“Nsango y’ɔngɛnɔngɛnɔ” oma lo dibuku di’ɛnyɛlɔ
“Dimi lakɛnyi ondjelo okina watafumbɔ l’atei w’olongo, nde aki la lokumu l’ɔlɔlɔ la pondjo oko nsango y’ɔngɛnɔngɛnɔ dia mbewoya wanɛ wodjashi laa nkɛtɛ.”—ƐNYƐLƆ 14:6, NW.
1. Kânga mbetawɔ Ɛmɛnyi wa Jehowa ɔnɛ dibuku di’Enyelo diakasambiyama oma le Nzambi, lande na kewɔ bu “yaato y’ɔtɛmwɛlɔ yatɛkɛta paka di’elanyelo k’andja w’otondo”?
OTSHIKITANYI la kɛnɛ kata anto lo lokombo lawɔ, Ɛmɛnyi wa Jehowa bu “yaato y’ɔtɛmwɛlɔ yatɛkɛta paka di’elanyelo k’andja w’otondo” kana “ɔtɛmwɛlɔ wasambisha paka dia lushi l’elombwelo.” Koko vɔ mbetawɔka dibuku di’Enyelo dielamɛ nto ɔnɛ Oshweelo ndo diɔsaka oko etenyi kɛmɔtshi k’Ɔtɛkɛta wa Nzambi wakasambiyama oma le nde. Eelo mɛtɛ, dibuku di’Enyelo diekɔ la nsango y’elombwelo k’anto wa kɔlɔ. Koko lam’atawasambisha anto, ekambi wa Nzambi ndekaka tɛkɛta dia elongamelo ka dimɛna efula kele lo Bible, katanema ndo lo dibuku di’Enyelo kana Oshweelo. Ɔnkɔnɛ, vɔ hawokotsha kana minya ɛngɔ kɛmɔtshi oma l’ɛtɛkɛta wa prɔfɛsiya watanema lɔkɔ.
Apandjudi wa nsango y’ɔngɛnɔngɛnɔ
2. Naa avɛsa amɔtshi wakamba l’Ɛmɛnyi wa Jehowa esangɔ efula l’olimu awɔ w’esambishelo?
2 Esangɔ efula, Ɛmɛnyi wa Jehowa tokambaka l’ɛtɛkɛta wa Yeso ɛnɛ dia vɔ mɛnya bonde kasalawɔ olimu w’esambishelo: “Lukumu l’ololo lone la diulelu layusambishama lu kete tshe, uku omenyi le wedja tshe. L’okongo diku, ekumelu kayuya.” (Mateu 24:14) Ko naa “lukumu [lakɔ] l’ololo” lɔsɔ na? Dia vɔ kadimola dimbola sɔ, Ɛmɛnyi wa Jehowa efula mbutaka kɛnɛ kofundami lo Enyelo tshapita 20 la 21, avɛsa watɛkɛta dia Lowandji l’Ɛnɔnyi Kinunu laki Kristo ndo di’ɛlɔmbwɛlɔ ka Diolelo diande la tshunda di’anto, lɛnɛ ele nyɔi, delo la kandji ‘hatonga nto pondjo.’—Enyelo 20:6; 21:1, 4.
