Lamaka Lushi La Jehowa Lo Yimba
“Lu nshi y’ekumelu, asoki wayuya.”—2 PETERO 3:3.
PAMI kɛmɔtshi kakakimɔ lɔsɛnɔ lande dia kambɛka Nzambi tena tshɛ ambeta ɛnɔnyi ndekana 66 akafunde ate: “Lakɛnaka nshi tshɛ nte: etena ka dimi tasadi dikambo tɔ kɛnɛ nɛ dia nshi yambotshikala yaya bu kambe. Lo kanyi yami, lakɛnaka ɔnɛ Armagɛdɔna ayoya l’edia ka lui. (Enyelo 16:14, 16) Lo ndjela ɛnyɛlɔ ka papa la ka she papa, dimi laki la lɔsɛnɔ lakɔtɔnɛka la dako di’ɔpɔstɔlɔ [Petero] di’ɔnɛ ‘nyolamake wôngelo wa lushi la Jehowa lo timba tanyu.’ Lushi tshɛ, dimi lakɔsaka andja w’oyoyo wakalakema oko ‘dikambo dia mɛtɛ kânga mbahawatɛnama.’ ”—2 Petero 3:11, 12; Heberu 11:1; Isaya 11:6-9; Enyelo 21:3, 4.
2 Ɛtɛkɛta wa Petero w’ɔnɛ ‘nyolamake’ lushi la Jehowa ‘lo timba tanyu’ mɛnyaka ɔnɛ aha sho likaloya ɛkɔngɔkɔngɔ lo timba taso. Hatohombe mbohɛ ɔnɛ lushi layolanya Jehowa dikongɛ di’akambo nɛ la ntondo ka nde mbela andja w’oyoyo wakandalake laya kaa suke. Sho pombaka liɔsa oko lushi la mɛtɛ mɛtɛ ko liɛnaka hwe, wate kana laya k’onyɔ. Amvutshi wa Nzambi wa lo nshi y’edjedja wakaliɔsaka ngasɔ oko lushi la mɛtɛ mɛtɛ ndo wakataka mbala efula ɔnɛ lushi lakɔ laya suke.—Isaya 13:6; Joele 1:15; 2:1; Obadiya 15; Zefaniya 1:7, 14.
3 Lande na kakatɔkɔkɔmiya Petero dia sho mbɔsaka lushi la Jehowa di’oko lɔ kokaka ndja “l’edia ka lui” na? Dikambo amɔtshi mɛtɛ wakamɛ mɔnyɔla kanyi ya wôngelo wa Kristo wakalakema; l’edja ka wôngelo akɔ mbahomba atshi wa kɔlɔ kondja dilanya. (2 Petero 3:3, 4) Ɔnkɔnɛ, lo tshapita ya sato yayangaso sɛdingola kakianɛ, tshapita ya lo mukanda ande wa hende, Petero ambokadimola awui wakataka ansɔki asɔ.
Petero Ambɔsɛngasɛnga Anango dia Vɔ Mbohɔka
4 Ngandji kakokaka Petero anango mɛnamaka hwe lo woho ɔnɛ wawaelɛnde mbala ko mbala lo tshapita nyɛ ɔnɛ: “Elangimi ami.” Dia nde mbasɛngasɛnga di’aha vɔ mbohɛ akambo wakawâlakanya, Petero ambomɛ mbatɛ ate: “Elangimi ami, . . . dimi lambangasanya etema anyu w’ololo ne dia nyuhula. Dieli la nyu dia mbuho [“ɛtɛkɛta wakatɛkɛta,” NW] amvutshi w’ekila [“lo nshi y’edjedja,” NW], ndu [“dui dia,” NW] Khumadiondjo la Ushimbedi, [di]akandanyutela l’enyo w’atumami.”—2 Petero 3:1, 2, 8, 14, 17; Jude 17.
