Weshasha wangɛnyangɛnya Nzambi

YESO nde l’ambeki ande wakalɛka olelo wa dimɛna efula la Bɛtaniya kâmɛ l’angɛnyi awɔ amɔtshi w’eshika, mbidja ndo Mariya, Mata la Lazaro laki eke ka mbolɔma. Etena kakɔshi Mariya ɔlɔndɔ wa malashi w’oshinga wolo ndo wakandakite malashi akɔ l’ekolo waki Yeso, Judasɛ Isakariyɔtɛ akomala ndo akate ate: “Okoko wa na wakiwo kunsundja malashi one lu denariyo kama shatu [yɛdikɔ ya lofuto l’ose olimu l’ɔnɔnyi w’otondo], dia mbisha akanga a weula?” Esadi eto, anto akina wakangunanguna woho akɔ wamɛ.​—Joani 12:1-6; Mako 14:3-5.

Koko Yeso akakadimola ate: “Nyuwete. . . . Akanga a weula weko l’atei anyu nshi tshe. Tena tshe dialanganyu, nyu mbeyaka mbatshela ololo, keli nyu kema la mi l’atei anyu nshi tshe.” (Mako 14:6-9) Ewandji w’ɛtɛmwɛlɔ w’ase Juda wakalakanyaka ɔnɛ kimɔ weshasha wa kɛtshi kema tsho dikambo di’ɔlɔlɔ koko diɔ koka ndo nimanyiya pɛkato. Koko Yeso akalembetshiya hwe dia weshasha wangɛnyangɛnya Nzambi hahembetɛ tsho lo mbisha ase wola weshasha wa kɛtshi.

Naka sho sɛdingola lo tshena pe woho wakakimɔmaka weshasha lo etshumanelo k’Akristo ka ntondo, kete tayɛna weho ɛmɔtshi w’eshika wakokaso mɛnya dia tekɔ lo ndjakiyanya dikambo di’anto akina dia ngɛnyangɛnya Nzambi la weshasha aso. Dikambo sɔ diayotɛnya nto yoho ya woshasha ya lânde yoleki salɛ anto ɔlɔlɔ.

‘Tokimɔ weshasha wa kɛtshi’

Mbala efula Yeso akakeketsha ambeki ande dia ‘kimɔ weshasha wa kɛtshi,’ ndo dikadimwelo dikina dia Bible kadimolaka etelo kɛsɔ ɔnɛ “mbisha lo kɛtshi” kana “mbisha la kɛtshi.” (Luka 12:33; New English Bible; A Translation in the Language of the People, kaki Charles B. Williams) Koko Yeso akɛnya dia pombaka mbewɔ dia monga la kanyi ya tombola onto lakimɔ weshasha lo dihole dia tombola Nzambi. Nde akate ate: “Lam’ashanyu antu diango la ketshi, tanyudaki pungi la ntundu kanyu, uku atutshaka akanga a lukesu lu temwelo la lu esese [di’anto mbatombola].” (Mateu 6:1-4) Lo kitanyiya dako sɔ, Akristo wa ntondo wakewɔ dia ndjaɛnya la ntondo k’anto oko ewandji w’ɛtɛmwɛlɔ w’ekila wa lo nshi yawɔ ndo wakakimanyiyaka wanɛ waki lo dihombo lo mbakambɛ elimu ɛmɔtshi kana lo mbasha weshasha ɛmɔtshi lo woshɛshɛ.

Ɛnyɛlɔ, vɔ totɛka lo Luka 8:1-3 dia Mariya Mangadala, Joana, Suzana ndo anto akina wakakambe “la diango diawo” dia kimanyiya Yeso nde l’apɔstɔlɔ ande aha la vɔ ndjafuna. Kânga mbaki apami asɔ la diangɔ, vɔ wakatshike kɛnɛ kakakimanyiyaka lo lɔsɛnɔ dia mbidja welo awɔ paka l’olimu w’esambishelo. (Mateu 4:18-22; Luka 5:27, 28) Lo kimanyiya Yeso nde l’ambeki ande dia kotsha olimu wakawasha Nzambi, wamato asɔ wakatombola Nzambi. Ndo Nzambi akɛnya dia nde akangɛnangɛna dikambo sɔ lo funda ɔkɔndɔ wa lokaho lawɔ la kɛtshi lo Bible woho wa nɔnga kina tshɛ ndjadiaka ɔkɔndɔ akɔ.​—Tukedi 19:17; Heberu 6:10.

