Tokimanyiya Asekaso Anto Dia Vɔ Mbeya Kɛnɛ Kalɔmba Nzambi
“Okende weko ladiku diami. Fono keko le mi, naka dimi halasambisha lukumu l’ololo!”—1 KORETO 9:16.
JEHOWA ekɔ la losango l’ɔlɔlɔ la mbutɛ anto tshɛ. Nde ekɔ la Diolelo dimɔtshi, ndo nde nangaka ɔnɛ anto wa l’ahole tshɛ wôke dikambo dia Diolelo diakɔ! L’ɔkɔngɔ wa sho mboka losango lɔsɔ l’ɔlɔlɔ, Nzambi tɔlɔmbaka dia sho lisanyɛ ndo anto akina. Ɔsɔ ekɔ olimu wele la tenyi pende. Ntondotondo, sho pombaka sambisha lokumu l’ɔlɔlɔ la Diolelo diaki Nzambi. Lo pɔlɔfɛsi kande katɛkɛta dikambo dia ‘nshi y’ekomelo ya dikongɛ di’akambo nɛ,’ Yeso akate ate: “Lukumu l’ololo lone la diulelu layusambishama lu kete tshe, uku omenyi le wedja tshe. L’okongo diku, ekumelu kayuya.”—Mateu 24:3, 14.
2 Etenyi ka hende k’olimu ɔsɔ ele ndakanya wanɛ wetawɔ esambishelo ka Diolelo. L’ɔkɔngɔ w’eolwelo kande, Yeso akatɛ olui a woke w’ambeki ande ate: “Okone nyutshu, nyete wedja tshe ambeki, nyâbatiza lu lukumbu la Papa ndu l’Ona ndu la [nyuma k’ekila, NW]. Nyuwaetshaki dia ntsha akambu tshe wamumunyutela. Nyulungi, dimi leko la nyu nshi tshe, edja ndu ekumelu k’andja.” (Mateu 28:19, 20) ‘Akambo asɔ wakadjangɛ Kristo’ ambeki ande komonga akambo ande ndamɛ; nde akalakanyaka anto dia vɔ nɛmiya ɛlɛmbɛ wa Nzambi, mbut’ate nɛmiya akambo walɔmba Nzambi. (Joani 14:23, 24; 15:10) Lâsɔ mbetsha anto akina dia vɔ ‘kitanyiya akambo wakadjanga Kristo’ kɛdikɛdi mbakimanyiya dia vɔ mbeya kɛnɛ katɔlɔmba Nzambi. Anto wele l’etema wosembwe pombaka ntsha kɛnɛ kalɔmba Nzambi dia vɔ monga ambolami wa lo Diolelo diande.
3 Ko Diolelo diaki Nzambi kɛdikɛdi na? Ayodiotsha kelɛso losango la Diolelo ɔnɛ lokumu l’ɔlɔlɔ na? Diolelo diaki Nzambi diekɔ lowandji lɔmɔtshi la l’olongo. Lowandji lɔsɔ lekɔ ohomba efula lo asho wa Jehowa, nɛ dia lo tshimbo yalɔ mbayondosantoya lokombo lande, mbayondolinya oma lo sɔnyi tshɛ. Diolelo sɔ mbele ehomɔ kayokamba la Jehowa dia kotsha lolango lande lanɛ la nkɛtɛ oko watshamalɔ l’olongo. Diɔ diakɔ diakatetsha Yeso dia nɔmbaka ɔnɛ Diolelo diaki Nzambi diaye ndo mbakandatɔkɔkɔmiya dia sho didjaka lo dihole dia ntondo lo nsɛnɔ yaso. (Mateu 6:9, 10, 33) Wɛ amboka lande na kɛna Jehowa ohomba sho ndakanya anyaso anto akambo wa Diolelo diande?