5 ‘Ɛtɛkɛta akɔna ɛsɔ wakatɛkɛta amvutshi w’ekila lo nshi y’edjedja’ wakɔkɔmiya Petero ambadi wa mukanda ande dia vɔ mbohɔka na? Ɔsɔ ele ɛtɛkɛta wendana la wôngelo wa Kristo lo nkudu ka Diolelo ndo l’elombwelo k’anto wɔnyɔla Nzambi. Petero akatawate ɛtɛkɛta akɔ ɛsɔ ntondo. (2 Petero 1:16-19; 2:3-10) Judɛ ekɔ lo mbuta dikambo di’Ɛnɔka, omvutshi wa ntondo watawɔ wakewola anto ɔnɛ Nzambi ayanga ndjolanya atshi wa kɔlɔ. (Jude 14, 15) Amvutshi akina nto wakayotombaka l’ɔkɔngɔ w’Ɛnɔka; Petero halange sho mbohɛ kɛnɛ kakafunde amvutshi akɔ.—Isaya 66:15, 16; Zefaniya 1:15-18; Zekariya 14:6-9.
6 Lâdiko dia lâsɔ, Petero ambotɛ ambadi wa mukanda ande dia vɔ mbohɔka ‘dui dia Nkumadiɔndjɔ la Oshimbedi.’ Lo dui sɔ dia Yeso mbele ndo dako di’ɔnɛ: “Nyuyalamaki, ne dia etema anyu watukuyala wutshu . . . Lushi loso, latukuya le nyu shashimuya, uku shuni ya djunga.” ‘Nyendaki ɔlɔlɔ, aha nyu ndala djɔ, nɛ dia nyu hanyeye lam’ayokoka etena kakashikikɛma.’ (Luka 21:34-36; Mako 13:33) Petero ekɔ lo tɔkɔkɔmiya nto dia sho mpokamɛ ɛtɛkɛta w’apɔstɔlɔ. L’atei w’apɔstɔlɔ, sho mbeyaka mbɔsa ɛnyɛlɔ k’ɔpɔstɔlɔ Paulo; nde akafunde ate: “Lushi la [Jehowa] layuya uku atuyakaka uvi l’utshu. Okone tatulalaki djo uku akina, keli tosene [“ndo tolame timba taso ɔlɔlɔ,” NW].”—1 Tesalonika 5:2, 6.
Nsaki Yele l’Ansɔki
7 Oko wakataditshi la ntondo, ɔkɔkɔ wakasha Petero anango alako asɔ ele nɛ dia amɔtshi wakamɛ mɔnyɔla waewoyelo wa ngasɔ, oko wakɔnyɔlaka Ase Isariyɛlɛ w’edjedja amvutshi wa Jehowa. (2 Ekondo 36:16) Petero ekɔ lo nembetshiya ate: “Nyuteyi ntundu nyati: Lu nshi y’ekumelu, asoki wayuya la losoko lawo, wayutshaka uku saki yawo.” (2 Petero 3:3, sho mbɛnganyisha alɛta ango.) Judɛ ekɔ lo mbuta ɔnɛ ansɔki asɔ kombolaka ‘akambo wa kɔlɔ.’ Nde mbaelɛka ɔnɛ ‘anto wa lo demba, wanɛ wele bu la lonyuma.’—Jude 17-19.
8 Ondo mɛtɛ ndo embetsha wa kashi wakate Petero ɔnɛ vɔ ‘ndjelaka nsaki ya mindo dia mbidja demba mindo’ mbele l’atei w’ansɔki asɔ wele bu la lonyuma. (2 Petero 2:1, 10, 14) Vɔ nsɔkaka Akristo wa kɔlamelo lam’awambolawɔ ɔnɛ: ‘Kema nde akatatshi ɔnɛ: layoya, ko ende? Oma ko lushi lakalale watshɛso djɔ lo nyɔi, diangɔ tshɛ diekɔ ɔnkɔnɛ wakidiɔ oma l’etatelo k’andja.’—2 Petero 3:4.
