Diolelo diaki Nzambi nembetshiyaka lowandji l’oyoyo la lanɛ la nkɛtɛ
‘Diolelo sɔ . . . diayɔtɛtshatɛtsha waolelo akina tshɛ, diayâshila oshiki, ko diɔ dɔamɛ diayotshikala pondjo.’—DANYELE 2:44.
1. Mbetawɔ kakɔna kakokaso monga latɔ lo Bible?
BIBLE ekɔ ehomɔ kayaeyanya Nzambi le anto. Ɔpɔstɔlɔ Paulo akafunde ate: “Ne dia lam’akanyalungula diui dia [Nzambi] diakatanyutela, nyu kudietawo uku diui di’antu, keli nyakadietawo uku diui dia mete, [oko ɔtɛkɛta wa Nzambi].” (1 Tesalonika 2:13) Bible tewoyaka kɛnɛ tshɛ keso l’ohomba wa mbeya lo kɛnɛ kendana la Nzambi oko: lonto lande, asangwelo wakinde, ndo kɛnɛ katɔlɔmbande. Tɔ kekɔ l’alako woleki tshɛ amɛna wendana la lɔsɛnɔ la nkumbo ndo la lɔkɛwɔ lahomba monga laso lushi la lushi. Tɔ kekɔ nto la prɔfɛsiya y’eshika yele mɔtshi yambokotshama, kina yekɔ lo kotshama nshi nyɛ ndo kina nto yayokotshama lo nshi yayaye. Sho kokaka mbuta aha la tamu ɔnɛ, ‘efundelo tshɛ wakasambiyama oma le Nzambi ndo wekɔ ohomba dia mbetsha anto, mangola, mbidja akambo l’ɔnɔngɔ, mbaekiya l’akambo w’ɔlɔlɔ, dia onto a Nzambi ndowana ndo mbeya ntsha elimu tshɛ w’ɔlɔlɔ.’—2 Timote 3:16, 17.
2. Ngande wakake Yeso epole ɔsɛkɛ lo ɔtɛ a dui wa lo Bible?
2 Dikambo dioleki tshɛ ohomba lo Bible ko ɔtɛ a dui wa lɔkɔ: mbut’ate, woho wele oma l’ekimanyielo ka Diolelo diande dia l’olongo, Nzambi ayoyindja lowandji lande, ndo mɛnya dia nde mbele la lotshungɔ la mbôlɛ. Dikambo sɔ mbakaleke Yeso mbika epole ɔsɛkɛ l’olimu ande. Bible mbutaka ɔnɛ: ‘[Nde] akatatela sambisha ata ate: nyokadimole etema nɛ dia diolelo dia l’olongo diaya suke.’ (Mateu 4:17) Nde akɛnya dihole diahomba Diolelo monga ladiɔ lo nsɛnɔ yaso, lo tolaka ɔnɛ: ‘Nyotetemale nyanga ntondo Diolelo la losembwe ladiɔ.’ (Mateu 6:33) Nde akɛnya nto ohomba wa Diolelo sɔ lo mbetsha ambeki ande dia nɔmba Nzambi ɔnɛ: ‘Diolelo diayɛ diaye. Lolango layɛ latshame la nkɛtɛ oko watshamalɔ l’olongo.’—Mateu 6:10.
Lowandji l’oyoyo la lanɛ la nkɛtɛ
3. Bonde kele Diolelo diaki Nzambi dikambo di’ohomba efula le so?
3 Naka Diolelo diaki Nzambi diekɔ ohomba efula ngasɔ le anto, ele nɛ dia kem’edja diɔ diayanga tshikitanya mbala kakɔ ɔtɔi lo pondjo yoho nyɛ yalɔmbwama nkɛtɛ kɛnɛ. Prɔfɛsiya ka lo Danyele 2:44, mbutaka ɔnɛ: “Lu nshi ya nkhumi ya dikanga yako [yôlɛ nshi nyɛ la nkɛtɛ], [Nzambi] leli l’ulungu ayutundja diulelu [ɛlɔmbwɛlɔ k’oma l’olongo] diahalanaki pundju. Dio hadiuyala l’okongo a wudja ukina. Dio diayulanya waulelu akina tshe, diayâshila ushiki [mandji ya la nkɛtɛ], ku dio diame diayutshikala pundju.” Etena kayolɛ Diolelo diaki Nzambi dia l’olongo nkɛtɛ k’otondo, anto hawɔlɔmbɔlaki nkɛtɛ kɛnɛ nto pondjo. Mandji y’anto yele lo kiɔkɔ ya diatɔnelo ndo yahela anto ɔngɛnɔngɛnɔ yayonyɛma lo pondjo.
