Bible kokaka kimanyiya diwala diayɛ
DIWALA, le amɔtshi tshɛkɛta shɔ mbelaka tokanyi t’ɔngɛnɔngɛnɔ lo wɔɔngɔ. Le akina yɔ mbaelaka ekiyanu lo wɔɔngɔ. Womoto ɔmɔtshi l’otshukami ekɔ lo ndjakiyanya ate: “Dimi ndjaokaka oko lambôkakitɔnaka l’omɛmi kânga mbodjashiso kâmɛ. Tena tshɛ dimi ndjaokaka oko hawombidje yimba ndo oko etshike.”
Kakɔna kayokonyaka anto ahende wakasale dɔkɔlɔkɔ dia mbokanaka ngandji onto la onyande ko hawoyodjana yimba kana mbokana ngandji nto? Dui dimɔtshi ele vɔ kombeka awui walɔmbama lo diwala. Jurunalistɛ mɔtshi y’aseka enganga ekɔ lo mbuta ate: “Sho tshukanaka aha la kondja ndoko wetshelo lo dikambo dia diwala.”
Eyangelo wakasale olui w’anto ɔmɔtshi wa lo Rutgers University (National Marriage Project) wa lo wodja w’États Unis, akɛnya di’anto yema tshitshɛ tsho mbele la ewo k’awui wendana la diwala. Ɛnɔmbɔdi w’eyangelo ɛsɔ wakafunde ɔnɛ: “Anto efula l’atei wa wanɛ wakawakɔnya wakate dia vɔ wakôdiama oma le ambutshi waki komonga la diwala di’ɔngɛnɔngɛnɔ kana wambokakitɔnaka la elonganyi awɔ. Vɔ mbeyaka shikaa kɛnɛ kelɛwɔ diwala dia kɔlɔ, koko hawoleke mbeya shikaa woho wahomba monga diwala di’ɔlɔlɔ. Amɔtshi mbeyaka nembetshiya tsho diwala di’ɔlɔlɔ oko ‘nɛ diotshikitanyi la di’ambutshi awɔ.’”
Onde Akristo pandɔka oma l’ekakatanu wendana la diwala? Ndooko. Diakɔ mbele, Akristo amɔtshi wa lo ntambe ka ntondo waki l’ohomba w’alako w’eshika wakalɔmbaka ‘di’aha vɔ nyanga kelekɔma’ oma l’awala awɔ. (1 Kor. 7:27) Mbokɛmaka hwe dia diwala tshɛ di’anto ahende wele kema kokele diayongaka l’ekakatanu lo tena dimɔtshi, koko tekɔ l’ekimanyielo. Wadi l’omi kokaka ndowanya diokanelo diawɔ lo kamba l’atɔndɔ wa lo Bible.
Lo mɛtɛ, Bible bu dibuku diasha paka alako wendana la diwala. Koko lam’ele tɔ ndja oma le Nzambi Ɔnɛ lele kiɔkɔ ya diwala, sho kokaka nongamɛ ɔnɛ atɔndɔ wa lɔkɔ mbishaka ekimanyielo. Lo tshimbo y’omvutshi Isaya, Jehowa Nzambi akate ate: “Dimi leli [Jehowa, Nzambi k]aye, latuketshaka dia we nduwana. Ndu latukolombolaka lu mbuka kahumbaye ntsho. Utunduyala we akalungi elembe ami, tshiki ki kaye kutuyala utamanya, la sambu kaye k’ololo kutuluwana otekoya.”—Isaya 48:17, 18.
Onde ngandji kaki lam’asayɛ l’olonganyi ayɛ kakamɛ kitakita? Onde wɛ ndjaokaka dia wɛ ekɔ lo diwala di’aha la ngandji? Womoto ɔmɔtshi lambotshukama aya ɛnɔnyi 26 akate ate: “Handeye ndo woho wakokami nembetshiya pâ ka lo yoho ya diwala dia ngasɔ. Tɔ kekɔ nshi tshɛ.” Lo dihole dia mbuta ɔnɛ handjɔngɛnangɛna la woho wa diwala nɛ, lande na kahayɔshi yɛdikɔ ya sala dikambo dimɔtshi lo kɛnɛ kendana la diwala sɔ na? Sawo diayela diayɛnya wadi l’omi woho wakoka atɔndɔ wa lo Bible kimanyiya diwala diawɔ lo dikambo dimɔtshi dia shikaa, mbuta ate mbakimanyiya lo kɛnɛ kendana la dɔkɔlɔkɔ diawɔ.