Tolowanya alɔmbɛlɔ aso oma lo wekelo wa Bible
“[Jehowa] li, lambukosengasenga nti: Uhuke tui lu dombelo diami, dimi ukambi aye.”—NEH. 1:11.
1, 2. Lande na kele ayonga ohomba dia sho nsɛdingola alɔmbɛlɔ amɔtshi wele lo Bible?
DƆMBƐLƆ ndo wekelo wa Bible ekɔ akambo w’ohomba efula wa l’ɔtɛmwɛlɔ wa mɛtɛ. (1 Tes. 5:17; 2 Tim. 3:16, 17) Lo mɛtɛ, Bible bu dibuku di’alɔmbɛlɔ, koko tɔ kekɔ la alɔmbɛlɔ efula, mbidja ndo wanɛ watanema lo dibuku di’Esambu.
2 Etena kadiayɛ ndo kekayɛ Bible, wɛ koka ntana alɔmbɛlɔ wɔtɔnɛ l’akambo wahomana la yɛ. Lo mɛtɛ, tayolowanya alɔmbɛlɔ aso naka sho mbidjaka tokanyi tɔmɔtshi tele l’alɔmbɛlɔ wele lo Bible etena kalɔmbaso. Wetshelo akɔna wakokaso nkondja oma le anto wele alɔmbɛlɔ wakawalɔmbɛ ekimanyielo wakakadimɔma ndo oma lo kɛnɛ kakawalɔmbɛ?
Toyange ɛlɔmbwɛlɔ kaki Nzambi ndo tokiyele
3, 4. Ɔkɛndɛ akɔna wakalongola okambi waki Abarahama, ndo wetshelo wakɔna wakokaso nkondja oma lo kɛnɛ kakatôsalɛka Jehowa?
3 Wekelo aso wa Bible wayotɛnya dia sho pombaka nɔmbaka nshi tshɛ ɛlɔmbwɛlɔ kaki Nzambi. Tɔsɛdingole kɛnɛ kakatombe etena kakatome owandji wa nkumbo Abarahama okambi ande w’opalanga, ondo Eliɛzɛrɛ otsha la Mezɔpɔtamiya dia toyangɛ Isaka wadi loka Nzambi wɔma. Etena kakataholaka wamato ashi l’ɛtɛkɔ kɛmɔtshi, okambi ɔsɔ akalɔmbɛ ate: “[Jehowa le] . . . , usekaseka a umuntu tshe layumolomba nti: Enge mbaka keli no ashi; ku ndi ayunkaluya diui ati: Noka; dimi layusha ndu kamelo yaye ashi a no. Oso kayuyala one lakayasonwela ukambi aye Isaka. Uma lu dikambu so mbayumulimbitela nti: We mbukaka khumemi ketshi.”—Etat. 24:12-14.
4 Dɔmbɛlɔ diakasale okambi waki Abarahama diakakadimɔma etena kakasha Rɛbɛka kamɛlɔ yande ashi. Aha la ntshimbatshimba, Rɛbɛka aketawɔ ntshɔ l’okambi ɔsɔ la Kanana ndo akakome wadi aki Isaka la ngandji. Lo mɛtɛ, hatokoke nongamɛ dia Nzambi ayotosha djembelo mɔtshi ya lânde, koko nde ayotɔlɔmbɔla lo lɔsɛnɔ naka sho mbɔlɔmba ndo ndjashikikɛ dia mbetawɔ nɔmbwama la nyuma kande.—Ngal. 5:18.
Dɔmbɛlɔ kimanyiyaka dia nkitshakitsha ekiyanu
5, 6. Kakɔna kakambiya lo kɛnɛ kendana la dɔmbɛlɔ diaki Jakɔbɔ etena kakinde suke la mpomana la Esau?
5 Dɔmbɛlɔ koka nkitshakitsha ekiyanu. Oma lo wɔma wakandokaka Esau wa diasa diande, Jakɔbɔ akalɔmbɛ ate: “[Jehowa] li . . . mete ololo ami hakuki dia we mbukami ketshi la ngandji uku akayantshela dimi ukambi aye. . . . Dimi lambukosengasenga nti: Unshimbeli uma l’anya wa onalingu Esau; ne dia dimi mbûkaka woma efula, nti: Atukuyundjaka, dimi la wali ndu ana. We kakamvutela wati: Dimi layukutshela ololo, layufudia tukanula taye uku lokongo latuyalaka l’umamu w’ashi a waki, laheyi untu mbala.”—Etat. 32:9-12.