4, 5. (a) Lande na kele Yeso mboleki sunganaka dia monga Nkumekanga ka Diolelo? (b) Ɔkɛndɛ akɔna wayonga la Yeso kem’edja nto na?
4 Omboledi wa ntondo wa lo Diolelo dia l’olongo ele Yeso Kristo ɔnɛ lambɔsɔnama oma le Jehowa, ndo nde mɛtɛ mbaleka sungana l’ɔkɛndɛ ɔsɔ. La ntondo ka nde ndja lanɛ la nkɛtɛ, nde aki l’olongo oko ‘okambi wa kɔmba’ waki Nzambi, enondo wa diangɔ tshɛ diakatonge Nzambi. (Tukedi 8:22-31) ‘Nde ekɔ efanelo ka Nzambi ɔnɛ lahɛnama, enondo wa diangɔ tshɛ diakatongama; nɛ dia lo tshimbo yande mbakatongama diangɔ tshɛ oyadi l’olongo kana la nkɛtɛ.’ (Kolosai 1:15, 16) Lam’akinde lanɛ la nkɛtɛ, Yeso akasalaka paka lolango laki Nzambi. Nde akakikɛ ehemba woleki tshɛ wolo ndo akavu aha la shisha kɔlamelo yande otsha le She.—Joani 4:34; 15:10.
5 Oma lo woho wakandatshikala la kɔlamelo polo lo nyɔi mbakolwama Yeso dia tɔsɛna l’olongo ndo sɔnama oma le Nzambi dia monga Nkumekanga ka lo Diolelo diakinde dia l’olongo. (Etsha 2:32-36) Oko Nkumekanga ka lo Diolelo, Kristo Yeso ayonga l’ɔkɛndɛ wa woke, ɔkɛndɛ wa nɔmbɔla nyemba ya ditongami dia lo nyuma diele la nkudu dia kumiya la mandji y’anto oma lanɛ la nkɛtɛ kâmɛ ndo akambo tshɛ wa kɔlɔ. (Tukedi 2:21, 22; 2 Tesalonika 1:6-9; Enyelo 19:11-21; 20:1-3) Oma lâsɔ, Diolelo diaki Nzambi dia l’olongo dialɔmbwama oma le Kristo diayonga lowandji l’oyoyo, ɔtɔi wa lowandji layɔlɔmbɔla nkɛtɛ k’otondo.—Enyelo 11:15.
6. Woho akɔna w’ɛlɔmbwɛlɔ wakokaso nongamɛ oma le Nkumekanga ka Diolelo?
6 Lo kɛnɛ kendana la Nkumekanga k’oyoyo ka lanɛ la nkɛtɛ, Ɔtɛkɛta waki Nzambi mbutaka ɔnɛ: “Wakawusha luwandji, lutumbu, la diulelu dia antu tshe, wedja, la antu w’eteketa tshe ndjala l’okongo andi.” (Danyele 7:14) Lam’ele Yeso ayokoya ngandji kaki Nzambi, anto wayonga la wɔladi ndo l’ɔngɛnɔngɛnɔ w’efula l’ɛlɔmbwɛlɔ kande. (Mateu 5:5; Joani 3:16; 1 Joani 4:7-10) “Diulelu diandi diayutahamanelaka, la ki kandi huyala l’ekumelu . . . dia dishikike la dikikitsha uma lu akambu w’usimbwi.” (Isaya 9:7, Bible k’Ekila) Ayonga mɛtɛ diɛsɛ dia mamba dia monga la Nkumekanga kalɔmbɔla la ngandji, la losembwe, ndo la sambo k’ɔlɔlɔ! Diakɔ diata 2 Petero 3:13, ɔnɛ: “Keli ne dia daka diandi, mbalungamelasu ulungu w’uyuyu [Diolelo diaki Nzambi dia l’olongo] la kete y’uyuyu, [ekongelo k’oyoyo k’anto], lene udjashi akambu w’ololo.”