9 Bonde kewɔ la lɔsɔkɔ la ngasɔ na? Bonde katawɔ ɔnɛ wôngelo wa Kristo hongaki pondjo, ndo ɔnɛ ndoko lushi lakekɛ Nzambi lonya lande lo akambo w’anto ndo nde hasalaki dikambo sɔ pondjo na? Lam’ekolawɔ timba t’anto dia vɔ mbohɛ ɔnɛ etena ka vɔ tayalɔngɔsɔdi tɔ kɛnɛ nɛ dia nshi yambotshikala yaya bu kambe, ɔnkɔnɛ wata Ɔtɛkɛta wa Nzambi, ansɔki asɔ wayela nsaki ya demba nyangaka dia mbɔladia akina yɔɔ lo nyuma ko mbaetɛ oko waa nyama yakokawɔ munda esadi eto dia vɔ mondoya mposa yawɔ vamɛ. Ande ekeketshelo ka wolo kambowotosha ɛlɔ kɛnɛ di’aha sho ndala djɔ lo nyuma lee! Nyɛsɔ tolamake lushi la Jehowa lo timba taso ndo tohɔke nshi tshɛ ɔnɛ nde ekɔ lo tênda! Lâsɔ mbayototshutshuya otema aso dia sho kambɛka Jehowa l’ohetoheto ndo nama lɔkɛwɔ laso pudipudi.—Osambu 11:4; Isaya 29:15; Ezekiyele 8:12; 12:27; Zefaniya 1:12.
Ansɔki Salaka Akambo wa Kɔlɔ Efula l’Okonda
10 Ansɔki wa ngasɔ mbohɛka dikambo dia mɛtɛ di’ohomba efula. Vamɛ hawolange diohɔ ndo nyangaka dia tshutshuya akina dia vɔ diohɛ. Lande na na? Dia vɔ mɔnga anto akɔ ko mbanda esadi eto. Petero ate: ‘La lolango lawɔ vamɛ mbahaweye dikambo nɛ.’ Dikambo diakɔna na? Dikambo di’ɔnɛ: “Ulungu a ntundu, ndu kete yakatungama l’ashi, yeki l’ashi, uma lu diui dia [Nzambi]. Ne dia ashi ane, antu waki la kete wakakhukhumama l’ashi, wakashisho.” (2 Petero 3:5, 6) Eelo mɛtɛ, Jehowa akanya akambo wa kɔlɔ oma laa nkɛtɛ lam’akandalɔsha Mvula k’Elola lo nshi ya Nɔa, ndo Yeso akayoka epole ɔsɛkɛ lo dikambo sɔ. (Mateu 24:37-39; Luka 17:26, 27; 2 Petero 2:5) Ɔnkɔnɛ, otshikitanyi la kɛnɛ kata ansɔki, diangɔ tshɛ kotetemala monga ‘ɔnkɔnɛ wakidiɔ oma l’etatelo k’andja.’
11 Ondo ansɔki wakasɔkaka Akristo wa kɔlamelo nɛ dia akambo wakawalongamɛka kokotshama l’etena kɛsɔ. Yema la ntondo ka Yeso mvɔ, ambeki ande ‘wakafɔnyaka ɔnɛ diolelo dia Nzambi diayanga mɛnɛ kakianɛ.’ Oma lâsɔ nto, l’ɔkɔngɔ wa Yeso mbolɔ, vɔ wakayowombola dia mbeya kana Diolelo diakahombe tatɛ mbolɛ l’etena kakɔ kɛsɔ. Ndo nto, ɛnɔnyi oko dikumi la ntondo ka Petero funda mukanda ande wa hende, ‘asolo’ w’amɔtshi ‘wakahahanaka’ oma l’‘ɛtɛkɛta wa l’onyɔ’ kana oma lo ‘mukanda’ wakawafɔnyaka ɔnɛ oma le ɔpɔstɔlɔ Paulo mboyewɔ kana oma le asekande ‘ko wakafɔnyaka ɔnɛ lushi la Jehowa lamboshilaka ndja.’ (Luka 19:11; 2 Tesalonika 2:2; Etsha 1:6) Akambo wa ngasɔ wakalongamɛka ambeki wa Yeso komonga akambo wa kashi, koko vɔ kokoka kotshama l’etena kɛsɔ. Lushi la Jehowa layoya mɛtɛ!