3. Olimu w’esambishelo wakamba Ɛmɛnyi wa Jehowa fɔnaka l’olimu akɔna?
3 Oko wewɔ apandjudi wa losango lɔsɔ l’ɔngɛnɔngɛnɔ, Ɛmɛnyi wa Jehowa wekɔ mɛtɛ enyimpala, mbut’ate amɛmbi w’awui waki ɔkɛndji wa lo didjidji wa l’olongo wele l’olimu wolembetshiyami lo dibuku di’Enyelo. “Dimi lakɛnyi ondjelo okina atafumbɔ l’atei w’olongo, nde aki la lokumu l’ɔlɔlɔ la pondjo oko losango l’ɔngɛnɔngɛnɔ dia mbewoya wanɛ wodjashi laa nkɛtɛ, wedja tshɛ, dibila tshɛ, weho w’ɛtɛkɛta tshɛ ndo weho w’anto tshɛ.” (Ɛnyɛlɔ 14:6, NW) L’atei wa “lokumu l’ɔlɔlɔ la pondjo” lɔsɔ mbele ndo diewoyelo di’ɔnɛ ‘diolelo [mbut’ate lowandji] di’andja’ ɔnɛ ‘diamboyala diolelo dia Nkumɛso la dia Kristo kande’ la diewoyelo di’ɔnɛ ‘etena kakashikikɛ’ Jehowa kambokoka dia “nanya wane watulanyaka kete.” (Enyelo 11:15, 17, 18) Kema awui asɔ mɛtɛ wekɔ lokumu l’ɔlɔlɔ?
Kɛnɛ katewoya dibuku di’enyelo
4. (a) Naa akambo wa mɛtɛ w’ohomba efula watanema lo tshapita ya ntondo ya Enyelo? (b) Kakɔna kalɔmbama le wanɛ walanga kondja ɛlɔlɔ w’oma lo losango l’ɔngɛnɔngɛnɔ?
4 Tshapita ya ntondo ya dibuku di’Enyelo mbelɛka Jehowa ɔnɛ “Alafa la Omenga, [Ɔnɛ] leko, lakiko, laya ka ndja, Kanga-Wulu-Tshe.” Tshapita yakɔ mbutaka nto ɔnɛ Ɔnande Yeso Kristo ekɔ “omenyi a kolamelu,” “ona enundu lakulwama uma lu nyoi,” ndo “umbuledi a khumi ya dikanga ya la kete.” Yɔ tɛkɛtaka nto dia Yeso oko “one latutukaka ngandji, ndu lakatutshungula uma lu kolo yasu la dikila diandi.” (Enyelo 1:5, 8) Lo yoho shɔ mbakɛnɛmɔla dibuku di’Enyelo akambo wa mɛtɛ washimbɛ lɔsɛnɔ oma k’etatelo kadiɔ. “Wanɛ wodjashi laa nkɛtɛ” hawotokondja ɛlɔlɔ oma lo losango l’ɔngɛnɔngɛnɔ lawaewoyawɔ endaka vɔ hawetawe lowandji la Jehowa, hawoyadi la mbetawɔ lo dikila dia Yeso diakatshwama ndo hawetawe ɔnɛ Jehowa akawôlola ndo ɔnɛ Kristo ekɔ lo mbolɛ nshi nyɛ oko Omboledi wa nkɛtɛ kɛnɛ wakasɔnama oma le Nzambi.—Osambu 2:6-8.
5. Lo tshapita ya 2 la ya 3 ya Enyelo Kristo kɔndwama oko onto lele l’ɔkɛndɛ akɔna?
5 Totshapita tohende tahɔnyi tolembetshiyaka Kristo Yeso oko Omendji wa l’olongo woludi la ngandji walama tshumanelo di’ambeki ande wele laa nkɛtɛ. Mikanda wakawafundɛ tshumanelo dimɔtshi diakasɔnama, tshumanelo esambele di’Akristo, dia lo ntambe ka ntondo diaki lo lɛkɛ lelɛwɔ ɔnɛ Asie Mineure, wekɔ l’awui w’ekeketshelo ndo l’alako wa wolo wele ohomba polo ndo ɛlɔ katɛkɛtaso kɛnɛ. Nsango yakawatomɛka tshumanelo sɔ tatɛka mbala efula l’ɛtɛkɛta w’ɔnɛ “dimi mbeyaka etsha aye” kana “dimi mbeyaka asui aye.” (Enyelo 2:2, 9) Mɛtɛ, Kristo akeyaka kɛnɛ tshɛ kaketaka lo tshumanelo di’ambeki ande. Nde akândola tshumanelo dimɔtshi l’ɔtɛ wa ngandji kawɔ, mbetawɔ kawɔ, olimu awɔ, ekikelo kawɔ, ndo kɔlamelo yawɔ lo lokombo lande la l’ɔtɛkɛta ande. Tshumanelo dikina, nde akâhangwɛ nɛ dia vɔ waketawɔ ngandji kakawokaka Jehowa la Ɔnande mbɔla yɔɔ, kana nɛ dia vɔ wakayoyasha lo akambo wa mindo wa dieyanelo, l’ɔtɛmwɛlɔ wa dikishi, kana wakayɔtɔlɔkɔ lo monga la yimba ya diatɔnelo.