Olimu wa Dimɛna Walɔmba Ohetoheto, Koko Aha Olimu wa Wotsho
4 Onde sambisha lokumu l’ɔlɔlɔ lɔsɔ ekɔ dikambo dia wotsho? Kema! Tɔ̂shi ɛnyɛlɔ kɛnɛ: Papa ka nkumbo ekɔ l’ɔkɛndɛ wa kotsha ehomba wa l’emunyi wa nkumbo kande. Naka nde hakotsha ɔkɛndɛ ɔsɔ kete nde ekɔ oko onto latona mbetawɔ k’Okristo. Ɔpɔstɔlɔ Paulo akafunde ate: “Naka untu humbi wane wuto la ndi, djekaleka wa lu khumbu kandi, ndi ambutuna mbetawo kandi, ambuleka untu lahetawo kolo.” (1 Timote 5:8) Onde ɔkɛndɛ ɔsɔ wekɔ wotsho le Okristo wa pami? Naka nde mbokaka nkumbo kande ngandji kete dikambo sɔ bu wotsho le nde, nɛ dia nde nangaka kotsha ehomba atɔ.
5 Woho akɔ wâmɛ mbeso l’ɔkɛndɛ wa sambisha lokumu l’ɔlɔlɔ ndo mbetɛ anto ambeki; ɔsɔ ekɔ dikambo diatɔlɔmbawɔ, ndo nsɛnɔ yaso nemanɛka l’olimu ɔsɔ. Paulo akate ate: “Okende weko ladiku diami. Fono keko le mi, naka dimi halasambisha lukumu l’ololo!” (1 Koreto 9:16; ɛdika la Ezekiyele 33:7-9.) Koko aha paka l’ɔtɛ w’ɔnɛ tekɔ l’ɔkɛndɛ oto mbasambishaso, ngandji mbatotshutshuya dia sho sambisha. Ntondotondo, Nzambi mbalekaso mboka ngandji, koko sho mbokaka ndo anyaso anto ngandji ndo sho mbeyaka ɔnɛ vɔ wekɔ l’ohomba wa mboka lokumu l’ɔlɔlɔ. (Mateu 22:37-39) Lokumu l’ɔlɔlɔ lɔsɔ mbashaka elongamelo ka lo nshi yayaye. Kem’edja nto, Diolelo diaki Nzambi diayoshidiya akambo wa wɛngiya, diayonya ɛhɛnyɔhɛnyɔ tshɛ, ndo diayodja wɔladi la kâmɛ—akambo asɔ tshɛ wayosalema dia mbisha wanɛ wayakitshakitsha la tshina di’ɛlɔmbwɛlɔ kande ka losembwe ɛtshɔkɔ wa pondjo. Shi sho ngɛnangɛnaka efula, mbokaka ndo ɔlɔ woho w’anyanya, dia sambisha anto akina lokumu l’ɔlɔlɔ lɔsɔ?—Osambu 110:3.
6 Koko, olimu ɔsɔ w’esambishelo ndo wa mbetɛ anto ambeki wekɔ okakatanu a wolo. Anto bu woho ɔtɔi. Aha anto tshɛ mbayasha lo awui a woho ɔtɔi kana mbele l’akoka woho ɔtɔi. Amɔtshi wakɔtɔ kalasa efula, koko akina kɔmbɔtɔ kalasa efula. Wadielo—etshelo kakɔsamaka ntondo oko dui di’ɔngɛnɔngɛnɔ dia mbetshaka wenya—ɔsamaka ɛlɔ kɛnɛ oko lotumu l’opipi. Ɛlɔ kɛnɛ, anto efula mbeyaka mbadia koko hawolange mbadia, ndo okakatanu ɔsɔ wekɔ lo tahame, kânga lo wedja wasɛma ɔnɛ wekɔ la yɛdikɔ y’efula y’anto weya mbadia la funda [Checker: Please try to compare gE and gF and see how this sentence was rendered]. Ko anto asɔ wele la diewo di’okanda diotshikitanyi ndo wayasha l’akambo a weho la weho, ngande wakokaso mbakimanyiya dia vɔ mbeya kɛnɛ kalɔmba Nzambi na?—Ɛdika la 1 Koreto 9:20-23.