Ɔtɛkɛta wa Nzambi Hetaka Weteta
12 Oko wakataditshi la ntondo, amvutshi wakasɛnaka la ntondo ka Kristo ndja lanɛ laa nkɛtɛ wakewolaka anto mbala efula ɔnɛ lushi la Jehowa mbisha atshi wa kɔlɔ dilanya laya suke. L’ɔnɔnyi wa 607 la ntondo ka tena diaso nɛ, “lushi la Jehowa” lakaye lo yɛdikɔ ya tshitshɛ lam’akasha Jehowa wodja ande wakɔ̂tɔmbɔkwɛ dilanya. (Zefaniya 1:14-18) L’ɔkɔngɔ diko, wedja ekina, kâmɛ ndo Babilɔna la Edjibito, wakayokondjaka dilanya lo “lushi la Jehowa” la ngasɔ. (Isaya 13:6-9; Jeremiya 46:1-10; Obadiya 15) Ekomelo ka dikongɛ di’akambo di’Ase Juda dia l’eleko ka ntondo kakatatami ndo tɔ lawɔ, ndo tɔ kakayoyala lam’akaye alembe w’Ase Rɔmɔ ko pandjola Juda vwa l’ɔnɔnyi wa 70 lo tena diaso nɛ. (Luka 19:41-44; 1 Petero 4:7) Koko Petero ekɔ lo tɛkɛta dikambo dia “lushi la Jehowa” l’otsha la ntondo, lushi lɔsɔ layoleka kânga Mvula k’Elola kakalɔ l’andja w’otondo!
13 Petero ambotatɛ kɔndɔla elanyelo kɛsɔ kayaye, ata ate: ‘Oma l’ɔtɛkɛta akɔ wâmɛ.’ Nde aki oma la mbuta ɔnɛ: ‘Oma l’ɔtɛkɛta wa Nzambi,’ nkɛtɛ kaki la ntondo ka Mvula k’Elola ‘kakatombe oma l’ashi ndo kakakitshama l’atei w’ashi.’ Dikambo sɔ diɔkɔndwami l’ɔkɔndɔ w’etongelo wa lo Bible diakasale dia Mvula k’Elola ndja lam’akahongomɔ ashi oma lo didjango kana ɔtɛkɛta wa Nzambi. Petero ambotetemala mbuta ate: ‘Oma l’ɔtɛkɛta akɔ wâmɛ [waki Nzambi], elongo wa nshi nyɛ la nkɛtɛ ka nshi nyɛ wambotshumanyema oya lo dja ndo wambolamema polo ndo lo lushi l’elombwelo la elanyelo k’anto wɔnyɔla Nzambi.’ (2 Petero 3:5-7; Etatelu 1:6-8) Lo dikambo sɔ, tekɔ l’ɔtɛkɛta wa Jehowa wahakoke mbeta weteta! Nde ayokomiya ‘elongo la nkɛtɛ,’ mbut’ate dikongɛ di’akambo nɛ, lo dja ya nkɛlɛ ka lushi lande la woke! (Zefaniya 3:8) Ko etena kakɔna na?