6. Ɛnɛlɔ kofundami lo tshapita ya 4 kimanyiyaka anto dia vɔ mpotɔ dui diakɔna?
6 Tshapita ya 4 yekɔ la ɛnɛlɔ ka wɔma wa mamba ka okudi wa l’olongo waki Jehowa Nzambi. Tshapita yakɔ tɛ̂nyaka lo tshenyi ya tshitshɛ lotombo la wôngelo wa Jehowa ndo wanɛ wayondɔsa dia tôlɛ l’olongo. Emboledi wɔlɔtshi alɛmbɔ wa koso, wanɛ wele ekudi awɔ kana nkɔsa yawɔ ya lowandji nyinga okudi wa l’atei w’andja w’otondo, wekɔ lo kusamɛ Jehowa ndo wekɔ lo mbuta vate: “Jehowa Nzambi kakiso le, wɛ kakoka nongola lotombo la kɛnɛmɔ ndo nkudu, dikambo wɛ kakatonge diangɔ tshɛ, ndo nɛ dia oma lo lolango layɛ mbakadiayala ndo mbakadiatongama.”—Ɛnyɛlɔ 4:11, NW.
7. (a) Ondjelo atɛnde wanɛ wodjashi laa nkɛtɛ dia vɔ ntsha? (b) Naa etenyi kɛmɔtshi k’ohomba k’olimu aso w’olakanyelo?
7 Onde ɛtɛkɛta ɛsɔ mbutɛka anto wa nshi nyɛ dui dimɔtshi? Eelo. Naka vɔ nangaka monga la lɔsɛnɔ lo Diolelo di’Ɛnɔnyi Kinunu, kete vɔ pombaka ndjela ɛtɛkɛta waki ‘ondjelo watafumbɔ l’atei w’olongo’ ko tataka ate: “Nyuki [Nzambi] woma, nyûtumbuli, ne dia unya andi w’elumbwelu ambukuka.” (Enyelo 14:6, 7) Oyango ɔmɔtshi woleki woke w’olimu w’olakanyelo wa Bible wakamba Ɛmɛnyi wa Jehowa ele kimanyiya “wanɛ wodjashi laa nkɛtɛ” dia vɔ mbeya ndo tɛmɔla Jehowa, mbɔlɛmiya lo woho wende Otungi, ndo nɛmbɛlɛmbɛ lowandji lande la losembwe l’otema ɔtɔi.
Ɔn’ɔkɔkɔ Lasungana Nɛmiyama
8. (a) Ngande wɔkɔndwami Kristo lo tshapita ya 5 la ya 6? (b) Wanɛ tshɛ wahokamɛ losango l’ɔngɛnɔngɛnɔ kokaka mbɔsa wetshelo akɔna oma l’ɛnɛlɔ kɛsɔ?
