Onde tekɔ lo monɛ efula oka?
1 Anto totaka vɔate: “kataleke onto mbidja weolo l’olimu ɔmɔtshi, katandaleke kondja wahɔ efula.” Dikambo sɔ mɛnamaka mɛtɛ lo kɛnɛ k’endana l’ɔtɛmwɛlɔ. Katataleke mbetsha wenya dia nɔngɔsɔla sanganya, dia sambisha losango la Diolelo ndo dia mɛnya anangɛso ngandji kawaokaso, lâwɔ akɔ ango katataleke pama lo nyuma. Ndo wedi okina mɛnamaka mɛtɛ. Naka tamboyakimɛ kana tambokamba olimu l’etema ehende, onde mɛtɛ sho kokaka nongamɛ etombelo w’ɛlɔlɔ oka?
2 Ɔpɔstɔlɔ Paulo akashikikɛ dui sɔ lo 2 Koreto 9:6: “Untu lune diango efula, ayuna diango efula.” Onde sho monɛka efula oka?
3 Wekelo wa Bible w’onto ndamɛ: Dia sho ndjâla ekambi watɔ elowa, sho tayotatɛ la monɛ efula lo kɛnɛ k’endana la wekelo aso w’onto ndamɛ. Sho pombaka monga la saki ka lomaloma ka ndɛ̂ka diangɔ dia lo nyuma. (Osam. 119:97, 105; Mat. 5:3) Oma l’ɛkɛndɛ wele laso lushi la lushi, sho pombaka mbidja weolo w’oma ka tshina di’otema dia sho nyomoleka mbeya ehomba aso wa lo nyuma. Dikambo sɔ nɔmbaka efula ka l’atei aso dia sho ‘ndjâtshungolɛ etena k’ɔlɔlɔ.’ (Ef. 5:16.) Apandjudi amɔtshi mbɔsaka tɛdikɔ dia mbetɔka kɔ̂lɔmɔ nshi mɔtshi dia vɔ mbeka. Akina ndjâlamɛka akɔlɔ amɔtshi l’oyango ɔsɔ. Lo yoho yakɔna yanaso efula na? Sho keketshaka mbetawɔ kaso ndo elongamelo kaso, ndo sho ndjaekiyaka dia monga la lomba lolodi l’ɔngɛnɔngɛnɔ ndo lɛ̂na akambo la sso di’ɔlɔlɔ.—Romo 10:17; 15:4; 1 Petero 1:13.
4 Sanganya ya l’etshumanelo: L’Osambu 122:1, Davidi akate ate: “Dimi lakangenangena lam’akawamvutela vati: Tutshu lu luudu la [Jehowa, NW]!” Onde asolo ayɛ wekɔ ngasɔ oka? Sho tayonɛ efula naka tayɔtɔka esangɔ tshɛ lo sanganya yaso tshanu ya lomingu la lomingu. Tɔ̂shi tɛdikɔ di’aha sho mpekɔ l’ɔkɔkɔ wa yema y’okakatanu mɔtshi. Nshi tshɛ, latataleke tondoya ekakatanu, kataleke ndo difuto diaso ndjâla woke.
5 Tokomake esadi lo sanganya ndo totshimbatshimbake yema l’ɔkɔngɔ a sanganya dia sho sawola kâmɛ l’anangɛso asawo washa ekeketshelo. Toyasha le efula k’anto lo ndjela akoka aso. Tɔlɔngɔsɔlake wekelo wa La Tour de Garde ɔlɔlɔ ndo sanganya kina lo yoho ya sho monɛ efula lo mbishaka waɔmbwɛlɔ l’etena kêso la diaaso. ‘Lam’ayotosha akina ashi lo yɛdikɔ y’efula’ lo sanganya, ndo sho lawɔ ‘tayokondja ashi lo yɛdikɔ y’efula.’—Tok. 11:25.
6 L’olimu w’esambishelo: Ondo ndoko lo dikambo ɔtɔi dialeka mɛnama didjango dia monɛ efula oko l’olimu w’esambishelo. Latataleke mbetsha wenya lɔkɔ, mbatataleke ndo ndjâla l’akoka wa pomanaka l’anto wayasha, dia salaka waembwelo w’eyoyo ndo dia nɔmbɔla wekelo wa Bible watɔ elowa.
7 Monɛ efula l’esambishelo, kɛdikɛdi monɛ lo yoho y’ɔlɔlɔ ndo lo yɛdikɔ y’efula. Dibuku Comment raisonner diekɔ ekimanyielo k’ohomba katokimanyiya dia sho ndowanya olimu aso ɔlɔlɔ. Lo lɛkɛ 9 polo 15, sho tanaka olekanyi mbɔtwɛlɔ ya l’asawo 40 l’ɛtɛ w’asawo 18 watokimanyiya dia nomialomia saki k’anto l’asoko. Naka onto ɔmɔtshi ambɛnya saki kande, sho pombaka funda lokombo lande lo kiatshi katshi mɔtshi dia ndjowembola la dia ndjona elowa w’oma lo kɛnɛ kakatonɛ. Akɔna eya kana weolo wadjaso wayoyodihɛ lo wekelo wa Bible, ndo kana tayetsha onto okina woho wa nde monɛ efula na?
8 Naka sho monɛ efula, kete tayolongamɛ ɛtshɔkɔ efula oma le Jehowa.—Mal. 3:10.