Mposa ka Wolo ka Mɛna Ekomelo Amboya
14 Ambeki wa Yeso wakalange mbeya etena kayoya ekomelo ko wakawombola vate: “Kakɔna kayoyala djembetelo ya wôngelo ndo ya tena di’ekomelo ka dikongɛ di’akambo nɛ?” Vɔ mɛtɛ wakambolaka dia mbeya etena kakahombe dikongɛ di’Ase Juda komɛ, koko okadimwelo wakawasha Yeso wakendanaka ntondotondo la etena kayolanyema ‘elongo wa nshi nyɛ la nkɛtɛ ka nshi nyɛ.’ Yeso akatatshi ɔnɛ akambo wele oko ata wa weke, ndjala ya kasha, adidimu wa nkɛtɛ, hemɔ ndo awui w’epetenge wayoyala. (Mateu 23:3-14; Luka 21:5-36) Tatɛ oma l’ɔnɔnyi wa 1914, tekɔ lo mɛna woho wakotshama djembetelo shɔ yakasha Yeso lo dikambo dia “tena di’ekomelo ka dikongɛ di’akambo nɛ” ndo akambo wakate ɔpɔstɔlɔ Paulo ɔnɛ wayɛnama lo “nshi y’ekumelu.” (2 Timote 3:1-5) Lo mɛtɛ, tolembetelo tahakoke mbidjama tamu taya mɛtɛ l’etena ka komelo ka dikongɛ di’akambo nɛ!
15 Ɛmɛnyi wa Jehowa wekɔ la mposa ka wolo ka mbeya etena kayoya lushi la Jehowa. Oma lo mposa kɛsɔ ka wolo kele lawɔ, vɔ tohembaka tena dimɔtshi dia fɔnya etena kakoka lushi lakɔ ndja. Koko lam’asalawɔ ngasɔ, vɔ mbokoyaka ambeki wa Yeso wa ntondo ko mbohɛka diewoyelo dia Nkumɛso di’ɔnɛ sho ‘hateye etena kayokoka lushi lakashikikɛma.’ (Mako 13:32, 33) Ansɔki mbɔlaka Akristo wa kɔlamelo l’ɔtɛ walongamɛwɔ akambo wele watakoke ntshama l’etena kɛnɛ kalongamɛwɔ. (2 Petero 3:3, 4) Koko kânga mbediɔ ɔsɔku, Petero ekɔ lo shikikɛ ɔnɛ lushi la Jehowa layoya lo ndjela alamanaka Wakinde.
Ohomba wa Monga la Kanyi ya Jehowa
16 Sho pombaka mɛnaka tena ɔnkɔnɛ wadiɛna Jehowa, oko wambotohola Petero kakianɛ ate: “Lushi otoi leli uku deku kinunu lu ashu wa Khumadiondjo, la deku kinunu dieko uku lushi otoi.” Lɔsɛnɔ laso lakomɛ l’ɛnɔnyi 70 kana 80 lekɔ mondomondo naka sho liɛdika la lushi ɔtɔi lo asho wa Jehowa. (2 Petero 3:8; Osambu 90:4, 10) Ɔnkɔnɛ, naka tambɛna di’oko alaka wa Nzambi wambotshimbatshimba dia kotshama, sho pombaka mbetawɔ dako nɛ diatosha omvutshi wa Nzambi ɔnɛ: “Kuyanga [etena kakashikikɛma] kayutshimbatshimba, nyukikungeli. To kayuya mete, hakiutshimbatshimba.” (Sho mbɛnganyisha alɛta ango.)—Habakuka 2:3.
