Kalasa k’olimu wa teokrasi ka lo 2000

¹ Kalasa k’Olimu wa Teokrasi ekɔ tshondo y’ɔtshɔkɔ le ekambi wa Jehowa. Lo ɛnɔnyi ndekana 50 wambeta ɛnɛ, tɔ kambokimanyiya miliyɔ y’anto dia vɔ pamia akoka awɔ w’atɛkɛtshi wa lo sɛkɛ ndo w’embetsha w’akambo wa mɛtɛ. (Osam. 145:​10-12; Mat. 28:​19, 20) Onde wɛ kokaka mɛna nganɛ wambokokimanyiya kalasa kɛsɔ? Tɔ kayokokimanyiya yoho yakɔ yâmɛ l’ɔnɔnyi ɔnɛ wa 2000 naka ndo wɛ ayoshaka asawo lɔkɔ ndo ayokambaka l’alako wayowokoshaka.

² Alako wendana l’ɛkɛndɛ ndo l’ekanda wayotokamba la wɔ wekɔ lo lɛkɛ la ntondo l’ekongelo ka kalasa k’olimu wa teokrasi ka 2000 . Lɔkɔ, vɔ tɛnya nto taahe t’etenyi l’etenyi, oma lɛnɛ ɔsami awui akɔ, woho wa mbisha asawo akɔ ndo akambo akina. Tambokɔlɔmba dia wɛ mbadia alako asɔ la yambalo tshɛ ndo kamba lawɔ.

³ Wadielo wa Bible wa lomimgu la lomingu: Ekɔ dikongelo pende diokakitɔnyi diendana la wadielo wa Bible wa lomingu la lomingu lo ekongelo ka kalasa k’olimu wa teokrasi. Ekongelo ka ntondo ekɔ kɛnɛ kokongâka, ndo tɔ mbɔsaka suke la ndjɛkɛ tshanu ya Bible. Lɔkɔ mbɔ̂sama ndo atshina w’akambo w’oma lo Bible. Ekongelo kekina kendana la wadielo wa Bible ekɔ ekongelo k’okotsha. Ekongelo ka ntondo mbɔtɔka letɔ yɛdikɔ ya mbala hiende. Lo ndjela ekongelo kɛsɔ, wɛ kokaka shidiya mbadia Bible k’otondo l’ɔkɔngɔ w’ɛnɔnyi esato. Mbokɛmaka di’amɔtshi wayolanga mbadia efula oleki woho wele l’ekongelo k’okotsha, koko akina hawotonga l’akoka wa ntsha ngasɔ. Ngɛnangɛna la kɛnɛ kakokayɛ ntsha, oleki wɛ ndjaɛdika l’anto akina. (Ngal. 6:⁠4) Kɛnɛ kele ohomba ele mbadiaka Ɔtɛkɛta waki Nzambi lushi la lushi.​—⁠Osam. 1:​1-3.

⁴ Dia mbɔtɔ lo Kalasa k’Olimu wa Teokrasi, wɛ pombaka tɛkɛta l’omendji wa kalasa. Dja lomba dimɛna lo sawo diambowokosha, ndo todidjake sawosawo. Ɔsa kalasa kɛsɔ oko yɛdikɔ y’oma le Jehowa. Lɔngɔsɔla sawo diayɛ dimɛna, manyamanyadiɔ ndo tɛkɛta akambo woye oma k’ɛse otema, ɔnkɔnɛ wɛ ayokondja wahɔ efula oma lo kalasa kɛsɔ ka lânde.