Woho wa pamia akoka wa kana yimba
1 Elembetshiyelo kɛmɔtshi ka tshɛkɛta “kana yimba” ele “tɛkɛta l’onto okina woho wa mbotshutshuya dia nde ntsha akambo kana kanyiya lo yoho mɔtshi.” Dia wɛ monga manamana l’esambishelo, wɛ pombaka ndjasha dia pamia dikoka dia mbeya kana yimba l’anto wahomana la yɛ. (Etsha 17:2-4) Ko ngande wakokayɛ pamia dikoka sɔ na?
2 Diɔ tatɛka l’okanyiyelo: Lam’ekayɛ akambo wa mɛtɛ wa lo Bible, wɛ ayokimanyiyama efula naka wɛ kanaka yimba l’akambo akɔ. Naka akambo amɔtshi wekɔ yema wolo mboka, yâtshungolɛ etena ka sala eyangelo ɛmɔtshi ndo kanyiya l’ekadimwelo wotanyiyɛ. Yanga dia mboka hwe, aha paka elembetshiyelo woshami eto koko ndo ɛkɔkɔ w’oma l’Afundelo watotshutshuya dia mbisha elembetshiyelo akɔ.
3 Ndjâlɔngɔsɔla otsha l’esambishelo ekɔ ohomba: Kanyiya woho wokokiyɛ nembetshiya akambo wa mɛtɛ le weho w’anto wotshikitanyi. Tâkonge dimbola dimɔtshi diokoki kotola yambalo y’onto. Tâshikike woho wa diɔtɔnganyiya la divɛsa dimɔtshi dia l’Afundelo ndo ɔkɔkɔ woshamidiɔ. Tâkanyiyisha wekamu wakoka pomana layɛ ndo woho wa mbaekola. Sɔtɔla ɔtɛ ɔmɔtshi a dui wakokɛ tokamba lawɔ dimɛna oma lo dibuku diatayasha anto.
4 Yela ɛnyɛlɔ kaki Yeso: Yeso akasha ɛnyɛlɔ k’ɔlɔlɔ ka woho wa kanaka l’anto yimba oma l’Afundelo. Dia sɛdingola woho wakandalakanyaka anto, enda ɔkɔndɔ wa lo Luka 10:25-37. Lembetɛ yoho ya ntsha nyɛ: (1) Lam’akadimolɛ wembola w’anto, kotolaka yambalo yawɔ oya l’Afundelo. (2) Lɔmbawɔ kanyi yakiwɔ, ndo andolawɔ etena katawɔ awui w’eshika. (3) Sala tshɛ dia dimbola mbɔtɔnɛ l’Afundelo. (4) Kamba la ɛnyɛlɔ kananda otema dia ndjashikikɛ ɔnɛ kɛnɛ kokadimudiyɛ kakokami hwe.—Enda lo Tshoto y’Etangelo ya Ngɔndɔ ka Sato 1, 1986, lɛkɛ 27-28, odingɔ 8-10 (lo Falase).
5 Kamba la dihomɔ diakawatosha: Comment raisonner à partir des Écritures ekɔ dibuku diakatondjama dia kambaka la diɔ l’esambishelo. Mbɔtwɛlɔ yadiɔ, tokanyi tadiɔ tekola wekamu wakoka pomana laso ndo awui wa yimba wele lɔkɔ tokimanyiyaka dia pamia akoka wa kana yimba. Dibuku Comment raisonner ekɔ ehomɔ k’oshika ka mongaka latɔ nshi tshɛ l’esambishelo ndo hatokoke kandakanda dia kamba ladiɔ lam’asawolaso l’onto awui wa lo Bible. Vusola awui wa lo lɛkɛ 7-8 dia nembetɛ woho wa kamba ladiɔ dimɛna.
6 Naka wɛ pamia dikoka diayɛ dia kana yimba, kete wɛ ayolowanya yoho yayɛ ya kamba olimu w’esambishelo la w’olakanyelo. Dui sɔ diayela ɛtshɔkɔ efula le yɛ ndo le wanɛ wahomana la yɛ l’esambishelo.