“Enda! Dimi leetɛ diangɔ tshɛ eyoyo”

Onde wɛ kombolaka monga la yoonge ya dimɛna ndo nsɛna edja wɛ la nkumbo kayɛ? Onde wɛ kombolaka nsɛna l’andja wele kandji, asui ndo nyɔi ambonyɛma? Ɔsɔ bu andja wa lo toshimu kana wa lɔfɔnya. Koko kem’edja, andja w’oyoyo wa losembwe ɔsɔ wayonga dui dia mɛtɛ nɛ dia ɔsɔ mbele sangwelo diaki Jehowa Nzambi. Tende woho wayokotshama sangwelo sɔ oko wɔkɔndwamidiɔ lo Ɛnyɛlɔ 21:3-5.​—Adia.

“Nde [Nzambi] ayokitola asɔyi tshɛ oma lo washo awɔ.” (Ɛnyɛlɔ 21:4) Woho akɔna wa asɔyi wayokitola Nzambi? Aha asɔyi w’ɔngɛnɔngɛnɔ kana wakokɛ washo aso. Koko, daka dia Nzambi sɔ mendanaka la asɔyi wakɛdiaso l’ɔtɛ w’asui kana ɔkɛyi. Nzambi hokitola tsho asɔyi asɔ ko pe, koko nde ayowakitola tshɛ lo tshɛ lo minya ndo kiɔkɔ yakonya dia sho nkɛdia asɔyi, mbuta ate asui ndo ɔkɛyi.

“Nyɔi hatoyala nto.” (Ɛnyɛlɔ 21:4) Akambo akɔna wakoka tɔkɛdia asɔyi ko ndeka nyɔi lele otunyi aso? Jehowa ayotshungola akanga w’okitanyiya oma lo lɔhɔmbɔ la nyɔi. Lo nsala na? Lo minya kiɔkɔ ya nyɔi, mbuta ate pɛkato kakatahowɔ oma le Adama. (Rɔmɔ 5:12) Jehowa ayokonya akanga w’okitanyiya dia monga kokele diɛsɛ la olambo w’etshungwelo wa Yeso.a Oma laasɔ, otunyi wa ndjihelo “wayolanyema” ele nyɔi. (1 Kɔrɛtɔ 15:26) Anto wa kɔlamelo wayɔsɛnaka woho wayolanga Nzambi dia vɔ nsɛna, mbuta ate pondjo pondjo la yoonge ya kokele.

“Kaanga kandji hatoyala nto.” (Ɛnyɛlɔ 21:4) Kandji ya ngande yahatonga nto? Kandji tshɛ ya lo tokanyi, ya l’alemba yaya oma lo pɛkato ndo oma lo eongelo kele kema kokele yakonya miliyɔ y’anto dia diɛnɛ hatonga nto.

Kem’edja, lɔsɛnɔ lele bu l’alelo, nyɔi ndo kandji layanga monga. Ondo wɛ koka ndjambola ɔnɛ ‘ko lende?’ ‘Onde daka diaki Nzambi sɔ mendanaka ondo la lɔsɛnɔ la l’olongo?’ Keema. Tɔsɛdingole lande na kataso ngasɔ. Ɔkɔkɔ wa ntondo ele, daka sɔ mimɛka l’ɛtɛkɛta w’ɔnɛ: “Hiombo yaki Nzambi yaya kaamɛ la anto,” ndo anto w’ɛlɔlɔ wayodjasɛ la nkɛtɛ. (Ɛnyɛlɔ 21:3) Ɔkɔkɔ wa hende ele, daka sɔ kɔndɔlaka dikambo di’andja wele “nyɔi hatoyala nto,” andja wele nyɔi kakikɔ lɔkɔ, koko kaya bu. Ndooko lushi lakonge nyɔi l’olongo, koko tɔ kokongaka paka la nkɛtɛ. Mbokɛmaka hwe dia daka diaki Nzambi di’anto monga la lɔsɛnɔ la dimɛna diayokotshama paka lanɛ la nkɛtɛ.

Jehowa nangaka dia sho monga la mbetawɔ lo daka diande diendana l’andja w’oyoyo wa losembwe. L’ɔkɔngɔ wa mbuta ɛtshɔkɔ wayotokondja, nde toshikikɛka dia daka diande diayokotshama lo mbuta ɔnɛ: “Enda! Dimi leetɛ diangɔ tshɛ eyoyo.” Nde akate nto ate: “Ɛtɛkɛta ɛnɛ wekɔ wa kɔlamelo ndo mɛtɛ.” (Ɛnyɛlɔ 21:5) Shi wɛ koka mbeka akambo efula wendana la woho wakokayɛ wɛ la wanɛ wokayɛ ngandji monga l’atei w’atɛmɔdi wa Jehowa wele l’ɔngɛnɔngɛnɔ wayɛna etena kayokotshama daka diaki Nzambi dia diambo sɔ?