17 Lande na kamboviya nshi y’ekomelo ka dikongɛ di’akambo nɛ edja nganɛ woho waki kɔfɔnyaka ndo anto efula na? Ɔkɔkɔ ɔmɔtshi w’ɔlɔlɔ wamboviya nshi y’ekomelo nyɛ, oko wamboyolembetshiya Petero, v’ɔnɛ: ‘Jehowa bu ɔkɔkɛ dia kotsha daka diande, oko wafɔnya anto amɔtshi, koko nde ekɔ la lotutsha oya le nyu dikambo nde halange kânga onto ɔmɔtshi shishɔ, koko nde nangaka anto tshɛ ndjâtshumoya oma lo kɔlɔ.’ (2 Petero 3:9) Jehowa mendaka akambo woleki ɔlɔlɔ le anto tshɛ. Nde ndjâkiyanyaka lo dikambo dia nsɛnɔ y’anto, oko watande ate: “Dimi hangenangena nyoi k’untu a kolo! Dimi nangaka ndi nkalula uma lu kolo kandi, la ndi ndjala la lumu.” (Ezekiyele 33:11) Ɔnkɔnɛ, sho kokaka monga l’eshikikelo ɔnɛ ekomelo kayoya l’etena kasungana dia ndjokotsha sangwelo di’Otungi aso wele la lomba lahakome ndo wolodi la ngandji!
Kakɔna Kayeta Na?
18 Lam’ele Jehowa mɛtɛ mbokaka wanɛ wôkambɛ ngandji, nde ayonya wanɛ tshɛ wawaɛnya pâ. (Osambu 37:9-11, 29) Dia nde mɛnya, ɔnkɔnɛ wakate Paulo ntondo, ɔnɛ elanyelo kɛsɔ kayoya l’etena kaheyama, Petero ate: ‘Lushi la Jehowa layoya oko wovi; lushi lakɔ, olongo ayeta la londjo la mponge, koko diangɔ diambololɔ dja efula diayɔlɛlɔ, ndo nkɛtɛ la etsha wa lɔkɔ wayotomba sɛkɛ.’ (2 Petero 3:10; 1 Tesalonika 5:2) Olongo wa mɛtɛ mɛtɛ wɛnaso ɔnɛ la nkɛtɛ kɛnɛ kodjashiso konanyema la Mvula k’Elola, ndo hawotolanyema lo lushi la Jehowa. Ko lâsɔ, kakɔna ‘kayeta’ kana kayolanyema na?
19 Mandji y’anto yolɛ asekawɔ anto oko “elongo” yayokomɛ ndo “nkɛtɛ,” mbut’ate tshunda di’anto wɔnyɔla Nzambi, kayokomɛ. Ondo “londjo la mponge” nembetshiyaka woho ɔnɛ wayeta elongo akɔ esadi eto. “Diangɔ” diakenga tshunda di’anto wa kɔlɔ wa nshi nyɛ “diayɔlɛlɔ,” mbut’ate diayolanyema. Ndo “nkɛtɛ,” ndo “etsha wa lɔkɔ,” “wayotomba sɛkɛ.” Jehowa ayɔkɛnɛmɔla etsha tshɛ wa kɔlɔ wasala anto l’etena kayondela ekomelo kasungana le dikongɛ di’andja ɔnɛ w’otondo.
Tetemala Mbidja Yimba l’Elongamelo Kayɛ
20 Lam’ele akambo asɔ wa mamba wayanga ntshama, Petero ate: sho pombaka monga l’‘etsha wa lɔkɛwɔ l’ekila ndo ntshaka akambo w’anto wamamema Nzambi, ko kongɛka wôngelo wa lushi la Jehowa ndo lilamaka lo timba taso.’ Aha la tamu, ‘elongo wayɔlɛlɔ la dja, ndo diangɔ diambololɔ la dja y’efula diayɔlɛlɔ!’ (2 Petero 3:11, 12) Lam’ele akambo asɔ wa weke kokaka tatɛ ntshama lui, dui sɔ pombaka monga la shɛngiya lo kɛnɛ tshɛ kasalaso kana kasangoyaso sala.