Dɔrɔka aki womoto okina “lakatshaka akambu w’ololo efula ndu akambu wa ketshi.” Nde akatɛlɛka wadi waki edo waki lo dihombo ahɔndɔ l’osomba wakandadjasɛka wa Jɔpa waki l’omamu wa ndjale. Hateye kana ndamɛ mbakasombaka diangɔ tshɛ ko kana nde akâkimanyiyaka tsho dia tɛla ahɔndɔ aha la mbâfutsha. Koko, olimu ande w’ɔlɔlɔ akawosha nɛmɔ efula la ntondo ka wanɛ wakandakoke kimanyiya ndo la ntondo ka Nzambi lakawosha difuto l’ɔngɛnɔngɛnɔ tshɛ l’ɔtɛ w’ɔlɔlɔ ande.​—Etsha 9:36-41.

Oyango w’ɔlɔlɔ ekɔ ohomba

Kakɔna kakatshutshuya anto asɔ dia kimɔ weshasha na? Vɔ kotshutshuyama tsho oma lo kɛtshi katoshaka onto nsaki ka kimanyiya. Vɔ wakokaka dia vɔ wekɔ l’ɔkɛndɛ wa sala kɛnɛ kakiwɔ l’akoka wa sala lushi tshɛ dia kimanyiya wanɛ wadiɛnɛ la wola, l’ɔlɔshamelo, la hemɔ, kana l’ekakatanu ekina. (Tukedi 3:27, 28; Jakoba 2:15, 16) Yoho ya mbisha shɔ mbangɛnyangɛnya Nzambi. Yɔ tshutshuyamaka ntondo oma lo ngandji k’efula kele l’onto otsha le Nzambi ndo oma lo woho walanga onto mbokoya lonto lande loludi la kɛtshi ndo la lokaho.​—Mateu 5:44, 45; Jakoba 1:17.

Ɔpɔstɔlɔ Joani akake epole ɔsɛkɛ lo dikambo di’ohomba diendana la lokahɔ sɔ etena kakandambola ate: “Naka untu eko la diango dia la kete, la ndi mendaka unyandi ahumba, ku ndi ambukikitsha utema, ukundi eli ngandji ka [Nzambi] l’utema andi?” (1 Joani 3:17) Okadimwelo mbokɛmaka hwe. Ngandji kokawɔ Nzambi tshutshuyaka anto dia salɛ anto akina ɔlɔlɔ. Nzambi ngɛnangɛnaka ndo futaka wanɛ wayela ɛnyɛlɔ kande lo monga la yimba ya lokaho. (Tukedi 22:9; 2 Koreto 9:6-11) Onde sho mɛnaka woho wa lokaho la ngasɔ ɛlɔ kɛnɛ? Tende kɛnɛ keke ka tomba l’etshumanelo kɛmɔtshi k’Ɛmɛnyi wa Jehowa.

Luudu laki Okristo ɔmɔtshi wa womoto waya osombe lakalana efula. Nde akadjasɛka ndamɛ ndo komonga l’ase nkumbo wa mbokimanyiya. L’edja k’ɛnɔnyi efula, nsanganya y’Akristo yakasalemaka nshi tshɛ lo luudu lande, ndo mbala efula nde akashaka onto tshɛ laketawɔka dia ndja lakande yangɔ ya ndɛ. (Etsha 16:14, 15, 40) Lam’akawɛnyi pâ kaki lande, ase etshumanelo wakɔshi yɛdikɔ ya mbokimanyiya. Amɔtshi wakakimɔ akuta ndo akina wakakambe olimu l’anya awɔ. L’ɔkɔngɔ wa mingu ngana, wanɛ wakayakimɔ la lolango lawɔ wakadje sambe k’oyoyo lo luudu lɔsɔ, dihole dia mbɔka di’oyoyo, wakashingola ndo wakakite mokubu lo luudu l’otondo ndo wakosalɛ tshendo y’oyoyo lo kuku. Woshasha ɔsɔ kokotsha tsho ehomba waki womoto ɔsɔ koko akakeketsha ndo kâmɛ ka l’atei w’etshumanelo ndo akakotola yambalo yaki asukanyi dia vɔ mɛna ɛnyɛlɔ ka woho washana Akristo wa mɛtɛ weshasha.