7. Ngande wakotshama Mateu 24:14 nshi nyɛ na?
7 Lo mɛtɛ Diolelo diaki Nzambi ekɔ lokumu loleki dimɛna tshɛ le anangi wa losembwe. Diɔ diakɔ diele, oko djembetelo yɛnya dia tekɔ lo sɛna lo ‘nshi y’ekomelo’ ya dikongɛ nɛ di’akambo dia kɔlɔ, Yeso akate ate: ‘Lokumu lɔnɛ l’ɔlɔlɔ la Diolelo layosambishama lo nkɛtɛ k’otondo oko ɔmɛnyi le wedja tshɛ, l’ɔkɔngɔ diko ekomelo kayoya.’ (2 Timote 3:1-5; Mateu 24:14) Lo ndjela prɔfɛsiya kɛsɔ, yɛdikɔ ya miliyɔ shamalo y’Ɛmɛnyi wa Jehowa yokahanyemi lo tshumanelo 90 000 lo wedja 234 wekɔ lo mbetsha miliyara ndekana ɔtɔi ka wenya ɔnɔnyi tshɛ dia mbewoya anto akina awui wendana la Diolelo diaki Nzambi. Sunganaka di’ahole awɔ w’ɔtɛmwɛlɔ mbelamɛ ɔnɛ Mbalasa ya Diolelo, nɛ dia lɛkɔ mbetshawɔ anto nganɛ wayonga lowandji l’oyoyo layaye.
Wanɛ wayolɛ kâmɛ la Kristo
8, 9. (a) Oma lende akɔsama wanɛ wayolɛ kâmɛ la Kristo? (b) Eshikikelo kakɔna kakoka monga laso lo kɛnɛ kendana l’ɛlɔmbwɛlɔ ka Nkumekanga la ka wanɛ wayolɛ la nde?
8 Kristo Yeso hatolɛ ndamɛ lo Diolelo dia l’olongo diaki Nzambi. Enyelo 14:1-4 akatatshi di’anto 144 000 wakahombe ‘sombama oma l’atei w’anto’ ndo mbolwama otsha lo lɔsɛnɔ la l’olongo. Lanɛ la nkɛtɛ, apami la wamato asɔ kombetawɔ di’anto mbakambɛ olimu; koko vɔ mbakakambɛ Nzambi olimu kâmɛ ndo anyawɔ anto la ndjakitshakitsha tshɛ. ‘Vɔ wayonga ɛlɔmbɛdi waki Nzambi ndo wa Kristo, ndo wayolɛ oko nkumi ya dikanga kâmɛ la nde ɛnɔnyi kinunu.’ (Enyelo 20:6) Lofulo lawɔ lekɔ l’ɛse k’efula lo liɛdika la lɔnɛ la ‘lemba la woke, lahakoke ndoko onto mbadia, loye oma lo wedja tshɛ ndo waoho tshɛ ndo oma l’ɛtɛkɛta tshɛ,’ wanɛ wayohandɔ lam’ayolanyema andja ɔnɛ. Ndo anto wa lo lemba lɔsɔ mbakambɛ Nzambi ‘olimu w’ekila yanyi tshɛ ndo otsho tshɛ,’ koko vɔ konongola leeta l’otsha l’olongo. (Enyelo 7:9, 15) Oko wewɔ ambolami wa Diolelo, vɔ mbakenga nkɛtɛ k’oyoyo.—Osambu 37:29; Joani 10:16.
