Tokotsha Dɔkɔlɔkɔ Diaso La Lushi La Lushi
1 Davidi, omembi w’esambu, akatshutshuyama dia mbutɛ Jehowa ate: “[Dimi nangaka membaka, NW] esambu wa ntumbulaka lukumbu laye pundju, dia dimi nkutsha alokoloko ami la lushi la lushi.” (Osam. 61:8) Davidi akeyaka ɔnɛ lam’atshika onto dɔkɔlɔkɔ, nde ditshikaka la lolango lande ndamɛ. Koko, nde akeyaka nto ɔnɛ naka nde tshika dɔkɔlɔkɔ, kete nde ayohomba dikotsha. Kânga mbakidiɔ ɔsɔku, nde akatombola Jehowa lo dikoka diaki la nde dia kotsha alɔkɔlɔkɔ ande la lushi la lushi.
2 Lam’akatayakimɔ le Jehowa, la lolango laso shamɛ mbakatatshike dɔkɔlɔkɔ dia sala lolango lande. Takayasɛkɛ shamɛ ndo takadje olimu wa Jehowa lo dihole dia ntondo lo lɔsɛnɔ laso. (Luka 9:23) Diɔ diakɔ diahombaso ndo sho lawɔ kotsha dɔkɔlɔkɔ diaso la lushi la lushi. (Und. 5:4-6) Wotelo wa lo sɛkɛ wakatasale l’etena ka batismu kaso pombaka mɛnama lo lɔkɛwɔ laso tshɛ, teya ɔnɛ “l’onyɔ mbasalawɔ wotelo wa lo sɛkɛ dia panda.” (Rɔmɔ 10:10, NW) Ɔsɔ ekɔ esambishelo ka lokumu l’ɔlɔlɔ. (Heb. 13:15) Akambo w’onto l’onto tshikitana, koko sho tshɛ mbeyaka lushi la lushi ohomba wa mbewoya akina lokumu l’ɔlɔlɔ.
3 Toyange Waaso wa Sambisha Lushi Tshɛ: Sambisha onto lokumu l’ɔlɔlɔ mbishaka ɔngɛnɔngɛnɔ. Dia sala ɔsɔku nshi tshɛ, sho pombaka nyanga waaso wa sambisha etena tshɛ kakoka. Wanɛ wɔsa yɛdikɔ ya sambishaka lo tshakitudi lɛnɛ akambawɔ elimu, la kalasa, le asukanyi awɔ kana le anto akina wahomana la wɔ lushi la lushi mongaka la tena di’ɔngɛnɔngɛnɔ. Sho kokaka sambisha kânga lo mukanda kana lo telefɔnɛ. Lo kambaka la waaso asɔ tshɛ ndo lo ndjaombelaka etena mbala la mbala dia sambisha lo luudu la luudu ndo sala waendelo w’eyoyo, ondo tayokondja ɔngɛnɔngɛnɔ wa lânde watotôkaka lam’ekaso l’onto Bible la ngelo. Mɛtɛ, sho kokaka nyanga waaso wa sambisha lushi tshɛ.
4 Kadiyɛso kɛmɔtshi akamɛ la mbala biukubuku Examinons les Écritures chaque jour lo wonya wa mumuya. Nde akasɛngɔla osekande lakamba la nde dia vɔ mbala divɛsa dia lushi kâmɛ, ko esadi eto nde akayomɛ mbeka Bible l’onto akɔ. Vɔ wakekaka etenyi k’oshidi a tango lushi tshɛ, mbala tshanu lo lomingu. Osekawɔ okina lakamba la wɔ akɛnyi dia vɔ mbekaka lushi la lushi. Ko nde akayoyalowola le nde oko ɔnangɛso, koko laya shuasua. Ohetoheto wa kadiyɛso kɛsɔ akɔ̂hɛtshahɛtsha, ko nde akatɛnana la ekumanyi kɛmɔtshi dia nde salangana nto. Oma lo saki kande ka kotsha dɔkɔlɔkɔ diande dimɛna la lushi la lushi, kadiyɛso kɛsɔ akonge la shɛngiya y’ɔlɔlɔ le anto ahende.
5 Naka tayosokoyama l’otema woludi la lowando lo kɛnɛ tshɛ kambotosalɛ Jehowa, kete tayokotshaka dɔkɔlɔkɔ diaso lushi tshɛ l’akoka aso tshɛ, ko tayonga l’ɔngɛnɔngɛnɔ ndo l’ɔlɔ. Oko omembi w’esambu, sho kokaka mbuta ɔnɛ: “Dimi layukandulaka l’utema tshe, we [Jehowa, NW]; layutumbulaka lukumbu laye pundju, we [Nzambi kami, NW].”—Osam. 86:12.