Totetemale Kamba La Kɛnɛ Kamboteka

“Nyutshaki akambu wakanyeyi la wakanyuki ndu wakanyenyi le mi. Ku [Nzambi k]a ki ayuyala la nyu.”​—FILIPI 4:9.

1, 2. Onde Bible kekɔ la shɛngiya lo nsɛnɔ y’anto wasɛma dia wekɔ atɛmɔdi waki Nzambi? Lembetshiya.

“ƆTƐMWƐLƆ Wekɔ lo Tatetemala Pama, Koko Lɔkɛwɔ l’Ɔlɔlɔ Lekɔ lo Tatetemala Shishɔ.” Ɔtɛ wa dui wa lo jurunalɛ Emerging Trends ɔsɔ mɛnyaka lo tshena pe etombelo w’oma l’ɛkɔnya wakasalema lo wodja w’États-Unis. Mɛnamaka dia lo wodja ɔsɔ lofulo l’anto watshɔ lo mvudu ya Nzambi ndo wata ɔnɛ ɔtɛmwɛlɔ mbɔsaka dihole di’ohomba efula lo lɔsɛnɔ lawɔ lambodɛ efula. Koko, alapɔlɔ w’oma l’ɛkɔnya ɛsɔ mbutaka dia: “Kânga mbediɔ ngasɔ, ase Amɛrikɛ efula hawetawɔ shɛngiya yele l’ɔtɛmwɛlɔ lo nsɛnɔ y’anto kana lo tshunda di’anto di’otondo.”

² Ɔsɔ kema dikambo dieta paka lo wodja ɔtɔi oto. L’andja w’otondo, efula k’anto wasɛma dia vɔ mbetawɔka Bible ndo ɔnɛ wekɔ atɛmɔdi wa Nzambi hawetawɔ di’Afundelo monga la shɛngiya ya mɛtɛ lo nsɛnɔ yawɔ. (2 Timote 3:5) Ɔnɔmbɔdi w’olui ɔmɔtshi w’anyanginyangi akate ate: “Sho takɔshi Bible la nɛmɔ efula, koko dia mbetsha wenya dia kiada, kieka ndo kamba la kɛnɛ katatɔ ekɔ dikambo di’edjedja, mbut’ate diambeta loowe.”

3. (a) Shɛngiya yakɔna yele la Bible le wanɛ wakoma Akristo wa mɛtɛ? (b) Ngande wakamba ambeki waki Yeso la dako diele lo Filipi 4:9?

³ Koko aha ngasɔ mbediɔ le Akristo wa mɛtɛ. Okambelo wa l’alako w’oma l’Ɔtɛkɛta wa Nzambi ambela etshikitanu efula l’ekanelo kawɔ ndo lo lɔkɛwɔ lawɔ. Ndo lonto l’oyoyo lakɛnɛmɔlawɔ mɛnamaka esadi eto le anto. (Kolosai 3:5-10) Le ambeki wa Yeso, Bible bu dibuku diakawakitsha tsho lo luudu diaya otoko po, mbut’ate diahawakambe ladiɔ. Lo yoho yotshikitanyi Ɔpɔstɔlɔ Paulo akatɛ Akristo wa la Filipi ate: “Nyutshaki akambu wakanyeyi la wakanyuki ndu wakanyenyi le mi. Ku [Nzambi K]a ki ayuyala la nyu.” (Filipi 4:9, sho mbenganyisha alɛta ango) Akristo hawokomɛ tsho lo mbetawɔ akambo wa mɛtɛ wa l’Ɔtɛkɛta wa Nzambi. Vɔ kambaka la kɛnɛ kekawɔ ndo tetemalaka la kamba l’alako wa lo Bible, lo nkumbo, l’ahole wakambawɔ elimu, l’etshumanelo ndo l’akambo akina wa lo lɔsɛnɔ.

