Wɛ kokaka nsɛna pondjo pondjo

AMBETAWUDI efula wa lo ɛtɛmwɛlɔ wa l’andja ɔnɛ ngɛnangɛnaka elongamelo ka lɔsɛnɔ la pondjo, oyadi lɔsɛnɔ la pondjo la ngande lelɔ. Elembetshiyelo washama mbeyaka tshikitana lo ndjela ɔtɛmwɛlɔ l’ɔtɛmwɛlɔ, koko elongamelo kekɔ ka woho wâmɛ, mbuta ate nsɛna l’ɔngɛnɔngɛnɔ aha la mɛna nyɔi. Shi kɛsɔ mbakombolayɛ ndo wɛ lawɔ? Ngande wakoka nembetshiyama tokanyi totshikitanyi tele l’anto tɔsɔ na? Ko onde elongamelo ka nsɛna pondjo pondjo kokaka kotshama?

Afundelo mɛnyaka dia Otungi akadje kanyi y’onto nsɛnaka pondjo pondjo l’etema w’anto oma k’etatelo, mbuta ate l’etena kakandatonge atshukanyi wa ntondo. Bible mbutaka ɔnɛ: “Ndi akasha antu tshe kanyi ya pundju lu etema awo.”​—Undaki 3:11.

Koko, dia kotsha nsaki kɛsɔ ka nsɛna pondjo pondjo, atshukanyi wa ntondo wakahombe mbetawɔ lotshungɔ lele la Nzambi la shikikɛ kɛnɛ kele ɔlɔlɔ la kɔlɔ. Otondonga vɔ wakatshe ngasɔ, tshike Jehowa otowasha lɔsɛnɔ la “pundju” lo dihole diakandalɔngɔsɔlɛ, mbuta ate l’ekambɔ ka Ɛdɛna.​—Etatelu 2:8; 3:22.

Lɔsɛnɔ la pondjo lakashishɔ

Ɔkɔndɔ wa lo Bible mɛnyaka dia Nzambi akonɛ “utamba w’ewu k’akambu w’ololo ndu k’akambu wa kolo” l’ekambɔ, elowa wa l’otamba ɔsɔ mbakandashimbe Adama la Eva diaha vɔ ndɛ, watokovɔ. (Etatelu 2:9, 17) Adama la Eva otowotona dia ndɛ elowa w’oma l’otamba ɔsɔ, tshike dui sɔ otɛnya dia vɔ mbetawɔka lowandji laki Nzambi. Lo wedi okina, ndɛ olowa w’oma l’otamba ɔsɔ otɛnya dia wambotona lowandji laki Nzambi. Adama la Eva kokitanyiya didjango diaki Jehowa ndo wakete lo wedi waki Satana, etongami ka lo nyuma kakatɔmbɔkwɛ lowandji laki Nzambi. Etombelo waki la dui sɔ ele, Nzambi akɛnya dia Adama la Eva takawahombe nsɛna pondjo pondjo.​—Etatelu 3:1-6.

Kɛnɛ kakakitsha Nzambi la ntondo kawɔ aki lɔsɛnɔ kana nyɔi, mbuta ate tetemala nsɛna kana mvɔ. Etombelo w’oma l’ɔtɔmbɔkwɛlɔ ɔsɔ aki nyɔi ndo ekomelo ka lɔsɛnɔ lawɔ. Adama la Eva ndo anawɔ tshɛ kokoka tetemala nsɛna lo yoho mɔtshi ya maji kana anima awɔ totetemala nsɛna l’ɔkɔngɔ wa nyɔi.a

Tokanula tshɛ taki Adama sowaka l’ɔtɛ w’ɔtɔmbɔkwɛlɔ ande. Etombelo wa dikambo sɔ nembetshiyamaka oma l’ɛtɛkɛta wakafunde ɔpɔstɔlɔ Paulo ate: “Okone uku akayi kolo la kete uma le untu otoi, la nyoi uma lu kolo; ku nyoi akadiangana le antu tshe ne dia antu tshe wakatshi kolo.”​—Romo 5:12.