6 Kânga mbele Jakɔbɔ akɔshi tɛdikɔ tɔmɔtshi la yewo tshɛ, dɔmbɛlɔ diande diakakadimɔma etena kakawokana nto nde la Esau. (Etat. 33:1-4) Adia dɔmbɛlɔ sɔ la yambalo tshɛ, ko wɛ ayɛna dia Jakɔbɔ kɔnɔmba tsho dia nkondja ekimanyielo. Nde akɛnya mbetawɔ kaki la nde le Kanula yakalakema ndo lowando laki la nde lo ngandji ka lɔsɛngɔ kaki Nzambi. Onde wɛ ekɔ la ‘wɔma l’otema’? (2 Kor. 7:5) Naka ngasɔ, kete dɔmbɛlɔ diaki Jakɔbɔ koka kohola dia alɔmbɛlɔ koka nkitshakitsha ekiyanu. Hatohombe tsho nɔmbaka dia ehomba aso, koko sho pombaka mbidjaka ndo awui wɛnya dia tekɔ la mbetawɔ.
Tɔlɔmbɛ dia nkondja lomba
7. Lande na kakalɔmbɛ Mɔsɛ dia mbeya mboka yaki Jehowa?
7 Nsaki ka ngɛnyangɛnya Jehowa pombaka totshutshuya dia sho nɔmba dia nkondja lomba. Mɔsɛ akalɔmbɛ dia mbeya mboka yaki Nzambi. Nde akalɔmbɛ ate: “Enda, we [Jehowa k]akamvutela wati: Utundja wudja one [Oma l’Edjibito]. . . diako mbakosengasengami kakiane nti: Naka dimi lakahumo lukulu l’olo lu ashu aye, omenya mbuka yaye kakiane, dia dimi . . . mpumo lukulu l’olo lu ashu aye.” (Etum. 33:12, 13) Dia nkadimola lo dɔmbɛlɔ diande, Nzambi akasha Mɔsɛ ewo k’efula ka mboka Yande, mbuta ate kɛnɛ kakinde l’ohomba dia nɔmbɔla wodja waki Jehowa.
8. Wahɔ akɔna wakokayɛ nkondja lo nkana yimba la 1 Khumi ya Dikanga 3:7-14?
8 Davidi nde lawɔ akalɔmbɛ ate: “[Jehowa le] umbetsha mbuka yaye.” (Osam. 25:4) Sɔlɔmɔna k’ɔna aki Davidi akalɔmbɛ Nzambi dia nde nkondja lomba dia nde nkotsha ɔkɛndɛ ande wa nkumekanga ka Isariyɛlɛ. Dɔmbɛlɔ diaki Sɔlɔmɔna diakangɛnyangɛnya Jehowa ko nde akawosha, aha kɛnɛ kakandalɔmbɛ keto, koko ndo ɛngɔnyi la lotombo. (Adia 1 Khumi ya Dikanga 3:7-14.) Naka wɛ ambokondja ɛkɛndɛ ɛmɔtshi wɛnayɛ dia wekɔ wotsho l’etshumanelo, kete lɔmba dia nkondja lomba ndo onga la okitshakitsha. Oma lâsɔ, Nzambi ayokokimanyiya dia wɛ nkondja ewo ndo lomba lele la yɛ ohomba dia nkotsha ɛkɛndɛ ayɛ lo yoho ya dimɛna ndo yolodi la ngandji.
Tosalake alɔmbɛlɔ w’oma k’ɛse otema
9, 10. Kakɔna kele ohomba lo woho wakatɛkɛta Sɔlɔmɔna dikambo di’otema lo dɔmbɛlɔ diakandasale l’osapwelo wa tɛmpɛlɔ?
9 Dia Nzambi mboka alɔmbɛlɔ aso, vɔ pombaka monga alɔmbɛlɔ w’oma k’ɛse otema. Sɔlɔmɔna akasale dɔmbɛlɔ di’oma k’ɛse otema diele lo 1 Khumi ya Dikanga tshapita 8 la ntondo k’olui w’anto wakasangana la Jerusalɛma dia nsapola tɛmpɛlɔ kaki Jehowa lo 1026 N.T.D. L’ɔkɔngɔ w’ɔshɛtɛ wa sheke kitshama lo Dihole dioleki ekila ndo ka dinge diaki Jehowa ndola lo tɛmpɛlɔ, Sɔlɔmɔna akatombola Nzambi.
