la ngandji!—Isaya 32:1, 2.
Toyelake Ɛlɛmbɛ wa Kristo
15 Sho tshɛ tekɔ l’ohomba wa ndjaendaka ɔlɔlɔ mbala la mbala dia mɛna kana tekɔ lo ndjela ndo tekɔ lo keketsha ɛlɛmbɛ wa Kristo. (2 Koreto 13:5) Mɛtɛ, sho tshɛ kokaka kimanyiyama naka sho ndjambola ɔnɛ: ‘Onde dimi keketshaka anyami kana mbaɔnyɔlaka? Onde dimi salaka awui lo yoho yakoka kana ya tshambandeko? Onde dimi kanɛka anto akina kana kɔkɔmalaka paka l’akambo wemi la lotshungɔ la sala?’ Okristo hayange dia mbidjangɛ ɔnango kɛnɛ kahombande kana kahandahombe sala lo akambo wahalembetshiyami hwe lo Bible.—Romo 12:1; 1 Koreto 4:6.
16 Lo tena dia pâ nɛ, ekɔ ohomba sho nyangaka woho wa keketshanaka onto la onyande. (Heberu 10:24, 25; ɛdika la Mateu 7:1-5.) Lam’endaso anangɛso la akadiyɛso, onde sho mbɔsaka waonga awɔ w’ɛlɔlɔ la nɛmɔ efula oleki dikɔmɔ diawɔ? Lo asho wa Jehowa, onto tshɛ ekɔ ohomba. Lonyangu ko, aha anto tshɛ mbakanyiya ngasɔ, kânga lo dikambo diawɔ vamɛ. Amɔtshi wekɔ la mbekelo ka mɛnaka paka munga yawɔ tsho la dikɔmɔ diawɔ to. Dia sho keketsha anto wa ngasɔ—ndo akina—onde hatokoke sawola l’onto ɔtɔi kana l’anto ahende lo losanganya tshɛ, ko mbaɛnya bonde kɔsaso wôngelo awɔ lo losanganya la nɛmɔ ndo ohomba wewɔ l’atei w’etshumanelo? Ande ɔlɔ dia mbawâmuya wotsho lo yoho shɔ ndo kotsha ɛlɛmbɛ wa Kristo lee!—Ngalatiya 6:2.
Ɛlɛmbɛ wa Kristo Wekɔ lo Sala Olimu!
17 Ɛlɛmbɛ wa Kristo wekɔ lo sala olimu l’atei w’etshumanelo k’Akristo. Tekɔ lo mɛna dui sɔ lushi la lushi—lam’atasambisha anyaso Ɛmɛnyi wa Jehowa lokumu l’ɔlɔlɔ l’ohetoheto tshɛ, lam’asambanawɔ ndo wakeketshanawɔ onto la onyande, lam’asalawɔ tshɛ dia kambɛ Jehowa kânga l’atei w’ekakatanu woleki wolo, lam’ayatshutshuya ambutshi dia mbodia anawɔ dia vɔ mboka Jehowa ngandji l’etema w’ɔngɛnɔngɛnɔ efula, lam’etsha emendji Dui dia Nzambi la ngandji ndo l’osalosalo, watshutshuya lemba l’ɛkɔkɔ dia lɔ monga l’ohetoheto wa mamba dia kambɛ Jehowa pondjo pondjo. (Mateu 28:19, 20; 1 Tesalonika 5:11, 14) Etena kakitanyiyaso ɛlɛmbɛ wa Kristo lo lɔsɛnɔ laso l’onto l’onto, otema wa Jehowa mɛtɛ ndolaka l’ɔngɛnɔngɛnɔ wa mamba! (Tukedi 23:15) Nde nangaka wanɛ tshɛ walanga ɛlɛmbɛ ande wa kokele sɛna pondjo pondjo. Lo Paradiso kayaye, tayɛna etena kayonga anto tshɛ kokele, etena kahatonga amɔnyɔdi w’ɛlɛmbɛ nto, ndo etena kayotahemɛ nsaki tshɛ y’etema aso. Ande difuto dia woke diayotokondja nɛ dia tekɔ lo ndjela ɛlɛmbɛ wa Kristo lee!
[Footnote]
a Mvudu shɔ bu oko mvudu y’andjashi Nzambi ya lo Lokristokristo. Lɛkɔ ndoko “wa abe,” kana “wa mɔpɛrɛ.” (Mateu 23:9) Anangɛso wele l’ɔkɛndɛ wa nɔmbɔla nɛmiyamaka, koko olimu awɔ nɔmbwamaka l’ɛlɛmbɛ akɔ wâmɛ walɔmbɔla dikumanyi tshɛ.