Tambɔlɔngɔswama Dimɛna dia Kimanyiya Anyaso Anto
7 Olimu wa wolo bu wolo efula dia wɛ sala naka wɛ ekɔ la dihomɔ diahombama. Ɛlɔ kɛnɛ, ehomɔ kasungana la woho w’olimu ɔmɔtshi mbeyaka tshikitanyema lui kana mumɔ ko vɔ mbidja ehomɔ kekina lo dihole diatɔ nɛ dia ehomba tatshikitanaka. Ngasɔ mbele ndo olimu aso wa sambisha losango la Diolelo diaki Nzambi. L’edja k’ɛnɔnyi watete, “ɔhɔmbɔ wa kɔlamelo ndo wa kɛsɔ” ekɔ lo tosha dihomɔ diahombama mɛtɛ, ekanda walɔngɔswama lo yoho ya lânde dia mbekaka l’anto Bible lawakawɔ. (Mateo 24:45, NW) Lo yoho shɔ mbambotɔlɔngɔswama dia kimanyiya anto wa lo “wedja tshe, ndu uma lu wauhu tshe ndu . . . w’eteketa tshe” dia vɔ mbeya kɛnɛ kalɔmba Nzambi. (Enyelo 7:9) Lo tena la tena, vɔ totondjɛka dihomɔ dikina dia sho tetemala kotsha ehomba watatshikitana tsho l’ekambɔ k’andja ɔnɛ. Ɛsɔ tênde bɛnyɛlɔ dimɔtshi.
8 Tatɛ oma l’ɔnɔnyi 1946 polo ndo lo 1968, dibuku dielɛwɔ “Que Dieu soit reconnu pour vrai!” mbakawɔsaka oko ehomɔ ka wolo dia ndakanyaka anto Bible, ndo abuku 19250000 wa dibuku sɔ wakatombe lo ɛtɛkɛta 54. L’ɔnɔnyi 1968, wakayotondjaka dibuku dielɛwɔ La vérité qui conduit à la vie éternelle, dibuku sɔ diakatokimanyiya l’edja k’ɛnɔnyi efula dia mbekaka Bible la wanɛ walanga. Lo nshi ya ntondo, anto efula wakekaka Bible vɔ l’Ɛmɛnyi wa Jehowa ɛnɔnyi k’ɛnɔnyi la ntondo ka vɔ ndjobatizama. Koko ehomɔ kɛsɔ kaki l’oyango wa mendana l’ombeki wa Bible, mbokeketsha dia nde kitanyiya awui wêkande. Etombelo akɔna wakayala na? Dibuku dielɛwɔ Les Témoins de Jéhovah: Prédicateurs du Royaume de Dieu mbutaka ɔnɛ: “Lo ɛnɔnyi esato w’olimu wakatatɛ oma lo Lovula 1, 1968, ko komɛ lo Loseketanya 31, 1971, lofulo l’anto tshɛtshɛ wakabatizama laki anto 434906—lofulo lɔsɔ ndeka lɔnɛ la wanɛ wakabatizama l’edja k’ɛnɔnyi esato w’olimu waki la ntondo mbala hiende la yema!” Tatɛ oma l’ɔnɔnyi wakadiatombe, dibuku dielɛwɔ La vérité diambodiangana lo lofulo la diambo—abuku 107000000 lo ɛtɛkɛta 117.
9 L’ɔnɔnyi 1982, dibuku dielɛwɔ Kokaka We Monga la Loseno la Pondjo lo Paradiso ka la Kete diakayala dibuku dioleki ohomba lo mbekaka l’anto Bible. Ehomɔ kɛsɔ kekɔ l’esato ndekana 150, osato l’osato ekɔ la tɔtɛkɛta t’eshika talembetshiya wetshelo w’oma l’osato akɔ. Olimu Aso wa Diolelo wa Kɔlɛkɔlɛ ya lo 1982 (l’Angɛlɛ) akate ɔnɛ: “Lo ɛnɔnyi oko 20 wambotɔsaka ‘Que Dieu soit reconnu pour vrai!’ oko dibuku dia mbekaka l’anto (oma lo 1946 polo l’atei w’ɛnɔnyi wa 1960), apandjudi w’eyoyo wa Diolelo ndekana 1000000 wakayɔtɔ l’ɔnɔngɔ aso. Oma lâsɔ, esambisha ekina 1000000 wakayokotshama lam’akayoyalaka La vérité qui conduit à la vie éternelle dibuku dia mbekaka l’anto Bible l’ɔkɔngɔ wa diɔ tomba l’ɔnɔnyi 1968. Ko lam’otokamba la dibuku di’oyoyo dielɛwɔ Kokaka We Monga la Loseno la Pondjo lo Paradiso ka la Kete dia mbekaka l’anto Bible, onde tayɛna ofulanelo wa ngasɔ w’apandjudi wa Diolelo? Eelo tayɛna, naka ngasɔ mbele lolango la Jehowa!” Ɔsɔ mɛtɛ aki lolango la Jehowa, nɛ dia tatɛ oma lo 1982 polo lo 1995, anto ndekana 2700000 wakayɔtɔ l’ɔnɔngɔ w’esambisha wa Diolelo!