9 Anto wa kɔlamelo wakasɔnɛ Jehowa dia tôlɛ l’olongo kâmɛ la Kristo wakahomana la weho tshɛ w’ekakatanu wa lo lɔsɛnɔ. Ndoko okakatanu ɔtɔi waki kopomana l’ɔmɔtshi a l’atei wa nkumi ya dikanga ndo ɛlɔmbɛdi ɛsɔ. Akambo wakahomana lawɔ asɔ ayoyakimanyiya efula dia vɔ mbeya nɔmbɔla anto. Kânga Yeso ndamɛ ‘akeke okitanyiya oma l’asui wakahomana lande.’ (Heberu 5:8) Kɛsɔ mbakakonya ɔpɔstɔlɔ Paulo lo mbuta ate: “Ne dia shu kema la olombedi a ladiku laheyi ntuka ketshi lu weodu asu, keli shu la olombedi a ladiku lakahimbama lu wehu tshe uku shu, keli kuntsha [pɛkato].” (Heberu 4:15) Sho mɛtɛ keketshamaka efula dia mbeya ɔnɛ l’andja w’oyoyo wosembwe waki Nzambi, anto wayɔlɔmbwama oma le nkumi ya dikanga ndo ɛlɔmbɛdi wele la ngandji ndo wayadja lo dihole di’anto akina!
Onde Diolelo diakikɔ lo sangwelo diaki Nzambi?
10. Bonde kele Diolelo dia l’olongo komonga lo sangwelo diaki Nzambi dia l’etatelo?
10 Onde Diolelo dia l’olongo diakikɔ lo sangwelo diaki Nzambi di’oma k’etatelo lam’akandatonge Adama la Eva? L’ɔkɔndɔ w’etongelo wele lo dibuku di’Etatelu, ndoko dihole diatɛkɛtawɔ dia Diolelo diakahombe mbolɛ anto. Jehowa ndamɛ mbakalɔmbɔlaka, ndo edja tshɛ kakiwɔ l’okitanyiya le nde, vɔ komonga l’ohomba wa lowandji lokina. Etatelu tshapita 1 mɛnyaka dia ondo Jehowa akasawolaka l’Adama la Eva oma lo tshimbo y’Ɔnande l’enondo la l’olongo. Ɔkɔndɔ ɔsɔ kambaka la tɔtɛkɛta tele oko: ‘Nzambi akawatɛ ate’ ndo ‘Nzambi akate ate.’—Etatelu 1:28, 29; Joani 1:1.
11. Naa etatelo ka kokele kakakondja anto?
11 Bible mbutaka ɔnɛ: ‘Nzambi akɛnyi dia kɛnɛ tshɛ kakandatonge kaki dimɛna efula.’ (Etatelu 1:31) Ɛngɔ tshɛ kaki l’ekambɔ k’Ɛdɛna kaki tshɛ kokele. Adama la Eva wakasɛnaka lo paradiso. Vɔ waki la wɛɔngɔ ndo l’alemba wa kokele. Vɔ wakakokaka sawola l’Otungi awɔ ndo Otungi awɔ akakokaka sawola la wɔ. Ndo, otowotshikala la kɔlamelo, tshike wotoyota ana wa kokele. Lâsɔ totowonga l’ohomba wa lowandji l’oyoyo l’oma l’olongo.
12, 13. Lam’ohofulanɛ anto wa kokele, bonde kele totondonga dikambo dia wolo le Nzambi dia sawolaka la wɔ vɔ tshɛ?
12 Oko wakahombe tafulanɛka nkumbo k’anto, ngande wohokokaka Nzambi sawolaka la wɔ vɔ tshɛ na? Tɔshi ɛnyɛlɔ ka tɔɔtɔ ta l’olongo. Tɔ tshumanyema l’elui lo loowa welɛwɔ ɔnɛ galaxies. Elui ɛmɔtshi wekɔ la miliyara ɔtɔi ka tɔɔtɔ. Ndo elui ekina wekɔ oko la miliyara 1 000 ya tɔɔtɔ. Wa nomb’ewo fɔnyaka dia ekɔ oko miliyara 100 ya elui wa tɔɔtɔ lo andja ɔnɛ wa loowa! Koko, Otungi mbutaka ɔnɛ: “Nyedia ashu anyu utsha l’ulungu, nyendi one lakatungi diango ne, latuditundjaka l’elui adio. Ndi atudietaka dio tshe kumbu. Uma lu wuki wa wulu andi, ndu uma lu khudu kandi k’utamanya, mbakidio kumpumbama nduku otoi.”—Isaya 40:26.