4. Lande na kele ekɔ wolo dia kamba l’ɛlɛmbɛ waki Nzambi?

⁴ Kamba l’ɛlɛmbɛ ndo l’atɔndɔ waki Nzambi bu yana ya dikambo. Tekɔ lo nsɛna l’andja walɔmbwama oma lo wolo wa Satana Diabolo, ɔnɛ lele Bible mbowelɛka ɔnɛ “etemolatemola ka la kete nye.” (2 Koreto 4:4; 1 Joani 5:19) Koko, ekɔ ohomba sho ndjalama oma l’ɛngɔ tshɛ kakoka toshimba dia sho tetemala monga la kɔlamelo otsha le Jehowa Nzambi. Ngande wakokaso tetemala monga la kɔlamelo?

Tokime “lokongɛ l’ɛtɛkɛta w’eshika”

5. Ɛtɛkɛta waki Yeso w’ɔnɛ ‘nyotetemale ndjelami’ alangawɔ nembetshiya?

⁵ Yoho mɔtshi ya kamba la kɛnɛ kekaso ele sukɛ ɔtɛmwɛlɔ wa mɛtɛ la kɔlamelo tshɛ kânga la ntondo k’ɔlɔshamelo w’oma le anto wele bu ambetawudi. Pombaka sala la wolo dia mbikikɛ. Yeso akate ate: ‘Naka onto nangaka ndjelami, nde ɛ̂mbɛ otamba ande w’asui, atetemale ndjelami.’ (Mateu 16:24) Yeso kombita dia sho pombaka mboyela lomingu ɔtɔi, ngɔndɔ ɔtɔi, kana ɔnɔnyi ɔtɔi. Koko nde akate ate: ‘Nyotetemale ndjelami.’ Ɛtɛkɛta ande mɛnyaka dia monga ombeki ande bu tsho dikambo dia lo tshanda mɔtshi ya lo lɔsɛnɔ laso kana tshikala la kɔlamelo paka l’etena kɛmɔtshi keto. Sukɛ ɔtɛmwɛlɔ wa mɛtɛ la kɔlamelo tshɛ nembetshiyaka dia oyadi kakɔna tshɛ kakoka tokomɛ, sho pombaka tetemala la mbikikɛ la kɔlamelo dia sukɛ yoho ya lɔsɛnɔ yakatasɔnɛ. Ngande wakokaso sala dikambo sɔ?

6. Naa djembetelo y’ɛtɛkɛta w’eshika yakeke Akristo wa lo ntambe ka ntondo oma le Paulo?

⁶ Paulo akakeketsha Timɔtɛ ka wonyande okambi ate: ‘Tetemala nkimɛ djembetelo y’ɛtɛkɛta w’eshika wakayoke oma le mi kâmɛ la mbetawɔ ndo la ngandji kendana la Kristo Yeso.’ (2 Timote 1:13) Paulo akandalange mbuta na? Tshɛkɛta ya lo Grɛkɛ yokadimɔmi lanɛ ɔnɛ “djembetelo” nembetshiyaka lo mɛtɛ mɛtɛ sango. Kânga mbele sango di’ɛngɔ kɛmɔtshi hɛnya tshɛ lo tshɛ woho wele ɛngɔ kakɔ, diɔ mbishaka kanyi woho wetɔ di’ɔsɛdingodi wele la shɛnɔdi monga la kanyi lo kɛnɛ kendana l’ɛngɔ kosangiwɔ. Woho akɔ wamɛ mbele djembetelo y’akambo wa mɛtɛ waketsha Paulo Timɔtɛ ndo anto akina komonga l’oyango wa mbisha okadimwelo wa lânde l’oseka wombola tshɛ wakakoke mimbɔma. Koko, wetshelo ɔsɔ mbishaka ɛlɔmbwɛlɔ ka mɛtɛ, woho w’anto wele l’etema w’ɔlɔlɔ shihodia kɛnɛ kâlɔmba Jehowa. Lo mɛtɛ, dia ngɛnyangɛnya Nzambi, vɔ wakahombe tetemala la ndjela djembetelo shɔ y’akambo wa mɛtɛ lo kambaka la kɛnɛ kakaweke.