10 Eka dɔmbɛlɔ diakasale Sɔlɔmɔna ndo enda woho watɛkɛtadiɔ dikambo di’otema. Sɔlɔmɔna akeyaka dia paka Jehowa ndamɛ mbeya otema w’onto. (1 Khum. 8:38, 39) Dɔmbɛlɔ sɔ mɛnyaka elongamelo kakoka ndjala l’otshi wa kɔlɔ ‘lakalola le Nzambi l’otema ande tshɛ.’ Etena kakandamaka ekambi waki Nzambi le atunyi, Nzambi akakokaka mboka alɔmbɛlɔ awɔ naka etema awɔ tshɛ monga le Nde. (1 Khum. 8:48, 58, 61) Lo mɛtɛ, alɔmbɛlɔ aso pombaka monga w’oma k’ɛse otema.
Woho wakoka dibuku di’Esambu ndowanya alɔmbɛlɔ aso
11, 12. Wetshelo akɔna wambotokondja oma lo dɔmbɛlɔ di’ose Lɛwi laki kokoka ntshɔ lo luudu l’ɔtɛmwɛlɔ laki Nzambi l’etena kɛmɔtshi?
11 Mbeka dibuku di’Esambu kokaka ndowanya alɔmbɛlɔ aso ndo tokimanyiya dia sho kongɛ polo l’etena kayokadimola Nzambi alɔmbɛlɔ aso. Tɔsɛdingole solo dia lotutsha diaki l’ose Lɛwi ɔmɔtshi laki lo lɔhɔmbɔ. Kânga mbakinde kokoka ntshɔ l’etena kɛmɔtshi lo luudu l’ɔtɛmwɛlɔ laki Jehowa, nde akembe ate: “Utema ami ukundi ambuyolembiama, ukundi ambuyutshutshumala na? Ulungameli li [Nzambi], ne dia dimi layuwandula ntu. Ndi keli panda kami la [Nzambi k]ami.”—Osam. 42:5, 11; 43:5.
12 Wetshelo akɔna wakokaso nkondja oma le ose Lɛwi ɔsɔ? Naka tambondama l’ɔtɛ w’akambo wa mɛtɛ ndo taya bu l’akoka wa nsangana l’asekaso ambetawudi lo dihole di’ɔtɛmwɛlɔ lo tshanda mɔtshi, kete tokonge la solo dia lotutsha tshɛ dia Nzambi tokimanyiya. (Osam. 37:5) Tokane yimba l’ɛngɛnɔngɛnɔ waki la so l’olimu waki Nzambi ndo tɔlɔmbɛ Nzambi dia monga l’ekikelo ‘etena kakongɛso dia Nzambi’ tokimanyiya dia sho ndjosangana nto l’ekambi ande.
Tɔlɔmbake la mbetawɔ
13. Lo ndjela Jakoba 1:5-8, lande na kahombayɛ nɔmba la mbetawɔ?
13 Oyadi akambo akɔna wele la so, tɔlɔmbake nshi tshɛ la mbetawɔ. Naka wɛ ambohomana l’ehemba wendana l’olowanyi, kete yela dako diaki ombeki Jakɔba. Lɔmba Jehowa ndo tongake la tâmu di’ɔnɛ nde koka kosha lomba lele la yɛ ohomba dia mbikikɛ ehemba. (Adia Jakoba 1:5-8.) Nzambi mbeyaka ekakatanu wele la yɛ ndo nde kokaka kɔlɔmbɔla ndo kokeketsha la nyuma kande. Dihwɛnde otema la mbetawɔ tshɛ, “aha la tamu,” ndo etawɔ ɛlɔmbwɛlɔ ka nyuma kande ndo alako w’oma l’Ɔtɛkɛta ande.
14, 15. Lande na kakokaso mbuta dia Hana akalɔmbɛ ndo akasale akambo la mbetawɔ?