13 Lam’ele Nzambi kokaka tshikitanya diangɔ sɔ tshɛ dia l’olongo, lâsɔ nɔmbɔla lofulo l’anto lele tshitshɛ efula totondonga mɛtɛ dikambo dia wolo le nde. Kânga polo nd’ɛlɔ, miliyɔ y’ekambi wakinde wekɔ lo mbɔlɔmba lushi la lushi. Koko alɔmbɛlɔ asɔ komaka wonya akɔ wamɛ le Nzambi. Ɔnkɔnɛ, sawola l’anto tshɛ wa kokele totondonga ndoko dikambo dia wolo le nde. Tohondonga l’ohomba wa Diolelo di’oma l’olongo dia ndjâlɔmbɔla. Ɔsɔ mɛtɛ otonga diɛsɛ dia woke efula, dia nɔmbwama oma le Jehowa, sawolaka la nde aha lo tshimbo y’onto, ndo monga l’elongamelo kaha mvɔ, mbut’ate sɛnaka pondjo pondjo lo paradiso ka la nkɛtɛ!
‘Onto kema la wolo wa ndjalɔmbɔla’
14. Bonde kayonga anto l’ohomba wa lowandji laki Jehowa lo pondjo?
14 Oyadi anto kongaka kokele, vɔ wayongaka nshi tshɛ l’ohomba w’ɛlɔmbwɛlɔ kaki Jehowa. Lande na na? Nɛ dia Jehowa kombatonga l’akoka wa vɔ mbeya ndjalɔmbɔla vamɛ aha l’ekimanyielo kande. Ɔsɔ ekɔ tshondo y’ɔlɛmbɛ wendana l’anto tshɛ oko wakadisuya omvutshi Jeremiya ate: “[Jehowa] li, dimi mbeyaka nti: Untu hakendakenda lu mbuka uma lu wulu andi! Lam’atundokendakendaka, ndi ndame heyi nombola ekulu andi. We [Jehowa], unsuya, keli la sambu k’ololo, aha la kele kaye, we utukumbete anyanya.” (Jeremiya 10:23, 24) Ayonga enginya k’efula le anto dia vɔ fɔnya ɔnɛ vɔ kokaka nɔmbɔla anyawɔ dimɛna aha l’ekimanyielo ka Jehowa. Dikambo sɔ tshikitana l’oyango wakawatongama. Tayɛna akambo anɛ, naka anto ndjalɔmbɔla aha l’ekimanyielo kaki Jehowa: lokaki, lohetsho, awui w’esehe, awui wa ngala, ata, ndo nyɔi. ‘Onto ayolɛ onyande onto paka dia mbôsoya.’—Undaki 8:9.
15. Etombelo akɔna wambotɛna oma l’ɔsɔnwɛlɔ wa kɔlɔ wakasale ambutshi aso wa ntondo?
15 Lonyangu ko, ambutshi aso wa ntondo wakɛnyi dia kema ohomba Nzambi monga Omboledi awɔ, ndo wakasɔnɛ dia ndjalɔmbɔla vamɛ aha l’ekimanyielo kande. Diɔ diakɔ diakiwɔ kotshikala nto kokele. Etena kɛsɔ vɔ wakahombe takɔmɔka polo ndo lo nyɔi oko lokunyi lahɛta lambowotondja oma l’atshuka. Vɔ wakayokomaka oko ɛngɔ kambolana, ndo paka eongelo kɛsɔ mbakahombe monga ɛngɔ kakakoke anawɔ mpowɔ. (Romo 5:12) “[Jehowa] dive dia wuki, ulimu andi weli uluwanyi; . . . ne dia mbuka yandi tshe yele [losembwe] . . . . Vo wakayalanya le ndi, vo kema an’andi ntu, ne dia vo wakayala la awadi.” (Euhwelu k’Elembe 32:4, 5) Lo mɛtɛ, Adama la Eva wakasɛngiyama oma le etongami ka lo nyuma kakatɔmbɔkɔ kakayokomaka Satana, koko oko wakiwɔ la wɛɔngɔ wa kokele vɔ wakakoke mbikadja tokanyi tande ta kɔlɔ.—Etatelu 3:1-19; Jakoba 4:7.