Ekɔ weho efula wakokaso kimanyiya anto akina shamɛ. Onde kokaka sho mbetsha wenya ɛmɔtshi kâmɛ l’ɔna pami kana ɔna womoto lele bu la she? Onde sho koka kimanyiya dia sombɛ osombe wa wadi aki odo ɔmɔtshi diangɔ kana mbɔtɛlɛ ahɔndɔ? Onde sho koka katɛ onto ɔmɔtshi lele kema l’ekondjelo k’efula yangɔ ya ndɛ kana mbosha yema ya dikuta? Sho koka kimanyiya anto oyadi sho bu ɔngɔnyi. Ɔpɔstɔlɔ Paulo akafunde ate: ‘Naka lolango lekɔ, kete onto akimɔ lo ndjela yɛdikɔ yele lande koko aha yɛdikɔ yaha lande.’ (2 Koreto 8:12) Onde mbisha onto ngasɔ mbala kakɔ ɔtɔi mbele yoho yamɛ yangɛnangɛna Nzambi? Kema.

Kayotota dikambo di’ekongelo ka woke k’ekimanyielo?

Mbala mɔtshi welo wadja onto ndamɛ hashidiya dikambo. Ndo Yeso nde l’ambeki ande mbaki la dihole diakawombaka akuta kâmɛ dikambo di’ase wola ndo vɔ waketawɔka weshasha w’akuta w’oma le anto w’ɔlɔlɔ wakahomanaka lawɔ l’olimu awɔ. (Joani 12:6; 13:29) Woho akɔ wamɛ mbele tshumanelo dia lo ntambe ka ntondo wakakɔngɔla diangɔ etena kaki ohomba ndo wakasale ekongelo ka woke k’ekimanyielo.​—Etsha 2:44, 45; 6:1-3; 1 Timote 5:9, 10.

Dikambo sɔ diakasalema oya l’ɔnɔnyi 55 T.D. Tshumanelo dia la Judeya diaki la wola ondo l’ɔtɛ wa ndjala ka woke kaki oma la monga lɛkɔ. (Etsha 11:27-30) Ɔpɔstɔlɔ Paulo lakayakiyanyaka nshi tshɛ dikambo di’ase wola, akalɔngɔsɔla ekimanyielo dikambo dia tshumanelo diaki etale efula oko ka la Makedɔniya. Ndamɛ akalɔngɔsɔla ɔkɔngɔ ɔsɔ ndo akakambe l’apami wakasɔnama dia kahanya diangɔ diakɔ. (1 Koreto 16:1-4; Ngalatiya 2:10) Ndamɛ ndo anto akina wakakambe lande kokondja ndoko difuto oma l’olimu wakawakambe ɔsɔ.​—2 Koreto 8:20, 21.

Ɛlɔ kɛnɛ Ɛmɛnyi wa Jehowa vɔ lawɔ wekɔ suke dia kimanyiya etena katomba mpokoso kɛmɔtshi. Ɛnyɛlɔ, l’ɔnɔnyi 2001, mvula ngembe yakasale di’elola ka woke efula monga l’osomba wa Houston wa lo ngelo ka Texas l’Amɛrikɛ. Lo tshɛ, mvudu 723 y’Ɛmɛnyi wa Jehowa yakalana yema ndo mvudu mɔtshi yakalana efula. Kɔmite kendana la woshelo w’ekimanyielo kakakengema la dikumanyi di’Akristo diakoka kakasalema aha la tshimbatshimba dia kimanyiya anto waki lo dihombo ndo dia kahanya diangɔ diakakimɔma dia kimanyiya Ɛmɛnyi wa Jehowa wa lo ngelo kɛsɔ dia vɔ mbeya ndɔshana la dikambo sɔ ndo dia vɔ nɔngɔsɔla mvudu yawɔ. Anto wakayakimɔ la lolango lawɔ w’oma lo tshumanelo diaki suke wakasale olimu ɔsɔ tshɛ. Ɔmɛnyi ɔmɔtshi wa Jehowa aki la lowando efula l’ɔtɛ w’ekimanyielo kɛsɔ. Ɔnkɔnɛ, l’etena kakandalongola falanga oma lɛnɛ akandafute asiransɛ dia nɔngɔsɔla luudu lande, nde akakimɔ akuta asɔ aha la tshimbatshimba le kɔmite kendana la woshelo w’ekimanyielo woho w’anto akina wele lo dihombo kondja ekimanyielo.