7. Ngande wakoka Akristo kimɛ djembetelo y’ɛtɛkɛta w’eshika?

⁷ Lo ntambe ka ntondo, anto wele oko, Humeneya, Alɛsandɛrɛ ndo Filɛtɔ waki la tokanyi taki kosukɛka ‘djembetelo y’ɛtɛkɛta w’eshika.” (1 Timote 1:18-20; 2 Timote 2:16, 17) Ngande wakakoke Akristo wa lo ntambe ka ntondo mbewɔ di’aha munganyiyama oma le waa apɔsta? Ele lo mbeka dimɛna dimɛna efundelo wakasambiyama ndo lo kamba lawɔ lo nsɛnɔ yawɔ. Wanɛ wakakɛndakɛndaka lo ndjela ɛnyɛlɔ ka Paulo ndo k’Akristo akina wa kɔlamelo wakakokaka mbishola ndo tona oseka wetshelo tshɛ waki kɔmbɔtɔnɛka la djembetelo y’akambo wa mɛtɛ wakaweke. (Filipi 3:17; Heberu 5:14) Lo dihole dia ‘kakatana okakatana kakatana oko anto wele la hemɔ l’ɔtɛ ndo mbidjana tâmu t’anyanya lo kɛnɛ kendana la tɔtɛkɛta,’ vɔ wakatetemala la mamema Nzambi. (1 Timote 6:3-6) Sho salaka woho akɔ wamɛ lam’atetemalaso la kamba l’akambo wa mɛtɛ wakateke. Mbetawɔ kaso keketshamaka mɛtɛ lam’ɛnaso dia miliyɔ y’anto wakambɛ Jehowa lo nkɛtɛ k’otondo wekɔ lo kukutɛ la wolo tshɛ djembetelo y’akambo wa mɛtɛ wa lo Bible wakawetshama.​—1 Tesalonika 1:2-5.

Totone ‘ɛkɔndɔ wa kashi’

8. (a) Ngande wayanga Satana ɛlɔ kɛnɛ dia ndanya mbetawɔ kaso? (b) Ɔhɛmwɛlɔ akɔna wakasha Paulo watanaso lo 2 Timote 4:3, 4?

⁸ Satana nyangaka dia nanya kɔlamelo yaso lo monɛ tâmu lo timba taso lo kɛnɛ kendana l’akambo wamboteka. Ɛlɔ kɛnɛ oko wakidiɔ lo ntambe ka ntondo, waa apɔsta ndo anto akina nyangaka dia nanya mbetawɔ k’anto wele la kɔlamelo. (Ngalatiya 2:4; 5:7, 8) Mbala mɔtshi vɔ kambaka la tita nsango dia dianganya akambo wele bu mɛtɛ kana mbuta akambo wa kɔlɔ lo kɛnɛ kendana la toho ta wetshelo ndo eyango wele l’ekambi waki Jehowa. Paulo akate di’amɔtshi wayotakɔ mboka k’akambo wa mɛtɛ. Nde akafunde ate: “Etena kayukuka lam’ahulanga antu ntetemala lu dietshelu di’ololo, keli ne dia atui awo weko hwe, ku vo wayuyamotshiya embetsha uku saki yawo. Vo wayunya atui oma lu mete, wayetola lu ekondo [wa kashi].”​—2 Timote 4:3, 4.

9. Kakɔna ondo kakalangaka Paulo mbuta lam’akandatɛkɛta di’‘ɛkɔndɔ wa kashi’?

⁹ Lo dihole dia ndjela djembetelo y’ɛtɛkɛta w’eshika, amɔtshi wakanganyiyama oma l’‘ɛkɔndɔ wa kashi.’ Naa ɛkɔndɔ wa kashi ɛsɔ na? Ondo Paulo akalangaka mbuta dia toshimu ta kashi, oko tɔnɛ tatanema lo dibuku diaki Tobit diavɔ anto tshɔdia.a Ɛkɔndɔ wa kashi mendanaka nto l’akambo wa lɔfɔnya kana wa vate vate. Ndo amɔtshi nto, lo ‘ndjela nsaki yawɔ hita’ mbeyaka ndjokesama oma le wanɛ wɔnyɔla atɔndɔ waki Nzambi kana wanɛ wɔnyɔla dikumanyi dialɔmbɔla l’etshumanelo. (3 Joani 9, 10; Jude 4) Kânga mbele etakanya wakikɔ, mɛnamaka di’amɔtshi wakakombola ndjela akambo wa kashi lo dihole dia ndjela akambo wa mɛtɛ wa l’Ɔtɛkɛta wa Nzambi. Kombeta edja, vɔ wakayotshikaka dia kamba l’akambo wakaweke, ndo kɛsɔ akâkonya lo wâle wa lo nyuma.​—2 Petero 3:15, 16.