10 Yeso akate ate: “Diango dia dinela dieko efula, keli ekambi mbeli tshitshe.” (Mateu 9:37) Dinela mɛtɛ diekɔ woke. Olimu w’efula wahomba salema wekekɔ. Lo wedja ɛmɔtshi, anto pombaka fundja nkombo ko kongɛka etena ka vɔ ndjêka Bible. Ɔnkɔnɛ, dia ndeka dianganya ewo ka Nzambi esadi esadi, “ɔhɔmbɔ wa kɔlamelo ndo wa kɛsɔ” akatotondjɛ ehomɔ k’oyoyo lo 1995, ehomɔ kɛsɔ kɛdikɛdi dibuku dia ndjɛkɛ 192 dielɛwɔ Ewo Katɔla Otsha lo Lɔsɛnɔ la Pondjo. Ehomɔ kɛsɔ k’ohomba efula haleke tɛkɛta dia wetshelo wa kashi. Tɔ nembetshiyaka wetshelo wa mɛtɛ wa lo Bible lo yoho yasungana. Tekɔ lo nongamɛ ɔnɛ dibuku sɔ diayokimanyiya ambeki wa Bible dia vɔ pama esadi lo nyuma. Dibuku dielɛwɔ Ewo diamboshila monga la shɛngiya ya wolo l’olimu w’esambishelo wa l’andja w’otondo ndo diekɔ lo tatetemala monga la shɛngiya yakɔ nɛ dia lofulo ladiɔ la 45500000 lakafundama lo ɛtɛkɛta 125 ndo wekɔ lo dikadimola lo ɛtɛkɛta 21.
11 Lo tena la tena, ‘ɔhɔmbɔ wa kɔlamelo’ toshaka dihomɔ dialɔngɔswama paka lo dikambo dia weho w’anto amɔtshi ato. Ɛnyɛlɔ, kakɔna kayotota lo dikambo di’anto wele ondo wekɔ l’ohomba w’ekimanyielo ka lânde l’ɔtɛ w’okanda wakaweke kana w’ɔtɛmwɛlɔ wewɔ na? Ngande wakokaso mbakimanyiya dia vɔ mbeya kɛnɛ kalɔmba Nzambi na? L’ɔnɔnyi 1982, takalongola kɛnɛ kakatahombaka mɛtɛ—takalongola biukubuku ya ndjɛkɛ 32 yelɛwɔ Nyudjase pundju l’ongenongeno la kete! Biukubuku shɔ yele l’esato tɔ yakayala ehomɔ k’ɔlɔlɔ efula lo ndakanya wanɛ waheye mbadia kana wahadia dimɛna. Yɔ nembetshiyaka atshina a wetshelo wa l’Afundelo lo ɛtɛkɛta wa wɔdu ndo lo yoho yakoka onto mboka esadi eto. Tatɛ oma lam’akayɔatombe, biukubuku yelɛwɔ Nyudjase pundju l’ongenongeno! yakatokimanyiya woho w’anyanya l’olimu aso w’olakanyelo wasalema lo nkɛtɛ k’otondo. Kɔpi ndekana 105100000 ya biukubuku shɔ yakafundama lo ɛtɛkɛta 239; lâsɔ mɛtɛ, l’atei w’ekanda wakatondja la Société Watch Tower polo ndo l’etena kɛsɔ, ɔsɔ mbaki okanda wakaleke kadimwama l’ɛtɛkɛta efula!