Koko, lo kɛnɛ kendana la weshasha wa kɛtshi wambotokongɛ dia mbisha anto, sho pombaka monga la yewo etena kasɛdingolaso efula k’anto walɔmba ekimanyielo. Anto wakamba l’atshunda amɔtshi wakahanya weshasha wa kɛtshi ndɛka akuta efula vamɛ kana kambaka l’akuta efula dia keketsha anto dia mbashaka weshasha wa vɔ kahanyaka ase kɛtshi koko yema tshitshɛ tsho y’akuta asɔ mbatokomaka le anto wahomba nongola weshasha akɔ. Tukedi 14:15 mbutaka ɔnɛ: “Kanga enginya atetawoka aui tshe wata antu. Keli kanga ewu atushishimaka mbuka katandatshu.” Ɔnkɔnɛ, sɛdingola akambo dimɛna ekɔ dui dia lomba.

Woshasha wele la wahɔ woleki

Ekɔ woho ɔmɔtshi wa woshasha woleki ndo woshasha wa kɛtshi ohomba. Yeso akɛnya dikambo sɔ etena kakawombola owandji ɔmɔtshi w’ɔlɔngɔlɔngɔ waki ɔngɔnyi kɛnɛ kakandahombe sala dia kondja lɔsɛnɔ la pondjo. Yeso akawotɛ ate: “Utshu, utusundja dieli la ye tshe. Udisha akanga a wula, ku we ayuyala la diango l’ulungu. Kuyi kuyundjeli.” (Mateu 19:16-22) Lembetɛ dia Yeso kombuta tsho ate: ‘Sha akanga a wola diangɔ ko wɛ ayokondja lɔsɛnɔ.’ Koko, nde akakotsha ate: “Kuyi kuyundjeli.” Mbokɛmaka lâsɔ dia, kânga mbele weshasha wa kɛtshi mandɔmaka ndo wekɔ la wahɔ, monga ombeki wa Kristo nɔmbaka akambo akina efula.

Dikambo diakaleke ohomba le Yeso aki dia kimanyiya anto akina lo nyuma. Yema tshitshɛ la ntondo ka nyɔi kande, nde akatɛ Pilato ate: “Dia dikambu ne mbakamayi la kete, dia mvuta akambu wa mete.” (Joani 18:37) Kânga mbakandasha ɛnyɛlɔ lo kɛnɛ kendana la kimanyiya ase wola, kɔnɔya ase hemɔ ndo ndesha anto waki la ndjala, Yeso akalakanya ambeki ande ntondotondo dia sambisha. (Mateu 10:7, 8) Ndo l’atei w’alako wa komelo wakandawasha, nde akawadjangɛ ate: “Okone nyutshu, nyete wedja tshe ambeki.”​—Mateu 28:19, 20.

Lo mɛtɛ, esambishelo hatokandola ekakatanu tshɛ wa l’andja. Koko, sambisha anto wa weho tshɛ lokumu l’ɔlɔlɔ la Diolelo diaki Nzambi tombolaka Nzambi nɛ dia esambishelo kotshaka lolango laki Nzambi ndo diholɛka wanɛ wetawɔ losango laki Nzambi lɔsɔ mboka k’otsha l’ɛtshɔkɔ wa pondjo. (Joani 17:3; 1 Timote 2:3, 4) Lande na kahayahokamɛ kɛnɛ kayokotɛ Ɛmɛnyi wa Jehowa mbala kayaye kayowoya dia ndjokenda na? Vɔ ndjaka la woshasha wa lo nyuma. Ndo vɔ mbeyaka dia ɔsɔ mbele woshasha woleki dimɛna wakokawɔ kosha.

[Esato wa lo lɛkɛ 6]

Ekɔ weho efula wa mɛnya dia tekɔ lo mboka anto akina kandji

[Osato wa lo lɛkɛ 7]

Woho wewoyaso anto akina lokumu l’ɔlɔlɔ ngɛnyangɛnyaka Nzambi ndo diholɛka anto mboka k’otsha l’ɛtshɔkɔ wa pondjo