8 Totshapita tohende tahɔnyi, ya 5 la ya 6, nembetshiyaka Yeso Kristo oko Ɔn’ɔkɔkɔ lɛnama ɔnɛ nde mbakoka ndjihola wɔɔmbɔ ɔmɔtshi wele la totshapa esambele, ko mbishola lo ɛtɛkɛta wa didjidji akambo wasalema lo nshi yaso nyɛ. (Enda lo Joani 1:29.) Dui di’oma l’olongo mbutɛka Ɔn’ɔkɔkɔ ɔsɔ wa didjidji ɔnɛ: “We kukuki dia nungula wombo a buku one, ndu dia ndjihula tulimbitelu tawo, ne dia we akadiakema, akasumbela [Nzambi] antu la dikila diaye: w’uma lu wauhu tshe ndu w’eteketa tshe, ndu w’uma lu wehu tshe, la waulelu tshe. We kakawaete uku diulelu la elombedi le [Nzambi kaso]; vo [wayolɛ nkɛtɛ].” (Enyelo 5:9, 10) Ɛnɛlɔ kɛsɔ kekɔ la wetshelo w’ɔnɛ, oma lo dikila dia Kristo diakatshulwama, anto amtɔshi woye oma lo weho tshɛ w’anto wambelamɛ dia toyala kâmɛ la nde l’olongo ndo ‘mbolɛ nkɛtɛ oko nkumi ya dikanga.’ (Enda lo Enyelo 1:5, 6.) Lofulo lawɔ shikikɛma lo totshapita t’osha la ntondo, lo dibuku di’Enyelo.
9. Ngande wolembetshiyami Kristo lo tshapita ya 6?
9 Lo ɛnɛlɔ kekina, Kristo nembetshiyama oko onto lɔlɔtshi dɛmbɔ dia koso ko mbahema lâdiko dia falasa ka wɛma, atatshu dia ‘tɔlɛndja ndo dia toshidiya ɛlɛmbiɛlɔ kande.’ Diɛsɛ ko nde ayɔlɛmbia awui wa kɔlɔ wolembetshiyami lo didjidji oma le ambahemi akina asato wa falasa wa lo dibuku di’Enyelo, wanɛ wele wâhemelo awɔ wa falasa akela ata, ndjala ya kasha, ndo lɔnyɔi le anto tatɛ oma l’ɔnɔnyi wahakoke mbohamɛ wa 1914. (Enyelo 6:1-8) Ɔkɛndɛ wa lânde wa Kristo, Ɔn’ɔkɔkɔ wa Nzambi, lo panda k’anto ndo l’ekotshamelo k’asangwelo wa Jehowa w’amɛna efula ekɔ ɔtɛ a dui ɔmɔtshi woleki ohomba wa l’olimu w’olakanyelo wa Bible wakamba Ɛmɛnyi wa Jehowa.
10. (a) Dui diakɔna di’ohomba efula diatanaso lo tshapita ya 7? (b) Kristo ngande wakandelɛ wanɛ walongola Diolelo?
10 Tshapita ya 7 yekɔ mɛtɛ la losango l’ɔngɛnɔngɛnɔ. Paka lo dibuku di’Enyelo to mbofundami lofulo la wanɛ wakelɛ Yeso ɔnɛ ‘lemba la tshitshɛ l’ɛkɔkɔ’ walongola Diolelo oma le She Ɔn’ɔkɔkɔ. (Luka 12:32; 22:28-30) Anto asɔ wakadjama tolembetelo oma le Jehowa Nzambi l’ekimanyielo ka nyuma kande. (2 Koreto 1:21, 22) Ɔpɔstɔlɔ Joani, ɔnɛ lakalongola dibuku di’Enyelo, ekɔ lo shikikɛ ate: “Dimi lakuki okone aki efula ka wane wakadjama tulimbitelu. Wane wakadjama tulimbitelu waki nunu lukama la akumi anei la nei.” (Enyelo 7:4) Lofulo lɔsɔ la shikaa lakanyomoyoshikikɛma lo tshapita ya dikumi l’anɛi oko lofulo la wanɛ tshɛ ‘wakasombama oma l’atei w’anto’ dia vɔ tôlɛ kâmɛ la Ɔn’ɔkɔkɔ lo Dikona dia Siɔna. (Enyelo 14:1-4) Kânga mbele ɛtɛmwɛlɔ wa Lokristokristo hawolembetshiya lofulo lɔsɔ dimɛna ko ndakanyaka ndo awui wahokɛma ɔtɛ l’ekolo dia dinyadinya lofulo lakɔ, nomb’ewo kɛmɔtshi k’akambo wa Bible kelɛwɔ Ethelbert Bullinger ekɔ lo mbuta ɔnkɔnɛ lo dikambo dia lofulo lɔsɔ: “Ɛtɛkɛta ɛsɔ mɛnyaka dui diele mɛtɛ: ɔsɔ ekɔ lofulo la shikaa ndo leyama, otshikitanyi la lofulo laheyama la lo tshapita yakɔ yâmɛ.”