21 Kakianɛ, Petero ambototɛ kɛnɛ kayɔhɛna dikongɛ nɛ di’edjedja, ate: “Koko lo ndjela daka diande mbakongɛso elongo w’eyoyo la nkɛtɛ k’oyoyo, lɛnɛ ayodjasɛ akambo wa losembwe.” (2 Petero 3:13, NW; Isaya 65:17) Ande esambelo ka woke lee! Kristo nde l’anto 144000 wayolɛ kâmɛ la nde wayonga “elongo w’eyoyo” wayɔlɔmbɔlaka ndo anto wayohandɔ l’ekomelo k’andja ɔnɛ wayokenga “nkɛtɛ k’oyoyo.”—1 Joani 2:17; Enyelo 5:9, 10; 14:1, 3.
Teyake Ɔnɛ Nshi Yambotshikala Yaya Bu Kambe ndo Tolamake Lɔkɛwɔ Laso Pudipudi
22 Petero ambotetemala mbuta ate: “Okone, elangimi ami, ne dia nyu nyambulungamela akambu ane, nyutetemali dia nyu ntanema la ki, aha la vadi, aha la unungu lu ashu andi. Nyeyi nyati: Memakana ka Khumadiondjo keko panda kanyu.” Naka sho kongɛka lushi la Jehowa l’asolo walomɔlomɔ ndo mbɔsaka etena tshɛ kɛnaso oko otshimbotshimbo ɔnɛ ekɔ djembetelo ya lotutsha laki Nzambi, kete tayewɔ vadi kana ɛkɔmɔ ka lo nyuma. Koko, wâle wekɔ! Petero ambotewola ɔnɛ lo mikanda waki “unyasu [l]a ngandji Paulu, . . . Akambu amotshi weli loko, weko wulu nshihudia. Akanga a dinginya la akanga a weodu watingisulaka akambu ako uku atshawo la afundelu akina, watuyalanyaka la wo.”—2 Petero 3:14-16.
23 Lo mɛtɛ, embetsha wa kashi wakengesolaka kɛnɛ kakafunde Paulo lo dikambo di’ɔlɔlɔ w’ɔtɛkɔya waki Nzambi, wakɔsaka mikanda ɛsɔ dia mɛnya oko lɔsɛnɔ lawɔ l’ofutanu bu kɔlɔ. Ondo Petero akohɔka dui sɔ l’etena kakandafunde dako diande nɛ dia ndjihelo ate: “Keli nyu, elangimi, ne dia nyu nyambeyaka akambu ane ntundu, nyewo, nyutukunganela lu wetshelu w’antu wa kolo, nyu nyatukoko lu eshikikalu kanyu.” Oma lâsɔ ko nde ndjodihiya mukanda ande, awakɔkɔmiya ate: ‘Nyohame lo ɔlɔlɔ w’ɔtɛkɔya ndo lo ewo ka Nkumadiɔndjɔ la Oshimbedi aso Yeso Kristo.’—2 Petero 3:17, 18.
24 Mbokɛmaka hwe dia Petero mɛtɛ nangaka keketsha anango. Nde kombolaka vɔ tshɛ monga la dionga diele oko nɛ diaki l’Ɔmɛnyi wa Jehowa ɔmɔtshi wa kɔlamelo waya l’ɛnɔnyi 82, ɔnɛ lakanga ɛtɛkɛta wakatatshi l’etatelo ka sawo nɛ; nde akate ate: “Dimi laki la lɔsɛnɔ lakɔtɔnɛka la dako di’ɔpɔstɔlɔ [Petero] di’ɔnɛ ‘nyolamake wôngelo wa lushi la Jehowa lo timba tanyu.’ Lushi tshɛ, dimi lakɔsaka andja w’oyoyo wakalakema oko ‘dikambo dia mɛtɛ kânga mbahawatɛnama.’ ” Nyɛsɔ ndo sho lawɔ toyale la yoho ya lɔsɛnɔ la ngasɔ.
