Etena Konɛso Efula Sho Kondjaka Ɛtshɔkɔ Efula
1 Sho tshɛ tekɔ lo kongɛ ekotshamelo k’alaka wa weke wele l’Ɔtɛkɛta wa Nzambi. Kânga ɛlɔ kɛnɛ, Jehowa toshaka ɛtshɔkɔ efula watosha nto ɔngɛnɔngɛnɔ lo nsɛnɔ yaso. Efula k’ɛtshɔkɔ wahombaso kondja, nemanɛka efula la welo wadjaso. Oko wakate ɔpɔstɔlɔ Paulo, “untu lune diango efula, ayuna diango efula.” (2 Kor. 9:6) Tɔsɛdingole awui ahende wendana la dikambo sɔ.
2 Olimu Aso Hita: Lam’asambishaso anto lokumu l’ɔlɔlɔ etena tshɛ keso l’akoka wa mbasambisha, sho kondjaka ɛtshɔkɔ efula. (Tuk. 3:27, 28) Ekɔ ɔngɛnɔngɛnɔ efula lam’ɛnaso anto efula wonɛ efula lo ndeka ndjasha l’esambishelo ka lokumu l’ɔlɔlɔ, ndo lo kamba oko ombatshi mboka wa tshanda kana wa pondjo. Sho tshɛ kokaka monɛ efula lo sala la wolo dia kalola dia tolomialomia nsaki kakɛnya anto kana lo mbalɔmba dia mbeka lawɔ Bible etena tshɛ katanema diaaso. (Romo 12:11) Naka tayodja welo wa ngasɔ, kete tayokondja etombelo washa ekeketshelo ndo tayoleka kondja ɔngɛnɔngɛnɔ l’olimu aso.
3 Tosuke Wahɔ wa Diolelo: Paulo akatɛkɛta dia ‘wônelo w’efula’ lo kɛnɛ kendana la weshasha wa diangɔ dia l’emunyi. (2 Kor. 9:6, 7, 11, 13) Tekɔ la toho totshikitanyi ta sukɛ wahɔ wa Diolelo oyadi lo kamba la wolo wa demba kana la diangɔ dia l’emunyi. Sho mbeyaka mbisha lonya lo wokelo wa Mbalasa ya Diolelo ndo ya Nsanganya ya Weke. Sho kokaka nto ndjasha dia mɔmba kana nɔngɔsɔla ahole asɔ w’ɔtɛmwɛlɔ wa mɛtɛ. Ndo nto, sho mbeyaka kimɔka weshasha aso lo kɛnɛ kendana l’adepasɛ wa l’etshumanelo kana dia sukɛ olimu w’esambishelo ka Diolelo ndo wa mbetɛ anto ambeki wakambema l’andja w’otondo. Naka sho tshɛ mbisha lonya, kete tayɔngɛnangɛna dia mɛna woho watshɔkɔla Jehowa olimu wakandatosha!—Mal. 3:10; Luka 6:38.
4 Ɔtɛkɛta wa Nzambi tokeketshaka ‘dia tshela anto akina ɔlɔlɔ, la dia ndjala ɔngɔnyi l’elimu w’ɔlɔlɔ ndo la lokaho.’ Lam’akitanyiyaso dako sɔ, sho kondjaka ɛtshɔkɔ efula ɛlɔ kɛnɛ. Ndo l’etena kakɔ kamɛ, tekɔ lo ‘ndjaombela okundji w’ɔlɔlɔ lo nshi yayaye ndo lɔsɛnɔ la pondjo.’—1 Tim. 6:18, 19.