12 Lâdiko di’abuku, tatɛ oma l’ɔnɔnyi 1990 ‘ɔhɔmbɔ wa kɔlamelo’ ekɔ lo totondjɛ dihomɔ dia ndakanyaka anto, dihomɔ sɔ tɛnyaka yoho kina y’oyoyo ya sho munandaka anto efula—dihomɔ diakɔ ele bandɛ ya video. Lo ngɔndɔ ka Kɔlɛkɔlɛ ka l’ɔnɔnyi 1990, bande ka video kɔsa taahe 55, bandɛ kelɛwɔ Les Témoins de Jéhovah — Un nom, une organisation kakatombe—ɔsɔ aki bandɛ ka ntondo ka video kakatondja la Société Watch Tower. Awui w’amɛna wa lɔkɔ ndo washa wetshelo w’ohomba, awui watanema lo ɛtɛkɛta 35, mɛnyaka ɔlɔngɔswamelo wa l’andja w’otondo w’anto wamboyakimɔ le Jehowa dia kotsha didjango dia Yeso dia sambisha lokumu l’ɔlɔlɔ lo nkɛtɛ tshɛ. Bandɛ kɛsɔ ka video kakalɔngɔswama lo yoho ya lânde dia tokimanyiya l’olimu aso wa mbetɛ anto ambeki. Apandjudi wa Diolelo kotshimbatshimba dia mumɛ kamba l’ehomɔ kɛsɔ l’olimu w’esambishelo. Amɔtshi kidjaka lo atapa awɔ w’abuku, ndo mongaka nshi tshɛ suke suke dia mɛnya wanɛ walanga kana mbashatɔ dia vɔ tênda lawakawɔ ko ndjokikaloya l’ɔkɔngɔ diko. Kombeta ndoko edja l’ɔkɔngɔ w’otombelo wa bandɛ kɛsɔ ka video, omendji ɔmɔtshi wêteta akafunde ate: “Bandɛ ya video yaya dihomɔ dia l’eleko kɛnɛ ka 21 dia munanda timba la etema wa miliyɔ y’anto, ɔnkɔnɛ tambolongamɛ ɔnɛ bandɛ kɛnɛ ka video kayonga bandɛ ka ntondo l’atei a bandɛ efula ya video yayokamba la la Société dia ntɔla olimu wa Diolelo wa l’andja w’otondo otsha la ntondo.” Mɛtɛ, bandɛ efula ya video yambotomba, ɛnyɛlɔ oko bandɛ hiende yelɛwɔ La Bible: un livre historique et prophétique ndo La fermeté des Témoins de Jéhovah face à la persécution nazie. Naka bandɛ ya video yaki la Société tanemaka lo ɔtɛkɛta anyu, onde wɛ ambokambaka la yɔ l’olimu ayɛ w’esambishelo?a
13 Atete ndoko edja, wakatotondjɛ biukubuku yelɛwɔ ɔnɛ: Kakɔna Katɔlɔmba Nzambi?, dia tokimanyiya l’olimu aso wa mbetɛ anto ambeki. Bonde kakawayitondja na? Ngande wakokaso kamba la yɔ na?
Tɔsɛdingole Ehomɔ k’Oyoyo
14 Biukubuku y’oyoyo yelɛwɔ Kakɔna Katɔlɔmba Nzambi? yakalɔngɔswama lo dikambo di’anto wamboshilaka monga la mbetawɔ le Nzambi ndo wɔsa Bible la nɛmɔ. Emendji wêteta la wa misiyɔnɛrɛ y’oma lo kalasa ka Ngiliyadɛ yambohokɔ akambo ɛnɔnyi efula lo wedja wahatashidimikɔ dimɛna wakatokimanyiya lo ɔlɔngɔswɛlɔ wa biukubuku shɔ. Yɔ yekɔ l’awui tshɛ wakalɔngɔswama dimɛna dimɛna dia mbekaka l’anto Bible, ndo atshina a wetshelo wa lo Bible wekɔ lɔkɔ. Ɛtɛkɛta wofundami lɔkɔ ndjâka ndo ɔlɔ, wekɔ wɔdu ndo sembɔka tɔɔ lo dikambo. Koko awui wofundami lɔkɔ bu wɔdu wamboleka. Aha ‘abɛlɛ’ ato mbele lo biukubuku shɔ koko yɔ nembetshiyaka ndo “mbu ya nde ya wulu” y’oma lo Dui dia Nzambi lo yoho yakoka anto efula mana awui akɔ fundo.—Heberu 5:12-14.