16. Ngande wɛnya ɔkɔndɔ etombelo w’oma lo woho wakayange onto dia ndjalɔmbɔla ndamɛ aha l’ekimanyielo kaki Nzambi?
16 Ɔkɔndɔ mɛnyaka hwe etombelo w’oma lo lotshungɔ lakayange onto oma le Nzambi. Aya ɛnɔnyi nunu wele anto wambohemba weho tshɛ wa dɔmbwɛlɔ, wa eombelo ka falanga ndo wa dikongelo diendana la tshunda di’anto. Koko akambo wa kɔlɔ wekɔ lo tatetemala tsho ‘otsha lo kɔlɔ kamboleka tshɛ.’ (2 Timote 3:13) Kɛnɛ ketshi lo ntambe ka 20 mɛnyaka mɛtɛ k’akambo asɔ. Tɔ kakalole la mpetsho ya wolo, awui wa ngala woleki tshɛ, ata, ndjala ya kasha, wola, ndo asui lo yɛdikɔ yahatongaka ndoko lushi. Ndo kânga mbele ehamelo wakonge l’akambo wendana l’esakelo ka waa hemɔ, anto wekɔ lo tetemala paka la mvɔ. (Undaki 9:5, 10) Lo nyanga ndjalɔmbɔla vamɛ, anto wakayoyatadja lo djonga ya Satana ɔnɛ lele Bible mbelɛka ɔnɛ ‘jambizambi ya dikongɛ nɛ di’akambo.’—2 Koreto 4:4.
Losha l’onto ntsha kɛnɛ kalangande
17. Ngande wakahombe anto kamba la losha lakawasha Nzambi l’onto monga la lotshungɔ la sala kɛnɛ kalangande?
17 Naka Jehowa akatshike anto dia vɔ ndjela mboka kakawasɔnɛ, ele nɛ dia nde akatonge la dikoka dia diambo efula, dikoka diakɔ ko: lotshungɔ la sɔna kɛnɛ kalangawɔ. Ɔpɔstɔlɔ Paulo akate ate: ‘Lɛn’ele nyuma ka Jehowa, mbele ndo lotshungɔ.’ (2 Koreto 3:17) Ndoko onto lalanga monga oko Rɔbo, ɔnɛ lele onto okina mbôfundɛ kɛnɛ kahombande mbuta kana sala sekɔndɛ tshɛ. Kɛnɛ kakalongamɛka Jehowa le anto, ele dia kamba la losha lawɔ la ntsha kɛnɛ kalangawɔ oko etshundju w’anto, dia mɛna ohomba wa salaka lolango lande ndo mbokitanyiyaka. (Ngalatiya 5:13) Ɔnkɔnɛ, lotshungɔ lɔsɔ lakahombe monga l’elelo, nɛ dia naka hongi ngasɔ kete lɔ ndjotondja ofukutanu. Lɔ takalahombe tamba elelo w’ɛlɛmbɛ wakandje Nzambi.
18. Nzambi akandɛnya lo tshika anto dia vɔ kamba la lotshungɔ lawɔ la sɔna kɛnɛ kalangawɔ?
18 Lo nde tshika nkumbo k’anto dia tɔ ndjalɔmbɔla twamɛ, Nzambi akɛnya mbala ɔtɔi lo pondjo dia paka ɛlɔmbwɛlɔ kande mbeso l’ohomba. Yoho yande ya nɔmbɔla, ndo lowandji lande, mbele yoho yamɛ yele ɔlɔlɔ. Yɔ mbelaka ɔngɛnɔngɛnɔ w’efula, ndo lɔngɔnyu. Ekɔ ngasɔ nɛ dia timba ndo alemba aso wakatongama oma le Jehowa dia kamba dimɛna etena kakitanyiyawɔ ɛlɛmbɛ ande. ‘Dimi Jehowa, Nzambi kayɛ mbele Ɔnɛ latoketshaka dikambo dia wahɔ wakiyɛ wɛmɛ, Ɔnɛ lakɛnya mboka kahombayɛ kɛndakɛnda.’ (Isaya 48:17) Lotshungɔ la sɔna aha la tamba elelo w’ɛlɛmbɛ waki Nzambi totondonga dikambo dia wotsho, koko lɔ lotosha onto diɛsɛ dia ngɛnangɛna la weho wa mbo ya ndɛ yotshikitanyi, ahole wa mbidjasɛ, disɛlasɛla ndo mishiki, mbut’ate monga la lɔsɛnɔ la dimɛna efula, lele l’ɔngɛnɔngɛnɔ wa pondjo lo paradiso ka lanɛ la nkɛtɛ.
