EKADIMWELO LO AMBOLA W’OMA LO BIBLE
Onde mɛtɛ Yeso akolola anto?
Yeso akolola Lazaro lakashile la mvɔ ambeta nshi nyɛi
Bible mɛnyaka hwe dia Yeso akolola anto wakavu. Ɛkɔndɔ ɛsɔ bu tsho toshimu; vɔ wakasalema l’ahole ndo lo tena dimɔtshi shikaa. Ɛnyɛlɔ, l’eleko k’ɔwɔ k’ɔnɔnyi 31 T.D., lemba l’anto wakande lɔkɛndɔ kaamɛ la Yeso oma la Kapɛrnauma otsha la Nayina. Etena kakawakome lɛkɔ, vɔ wakatohomana l’olui okina w’anto. Wɛ koka mbetawɔ ɔkɔndɔ wendana la eolwelo kakasalema l’ɔkɔngɔ wa laasɔ nɛ dia dui sɔ kɔndwama lo Bible Ɔtɛkɛta wa Nzambi ndo nɛ dia diɔ diakasalema lo washo w’anto asɔ tshɛ.—Adia Luka 7:11-15.
Yeso akolola nto ɔngɛnyi ande Lazaro lakashile la mvɔ ambeta nshi nyɛi. Wɛ koka mbetawɔ kɛnɛ kakasale Yeso lushi lɔsɔ nɛ dia mbala kɛsɔ nto dui diakɔ diakasalema lo washo w’ɛmɛnyi efula.—Adia Joani 11:39-45.
Lande na kakololaka Yeso anto?
Yeso akololaka anto nɛ dia nde akawaokaka kɛtshi. Nde akasalaka ngasɔ dia mɛnya dia She, lele Otongi wa lɔsɛnɔ akawosha wolo wa mbahemɛ nyɔi.—Adia Joani 5:21, 28, 29.
Woho wakololaka Yeso anto tokimanyika dia mbɛkɛ otema lo alaka ande wendana la nshi yayaye. Nde ayolola nyemba yemba y’anto, mbidja ndo anto wa kɔlɔ waki kombeya ndooko dui lo kɛnɛ kendana la Nzambi ka mɛtɛ. Anto asɔ wayokondja diaaso dia mbeya ndo mboka Jehowa Nzambi ngandji.—Adia Etsha 24:15.