Dietawɔ diele la anto efula
“Lakɛnaka alɔ wa kɔlɔ wa lalongola lo ifɛrnɔ! Lakɛnaka lo alɔ dia wakambikashaka lo lowenga la dja ndo lakemɔka la ekoko wa delo. Ndoko ohomba mbuta dia lakasalaka la wolo diaha sala pɛkato.”—Arline.
ONDE wɛ mbetawɔka dia ifɛrnɔ ekɔ dihole di’asui diakawalɔngɔsɔla dia soyaka atshi wa pɛkato? Anto efula mbetawɔka dui sɔ. Ɛnyɛlɔ, lo 2005, nomb’ewo kɛmɔtshi ka lo inivɛrsite St. Andrews ka lo wodja wa Écosse akɛnyi dia yɛdikɔ ya kasato ɔtɔi k’ewandji w’ɛtɛmwɛlɔ wa l’Écosse mbetawɔka dia anto wasala kɔlɔ wayosowa “pondjo pondjo lo yimba lo ifɛrnɔ.” Katanu ɔtɔi mbetawɔka dia wanɛ watshɔ lo ifɛrnɔ soyamaka lo demba.
Lo wedja efula, anto efula mbetawɔka wetshelo wa ifɛrnɔ. Ɛnyɛlɔ, lo wodja wa États-Unis, ɔkɔnya ɔmɔtshi wakasalema lo 2007 akɛnya dia pursa 70 ya wanɛ wakawakɔnya mbetawɔka wetshelo wa ifɛrnɔ. Kânga lo wedja wele anto hawoleke ndjasha lo awui w’ɔtɛmwɛlɔ, anto mbetawɔka wetshelo wa ifɛrnɔ. Ɔkɔnya wakasalema lo 2004 akɛnya dia lo wodja wa Canada pursa 42 y’anto mbetawɔka wetshelo wa ifɛrnɔ. Ndo lo wodja wa Grande-Bretagne pursa 32 y’anto mbetawɔka dia ifɛrnɔ wekɔ.
Kɛnɛ ketsha ewandji w’ɛtɛmwɛlɔ
Ewandji w’ɛtɛmwɛlɔ efula hawoyetsha dia ifɛrnɔ ekɔ dihole diasoyama anto lo dja ya mɛtɛ mɛtɛ. Koko, vɔ sukɛka olembetshiyelo wɔtɔnɛ la wɔnɛ wɔtɛkɛtami lo dibuku Katakismu k’ɔtɛmwɛlɔ w’aseka Mupɛ (lo Angɛlɛ) kakatondjama lo 1994. Dibuku sɔ mbutaka ɔnɛ: “Nyango dilanya dia lo ifɛrnɔ ekɔ okakitwanelo wa pondjo l’asa onto la Nzambi.”
Kânga mbediɔ ngasɔ, efula k’anto wâkatetemala mbetawɔ di’ifɛrnɔ ekɔ dihole diasoyama anto lo yimba kana lo demba. Wanɛ wasukɛ wetshelo ɔsɔ mbutaka dia vɔ tomba oma lo Bible. Yɔnɛ Albert Mohler, owandji w’ɔtɛmwɛlɔ welɛwɔ waa baptistes du sud akate ate: “Wetshelo ɔsɔ tomba oma lo Afundelo.”
Lande na kele kɛnɛ ketawɔyɛ kekɔ ohomba?
Naka ifɛrnɔ ekɔ mɛtɛ dihole diasoyama anto, kete mɛtɛ wɛ pombaka mbodioka wɔma. Koko, naka wetshelo ɔsɔ wekɔ kashi, kete ewandji w’ɛtɛmwɛlɔ wetsha wetshelo akɔ fukutanyaka tshanana timba t’anto wetawɔ wetshelo awɔ. Ndo nto, vɔ tɛngaka Nzambi.
Kakɔna kata Bible, Ɔtɛkɛta wa Nzambi lo dikambo sɔ? Asawo wayela wayokamba la dikadimwelo dia Bible di’aseka Mupɛ ndo di’aseka Asɔnyi dia kadimola lo ambola asato anɛ: 1) Akomɛ onto mɛtɛ etena kavɔnde? 2) Aketsha Yeso lo dikambo dia ifɛrnɔ? 3) Naa shɛngiya yele la mbeya mɛtɛ lo dikambo dia ifɛrnɔ le yɛ?