Lɔsɛnɔ la pondjo lambokaloyama

Ɔpɔstɔlɔ Paulo akɛdika lɔsɛnɔ laki tokanula ta Adama la lɔnɛ laki la ɛhɔmbɔ lo ntambe ka ntondo. Lam’ele wakahowɔ pɛkato, ana waki Adama la Eva tshɛ wakotɔ “fumbi ya kolo,” ndo wakahombe mvɔ. (Romo 5:12; 6:16, 17) Weho akɔ tshɛ, ana waki Adama la Eva wototshikalaka nshi tshɛ ɛhɔmbɔ wa pɛkato otondongaka Jehowa kombatshungola oma lo lɔhɔmbɔ lɔsɔ. Paulo nembetshiyaka ate: “Ndu ushasha one ambutshikitana la sui di’uma lu kolo k’untu otoi [Adama]. Uma l’elumbwelu ka kolo otoi mbakayi mananu, keli ushasha ako wambuya uma lu kolo efula, wambela antu eyindjamelu.” Ɔnkɔnɛ “eyindjamelu” kɛsɔ mbakakonya dia Yeso nambola lɔsɛnɔ lande l’onto la kokele “dia ntshungula antu tshe.” Jehowa akeyaka wolo wele la tshungo dia tshungola anto oma “l’elumbwelu” ka ‘dianyelo.’​—Romo 5:16, 18, 19; 1 Timote 2:5, 6.

Diakɔ diele ase siansɛ hawokokaki tana pondjo yangɔ mɔtshi ya lo demba di’onto yakoka mbisha anto lɔsɛnɔ la pondjo. Lo ndjela Bible, kiɔkɔ ya nyɔi k’anto mendanaka la lɔkɛwɔ, koko aha la demba. Kɛnɛ kakahombamaka dia anto nyomokondja lɔsɛnɔ la pondjo aki olambo wa tshungo waki Yeso. Tshungo ekɔ nto djembetelo ya losembwe la ngandji ka lɔsɛngɔ kaki Nzambi. Ko waa na wayokondja wahɔ oma lo tshungo ndo wayolongola lɔsɛnɔ la pondjo?

Woshasha wa eongelo kahavu

Jehowa Nzambi okongaka “umaka mombokombola.” Nde havɔka. (Osambu 90:2) Onto la ntondo lele Jehowa akawosha woshasha wa eongelo kahavu aki Yeso Kristo. Ɔpɔstɔlɔ Paulo akalembetshiya ate: “Kristu akulwama uma lu nyoi; ndi hayuvo ntu. Nyoi hawahamela ntu.” (Romo 6:9) Otshikitanyi la emboledi wa la nkɛtɛ, Paulo akalembetshiya dia Yeso lakolwama ekɔ tshɔi y’onto yakalongola eongelo kahavu. Yeso ayotshikalaka “la lumu pundju.” Lɔsɛnɔ lande ‘halolanaki.’​—Heberu 7:15-17, 23-25; 1 Timote 6:15, 16.

Aha Yeso oto mbalongola woho wa woshasha ɔsɔ. Akristo w’akitami wa nyuma wakasɔnama dia tolɛ oko nkumi ya dikanga lo lotombo la l’olongo wayolɔ woho wakolɔ Yeso. (Romo 6:5) Ɔpɔstɔlɔ Joani mɛnyaka dia diɛsɛ sɔ diayoshama le anto 144 000 ato. (Enyelo 14:1) Vɔ lawɔ nongolaka eongelo kahavu. Lo kɛnɛ kendana la eolwelo kawɔ, Paulo akate ate: “Umunyi la dikila haweyi nkita diulelu dia [Nzambi] . . . Ne dia pungi ayuda, antu wakavu wayulwama l’alimba wahahonde ku shu tayukadimo. Ne dia dieli la kene k’ehondelo dia ndota kene kahahonde, dieli la kene ka nyoi dia ndota kene kaha la nyoi.” Nyɔi kema la wolo le wanɛ wolɔ woho ɔsɔ.​—1 Koreto 15:50-53; Enyelo 20:6.