10. Naa ɛkɔndɔ ɛmɔtshi wa kashi wa lo nshi yaso nyɛ, ndo ngande wakɛnya Joani ohomba wa sɛna wolo?

¹⁰ Sho kokaka mbewɔ ɛlɔ kɛnɛ di’aha ndjela ɛkɔndɔ wa kashi naka sho sɛdingola dimɛna akambo wahokamɛso ndo sɔna kɛnɛ kahombaso mpokamɛ kana mbadia. Ɛnyɛlɔ, mbala efula tita nsango keketshaka awui wa mindo. Anto efula keketshaka kanyi yɔnɛ Nzambi bu. Amɔnyɔdi hawetawɔ ɔnɛ Bible ekɔ dibuku diakasambiyama oma le Nzambi. Ndo waa apɔsta wa nshi nyɛ tetemalaka la nyanga dia monɛ ntɔngɔ ya tâmu l’etema w’anto dia ndanya mbetawɔ kawɔ k’Okristo. Lo kɛnɛ kendana la wâle akɔ wamɛ wakaye oma le amvutshi wa kashi lo ntambe ka ntondo, ɔpɔstɔlɔ Joani tɔhɛmɔlaka ate: “Elangimi ami, tanyetawoki nyuma tshe, keli nyuhimbi nyuma, kana [“oma le Nzambi mbeyɔ,” NW] ne dia amvutshi efula wa kashi wambukukanela l’andja.” (1 Joani 4:1) Lâsɔ ekɔ mɛtɛ ohomba sho sɛna wolo.

11. Naa yoho mɔtshi yakokaso ndjaonganɛ ndo menda kana tekɔ lo mbetawɔ?

¹¹ Lo dikambo sɔ, Paulo akafunde ate: “Nyuyaunganeli nyame, kana nyu la mbetawo.” (2 Koreto 13:5) Ɔpɔstɔlɔ tokeketshaka dia sho ndjaonganɛ dia shikikɛ kana tekɔ lo tetemala ndjela dietawɔ di’Okristo. Naka sho mbekɛka nongamɛ wanɛ walanga di’akambo salema paka woho walangawɔ, kete sho pombaka ndjasɛdingola l’otema ɔtɔi. (Osambu 139:23, 24) Onde sho nyangaka dia munda ekambi waki Jehowa la dikɔmɔ? Naka ɔsɔku mbediɔ, ko lande na? Onde ɛtɛkɛta kana etsha w’onto ɔmɔtshi wakatonyangiya? Naka eelo, onde lâsɔ sho tetemalaka mbɔsa di’akambo tshɛ wasalawɔ wekɔ paka ngasɔ? Ehemba tshɛ wahomana laso lo dikongɛ nɛ di’akambo wekɔ wa lo tshanda mɔtshi tsho. (2 Koreto 4:17) Oyadi kânga tekɔ lo pomana l’ekakatanu ɛmɔtshi l’etshumanelo, onde ekɔ dimɛna sho tshika dia kambɛ Nzambi? Naka dikambo diambotokiyanya, onde hatoleka dimɛna sala kɛnɛ keso l’akoka wa sala dia kandola dikambo diakɔ, oma lâsɔ ko sho dikitsha l’anya wa Jehowa?​—Osambu 4:4; Tukedi 3:5, 6; Efeso 4:26.

12. Ɛnyɛlɔ kakɔna ka dimɛna kakatotshikɛ ase Bɛrɔya?