15 L’ɛnɔnyi ɛnɛ wêtshi, apandjudi wa Diolelo wa lo wedja wotshikitanyi wakalɔmbɛ okanda wa ngasɔ. Ɛnyɛlɔ, Bɛtɛlɛ ka la Papouasie-Nouvelle-Guinée akafunde ɔnɛ: “Anto wekɔ l’okandokando lo dikambo dia wetshelo w’ɛtɛmwɛlɔ wahɔtɔnɛ. Vɔ wekɔ l’ohomba w’ɛtɛkɛta wa mɛtɛ wa lo tshena pe, ɛtɛkɛta washikikɛma la lofulo lɔmɔtshi l’avɛsa wakokawɔ menda lo Bible yawɔ hita. Vɔ wekɔ l’ohomba w’awui w’eshika ndo wokɛma hwe wɛnya kɛnɛ kalɔmba Nzambi Akristo wa mɛtɛ ndo wɛnya mbekelo la ditshelo diele kɔlɔ lo asho ande.” Biukubuku yelɛwɔ Kakɔna Katɔlɔmba Nzambi? yekɔ mɛtɛ kɛnɛ kele laso ohomba dia kimanyiya anto wa ngasɔ dia vɔ mbeya kɛnɛ kalɔmba Nzambi.
16 Ngande wakokayɛ kamba la ehomɔ kɛsɔ k’oyoyo na? Ntondotondo, wɛ kokaka ndjiɔsa dia mbeka l’anto waheye mbadia dimɛna kana wele ondo bu la mbekelo ka mbadiaka.b Anto wa ngasɔ mbeyaka kimanyiyama l’elembetshiyelo wa wɔdu wele lo biukubuku shɔ. L’ɔkɔngɔ wa vɔ menda kɔpi ka biukubuku shɔ kakatombe ntondo, bilɔ yaki la Société Watch Tower, kana Bɛtɛlɛ, yakafunde ɛtɛkɛta ɛnɛ: “Biukubuku nyɛ yayokimanyiya anto heyama lo ahole efula wa lo wodja wele anto bu la mbekelo ka mbadiaka efula.” (Brésil) “Ekɔ lokema l’anto waya oma lo wedja ekina dia ndjodjasɛ lendo ko hawokoke mbadia ɛtɛkɛta awɔ wa lôtɔ ndo wekɔ la yema y’okakatanu dia mbadia Falase. Biukubuku nyɛ mbeyaka tokimanyiya dia mbekaka l’anto wa ngasɔ.” (France) Onde wɛ kokaka kanyiya anto wa lo wodja anyu wakoka kimanyiyama la biukubuku yelɛwɔ Kakɔna Katɔlɔmba Nzambi?
17 Oyango wa hende ele, lo wedja efula, biukubuku shɔ kokaka tokimanyiya efula dia sho mumɛ mbeka Bible sho l’anto wôka Nzambi wɔma, oyadi wakɔtɔ kalasa efula kana bu. Sho pombaka mɛtɛ ndjâtshutshuya dia tatɛka mbeka l’anto Bible lo dibuku dielɛwɔ Ewo Katɔla Otsha lo Lɔsɛnɔ la Pondjo. Koko lo tena dimɔtshi, ayoleka wɔdu mumɛ mbeka l’onto lo biukubuku mɔtshi. Oma lâsɔ ko l’etena kasungana, nyu pombaka ndjotatɛ mbeka dibuku Ewo, ehomɔ kaso kalangaso efula ndo koleki woke dia mbekaka l’anto Bible. Lo dikambo dia biukubuku yelɛwɔ Kakɔna Katɔlɔmba Nzambi?, Bɛtɛlɛ, kana bilɔ yênda olimu w’Ɛmɛnyi wa Jehowa, yakafunde ɔnɛ: “Mumɛ mbeka l’onto Bible ekɔ dikambo dia wolo efula, ndo mɛnamaka dia apandjudi ndekaka kondja diɛsɛ dia mumɛ mbeka l’onto Bible lam’atatɛwɔ lo biukubuku.” (Allemagne) “Biukubuku ya nganɛ yayotokimanyiya efula dia tatɛ mbeka l’anto w’eyoyo Bible, oma lâsɔ ko ambeki asɔ ndjotetemala mbeka Ewo.” (Italie) “Kânga mbele Ase Japon wakɔtɔ kalasa efula, efula ka l’atei awɔ bu l’ewo k’efula ka Bible ndo k’atshina a wetshelo wa lɔkɔ. Biukubuku nyɛ yayokimanyiya ombeki wa Bible efula dia nde pama ko ndjêka dibuku dielɛwɔ Ewo.”—Japon.