[Study Questions]
1. Lande na kakokaso mbuta ɔnɛ ɛlɛmbɛ wa Kristo wekɔ la nkudu ka mamba katshutshuya anto dia vɔ sala kɛnɛ kele ɔlɔlɔ ɛlɔ kɛnɛ?
2. Ngande waki Lokristokristo komana ɛlɛmbɛ wa Kristo fundo, ndo akokaso sala dia kotsha ɛlɛmbɛ ɛsɔ?
3. (a) Naa adjango amɔtshi wele l’atei w’ɛlɛmbɛ wa Kristo? (b) Bonde kahatakoke mbuta ɔnɛ etshumanelo k’Akristo hakoke monga l’ɛlɛmbɛ ekina lâdiko di’adjango wakadje Kristo ndamɛ?
4. Kakɔna katotshutshuya dia sho tɛmɔla Nzambi lo yoho y’ɔlɔlɔ?
5. (a) Ngande wakoka ambutshi kotsha ɛlɛmbɛ wa Kristo lo nkumbo? (b) Kakɔna kahomba ana oma le ambutshi awɔ, ndo wekamu akɔna wahomba ambutshi amɔtshi mbekola dia vɔ mbashatɔ?
6. (a) Onde ana wekɔ l’ohomba w’ɛlɛmbɛ w’ambutshi, ko lande na kakadimolayɛ ngasɔ? (b) Ana pombaka shihodia ɔnɛ ɛlɛmbɛ wekɔ lo mbidjama la ngelo dikambo kona? (c) Naa wâle ɛmɔtshi wahatotombaka naka ɛlɛmbɛ wa Kristo wekɔ lo dihole dia ntondo lo nkumbo k’otondo?
7. Ngande washa Bɛtɛlɛ ɛnyɛlɔ lo dikambo dia mbidja ɛlɛmbɛ lo nkumbo?
8. (a) Oyango akɔna wahombaso mongaka lawɔ nshi tshɛ l’etshumanelo? (b) Anto amɔtshi wakalɔmbɛ tɛdikɔ kana wakahembe mbidja ɛlɛmbɛ lo awui akɔna?
9. Lande na kele ekɔ ohomba sho mbewɔ mɔnywanaka ndo ndjaetɛ oko toshushi t’anyaso?
10. Wa na wele l’ɔkɛndɛ wa mendaka etshumanelo, ndo ngande wahombaso mbasha lonya?
11. Ngande wayela dikumanyi ɛlɛmbɛ wa Kristo l’etshumanelo?
12. Lam’atshɔ Okristo ɔmɔtshi le ekumanyi dia tɔ̂lɔmba ekimanyielo, ekumanyi kakɔ ahombande sala?
13. L’ɔtɛ wa vɔ mbɔsɛ anto akina tɛdikɔ kana mbisha tokanyi tawɔ vamɛ, bonde kakimanyiya dikumanyi akina dia vɔ kana lomba lo akambo wâkomɛ?
14. Ngande wakoka wanɛ wambotshunda wɔɔngɔ mɛnya ɔnɛ vɔ ndjaɛkɛka le Jehowa?
15. Naa wembola ɛmɔtshi wakokaso ndjaoka shamɛ dia mɛna kana tekɔ lo ndjela ɛlɛmbɛ wa Kristo l’asaso l’anangɛso?
16. Ngande wakokaso kimanyiya wanɛ wahaleke ndjaɛna oko anto w’ohomba, ko kotsha dui di’ohomba dia l’ɛlɛmbɛ wa Kristo lo yoho shɔ?
17. Lo weoho akɔna wotshikitanyi wɛnayɛ ɛlɛmbɛ wa Kristo wasala olimu l’etshumanelo kanyu?
[Caption]
[Notɛ ka l’ɛsɛ ka dikatshi]
[Caption]
[Wembola]
[Caption on page 30]
[Diombwɛlo di’osato wa lo lɛkɛ 30]
Ɔnayɛ ekɔ l’ohomba efula wa ngandji
[Caption on page 31]
[Diombwɛlo di’osato wa lo lɛkɛ 31]
Ande ekeketshelo katosha dikumanyi diokaso ngandji lee!
[Caption on page 31]
Akanayɛ?
◻ Lande na kele Lokristokristo koshihodia ɛlɛmbɛ wa Kristo?
◻ Ngande wakokaso ndjela ɛlɛmbɛ wa Kristo lo nkumbo?
◻ Dia sho ndjela ɛlɛmbɛ wa Kristo l’etshumanelo, ahombaso mbewɔ, ndo ahombaso sala?
◻ Ngande wakoka dikumanyi kitanyiya ɛlɛmbɛ wa Kristo l’awui wasalawɔ l’etshumanelo?