11. (a) Naa losango l’ɔngɛnɔngɛnɔ latanema lo tshapita ya 7? (b) Elongamelo kakɔna kele la ntondo ka wanɛ wele lo ‘lemba la woke’?
11 Lofulo lakɔna lɔsɔ laheyama lakatɛkɛtaka yɔnɛ Bullinger na? Ɔpɔstɔlɔ Joani akafunde ɔnkɔnɛ lo divɛsa dia divwa: “L’okongo w’akambu aso, dimi lakendi, lakenyi ului a wuki w’antu waheyama mbala, uma lu wedja tshe, ndu uma lu wauhu tshe ndu uma lu weuhu w’antu tshe, ndu w’eteketa tshe.” (Enyelo 7:9) Waa na wakenga olui ɔsɔ wa woke, dihole diakɔna diele lawɔ nshi nyɛ la ntondo ka Nzambi ndo akongɛwɔ lo nshi yayaye? Okadimwelo wa wembola ɛsɔ lo dibuku di’Enyelo ekɔ mɛtɛ lokumu l’ɔlɔlɔ le wanɛ wodjashi laa nkɛtɛ. Ɔnkɔnɛ mbadiaso lo Bible: “Vo weli wane wambuya uma lu pa ka wuki, wakotsha ahondo, wakawedia la dikila dia Ona-Okoko.” Lam’ele vɔ wekɔ la mbetawɔ lo dikila dia Kristo diakatshulwama, vɔ wayokokamɛ lam’ayoya ‘fɔnu ka woke.’ Kristo ‘ayowalɔmbɔla otsha lo tɛkɔ di’ashi wa lɔsɛnɔ. Ndo Nzambi ayokitola asɔi tshɛ oma lo washo awɔ.’ (Enyelo 7:14-17) Mɛtɛ, miliyɔ y’anto wasɛna nshi nyɛ kokaka monga l’atei wa lemba lɔsɔ l’anto waheyama ndo mbadia wanɛ wayokondja eko lam’ayokomɛ andja ɔnɛ wa kɔlɔ. Nkumekanga Yeso Kristo ayowalɔmbɔla otsha lo lɔsɛnɔ la pondjo lanɛ laa nkɛtɛ nɛ dia vɔ wayonga anto wayondôlɛka lo Lowandji lande l’Ɛnɔnyi Kinunu. Onde ɔsɔ keema lokumu l’ɔlɔlɔ oka?
‘Dombwelo diande diele mɛtɛ ndo losembwe’
12, 13. (a) Awui akɔna watanema lo tshapita ya 8 polo ya 19? (b) Bonde kele akanga w’etema wosembwe hawokoke ndjâkiyanya l’ɔtɛ wa prɔfɛsiya shɔ?
