‘Wamato wakamba efula lo nkumadiɔndjɔ’
1 La ɛtɛkɛta wa la diko engo, mbakatɛkɛta Paulo dikambo dia Turufina nde la Turufosa, akadiyɛso ahende wakakambaka olimu efula l’etshumanelo ka la Rɔma. Lo dikambo dia kadiyɛso kekina, kelɛwɔ Perisi, nde akate ate: ‘Nde akakambe olimu efula lo Nkumadiɔndjɔ.’ Paulo akândola ndo Febi woho akɔ wâmɛ ate nde ‘akakimanyiya anto efula.’ (Romo 16:2, 12) Afundelo mɛnyaka lo yoho ya lânde ɔnɛ Dɔrɔka aki womoto “[l]akatshaka akambu w’ololo efula ndu akambu wa ketshi.” (Etsha 9:36) Wamato wele nge lo nyuma wekɔ tshondo y’ɔtshɔkɔ l’etshumanelo!
2 Onde sho mandolaka akadiyɛso wakamba efula l’etshumanelo kaso? Vɔ mbakamba etenyi koleki woke k’olimu w’esambishelo: vɔ mbekaka l’anto efula Bible, ndo kimanyiyaka eyoyo efula. Ndo nto, vɔ mbidjasɛka tena efula l’ana dia mbakimanyiya woho wa vɔ pama lo nyuma. Wamato w’Akristo wekɔ lo mbisha lonya dia mpika yimba ya ngandji, y’ɔngɛnɔngɛnɔ, ya wɔladi, la y’ohetoheto l’atei w’etshumanelo. Vɔ nsukɛka waomɛwɔ la ase nkumbo akina lo weho efula dia vɔ nyomotamanya nkamba olimu wa Jehowa.
3 Akadiyɛso wakamba olimu wa tena tshɛ: L’atei w’anto wakamba efula lo Nkumadiɔndjɔ mbatanema ndo akadiyɛso wele waa misiɔnɛrɛ, efula wekɔ lo kamba di’ehamelo k’olimu w’esambishelo lo wedja w’etale. Lo tshumanelo diendama oma le waomɛwɔ, wadi w’emendji weteta wekɔ lo kamba l’etete l’olimu w’esambishelo, ndo keketshaka akadiyɛso efula. Hatokoke mbohɛ akadiyɛso wele lo Bɛtɛlɛ, wanɛ wakamba olimu w’ekila l’ohetoheto tshɛ dia sukɛ ɔlɔngɔswamelo waki Jehowa. Ndo akadiyɛso wele ambatshi mboka wa pondjo, wekɔ lo mbidja weolo dia tombola Nzambi, oma lo kɔlamelo yawɔ, wakimanyiya nunu di’anto dia mbeya akambo wa mɛtɛ.
4 Wamato asɔ wa kɔlamelo kondjaka ɔngɛnɔngɛnɔ efula oma lo yoho shɔ ya lɔsɛnɔ ya mbetawɔ ndjâhondja. (1 Tim. 6:6, 8) Vɔ kokaka nongola lowando ndo ekeketshelo ka woho akɔna tshɛ la osukɔ wakokaso mbasha.
5 Akristo wa wamato wekɔ ohomba lo ɔlɔngɔswamelo wa Jehowa, olimu wa kɔlamelo wakambawɔ wekɔ ɔtshɔkɔ le anto tshɛ. Nyɛsɔ totetemale mandola weho wa wamato asɔ ndo mbâlɔmbɛka le Jehowa dia nde mbatshɔkɔla lam’ele vɔ wekɔ lo ‘kamba efula lo Nkumadiɔndjɔ.’