¹² Lo dihole dia monga amɔnyɔdi, nyɛsɔ tongake la kanyi y’ɔlɔlɔ lo kɛnɛ kendana l’akambo walongolaso oma lo wekelo w’onto ndamɛ ndo oma lo nsanganya ya l’etshumanelo. (1 Koreto 2:14, 15) Ndo lo dihole dia mbidjaka tâmu lo kɛnɛ kendana l’Ɔtɛkɛta wa Nzambi, ayonga dui dia lomba dia sho monga la dionga diele oko nɛ diaki l’ase Bɛrɔya wa lo ntambe ka ntondo, wanɛ wakasɛdingolaka Afundelo dimɛna dimɛna! (Etsha 17:10, 11) Ɔnkɔnɛ, nyɛsɔ tokambake la kɛnɛ kekaso, totone ɛkɔndɔ wa kashi ndo tokukute akambo wa mɛtɛ.

13. Ngande wakokaso ndjodianganya ɛkɔndɔ wa kashi aha la sho mbeya?

¹³ Ekɔ nto yoho kina y’ɛkɔndɔ wa kashi yahombaso ndjalama oma lɔkɔ. Ɛkɔndɔ efula wa kashi wodianganaka oma lo tshimbo ya internet. Ekɔ ɔlɔlɔ sho monga la yewo lo kɛnɛ kendana l’akambo asɔ, djekoleko naka hateye kiɔkɔ yotombi akambo akɔ. Oyadi kânga Okristo ɔmɔtshi w’oshika mbototome losango lɔmɔtshi, mbeyaka monga ko aha ndamɛ mbakɛnyi la washo woho wakete akambo akɔ. Diakɔ diele sho pombaka sɛna wolo di’aha pandjola kana tomɛ anto akina losango lahateye shikaa. Mɛtɛ sho hatohombe kɔndɔla “ɛkɔndɔ w’anyaanya ndo wahɔɔtɔnɛɛ la dyeetawɔ.” (1 Timoteyo 4:7; Dyookanelo dy’Oyooyo) Lam’ele tekɔ nto l’ɔkɛndɛ wa mbitanɛka akambo wa mɛtɛ, ayonga ɔlɔlɔ sho mbewɔ dikambo tshɛ diakoka ndjotokonya dia dianganya akambo wele bu mɛtɛ aha la sho mbeya.​—Efeso 4:25.

Ɛlɔlɔ waya lo kamba l’akambo wa mɛtɛ

14. Naa ɛlɔlɔ wayotokondja naka sho kamba la kɛnɛ kekaso oma l’Ɔtɛkɛta wa Nzambi?

¹⁴ Kamba la kɛnɛ kekaso oma lo wekelo wa Bible w’onto ndamɛ ndo oma lo nsanganya y’Akristo mbelaka ɛlɔlɔ efula. Ɛnyɛlɔ, tayoleka monga la diɔtɔnganelo di’ɔlɔlɔ lam’asaso la wanɛ wôtɔ la so lo mbetawɔ. (Ngalatiya 6:10) Dionga ndo nsaki yaso yayotshikitana naka sho kamba l’atɔndɔ wa lo Bible. (Osambu 19:8) Ndo nto, kamba la kɛnɛ kekaso, ‘nɛngaka wetshelo wa Nzambi’ ndo mongaka suke dia kotola anto akina oya l’ɔtɛmwɛlɔ wa mɛtɛ.​—Tito 2:6-10.

15. (a) Ngande wakonge dikɛnda dimɔtshi la dihonga dia sambisha lo kalasa? (b) Wetshelo akɔna wamboyokondja oma lo dikambo sɔ na?