19. Naa ehomɔ kakamba Nzambi latɔ dia ndjaokanya l’anto?
19 Koko ɔsɔnwɛlɔ awɔ wa kɔlɔ wakayanganya anto la Jehowa, mbashishɛ eongelo ka kokele, olanelo wa demba ndo nyɔi. Ɔnkɔnɛ anto wakonge l’ohomba wa tshungɔ oma lo eongelo kɛsɔ ka kɔlɔ dia monga nto la diɔtɔnganelo di’ɔlɔlɔ la Nzambi oko anande w’apami ndo wa wamato. Ehomɔ kakasɔnɛ Nzambi dia kotsha dikambo sɔ ele Diolelo, ndo Otshungodi ko Yeso Kristo. (Joani 3:16) Oma l’ekimanyielo ka yɛdikɔ shɔ, wanɛ wayatshumoya l’otema ɔtɔi, oko ɔna lotshito la lo wɛɛla waki Yeso wayonga la diokanelo nto la Nzambi, ndo nde ayowaetawɔ nto oko anande.—Luka 15:11-24; Romo 8:21; 2 Koreto 6:18.
20. Ngande wayokotsha Diolelo sɔ sangwelo diaki Nzambi?
20 Weho akɔ tshɛ Jehowa ayokotsha lolango lande lanɛ la nkɛtɛ. (Isaya 14:24, 27; 55:11) L’ekimanyielo ka Diolelo diande diele l’anya wa Kristo, Nzambi ayoyindja tshɛ lo tshɛ lotshungɔ lele lande la monga Nkumi kaso. Diolelo sɔ diayokomiya mandji y’ana w’anto ndo y’ɛdiɛngɛ yolɛ lanɛ la nkɛtɛ, ko diɔ diamɛ diayolɛ oma l’olongo l’edja k’ɛnɔnyi kinunu. (Romo 16:20; Enyelo 20:1-6) Ko l’etena kɛsɔ, ngande wayɛnama woke woke wa yewo ya Jehowa ya mbeya nɔmbɔla na? Ndo l’ɔkɔngɔ w’ɛnɔnyi kinunu, ɔkɛndɛ akɔna wayonga la Diolelo? Tayɔsɛdingola wembola ɛsɔ lo sawo diayela.
Akambo w’ovuswelo
• Naa ɔtɛ a dui wa lo Bible?
• Waa na wayokenga ɛlɔmbwɛlɔ k’oyoyo ka lanɛ la nkɛtɛ?
• Bonde kele mandji y’anto walɔmbɔla aha l’ekimanyielo kaki Nzambi hawotondoyaki pondjo na?
• Ngande wahomba anto kamba la lotshungɔ lawɔ la sala kɛnɛ kalangawɔ?
[Osato wa lo lɛkɛ 8]
Wetshelo waki Yeso wakakaka epole ɔsɛkɛ lo lowandji laki Nzambi lo tshimbo ya Diolelo
[Esato wa lo lɛkɛ 10]
L’oseka wodja tshɛ, dikambo dioleki ohomba le Ɛmɛnyi wa Jehowa ele mbetsha anto akambo wa Diolelo
[Esato wa lo lɛkɛ 12]
Ɔkɔndɔ mɛnyaka etombelo wa kɔlɔ wa lotshungɔ lakayange onto oma le Nzambi
[Efundelo wɛnya kanga]
WWI asɔlayi: Photo U.S. National Archives; pango ka lokanu: Oświęcim Museum; ɔna: FƆTƆ K’ONU 186156/J. Isaac