[Study Questions]
1. Okristo ɔmɔtshi wa nshi nyɛ aki la kanyi yakɔna ya mɛnaka ɔnɛ nshi yambotshikala yaya bu kambe?
2. Nama lushi la Jehowa lo timba taso kɛdikɛdi na?
3. Kakɔna mɛtɛ kakasokoya Petero dia nde ndaka anango lo dikambo dia lushi la Jehowa?
4. Petero alangande sho mbohɔka?
5. Kakɔna kakate amvutshi amɔtshi lo dikambo dia lushi la Jehowa?
6. Naa ɛtɛkɛta wa Kristo la w’apɔstɔlɔ ande watokimanyiya dia sho nama lushi la Jehowa fundo?
7, 8. (a) Wanɛ wɔnyɔla waewoyelo wa Nzambi wekɔ anto a woho akɔna? (b) Awui akɔna watotaka ansɔki?
9. (a) Bonde katoyangaka ansɔki dia mbohiya anto ɔnɛ nshi yambotshikala yaya bu kambe ɔnkɔnɛ wata Ɔtɛkɛta wa Nzambi? (b) Ngande wakokaso ndjâkokɛ lo namaka lushi la Jehowa lo timba taso?
10. Ngande wɛnya Petero ɔnɛ ansɔki wekɔ lo ndjâkesa?
11. Naa awui amɔtshi wakalongamɛka Akristo wa ntondo wele kokotshama l’etena kɛsɔ ko wakayokonyaka amɔtshi dia vɔ mbasɔka?
12. Ngande wakɛnama Ɔtɛkɛta wa Nzambi ɔnɛ vɔ hawokoke mbeta weteta lo pɔlɔfɛsi yawɔ yendana la “lushi la Jehowa”?
13. Naa ɛnyɛlɔ kɛmɔtshi ka lo nshi yakete kɛnya ɔnɛ dikongɛ di’akambo nɛ diayokomɛ mɛtɛ?
14. Lande na kakokaso shikikɛ ɔnɛ tekɔ lo sɛna lo “nshi y’ekumelu”?
15. Kakɔna katoyangaka Akristo dia ntsha kânga mbakawaewola Yeso lo dikambo sɔ?
16. Naa dako di’oshika diahombaso ndjelaka?
17. Kânga mbamboviya nshi y’ekomelo woho waki kɔfɔnyaka ndo anto efula, dikambo diakɔna diakokaso shikikɛ?
18, 19. (a) Bonde kambɔsa Jehowa tɛdikɔ dia nanya dikongɛ di’akambo nɛ? (b) Ngande wakɔndɔla Petero ekomelo ka dikongɛ nɛ, ndo kakɔna mɛtɛ kayolanyema?
20. Ewo k’akambo wayosalema lo nshi yayaye pombaka monga la shɛngiya yakɔna lo nsɛnɔ yaso?
21. Kakɔna kayɔhɛna elongo wa nshi nyɛ la nkɛtɛ ka nshi nyɛ?
22. (a) Kakɔna kayotokimanyiya dia sho mbewɔ vadi kana ɛkɔmɔ ka lo nyuma? (b) Wâle akɔna watewola Petero?
23. Naa dako dia Petero dia ndjihelo?
24. Dionga dia ngande diahomba monga l’ekambi wa Jehowa tshɛ?
[Caption]
[Questions]
[Caption on page 29]
[Review on page 29]
Ngande Wayoyokadimola?
◻ ‘Namaka’ lushi la Jehowa ‘lo timba taso’ kɛdikɛdi na?
◻ Ansɔki mbohɛka dikambo diakɔna l’okonda, ndo lande na?
◻ Lande na kele ansɔki nsɔkaka Akristo wa kɔlamelo?
◻ Kanyi yakɔna yahombaso mongaka la yɔ?
[Caption on page 30]
[Caption on page 30]
Lamaka lushi la Jehowa lo yimba . . .
[Caption on page 31]
[Caption on page 31]
. . . ndo andja w’oyoyo wayoya l’ɔkɔngɔ alɔ