12 Tshapita ya 8 polo ya 19 mbaleka mbɔsama le anto efula dia vɔ mbuta ɔnɛ dibuku di’Enyelo, kana Oshweelo, diekɔ dibuku diewoya dito kana mpokoso kɛmɔtshi ka wɔma efula. Tɔ tekɔ la nsango ya wolo y’elombwelo (yolembetshiyami lo didjidji oma lo wodelo wa amama, asui, ndo alɔnga wa nkɛlɛ ka Nzambi), elombwelo kahomba komɛ tenyi diotshikitanyi di’andja wa Satana. Dombwelo sɔ diayosalema ntondo le ɛtɛmwɛlɔ wa kashi (“Babilona ka Wuki”), oma lâsɔ ko le atshunda wa pɔlitikɛ wahalɛmiya Nzambi, wanɛ wolembetshiyami lo didjidji oko nyama ya pango.—Enyelo 13:1, 2; 17:5-7, 15, 16.a
13 Totshapita tɔsɔ kɔndɔlaka woho wakɛdiama olongo lam’akawakadja Satana nde l’ɛdiɛngɛ ande oya l’ahole wosukanyi la nkɛtɛ. Paka dui sɔ mɛtɛ mbɛ̂nya bonde kele andja ɔnɛ wakɔtɔ lo shɔkɔ yaki komonga ntondo tatɛ oma lo 1914. (Enyelo 12:7-12) Totshapita tɔsɔ nto nembetshiyaka lo ɛtɛkɛta wa didjidji elanyelo k’atshunda wa Satana wa lanɛ laa nkɛtɛ. (Enyelo 19:19-21) Onde akanga w’etema wosembwe kokaka ndjâkiyanya l’ɔtɛ w’akambo asɔ wa mamba? Ndoko yema tshitshɛ, nɛ dia lam’ayosalemaka dombwelo diaki Nzambi, alembe amɔtshi wa l’olongo wayodaka tokoko ɔnɛ: “Nyotombole Owandji! Eko, lotombo ndo nkudu wayaale leende! Olomboyeelo waakinde weekɔ wa nsɔlɔ ndo wa losembwee!”—Oshweelo 19:1, 2, Dyookaneelo dy’Oyooyo.
14, 15. (a) Ngande wayosalema ekomelo k’andja ɔnɛ lo yoho ya losembwe? (b) Lande na kele etenyi kɛnɛ ka dibuku di’Enyelo pombaka monga dui di’ɔngɛnɔngɛnɔ le akanga w’etema wosembwe?
14 Jehowa hatela andja wa losembwe la ntondo ka minya wanɛ tshɛ walanya nkɛtɛ. (Enyelo 11:17, 18; 19:11-16; 20:1, 2) Koko, ndoko onto kana tshunda dimɔtshi dia pɔlitikɛ, diele la lowandji kana la wolo wa ntsha dikambo sɔ. Paka Jehowa nde la Nkumekanga ndo Shushi yakandasɔnɔla, Yeso Kristo, mbakoka ntsha dikambo sɔ la losembwe.—2 Tesalonika 1:6-9.
15 Oko wɛnamadiɔ hwe lo dibuku di’Enyelo, Jehowa ekɔ lo sangoya dia komiya andja ɔnɛ wa kɔlɔ. Ɔsɔ pombaka monga dui di’ɔngɛnɔngɛnɔ le apami ndo wamato wanɛ ‘wakuma akumu ndo walela lam’ɛnawɔ akambo wa wɔnɔnyi wele lo salema.’ (Ezekiyele 9:4) Dikambo sɔ pombaka mbaɛnya ohomba w’aha tshimbatshimba kânga yema dia ndjaɔtɔnganyiya la leeta laki ondjelo waki la losango l’ɔngɛnɔngɛnɔ ko tataka ate: ‘Nyôke Nzambi wɔma . . . dikambo wonya w’elombwelo kande wambokoka, ɔnkɔnɛ nyɔtɛmɔlɛ Ɔnɛ lakatonge olongo la nkɛtɛ.’ (Enyelo 14:7) Anto wa ngasɔ watɛmɔlɛ ndo wakambe Jehowa l’ɔnɔngɔ w’Ɛmɛnyi ande, ‘wanɛ wayela adjango wa Nzambi ndo wele l’olimu wa sambisha akambo wendana la Yeso.’—Enyelo 12:17.
Lowandji l’ɛnɔnyi kinunu la lotombo
16. (a) Bonde kele ɛtɛmwɛlɔ wa Lokristokristo hawetawɔ elongamelo ka Lowandji l’Ɛnɔnyi Kinunu? (b) Lande na ketawɔ Ɛmɛnyi wa Jehowa ɔnɛ dɔmbɛlɔ di’ɛnyɛlɔ diayokotshama?
