Wembola w’oma le ambadi

Onde pombaka kotshaka nshi tshɛ dɔkɔlɔkɔ diadjɛso Nzambi?

Lo ndjela Bible, dɔkɔlɔkɔ kɛdikɛdi daka di’ohomba efula diasala onto otsha le Nzambi dia sala dikambo dimɔtshi, nambola olambo ɔmɔtshi, tatɛ kamba olimu ɔmɔtshi wa lânde kana dia nsɛna yoho mɔtshi ya lɔsɛnɔ ya lânde, kana dia nkila diangɔ dimɔtshi diele ɔlɔlɔ. Bible ekɔ l’ɛkɔndɔ w’alɔkɔlɔkɔ amɔtshi wakahombe ndjokotshama paka naka ntondo Nzambi ambotasadi dikambo dimɔtshi. Ɛnyɛlɔ, Hana ka nyango omvutshi Samuɛlɛ, “akatshiki dokoloko ati: [Jehowa], kanga lulimbilimbi, naka . . . we ayumbuho aha mbuhelami, dimi ukambi aye, ndu naka we ayumbisha, dimi ukambi aye, ona pami, dimi layûkimo le ye, we [Jehowa], nshi tshe ya lumu landi. Ndi hanyaki divu dia l’ote andi pundju.’” (1 Samuele 1:11) Bible mbutaka nto dia dɔkɔlɔkɔ ekɔ dikambo diasala onto la lolango lande hita. Onde sho pombaka paka kotsha dɔkɔlɔkɔ diadjɛso Nzambi?

Nkumekanga Sɔlɔmɔna ka l’Isariyɛlɛ w’edjedja akate ate: “Lam’atshikelaye [Nzambi] dokoloko, tutshimbatshimbake dia ndishidiya.” Nde akate nto ate: “Kushidiya dokoloko diakayatshiki. Aha ntshika dokoloko, ndeka ntshika dokoloko ku hadishidisha, ololo.” (Undaki 5:4, 5) Ɛlɛmbɛ wakawasha ase Isariyɛlɛ oma lo tshimbo ya Mɔsɛ mbutaka ɔnɛ: “Lam’ayunyutshika daka le [Jehowa Nzambi k]anyu, tanyutshimbatshimbaki dia dishidiya. Mete, [Jehowa, Nzambi k]anyu ayunyolombadio. Naka nyayutshimbatshimba, nyayuyahela kolo.” (Euhwelu k’Elembe 23:21) Mbokɛmaka hwe dia, tshika dɔkɔlɔkɔ otsha le Nzambi bu yana ya dikambo. Dɔkɔlɔkɔ pombaka salema l’oyango wa dimɛna, ndo onto lasala dɔkɔlɔkɔ bu l’okandokando l’akoka wele lande wa kotsha kɛnɛ tshɛ kakandalake lo dɔkɔlɔkɔ diakɔ. Naka bu ngasɔ, kete ndeka dimɛna tshika aha la nde sala dɔkɔlɔkɔ. Naka dɔkɔlɔkɔ diambosalema, onde oseka dɔkɔlɔkɔ tshɛ pombaka kotshama?

Kayotota naka onto amboshilaka la tshika dɔkɔlɔkɔ lo dikambo dimɔtshi koko l’ɔkɔngɔ nde amboyɛna dia dikambo diakɔ hɔtɔnɛ la lolango la Nzambi na? Ohɔsa dia dɔkɔlɔkɔ diakakoke lo yoho mɔtshi kakatanya awui wa mindo la ɔtɛmwɛlɔ wa mɛtɛ? (Euhwelu k’Elembe 23:18) Aha la tâmu, dɔkɔlɔkɔ dia ngasɔ hadiohombe kotshama. Ndo nto, lo ndjela Ɛlɛmbɛ wa Mɔsɛ, dɔkɔlɔkɔ diakatshikaka womoto diakakokaka mbitɔma oma le she kana oma le omɛnde.​—Walelu 30:3-15.

