Lonyangu l’efula ndo lahashile

ATETE edja, onyangiyangi ɔmɔtshi akasale eyangelo lo kɛnɛ kendana la shɛngiya yonga la woho watete nshi le anto wele la lonyangu l’efula l’ɔtɛ wa wakiwɔ wa ngandji wambovɔ. Nde akatomɛ ambutshi enanɛi wakavusha anawɔ ambeta ɛnɔnyi efula ambola amɔtshi. Aha ambutshi tshɛ mbakakadimola lo ambola asɔ. Ombutshi ɔmɔtshi wa pami welɛwɔ Vladimir, lakavusha ɔnande la pami ambeta ɛnɔnyi etanu, akate dia nde ekekɔ la kandji efula dia tɛkɛta dikambo di’ɔnande ɔsɔ.a

Ambutshi efula wambovusha mongaka la kandji kahashile kɛsɔ. Ɛnɔnyi dikumi l’ɔkɔngɔ wa William mvusha ɔnande laki l’ɛnɔnyi 18 lo aksida ɔmɔtshi wa l’ashi, nde akafunde ate: “Nyɔi k’ɔnami ɔsɔ kâkambisha pâ polo ndo kakianɛ ndo pâ kɛsɔ hashilaki naka leke la lɔsɛnɔ.” Ɛnɔnyi etanu l’ɔkɔngɔ wa Lucy mvusha ɔnande la hemɔ ka shashimoya, nde akafunde ate: “Nshi ngana y’oma la ntondo, dimi lakatetemala kanyiya lo mbuta ɔnɛ: ‘Dui dia nganɛ hakoke salema.’ Lakayaokaka oko onto lɛna dɔ dia kɔlɔ lele hete edja nde kashimɔka oma lo djɔ. L’ɔkɔngɔ w’etena kɛmɔtshi, lakatatɛ suya mɛtɛ dia ɔnami ambovɔ ndo nde hayokoka kalola oya la ngelo nto. Aya ɛnɔnyi etanu wambovɔ ɔnami, koko mbala efula, etena kemi dimɛ, dimi mbolelaka.”

Lande na kele ambutshi wambovusha, oko Vladimir, William, ndo Lucy mongaka la lonyangu l’efula ndo lahashile na? Nyɛsɔ tɔsɛdingole ɛkɔkɔ ɛmɔtshi.

Lande na lonyangu l’efula la ngasɔ?

Etena kotɔ ɔna lo nkumbo, ambutshi mongaka la ɔngɛnɔngɛnɔ woleki ɛngɛnɔngɛnɔ ekina. Etena kowɛmbiwɔ, kendawɔ woho wambondolala kana kawɛnawɔ amɔnamɔna, vɔ mongaka la ɔngɛnɔngɛnɔ w’efula. Ambutshi wa ngandji ngɛnangɛnaka anawɔ. Vɔ mbaetshaka dia monga la lɔkɛwɔ l’ɔlɔlɔ ndo la loshilambo. (1 Tessalonika 2:7, 11) Etena kola ana oma lo welo wadja ambutshi awɔ, ambutshi mongaka la ɔngɛnɔngɛnɔ w’efula ndo tatɛka nongamɛ awui efula lo dikambo diawɔ.

Ambutshi wayakiyanya dikambo di’anawɔ salaka tshɛ dia kotsha ehomba awɔ. Mbala la mbala, vɔ mombaka yema ya dikuta kana diangɔ dia l’emunyi dia ndjokimanyiya anawɔ etena kayowotshuka kana kayowotshukama. (2 Koreto 12:14) Lo menda wenya, welo ndo falanga y’efula yashishawɔ dikambo di’anawɔ, sho kokaka mbuta dia ambutshi mbodiaka anawɔ dia vɔ tshikala la lɔsɛnɔ, koko aha dia vɔ ndjovɔ. Etena kavɔ ɔna, kete olimu wa mbowodia hawokomi l’ekomelo kawɔ, ndo elongamelo kaki l’ambutshi ndjɔtɔka l’ashi. Nyɔi ndjokomiyaka kana ndjohembolaka ngandji k’efula kele l’ambutshi otsha le ɔna. Dihole diaki la ɔnawɔ l’etema awɔ diaya kakianɛ hwe. Ambutshi mongaka la ɔkɛi w’efula wahashile esadi.

Bible suyaka dia ambutshi wambovusha mongaka la lonyangu l’efula ndo lahashile. Lo kɔndɔla kɛnɛ kakatombe etena kakoke Jakɔba, owandji wa nkumbo nyɔi ka Yɔsɛfu y’ɔnande, Bible mbutaka ɔnɛ: “Jakoba akatshatsha ahondo andi, akalote dihondo di’utanda, akaleli on’andi [nshi efula]. Ku an’andi w’apami la an’andi w’amantu tshe wakayi la ndjûsamba. Keli ndi akatuni esambelu kawo ata ati: Dimi layutsho l’udimu a pengandu la delu dia on’ami. Ku ndi akaleli on’andi wulu.” Ɛnɔnyi efula l’ɔkɔngɔ, Jakɔba akatetemala ndela ɔnande lakawawotɛ ɔnɛ akavu. (Etatelu 37:34, 35; 42:36-38) Ɛnyɛlɔ kekina k’oma lo Bible, ekɔ kaki womoto ɔmɔtshi la kɔlamelo lakawelɛka Naɔmi lakavusha anande ahende w’apami. Oma lo lonyangu l’efula laki lande, nde akalange tshikitanya lokombo lande, mbuta ate minya lokombo la Naɔmi, kitshimudi ate: “Mpe,” ko mbɔsa lokombo la Mara, kitshimudi ate: “Ululu.”​—Ruta 1:3-5, 20, 21.

Koko Bible hatɛkɛta paka dia ɔkɛi wonga la ambutshi wambovusha. Tɔ mɛnyaka nto woho washa Jehowa wanɛ wambovusha wolo. Lo sawo diayela, tayɔsɛdingola toho tɔmɔtshi tasamba Nzambi wanɛ wambovusha.

[Nɔte ka l’ɛse ka dikatshi]