16 Lo tshapita ya 20 polo ya 22 ya dibuku di’Enyelo, Afundelo toshaka ɔkɔkɔ wa monga l’elongamelo lo Ɛnɔnyi Kinunu. Lo Bible k’otondo, l’etenyi kɛsɔ keto mbatɛkɛtawɔ dia ntambe kɛmɔtshi k’ɛnɔnyi kinunu wayonga etatelo k’etena ka pondjo pondjo k’ɔngɛnɔngɛnɔ l’olongo ndo laa nkɛtɛ. Ɛtɛmwɛlɔ wa Lokristokristo wakatone elongamelo ka Lowandji l’Ɛnɔnyi Kinunu. Lam’ele elakanyelo wa l’ɛtɛmwɛlɔ mbutaka ɔnɛ anto w’ɛlɔlɔ ntshɔka l’olongo ko anto wa kɔlɔ ntshɔka l’ifɛrnɔ, vɔ hawolakanya kânga yema dia paradiso ka laa nkɛtɛ. Dɔmbɛlɔ di’ɛnyɛlɔ dialɔmba dia ‘lolango [la Nzambi] latshame laa nkɛtɛ oko l’olongo’ diaya bu ndoko ohomba kânga yema le efula k’ase ɛtɛmwɛlɔ wa Lokristokristo. (Mateu 6:10) Koko, Ɛmɛnyi wa Jehowa hawotshe ngasɔ. Vɔ mbetawɔka l’eshikikelo tshɛ ɔnɛ Jehowa Nzambi kotonga nkɛtɛ “utungatunga,” koko akayitonge “dia antu mbidjase loko.” (Isaya 45:12, 18) Ɔnkɔnɛ, prɔfɛsiya y’edjedja, dɔmbɛlɔ di’ɛnyɛlɔ ndo elongamelo ka lo dibuku di’Enyelo k’Ɛnɔnyi Kinunu tshɛ mbɔtɔnɛka. Lo Lowandji lande l’Ɛnɔnyi Kinunu, Kristo ayosala tshɛ dia lolango la Jehowa ntshama laa nkɛtɛ ɔnkɔnɛ watshamalɔ l’olongo.
17. Kakɔna kɛnya ɔnɛ “deku kinunu” kana “yinga y’ɛnɔnyi” pombaka mbɔsama oko lofulo la mɛtɛ mɛtɛ?
17 Tshɛkɛta “deku kinunu” kana “yinga y’ɛnɔnyi” tanemaka mbala shamalo lo avɛsa esambele wa ntondo wa lo Enyelo (kana Oshweelo) tshapita 20. Tolembete dia, l’ɔtɛkɛta ɔmɔtshi wakafundama Bible l’etatelo (lo Grɛkɛ), lo mbala shamalo shɔ, ɛnɔnyi kinunu fundama mbala nyɛi lo yoho yɛnya ɔnɛ ɔsɔ ekɔ lofulo l’ɛnɔnyi la shikaa ndo leyama, koko aha lofulo l’ɛnɔnyi waheyama komelo kawɔ. Otshikitanyi la kanyi yalanga waa nomb’ewo ya lo Lokristokristo sho monga layɔ, ɔsɔ ekɔ lofulo l’ɛnɔnyi la shikaa ndo la mɛtɛ mɛtɛ, dikambo hawotshi ɔnɛ ɛnɔnyi nunu kana tinga t’ɛnɔnyi. Kakɔna kayosalema lo Ɛnɔnyi Kinunu ɛsɔ na? Ntondotondo, Satana ayokelekama l’edja k’ɛnɔnyi ɛsɔ tshɛ. (Enyelo 20:1-3; enda ndo lo Heberu 2:14.) Lokumu l’ɔlɔlɔ mɛtɛ lɔsɔ ya!
18. (a) Lande na kakoka Ɛnɔnyi Kinunu mbelamɛ ɔnɛ “lushi” l’elombwelo? (b) Kakɔna kayosalema l’ekomelo k’ɛnɔnyi kinunu?