Tɔshi nto ɛnyɛlɔ k’onto lakatshike dɔkɔlɔkɔ le Nzambi dia tshikala onyemba, koko kakianɛ nde aya l’okandokando. Dɔkɔlɔkɔ diakandatshike diambokonya lo wâle wa naka nde tetemala la dikitanyiya, kete nde mbeyaka sekola ɛlɛmbɛ waki Nzambi wendana la lɔkɛwɔ l’ɔlɔlɔ. Onde nde pombaka tetemala la sala tshɛ dia paka kotsha dɔkɔlɔkɔ sɔ? Onde hatoleka dimɛna le nde dia nde ndjakokɛ diaha ndjosala pɛkato ka monanyi lo sekola dɔkɔlɔkɔ diande ko nɔmba Nzambi l’etete dia nde mbodimanyiyɛ lo kɛnɛ kendana la dɔkɔlɔkɔ diakandasale? Onto ndamɛ mbahomba mbɔsa yɛdikɔ lo dikambo sɔ. Ndoko onto okina lahomba mbɔ̂sɛ yɛdikɔ lo dihole diande.

Ko kayotota di’onto lakatshike dɔkɔlɔkɔ dimɔtshi ko nde amboyɛna l’ɔkɔngɔ dia nde akadisale esadi aha la kana yimba ɔlɔlɔ? Onde nde pombaka tetemala la sala woho wa kotsha dɔkɔlɔkɔ diakɔ? Komonga dikambo dia wɔdu le Jɛfɛta dia nde kotsha dɔkɔlɔkɔ diakandatshike le Nzambi, koko nde akadikotsha l’ɔlɔlɔ tshɛ. (Embadi 11:30-40) Naka onto hakotshisha dɔkɔlɔkɔ diande, dikambo sɔ mbeyaka konya Nzambi dia mboka “kele” ndo tona kɛnɛ tshɛ kakasale onto akɔ. (Undaki 5:6) Mbɔsa akambo wendana l’okotshelo wa dɔkɔlɔkɔ la sawosawo kokaka konya onto di’aha nde mbetawɔma lo washo wa Nzambi.

Yeso akate ate: “Keli diui dianyu diayali: Elu; kana Kema. Diui tshe diahema ladiku dia aui aso dieli uma le kanga kolo.” (Mateu 5:37, sho mbɛnganyisha alɛta ango.) Okristo hahombe tsho ndjakiyanya lo woho wahombande kotsha dɔkɔlɔkɔ diande otsha le Nzambi koko ndo dia monga onto lakotsha ɛtɛkɛta ande tshɛ, oyadi otsha le Nzambi kana otsha le anto. Ko kayotota naka nde amboshilaka la mbokana l’onto okina lo dikambo dimɔtshi diakandɛnyi ntondo ɔnɛ diekɔ kawɔ, koko aya l’okandokando l’ɔkɔngɔ wa nde disɛdingola ɔlɔlɔ nɛ dia nde amboyɛna dia diɔ bu dimɛna? Nde hahombe mbɔsa dikambo sɔ oko dikambo di’anyanya. Koko naka nde sawola l’onto lakokana lande dimɛna, kete ondo onto akɔ mbeyaka ndjowotɛ dia nde bu l’ɔkɛndɛ wa paka kotsha kɛnɛ kakawokana.​—Osambu 15:4; Tukedi 6:2, 3.

Lo kɛnɛ kendana la dɔkɔlɔkɔ kana l’akambo akina, kakɔna kahombaso ndeka mbidja yimba? Toyangake nshi tshɛ dia monga la diɔtɔnganelo dia dimɛna la Jehowa Nzambi.

[Esato wa lo lɛkɛ 30]

Hana komengenga dia kotsha dɔkɔlɔkɔ diande

[Esato wa lo lɛkɛ 31]

Kânga mbele aki wolo sala dikambo sɔ, Jɛfɛta aketawɔ dia kotsha dɔkɔlɔkɔ diande