18 Bɛtɛlɛ ya l’andja w’otondo yakalɔmbɛ biukubuku shɔ, ndo la Société aketawɔ dia ndjikadimola lo ɛtɛkɛta 221. Tambolongamɛ ɔnɛ okanda ɔsɔ w’oyoyo wayotokimanyiya efula dia sho kimanyiya anto akina dia vɔ mbeya kɛnɛ kâlɔmba Jehowa Nzambi. Ndo sho lawɔ, tatohɛke ɔnɛ kitanyiya kɛnɛ katɔlɔmba Nzambi, ndo ndjela didjango dia sambisha la mbetɛ anto ambeki, toshaka diaaso dia sho mɛnya Jehowa ngandji kawokaso. Mɛtɛ, kɛnɛ katɔlɔmba Nzambi kema wotsho. Ɔsɔ ekɔ yoho ya lɔsɛnɔ yoleki ɔlɔlɔ!—Osambu 19:7-11.
[Footnotes]
a Dibuku dielɛwɔ Les Témoins de Jéhovah : Prédicateurs du Royaume de Dieu mbutaka ɔnɛ: “Bandɛ ya video kema l’oyango wa mbɔsa dihole di’ekanda wafundaso kana esambishelo k’onto l’onto. Ekanda wafunda la Société wekɔ lo tetemala monga ohomba efula lo dianganya lokumu l’ɔlɔlɔ. Esambishelo ka luudu la luudu kasala Ɛmɛnyi wa Jehowa kekɔ nshi tshɛ etenyi kɛmɔtshi k’olimu kele l’etshina ka shikaa l’atei w’Afundelo. Koko, bandɛ ya video yamboya kakianɛ oko dihomɔ di’ohomba efula dia keketsha mbetawɔ k’anto lo alaka wa Nzambi w’ohomba efula, ndo mbatshutshuya dia vɔ mbɔsa olimu wasalema nshi nyɛ lo nkɛtɛ k’otondo la nɛmɔ efula.”
b Dia wɛ mbeya woho wa mbekaka l’anto Bible lo Kakɔna Katɔlɔmba Nzambi?, enda sawo diele l’ɔtɛ a dui ɔnɛ: “Ehomɔ k’Oyoyo dia Kimanyiya Anto dia Vɔ Mbeya Kɛnɛ Kalɔmba Nzambi,” lo lɛkɛ 9-10.
[Study Questions]
1, 2. (a) Naa olimu wa tenyi pende watɔlɔmba Jehowa dia sho kamba? (b) Anto wele l’etema wosembwe ahombawɔ mbeka dia vɔ monga ambolami wa lo Diolelo diaki Nzambi?
3. Diolelo diaki Nzambi kɛdikɛdi na? Ayodiosala kelɛso losango la Diolelo ɔnɛ lokumu l’ɔlɔlɔ?
4. Ngande wakokayɛ mɛnya ɔnɛ ɔkɛndɛ aso wa sambisha lokumu l’ɔlɔlɔ kema dikambo dia wotsho?
5. Kânga mbele olimu wa sambisha ndo wa mbetɛ anto ambeki wekɔ ɔkɛndɛ wahombaso kotsha, lande na kahombaso mongaka l’ɔngɛnɔngɛnɔ lo salaka olimu akɔ?
6. Lande na kele olimu wa sambisha ndo wa mbetɛ anto ambeki wekɔ tshondo y’okakatanu?
7. Ngande wambotɔlɔngɔsɔla “ɔhɔmbɔ wa kɔlamelo ndo wa kɛsɔ” dia sho kimanyiya anyaso anto dia vɔ mbeya kɛnɛ kalɔmba Nzambi?
