Yasukanya la Nzambi

‘Nzambi k’esambelo tshɛ’

2 Koreto 1:​3, 4

AKAMBO efula wa lo lɔsɛnɔ, ɛnyɛlɔ oko asui, ɔkɔmwɛlɔ, ndjaɔsa oko etshike kokaka tela lonyangu efula ndo toshishɛ elongamelo. Lo tena dia ngasɔ wɛ kokaka ndjambola ɔnɛ: ‘Lende akokami kondja ekimanyielo?’ Ɛtɛkɛta w’ɔpɔstɔlɔ Paulo watanema lo 2 Koreto 1:3, 4 mɛnyaka dia Jehowa Nzambi mbele kiɔkɔ y’esambelo.

Lo divɛsa 3, Nzambi mbelamɛka ɔnɛ: “Shesu ka ketshi.” Ɛtɛkɛta ɛsɔ alembetshiyawɔ na? Tshɛkɛta ya lo Grɛkɛ yokadimɔmi ɔnɛ “ketshi” kokaka mbela kanyi ya mboka anto akina kɛtshi l’ɔtɛ w’asui wele lawɔ.a Dibuku dimɔtshi dialembetshiya awui wa lo Bible mbutaka dia tshɛkɛta shɔ kokaka kadimɔma ɔnɛ “loka kɛtshi” kana “layakiyanya efula.” “Ketshi” ka Nzambi mbotshutshuyaka dia nde kimanyiya anto. Shi mbeya dionga diaki Nzambi sɔ totshutshuyaka dia sho ndjasukanya la nde?

Paulo mbɔsaka Jehowa nto oko ‘Nzambi k’esambelo tshɛ.’ Lo divɛsa nɛ Paulo akakambe la tshɛkɛta yele ndo la “kanyi ya samba onto etena kende l’ekakatanu kana la lonyangu ndo kanyi ya mbôkimanyiya kana mbôkeketsha.” Dibuku dimɔtshi (The Interpreter’s Bible) mbutaka ɔnɛ: “Sho sambaka ɔmɛnyi fɔnu etena kôkeketshaso dia nde mbikikɛ asui wele lande.”

Wɛ mbeyaka ndjambola ɔnɛ: ‘Ngande watosamba Nzambi ndo watoshande wolo wa sho mbikikɛ asui?’ Yoho yalekande sala dikambo sɔ ele lo tshimbo ya Bible Ɔtɛkɛta ande ndo lo tshimbo ya woshasha wa dɔmbɛlɔ. Paulo akate dia Nzambi akatosha Ɔtɛkɛta Ande la ngandji tshɛ dia “shu ndjala la elungamelu . . . uma lu ekikitshelu ka lu afundelu.” Ndo nto, oma lo tshimbo y’alɔmbɛlɔ w’oma k’ɛse otema sho koka monga la “ki ka [Nzambi] kuleki yimba tshe.”​—Romo 15:4; Filipi 4:7.

Polo lo yɛdikɔ yakɔna yasamba Jehowa ekambi ande? Paulo mbutaka dia Nzambi ‘tosambaka l’asui tshɛ.’ (2 Koreto 1:4) Oyadi tɔsɛngiya, ekakatanu kana asui wakokaso pomana lawɔ, Nzambi kokaka tosha ekeketshelo ndo wolo wele laso ohomba dia sho mbikikɛ. Shi kɛsɔ tokeketshaka?

Esambelo kaya oma le Nzambi hakomɛ tsho le wanɛ wakilongola. Paulo tetemalaka mbuta dia Nzambi tosambaka woho wa sho ‘monga l’akoka wa samba wanɛ tshɛ wele la asui oma l’esambelo kakatosambe Nzambi.’ Etena kasambemaso oma lo asui, dui sɔ tokimanyiyaka dia sho mboka anto akina kɛtshi ndo diɔ totshutshuyaka dia kimanyiya wanɛ wele lo dihombo.

Oko wende ‘Nzambi k’esambelo tshɛ,’ Jehowa hasale dia ekakatanu kana pâ yele laso shila. Koko sho kokaka monga l’eshikikelo kɛnɛ: Naka sho mendɛ le nde dia nde tosamba, kete nde mbeyaka tokeketsha dia sho tondoya lonyangu kana ekakatanu wakoka monga laso lo lɔsɛnɔ. Sho kokaka mɛtɛ tɛmɔla ndo tombola Nzambi ka kɛtshi ka ngasɔ.

[Nɔte ka l’ɛse ka dikatshi]