14 Hana, laki wadi ɔmɔtshi laki Elekana w’ose Lɛwi akalɔmbɛ ndo akasale akambo la mbetawɔ. Waladɛnde Penina lakote ana efula akawɔlaka lo woho wakinde ekomba. Hana akatshike dɔkɔlɔkɔ lo tabɛrnakɛlɛ dia naka nde mbota ɔna pami, nde akahombe mbosha Jehowa. Lam’ele ɛlɔmɔ ande wakasokasokaka etena kakandalɔmbaka, Ɔlɔmbɛdi wa lâdiko Eli akɔshi dia nde ambodjɔ wanu. Etena kakandeye dia Hana kombidjɔ wanu, nde akawotɛ ate: “[Nzambi k]a Isariyele uki dombelo diaye!” Kânga mbaki Hana kombeyaka kɛnɛ kakahombe salema, nde aki la mbetawɔ di’ɔnɛ Nzambi ayokadimola dɔmbɛlɔ diande. Ɔnkɔnɛ, nde “kundjala la lunyangu ntu.” Nde kondjakiyanya nto l’ɔtɛ wa dikambo sɔ.—1 Sam. 1:9-18.
15 L’ɔkɔngɔ wa nde mbota Samuɛlɛ ndo mbokidia awɛlɛ, Hana akawosha Jehowa dia nde mbokambɛka olimu w’ekila lo tabɛrnakɛlɛ. (1 Sam. 1:19-28) Ntshungola etena dia nkana yimba lo dɔmbɛlɔ diakandasale lo diaaso sɔ mbeyaka ndowanya alɔmbɛlɔ aso ndo tokimanyiya dia sho mɛna ɔnɛ sho koka ntondoya oseka dikambo tshɛ dia lonyangu diakoka monga la so naka sho nɔmba la mbetawɔ k’ɔnɛ Jehowa ayotokadimola.—1 Sam. 2:1-10.
16, 17. Kakɔna kakatombe lo woho wakalɔmbɛ ndo wakasale Nehemiya akambo la mbetawɔ?
16 Nehemiya, pami k’ɔlɔlɔ kakasɛnɛ lo ntambe ka tanu N.T.D. akalɔmbɛ ndo akasale akambo la mbetawɔ. Nde akalɔmbɛ ɔnɛ: “[Jehowa] li, lambukosengasenga nti: Uhuke tui lu dombelo diami, dimi ukambi aye, ndu lu dombelo di’ekambi aye watulangaka mbuka lukumbu laye woma. Umbuki ngandji kaye ka mamba, umpumuya dimi ukambi aye lukulu l’olo, la ntundu ka untu one.” Aki “untu” ɔsɔ? Onto ɔsɔ ko Aratashasha, nkum’ekanga k’ose Pɛrɛsiya kele Nehemiya aki okambi ande lakawodjɛka wanu lo dikɔhɔ.—Neh. 1:11.
17 Nehemiya akalɔmbɛ la mbetawɔ l’edja ka nshi efula l’ɔkɔngɔ wa nde mbeya dia ase Juda wakatshungɔ oma lo lɔhɔmbɔ la Babilɔna waki “l’atei w’asui la sonyi. Eheli ka lukumbu la Jerusalema kakalana.” (Neh. 1:3, 4) Alɔmbɛlɔ waki Nehemiya wakakadimɔma lo yoho yakaleke kɛnɛ kakandalongamɛka etena kaketawɔ nkumekanga Aratashasha dia nde ntshɔ otsha la Jerusalɛma dia tohika mpele diayɔ. (Neh. 2:1-8) Kombeta edja, ehele ka lokombo kakalɔngɔsɔma. Alɔmbɛlɔ waki Nehemiya wakakadimɔma nɛ dia vɔ wakaleke mendana l’ɔtɛmwɛlɔ wa mɛtɛ ndo wakasalemaka la mbetawɔ. Onde ngasɔ mbasalayɛ?
Tohɔke dia mbotombolaka ndo mbokaka losaka
18, 19. L’ɔtɛ w’ɛkɔkɔ akɔna wahomba okambi waki Jehowa mbotombola ndo mbôka losaka?
18 Lo alɔmbɛlɔ aso, tohɔke dia tombolaka Jehowa ndo mbôkaka losaka. Tekɔ l’ɛkɔkɔ efula wa nsala dui sɔ! Ɛnyɛlɔ, Davidi akalomɔlomɔka dia ntombola lokumekanga laki Jehowa. (Adia Osambu 145:10-13.) Onde alɔmbɛlɔ ayɛ mɛnyaka dia wɛ ekɔ la lowando lo diɛsɛ diele la yɛ dia mbewoya Diolelo diaki Jehowa? Ɛtɛkɛta waki omembi w’esambo mbeyaka kokimanyiya dia wɛ mbutɛ Nzambi lo dɔmbɛlɔ di’oma k’ɛse otema lowando lele la yɛ l’ɔtɛ wa nsanganya ya l’etshumanelo ndo ya weke.—Osam. 27:4; 122:1.