8. (a) Olimu akɔna wakasale dibuku dielɛwɔ “Que Dieu soit reconnu pour vrai!” lo ntɔla olimu w’olakanyelo wa Bible otsha la ntondo? (b) Ehomɔ kakɔna ka mbekaka l’anto Bible kakatombe lo 1968, ndo tɔ kakalɔngɔswama lo dikambo diakɔna? (c) Ngande wakatokimanyiya dibuku dielɛwɔ La vérité l’olimu wa mbetɛ anto ambeki?
9. Lo yoho yakɔna yotshikitanyi dibuku dielɛwɔ Loseno la Pondjo l’abuku akina, ndo shɛngiya yakɔna yaki ladiɔ lo lofulo l’esambisha wa Diolelo?
10. Naa ehomɔ k’oyoyo kakawatondja lo 1995, ndo lande na kahombatɔ kimanyiya ambeki wa Bible dia vɔ pama esadi lo nyuma?
11. Naa ehomɔ ka dimɛna kakawatondja dia tokimanyiya dia sho ndakanya wanɛ waheye mbadia kana waheye mbadia dimɛna, ndo ngande wakatokimanyiya ehomɔ kakɔ l’olimu aso w’olakanyelo wasalema lo nkɛtɛ k’otondo?
12, 13. (a) Tatɛ oma l’ɔnɔnyi 1990, naa dihomɔ dia woho okina diatosha ‘ɔhɔmbɔ wa kɔlamelo’ dia sho munanda anto efula? (b) Ngande wakokaso kamba la bandɛ ya video yaki la Société l’olimu aso w’esambishelo? (c) Naa ehomɔ k’oyoyo kotoshawɔ atete ndoko edja dia tokimanyiya l’olimu aso wa mbetɛ anto ambeki?
14, 15. Biukubuku yelɛwɔ Kakɔna Katɔlɔmba Nzambi? yakalɔngɔswama lo dikambo di’anto akɔna, ndo awui akɔna wele lɔkɔ?
16. (a) Wa na wayoleka kimanyiyama l’elembetshiyelo wa wɔdu wele lo biukubuku shɔ y’oyoyo? (b) Ngande wakoka anto wa lo lɛtshi lanyu la nkɛtɛ kimanyiyama la biukubuku yelɛwɔ Kakɔna Katɔlɔmba Nzambi?
17. Ngande wakoka biukubuku shɔ y’oyoyo monga ekimanyielo ka woke lo wedja efula, ndo lande na?
18. Kakɔna kahombaso mbohɔka lo dikambo dia kitanyiyaka kɛnɛ katɔlɔmba Nzambi?
[Caption]
[Footnotes]
[Caption]
[Questions]
[Caption on page 17]
[Caption on page 17]
Olimu aso w’esambishelo ndo wa mbetɛ anto ambeki bu wotsho
[Caption on page 18]
[Captions on page 18]
“Que Dieu soit reconnu pour vrai!” (1946, diakayɔlɔngɔswamaka nto lo 1952): 19250000 lo ɛtɛkɛta 54 (Dibuku dia l’Angɛlɛ)
La vérité qui conduit à la vie éternelle (1968): 107000000 lo ɛtɛkɛta 117 (Dibuku dia lo Falase)
Kokaka We Monga la Loseno la Pondjo lo Paradiso ka la Kete (1982): 80900000 lo ɛtɛkɛta 130 (Dibuku dia lo russe)
Ewo Katɔla Otsha lo Lɔsɛnɔ la Pondjo (1995): 45500000 lo ɛtɛkɛta 125 (Dibuku dia l’allemand)
[Caption on page 21]
[Review on page 21]
Onde Wɛ Kokaka Nembetshiya?
◻ Naa olimu wa tenyi pende walɔmba Jehowa ekambi ande dia vɔ sala?
◻ Bonde kele ɔkɛndɛ aso wa sambisha ndo wa mbetɛ anto ambeki bu wotsho le so?
◻ Naa dihomɔ diambotosha “ɔhɔmbɔ wa kɔlamelo ndo wa kɛsɔ” dia sho kambaka ladiɔ l’olimu aso w’esambishelo ndo wa mbetɛ anto ambeki?
◻ Biukubuku yelɛwɔ Kakɔna Katɔlɔmba Nzambi? yakalɔngɔswama lo dikambo di’anto akɔna, ndo ngande wakokaso kamba la yɔ l’olimu aso w’esambishelo?