Kalasa k’Olimu wa Teokrasi ka lo 2002
1 Dikoka dia tɛkɛta mbɔsamaka oko dikambo di’anyanya le anto efula. Koko, ɔtɛkɛta ekɔ woshasha w’oma le Jehowa. Vɔ toshaka diaaso dia tɛkɛta l’anto akina ndo dia kɛnɛmɔla tokanyi la nsaki yaso. Ndo kɛnɛ koleki tshɛ ele, sho koka kamba l’ɔtɛkɛta dia tombola Nzambi.—Osam. 22:22; 1 Kor. 1:4-7.
2 Apami, wamato, ndo ana wekɔ lo mbetshama lo Kalasa k’Olimu wa Teokrasi dia vɔ mbewoya lokombo la Jehowa. (Osam. 148:12, 13) Ekongelo ka kalasa ka lo 2002 kekɔ l’asawo wotshikitanyi w’oma lo Bible wakokaso shamɛ kondja wahɔ oma lɔkɔ ndo kamba la wɔ l’olimu w’esambishelo. Naka tayɔlɔngɔsɔlaka ndo mbishaka asawo lo kalasa kɛnɛ, kete sho mbeyaka pamia ewo kaso ndo akoka aso w’embetsha w’Ɔtɛkɛta wa Nzambi.—Osam. 45:1.
3 Adiaka Bible Lushi la Lushi: Naka tayongaka la Bible etena tshɛ l’anya, kete tayokoka mbɔsa etena tshɛ keso bu l’olimu dia kiada. Efula ka l’atei aso ndjaombɛka minitɛ mɔtshi ngana lo lushi dia mbadia Bible. Ekɔ mɛtɛ ɔlɔlɔ efula mbadiaka kânga lɛkɛ ɔtɔi lushi tshɛ, nɛ dia naka sho sala ngasɔ kete ambotakokaka sho ndjela ekongelo ka wadielo wa Bible kele l’ekongelo ka kalasa!—Osam. 1:1-3.
4 Dikoka dia mbadia Bible dimɛna koka tokimanyiya dia minanda etema w’ampokami aso ndo mbatshutshuya dia tombola Jehowa. Anangɛso washa Sawo No. 2 pombaka mboholaka wadielo mbala ko mbala la dui dia wolo. Omendji wa kalasa ayowasha losaka ndo alako dia vɔ ndowanya wadielo awɔ.
5 Kamba la Dibuku Comment raisonner: Sawo No. 3 ndo No. 4 diayɔsamaka oma lo dibuku Comment raisonner. Efula l’atei aso mɛnaka dia vɔ pombaka mbala efula sala la wolo dia kambaka l’ehomɔ k’ɔlɔlɔ kɛsɔ l’esambishelo. Akadiyɛso la dia sɔna tokongamu tɔtɔnɛ la mbilo kawɔ. Omendji wa kalasa pombaka mbidja yimba efula lo woho wetshawɔ ndo wakambawɔ l’Afundelo.
6 Ɔnkɔnɛ, Kalasa k’Olimu wa Teokrasi kayotokimanyiya sho tshɛ dia tetemala kamba la woshasha wakatosha Nzambi, mbut’ate ɔtɛkɛta dia mbewoya lokumu l’ɔlɔlɔ ndo tombola Jehowa, Nzambi kaso ka woke!—Osam. 34:1; Ef. 6:19.