19 Lowando lele la yɛ l’ɔtɛ wa diɔtɔnganelo dia dimɛna efula diele lam’asayɛ la Nzambi mbeyaka kotshutshuya dia wɛ nɔmba oma k’ɛse otema lo nkamba la tokanyi tele oko tɔnɛ: “Khumadiondjo li, dimi layukutumbulaka l’atei antu. Layukimbelaka esambu wa diandu l’atei a wedja. Ngandji kaye ka shikaa nkumaka pulu ndu l’ulungu, la kolamelu yaye pulu ndu lu wangi. [Nzambi] li, utumbwami la diku di’ulungu. Lutumbu laye layali la diku dia kete tshe.” (Osam. 57:9-11) Ɔsɔ mɛtɛ ekɔ ɛtɛkɛta wakeketsha! Onde wɛ hetawɔ dia ɛtɛkɛta wananda otema wa ngasɔ w’oma lo dibuku di’Esambu kokaka monga la shɛngiya l’alɔmbɛlɔ ayɛ ndo mbalowanya?
Tɔlɔmbake Nzambi la dilɛmiɛlɔ di’efula
20. Ngande wakakɛnɛmɔla Mariya omamemelo ande le Nzambi?
20 Dilɛmiɛlɔ di’efula diele la so otsha le Nzambi pombaka kɛnɛmɔma l’alɔmbɛlɔ aso. Ɛtɛkɛta woludi la dilɛmiɛlɔ wakate Mariya yema tshitshɛ l’ɔkɔngɔ wa nde mbeya dia nde ayota Mɛsiya fɔnaka la wɛnɛ wakate Hana etena kakandakimɔ Samuɛlɛ k’ɔnande dia tokambɛ Nzambi lo tabɛrnakɛlɛ. Dilɛmiɛlɔ di’efula diaki la Mariya otsha le Nzambi mɛnamaka oma l’ɛtɛkɛta ande ɛnɛ: “Utem’ami ambutumbula Khumadiondjo, lumu lami lambongenangena le [Nzambi], Ushimbedi ami.” (Luka 1:46, 47) Onde wɛ hakoke ndowanya alɔmbɛlɔ ayɛ lo mbasalaka la dilɛmiɛlɔ di’efula dia ngasɔ? Aha la tâmu, Mariya lakokaka Nzambi wɔma akasɔnama dia monga nyango Yeso, Mɛsiya!
21. Ngande wɛnya alɔmbɛlɔ waki Yeso dilɛmiɛlɔ di’efula ndo mbetawɔ kaki la nde?
21 Yeso akalɔmbaka la dilɛmiɛlɔ di’efula ndo la mbetawɔ tshɛ. Ɛnyɛlɔ, la ntondo ka nde mbolola Lazaro, “Jesu akedia ashu, akati ati: Papa, lambukuka lusaka ne dia we mbukelakami. Dimi lakeyi nti: We atumbukelaka nshi tshe.” (Joa. 11:41, 42) Onde alɔmbɛ ayɛ kɛnɛmɔlaka dilɛmiɛlɔ di’efula ndo mbetawɔ ka ngasɔ? Eka dɔmbɛlɔ di’ɛnyɛlɔ dia la dilɛmiɛlɔ diakasale Yeso, ko wɛ ayɛna dia akambo woleki ohomba lɔkɔ ele okidiamelo wa lokombo laki Jehowa, oyelo wa Diolelo diande ndo okotshamelo wa lolango lande. (Mat. 6:9, 10) Kanyiya yema dikambo di’alɔmbɛlɔ ayɛ hita. Onde vɔ kɛnɛmɔlaka woho wayashayɛ tshɛ lo Diolelo diaki Jehowa, lo osalelo wa lolango lande ndo lo okidiamelo wa lokombo lande? Kɛsɔ kahombama.