¹⁵ L’atei w’Ɛmɛnyi wa Jehowa, sho tanaka ɛlɔngɔlɔngɔ l’esekaseka efula wakamba la kɛnɛ kekawɔ oma lo wekelo wa Bible w’onto ndamɛ, oma l’ekanda w’Akristo ndo lo mbɔtɔka mbala la mbala lo nsanganya ya l’etshumanelo. Lɔkɛwɔ lawɔ l’ɔlɔlɔ lekɔ tshondo y’esambishelo le embetsha ndo le asekawɔ ambeki. (1 Petero 2:12) Tɔshi ɛnyɛlɔ kaki Leslie, osekaseka w’ɛnɔnyi 13 wa lo wodja w’États-Unis. Nde mbutaka dia nde akɛnaka wolo tɛkɛta l’asekande wa la kalasa dikambo dia dietawɔ diande, koko, lushi lɔmɔtshi, nde akatshikitanya dionga sɔ. “Wakatɛkɛtaka lo kalasa woho watasondja anto diangɔ lo luudu la luudu. Ombeki ɔmɔtshi wa womoto akemɛ lonya ko akasha ɛnyɛlɔ k’Ɛmɛnyi wa Jehowa.” Oko wakinde Ɔmɛnyi wa Jehowa, kakɔna kakasale Leslie na? Nde akate ate: “Dimi lakâmɛ mbetawɔ kami. Woho wakamatɛkɛta dia mamɛ mbetawɔ kami akâmbiya onto tshɛ nɛ dia dimi lakeyamaka oko onto lahatɛkɛta lo kalasa.” Etombelo akɔna wakonge la dihonga diaki Leslie na? Leslie akate ate: “Dimi laki l’akoka wa mbisha ombeki ɔmɔtshi biukubuku ɔtɔi ndo traktɛ nɛ dia nde aki la wembola ekina.” Jehowa mɛtɛ ngɛnangɛnaka lam’ɛnande akɛnda wakamba la kɛnɛ kekawɔ wasambisha la dihonga tshɛ la kalasa!​—Tukedi 27:11; Heberu 6:10.

16. Ngande wakakimanyiya Kalasa k’Olimu wa Teokrasi dikɛnda dimɔtshi di’Ɔmɛnyi wa Jehowa?

¹⁶ Ɛnyɛlɔ kekina ekɔ kɛnɛ kaki Elizabɛtɛ. Tatɛ lam’akinde l’ɛnɔnyi esambele ndo l’edja tshɛ kakinde lo kalasa ka primɛrɛ, dikɛnda dia womoto sɔ aketaka embetsha ande lo Mbalasa ka Diolelo mbala tshɛ kakandongaka la sawo dia mbisha lo Kalasa k’Olimu wa Teokrasi. Naka ombetsha hongi l’akoka wa ndja, Elizabɛtɛ akatshikalaka l’ɔkɔngɔ wa kalasa ko mbisha ombetsha akɔ sawo diande. L’ɔnɔnyi ande wa komelo wa lo kalasa ka sekɔndɛrɛ, Elizabɛtɛ akasale alapɔlɔ wele l’akatshi dikumi wɛnya ɛlɔlɔ wa Kalasa k’Olimu wa Teokrasi ndo akasha sawo sɔ la ntondo k’embetsha ɛnɛi. Wakɔ̂lɔmbɛ nto dia nde mbisha sawo dimɔtshi oko ɛnyɛlɔ k’asawo watoshamaka lo Kalasa k’Olimu wa Teokrasi, ko nde akasɔnɛ sawo diele l’ɔtɛ a dui ɔnɛ: “Bonde Katshika Nzambi Akambo wa Kɔlɔ?” Elizabɛtɛ akakondja wahɔ efula oma l’ekongelo ka wetshelo kasha Ɛmɛnyi wa Jehowa lo Kalasa k’Olimu wa Teokrasi. Nde ekɔ tsho ɔtɔi ɔmɔtshi l’atei w’efula k’Akristo w’akɛnda watombola Jehowa lo kamba l’akambo wakaweke oma l’Ɔtɛkɛta ande.

17, 18. (a) Dako diakɔna diasha Bible lo kɛnɛ kendana la losembwe? (b) Ngande wakonge losembwe l’Ɔmɛnyi wa Jehowa ɔmɔtshi la shɛngiya efula le pami kɛmɔtshi?

¹⁷ Bible nɔmbaka Akristo dia monga la losembwe l’akambo tshɛ. (Heberu 13:18) Awui w’okadi koka nanya diɔtɔnganelo diasaso l’anto akina, djekoleko diɔtɔnganelo diasaso la Jehowa. (Tukedi 12:22) Lɔkɛwɔ laso la dimɛna mɛnyaka dia tekɔ lo kamba la kɛnɛ kamboteka, ndo lɔ lambotshutshuya anto efula dia monga la dilɛmiɛlɔ di’efula otsha l’Ɛmɛnyi wa Jehowa.

