Onde tambokaka dikambo sɔ?
1 Eelo, tambodiokaka! Akambo efula Jehowa mbavusolaka l’Ɔtɛkɛta ande dia wahɔ w’ekambi ande. Yeso akavusolaka mbala ko mbala wetshelo ande wendana la Diolelo lo toho totshikitanyi. Apɔstɔlɔ ande wakavusolɛka wanɛ wamboshikimala l’akambo wa mɛtɛ akambo wa lo nyuma.—Romo 15:15; 2 Pet. 1:12, 13; 3:1, 2.
2 Lo nshi yaso nyɛ, ɔlɔngɔswamelo wa Jehowa ntshâka di’akambo w’ohomba efula vusɔmaka mbala ko mbala lo nsanganya ya l’etshumanelo. Ekanda ɛmɔtshi wambekama mbala ko mbala. Eelo, ekɔ ohomba sho mboka akambo wambotoshilaka mboka!
3 Ovuswelo tokimanyiyaka efula: Waohwelo wa Jehowa toshaka eokelo k’efula, tomanyaka akambo fundo, ndo tokeketshaka di’aha sho takɔ mboka kaso ka lo nyuma. (Osam. 119:129) Ɔnɛ lavusola awui l’ɛlɛmbɛ waki Nzambi ekɔ oko onto layaenda lo talatala. Vɔ tokimanyiyaka dia sho ndjasɛdingola ndo minya dionga di’onto lôka koko ‘hakɔhɛ la mbohɛ.’—Jak. 1:22-25.
4 Naka hatoyaohola shamɛ akambo wa mɛtɛ wambotekaka, kete akambo akina wayonga la shɛngiya l’etema aso. Waohwelo wa Nzambi tokeketshaka dia sho shika ekolo la ntondo ka tɔsɛngiya ta kɔlɔ t’andja ɔnɛ waki Satana. (Osam. 119:2, 3, 99, 133; Fil. 3:1) Awui watoholawɔ mbala la mbala lo kɛnɛ kendana l’ekotshamelo k’alaka waki Nzambi totshutshuyaka dia ‘sho mendaka ɔlɔlɔ.’ (Mako 13:32-37) Ovuswelo w’akambo wa mɛtɛ wa l’Afundelo tokimanyiyaka dia sho tshikala lo mboka k’otsha lo lɔsɛnɔ la pondjo.—Osam. 119:144.
5 Woho wa sho kondja wahɔ: Sho pombaka ‘mpokɛ lotui lo waohwelo wa Nzambi.’ (Osam. 119:36) Naka tayɔsɛdingola dikambo dimɔtshi diokoteyaka lo losanganya lɔmɔtshi, kete sho pombaka tayalɔngɔsɔdi la ntondo, mbadia avɛsa tshɛ woshilami, ndo kanyiya nganɛ wakokaso kamba l’awui akɔ. Paka sho nɔngɔsɔlaka Ovuswelo wa lo Kalasa k’Olimu wa Teokrasi, hatohombe mbowɔsa oko vwuiwui y’anyanya. (Luka 8:18) Aha sho minyaka yimba lo nsanganya yaso l’ɔtɛ w’ɔnɛ akambo wa mɛtɛ asɔ tokowaokaka mbala ko mbala.—Heb. 5:11.
6 Tônge la dionga diaki l’omembi w’esambo lakate ate: “Dimi latongenangena dia ndjela elembe aye, uleki ekundji tshe.” (Osam. 119:14) Eelo, tambokaka akambo wa diambo asɔ, ndo ondo tayowaoka nto. Lande na kayotowaoka nto na? Nɛ dia Jehowa mbeyaka dia tekɔ l’ohomba wa mboka akambo akɔ!