22. Lande na kakokayɛ monga l’eshikikelo dia Jehowa ayokosha dihonga dia wɛ nsambisha lokumu l’ɔlɔlɔ?
22 L’ɔtɛ wa ɛhɛnyɔhɛnyɔ kana ehemba ekina, sho pombaka nɔmba dia Jehowa tokimanyiya dia mbokambɛ la dihonga. Etena kakadjangɛ ase Sheke Petero nde la Joani diaha vɔ ‘mbetsha lo lokombo la Yeso,’ la dihonga tshɛ vɔ kotshika dia nsala dui sɔ. (Etsha 4:18-20) Lam’akawâkimɔ, vɔ wakatotɛ asekawɔ ambetawudi kɛnɛ kakatombe. Oma lâsɔ, anto tshɛ waki lawɔ wakalɔmbɛ Nzambi dia nde mbakimanyiya dia vɔ nsambisha ɔtɛkɛta ande la dihonga. Vɔ mɛtɛ wakahombe monga l’ɔngɛnɔngɛnɔ w’efula etena kakakadimɔma dɔmbɛlɔ sɔ, nɛ dia vɔ “wakaludiama la nyuma k’[ekila], wakati diui dia [Nzambi] la dihunga”! (Adia Etsha 4:24-31.) Etombelo wakayala ele, anto efula wakakome atɛmɔdi wa Jehowa. Dɔmbɛlɔ kokaka kokeketsha dia wɛ nsambisha lokumu l’ɔlɔlɔ la dihonga.
Totetemale ndowanya alɔmbɛlɔ aso
23, 24. a) Shila bɛnyɛlɔ dikina diɛnya woho wakoka wekelo wa Bible ndowanya alɔmbɛlɔ ayɛ. b) Kakɔna kayoyosala dia ndowanya alɔmbɛlɔ ayɛ?
23 Bɛnyɛlɔ dikina efula diekɔ diɛnya dia wadielo ndo wekelo wa Bible koka ndowanya alɔmbɛlɔ aso. L’ɛnyɛlɔ ka Jɔna, wɛ kokaka nsuya lo dɔmbɛlɔ dia ‘panda kekɔ le Jehowa.’ (Jona 2:1-10) Naka wɛ ekɔ lo ntshimba wɔɔngɔ l’ɔtɛ wa pɛkato ka woke kakayasale ndo amboyanga ekimanyielo oma le dikumanyi, kete tokanyi takakɛnɛmɔla Davidi mbeyaka kokimanyiya dia wɛ mɛnya ndjatshumoya kayɛ etena kalɔmbayɛ. (Osam. 51:1-12) Lo alɔmbɛlɔ amɔtshi, wɛ kokaka ntombola Jehowa oko wakasale Jeremiya. (Jer. 32:16-19) Naka wɛ ekɔ lo nyanga olonganyi, kete mbeka dɔmbɛlɔ diele lo Ezera tshapita 9 nsanganya l’ɛsɛngɔsɛngɔ ayɛ hita mbeyaka keketsha yɛdikɔ yayɛ ya nkitanyiya Nzambi lo ‘tshukana paka lo Nkumadiɔndjɔ.’—1 Kor. 7:39; Ez. 9:6, 10-15.
24 Tetemala mbadiaka, mbekaka ndo salaka eyangelo lo Bible. Yanga akambo wakokayɛ mbidjaka l’alɔmbɛlɔ ayɛ. Wɛ ayonga l’akoka wa nkamba l’awui asɔ lo alɔmbɛlɔ ayɛ wa ɛsɛngɔsɛngɔ, wa eokelo ka losaka ndo wa lotombo. Tayoleka ndjasukanya la Jehowa naka sho ndowanya alɔmbɛlɔ aso oma lo wekelo wa Bible.
Ngande wayoyokadimola?
• Lande na kahombaso nyanga ɛlɔmbwɛlɔ kaki Nzambi ndo kiyela?
• Kakɔna kahomba totshutshuya dia sho nɔmba dia nkondja lomba?
• Ngande wakoka dibuku di’Esambu ndowanya alɔmbɛlɔ aso?
• Lande na kahombaso nɔmba la mbetawɔ ndo la dilɛmiɛlɔ di’efula?
[Osato wa lo lɛkɛ 8]
Okambi waki Abarahama akalɔmbɛ ɛlɔmbwɛlɔ kaki Nzambi. Ko wɛ?
[Osato wa lo lɛkɛ 10]
Ɔtɛmwɛlɔ wa lo nkumbo kokaka ndowanya alɔmbɛlɔ ayɛ