18 Lam’ele ‘wanɛ wôlɛ kâmɛ la [Kristo] ɛnɔnyi kinunu oko nkumi ya dikanga’ wakakondja ‘wolo wa nomboya,’ etena kɛsɔ mɛtɛ kekɔ “lushi” l’elombwelo l’ɛnɔnyi kinunu. (Enyelo 20:4, 6; enda ndo lo Etsha 17:31; 2 Petero 3:8.) Wanɛ wakavu wayolɔ ndo, kâmɛ la wanɛ wayohandɔ lo ‘fɔnu ka woke,’ wayoyolomboyama la losembwe lo ndjela etsha wakiwɔ wa lo nshi shɔ. (Enyelo 20:12, 13) L’ekomelo k’ɛnɔnyi kinunu, wayotshungola Satana dia nde ndjodja anto l’ohemba wa komelo. L’ɔkɔngɔ wa lâsɔ, Satana nde l’ɛdiɛngɛ ande kâmɛ la wanɛ wayoyɔtɔmbɔkɔ nto laa nkɛtɛ ko mboyela wayolanyema pondjo pondjo. (Enyelo 20:7-10) Anto wahatɔkɔ l’ohemba ɔsɔ, nkombo yawɔ yayofundama lo “buku dia lumu” ndo hayodimɔki pondjo oma lɔkɔ, vɔ wayokambɛka ndo wayɔtɛmɔlaka Jehowa lo paradiso ka laa nkɛtɛ.—Enyelo 20:14, 15; Osambu 37:9, 29; Isaya 66:22, 23.
19. (a) Lande na kakokaso shikikɛ ɔnɛ alaka w’amɛna efula wofundami lo dibuku di’Enyelo wayokotshama aha onyake? (b) Kakɔna kayotɛna lo sawo diayela?
19 Ɔsɔ ekɔ nsango y’ɔngɛnɔngɛnɔ yofundami lo dibuku di’Enyelo. Ɔsɔ bu alaka w’anyanya w’oma le anto. Ɔpɔstɔlɔ Joani akafunde ate: “One lakadjashi lu kiti ka diulelu akati ati: Ulungi, dimi lambete diango tshe eyuyu. Ndi akati ati: Ufundi, ne dia aui ako weli kolamelu la mete.” (Enyelo 21:5) Ahombaso ntsha dia ndo sho mɛna ekotshamelo ka nsango y’ɔngɛnɔngɛnɔ shɔ na? Dibuku di’Enyelo diekɔ l’alako efula washadiɔ wanɛ walanga ngɛnyangɛnya Nzambi. Naka sho ndjela alako asɔ, kete tayokondja ɔngɛnɔngɛnɔ waha la komelo, oma ko nshi nyɛ edja ndo pondjo pondjo, oko wayotodiɛna lo sawo diayela.
[Footnote]
a Dia wɛ mɛna woho wakawalembetshiya dibuku di’Enyelo di’otondo, enda lo La Révélation : le grand dénouement est proche !, dibuku diakatombe l’ɔnɔnyi wa 1988 oma le Watchtower Bible and Tract Society of New York, Inc.
[Caption]
[Footnote]
[Caption]
Wembola w’ovuswelo
◻ Naa akambo amɔtshi wa mɛtɛ w’etshina watanema lo dibuku di’Enyelo tshapita ya 4 polo ya 6 wele etenyi k’ohomba ka losango l’ɔngɛnɔngɛnɔ?
◻ Naa nsango y’ɔngɛnɔngɛnɔ yele lo Enyelo tshapita ya 7?
◻ Bonde kele akanga w’etema wosembwe hawokoke ndjâkiyanya l’ɔtɛ wa nsango y’elombwelo ya lo dibuku di’Enyelo?
◻ Lo yoho yakɔna yayonga Ɛnɔnyi Kinunu “lushi” l’elombwelo?
[Caption]
[Study Questions]
[Caption on page 24]
[Picture on page 24]
Nkumekanga Yeso Kristo ayokomiya ata, minya ndjala ya kasha la nyɔi oma lo nkɛtɛ k’otondo