Lo mɛtɛ ɛnɛlɔ kɛsɔ k’oma le Nzambi kekɔ diambo efula. Kânga mbewɔ ditongami dia lo nyuma, andjelo kotongama la eongelo kahavu. Dui sɔ mɛnamaka lo woho wele andjelo wakatɔmbɔkɔ kâmɛ la Satana wayodiakema. (Mateu 25:41) Wanɛ wayolɛ kâmɛ la Yeso, lo wedi awɔ, nongolaka woshasha wa eongelo kahavu, djembetelo ya wɛkamu wa shikaa wele la Jehowa lo kɔlamelo yawɔ.

Onde dikambo sɔ nembetshiyaka ɔnɛ paka djui ya tshitshɛ y’anto 144 000 lo mbaɛdika la miliyara y’anto wakasɛnɛ, mbayɔsɛna pondjo pondjo? Ndooko. Nyɛsɔ tende lande na kataso ngasɔ.

Lɔsɛnɔ la pondjo lo Paradiso ka la nkɛtɛ

Dibuku dia lo Bible dia Enyelo mɛnyaka ɛnɛlɔ ka dimɛna efula ka olui w’anto waheyama mbadia wambolongola lɔsɛnɔ la pondjo lo paradiso ka la nkɛtɛ. L’atei awɔ mbele ndo wanɛ wakavu ko wambolwama ndo waya la wolo ndo l’alemba waki lawɔ lo nshi yawɔ ya ɛlɔngɔlɔngɔ. (Enyelo 7:9; 20:12, 13; 21:3, 4) Vɔ wayɔtɔlama lo “ndjali k’ashi a lumu, a wema pesopeso uku talatala, watumba uma la tshina dia kiti ka diulelu ka [Nzambi].” L’omamu w’ashi akɔ mbele “utamba a lumu . . . akatshi w’utamba waki dia nkonoya wedja.” Jehowa Nzambi ka kɛtshi ekɔ lo mbisha leeta lɔnɛ ate: “One leli la pusa ayi! One lalanga ose ashi a lumu wososa.”​—Enyelo 22:1, 2, 17.

Etamba wa lomu ndo ashi asɔ hawotaloya lɔsɛnɔ l’onto. Ndo ashi watawɔ ɔnɛ naka onto ambanɔ kete nde ayotshikalaka ɔlɔngɔlɔngɔ ndo osekaseka wakatayangaka waa alchimistes ndo anyangiyangi kokoka vɔ lawɔ taloya lɔsɛnɔ l’onto. Koko, etamba la ashi watɛkɛtawɔ lo Bible nembetshiyaka tɛdikɔ takɔshi Nzambi lo tshimbo ya Yeso Kristo dia kaloyɛ anto lɔsɛnɔ la kokele lakikɔ oma l’etatelo.

Sangwelo diaki Nzambi dia mbisha anto wele l’okitanyiya lɔsɛnɔ la pondjo lanɛ la nkɛtɛ diatatshikitana. Sangwelo sɔ diayokotshama, nɛ dia Jehowa ekɔ kanga kɔlamelo. Osambu 37:29 mbutaka ɔnɛ: “Antu w’ololo wayukita kete, wayudjaseka loko pundju.” Daka sɔ totshutshuyaka sho la wanɛ wayolongola eongelo kahavu l’olongo, dia mbuta ɔnɛ: “Khumadiondjo [Nzambi], Kanga-Wulu-Tshe, ndi etsha aye waki ndu mamba li! We Khum’ekanga ka wedja tshe, mbuka yaye yeko ololo la mete! Khumadiondjo, akona ahukuka woma, ndu ahutumbula lukumbu laye na? Ne dia weme utu keli [la kɔlamelo].”​—Enyelo 15:3, 4.

Onde wɛ kombolaka woshasha wa diambo wa lɔsɛnɔ la pondjo? Naka ngasɔ, kete wɛ pombaka monga la kɔlamelo ndo l’okitanyiya le ‘Nkumekanga ka pondjo.’ Wɛ pombaka mbeka akambo wendana la Jehowa ndo Yeso Kristo ɔnɛ lele oma lo tshimbo yande mbakokaso kondja lɔsɛnɔ lɔsɔ. Wanɛ tshɛ wetawɔ ɛlɛmbɛ waki Nzambi wendana la ɔlɔlɔ la kɔlɔ wayolongola woshasha wa “lumu la pundju.”​—Joani 17:3.

[Nɔte ka l’ɛse ka dikatshi]