¹⁸ Tende kɛnɛ kakakomɛ ɔsɔlayi ɔmɔtshi wakawelɛka Filipɛ. Nde akasinya shɛkɛ koko nde kofunda lofulo l’akuta lakandahombe tondja oma lo kɔntɛ kande, ko nde akashisha shɛkɛ shɔ aha la nde mbeya dia nde akayishinya polo ndo lushi lakawayotomɛ yɔ lo divɔlɔpɛ. Ɔmɛnyi wa Jehowa ɔmɔtshi mbakatɔngɔna shɛkɛ yakɔ ndo funda yema ya nɔtɛ ɔnɛ awui wetshamami l’ɔtɛmwɛlɔ ami mambotshutshuya dia kokawoyɛ shɛkɛ nyɛ. Filipɛ akambe heyama. Nde akate ate: “Wotokoka mbivami dɔlara 9 000!” Lo diaaso dikina, nde akanyange heyama lam’akawawove lofulɛ lande lo luudu la Nzambi. Ondo onto laweya dimɛna mbakaliɔshi, koko onto lahandeye akokawoya shɛkɛ yakakoke onto ɔsɔ tondja layɔ nunu dia dɔlara! Lo mɛtɛ, Akristo wele la losembwe tombolaka Jehowa Nzambi!

Totetemale kamba la kɛnɛ kamboteka

19, 20. Ɛlɔlɔ akɔna wayotokondja lo kɛndakɛnda lo yoho yɔtɔnɛ l’akambo w’oma l’Afundelo wekaso?

¹⁹ Wanɛ wakamba la kɛnɛ kamboweka oma l’Ɔtɛkɛta wa Nzambi kondjaka ɛlɔlɔ efula. Ombeki Jakɔba akafunde ate: “Keli [onto] lenda elembe w’ololo wa ndjadjasela, ndu latetemala loko, aha umbuki a diui ladiuhela, keli utshi a diui mbendi. Untu ako ayotshokwama lu etsha andi.” (Jakoba 1:25) Eelo, naka sho kɛndakɛnda lo yoho yɔtɔnɛ l’akambo wa l’Afundelo wekaso, kete tayonga l’ɔngɛnɔngɛnɔ wa mɛtɛ ndo tayonga l’akoka wahombama dia ndɔshanya l’ekakatanu wa lo lɔsɛnɔ. Kɛnɛ koleki tshɛ ele, tayɔtshɔkwama oma le Jehowa ndo tayonga l’elongamelo ka lɔsɛnɔ la pondjo!​—Tukedi 10:22; 1 Timote 6:6.

²⁰ Lâsɔ mɛtɛ, nyɛsɔ totetemale la ndjasha tshɛ lo wekelo w’Ɔtɛkɛta wa Nzambi. Tosanganake mbala la mbala l’atɛmɔdi waki Jehowa, ndo todjake yimba l’akambo watɛkɛtama lo nsanganya y’Akristo. Totetemale kamba la kɛnɛ kekaso ‘ko Nzambi ka ki ayoyala la so.’​—Filipi 4:9.

[Nɔtɛ ka l’ɛse ka dikatshi]

Onde wɛ akohɔ?

• Djembetelo y’‘ɛtɛkɛta w’eshika’ kɛdikɛdi na ndo ngande wakokaso ndjikimɛ?

• Naa “ɛkɔndɔ wa kashi” wahombaso mbewɔ?

• Ɛlɔlɔ akɔna wakondja wanɛ wakamba l’akambo wekawɔ oma l’Ɔtɛkɛta wa Nzambi?

[Osato wa lo lɛkɛ 15]

Ngande wakakoke Akristo wa lo ntambe ka ntondo mbewɔ di’aha minganyiyama oma le waa apɔsta?

[Esato wa lo lɛkɛ 16]

Ntɔngɔ ya tâmu mbeyaka monɛma oma lo tita nsango, oma l’internet, ndo oma le waa apɔsta wa nshi nyɛ

[Osato wa lo lɛkɛ 17]

Bu dimɛna dianganya akambo wahateye shikaa

[Esato wa lo lɛkɛ 18]

L’olimu, la kalasa kana l’ahole akina, Ɛmɛnyi wa Jehowa kambaka la kɛnɛ kadiawɔ oma l’Ɔtɛkɛta wa Nzambi