Tambetshama oma le Jehowa
1 L’ɛlɔmbwɛlɔ ka Nzambi, ekongelo ka wetshelo ka l’andja w’otondo kekɔ lo ndjelama ɛlɔ kɛnɛ lo wedja 233. Ndoko ɛngɔ ɔtɔi kakoka andja ɔnɛ tosha kakokaso mbɛdika l’ekongelo kɛsɔ. Jehowa, Ombetsha aso a Woke, ekɔ lo têtsha woho wakokaso kondja ɛlɔlɔ oma ko kakianɛ oko watetshande nto lo dikambo dia lɔsɛnɔ la pondjo.—Is. 30:20; 48:17.
2 Kalasa Yekaso Awui wa Nzambi: Tênde kalasa y’eyoyo yatatetemala dihɔ dia kimanyiya ekambi wa Jehowa. Kalasa k’Olimu wa Teokrasi kalɔmbwama lomingu tshɛ lo tshumanelo oko 87000 kekɔ lo ndowanya miliyɔ y’apandjudi wa Diolelo dia vɔ monga ekambi w’eshika wa lokumu l’ɔlɔlɔ. Onde wɛ ambofundjaka lokombo lo kalasa kɛsɔ? Onde ndo wɛ mbele l’atei wa nunu di’anto wanɛ waketsha mingu hiende y’etondo lo Kalasa k’Ambatshi Mboka? Lam’ele wambokitshakitsha lofulo la wenya walɔmbama, ondo anto efula wayokoka kamba oko ambatshi mboka wa pondjo ko monga l’akoka wa mbɔtɔ lo kalasa kɛsɔ. Kalasa k’Olowanyelo w’Ekambi kaviya ngɔndɔ hiende kalakanyawɔ ɛlɔ kɛnɛ l’andja w’otondo l’ɛtɛkɛta wa weke, ndowanyaka dikumanyi di’eke enyemba kâmɛ ndo ekambi w’olimu dia mɛmba ɛkɛndɛ wa weke l’olimu wa teokrasi. Mbala la mbala, dikumanyi kâmɛ ndo ekambi w’olimu nongolaka wetshelo wa dimɛna efula lo Kalasa k’Olimu wa Diolelo.
3 Mvudu yaki la Société yele la Patterson, la New York, mbakamba lawɔ dikambo dia kalasa shato ya weke, yasha wetshelo wa dimena efula. Kalasa ka Ngiliyadɛ kaki la Société kaviya ngɔndɔ tshanu nɔngɔsɔlaka ekambi lo dikambo di’olimu wa misiɔnɛrɛ lo wedja ekina. Ase kɔmite ya filialɛ ya l’andja w’otondo mbetshamaka yɛdikɔ ya ngɔndɔ hiende y’etondo dia mbeya nɔmbɔla filialɛ yawɔ. Lo Ngɔndɔ ka Tanu 1999, kalasa k’oyoyo ka ngɔndɔ hiende kakadihɔ dikambo di’emendji weteta. Tɔ kakonge ntondo l’ambeki 48, w’oma l’États-Unis la Canada. Ekambi wa Jehowa tshɛ kondjaka ɛlɔlɔ oma lo wetshelo wawasha Jehowa lo tshimbo ya kalasa shɔ yotshikitanyi.
4 Tambetshama l’Oyango Akɔna na? Ose Olui Walɔmbɔla ɔmɔtshi akate ate: “Ekongelo kaso ka wetshelo kɛnɛ ekɔ l’oyango wa kimanyiya ekambi tshɛ wa Jehowa dia vɔ tshunda ɔlɔlɔ oko wofudamidiɔ lo Tukedi 1:1-4.” Tambɔlɔmba Jehowa dia nde tetemala mbisha ɔm’ɔmɔ a l’atei aso ‘lolemi la wanɛ wambetshama.’—Is. 50:4.