Onde sho kambaka la dibuku Comment raisonner?
1. Ngande waketshaka ɔpɔstɔlɔ Paulo ndo Yeso anto akina?
1 Ɔpɔstɔlɔ Paulo akasalaka la wolo dia ‘kana l’anto yimba oma l’Afundelo.’ (Etsha 17:2, 3; 18:19) Lo sala ngasɔ, nde akokoyaka Yeso, ɔnɛ lakashilaka Afundelo mbala la mbala ndo lakakambaka la wɛɛla dia kimanyiya ampokami ande woho wa vɔ shihodia lolango laki Nzambi. (Mat. 12:1-12) Dibuku Comment raisonner à partir des Écritures ? diakalɔngɔswama dia tokimanyiya dia sala woho akɔ wâmɛ.
2. Ngande wakokaso kamba la dibuku Comment raisonner dia nɔngɔsɔla mbɔtwɛlɔ y’amɛna?
2 Tɔlɔngɔsɔlake mbɔtwɛlɔ y’amɛna: Dibuku Comment raisonner à partir des Écritures ? diekɔ la mbɔtwɛlɔ yemula nsaki yatanema lo lɛkɛ 9-15. Mbeka ndo kamba la mbɔtwɛlɔ yotshikitanyi shɔ, djekoleko naka sho kindjakindjaka ɛtshi kaso ka nkɛtɛ mbala la mbala ayotokimanyiya dia tshikitanyaka toho taso ta sambisha ndo dia sho koma tomanamana lo kɛnɛ kendana la tatɛ sawola l’anto. Etena kasambishaso lo telefɔnɛ, sho kokaka mbadia mbɔtwɛlɔ shɔ mbala kakɔ ɔtɔi oma lo dibuku.
3. Kakɔna katanaso lo lɛkɛ 16-24 la dibuku Comment raisonner kakoka tokimanyiya l’olimu w’esambishelo?
3 Woho wa mbekola wekamu: Shi ekɔ dimɛna takanyiyisha la ntondo wekamu wakoka pomana la so l’ɛtshi kaso ka nkɛtɛ ndo mbɔsa minitɛ ngana dia vusola awui wele lo lɛkɛ 16-21 la ntondo ka sho tomba l’esambishelo woho watosha okadimwelo ɔmɔtshi naka wambototoka dimbola? Shi ondo sho kokaka pomana l’anto amɔtshi wele ase Buda, waa Hindu, ase Juda kana waa Mizilma? Naka eelo, kete awui wele lo lɛkɛ 21-24 wayotokimanyiya efula.
4. Ngande wakokaso kamba la dibuku Comment raisonner naka wambotoka dimbola kana wambonyiya dikambo dimɔtshi diahatasange l’anto lolemi?
4 Woho wa kadimola ambola: Dibuku Comment raisonner kokaka tokimanyiya nto etena katokawɔ dimbola dimɔtshi kana konyiyawɔ dikambo dimɔtshi diahatasange l’anto lolemi. Sho koka tsho mbutɛ onto akɔ ɔnɛ sho nangaka mbɛnya dui dimɔtshi di’ohomba diendana la dimbola diande, oma lâsɔ ko sho mbɔsa dibuku Comment raisonner dia mbɛnya dui diakɔ. Lama wele awui wa lo dibuku sɔ nɔngama lo ndjela alfabɛtɛ, sho kokaka mbifola dibuku l’ɔtɛ a dui wa woke wele l’awui wayonga laso ohomba. Oma lâsɔ, ko sho menda ambola wofundami l’alɛta wedima aha la tshimbatshimba. Naka hatɛnyi esadi eto kɛnɛ kayangaso, ko sho ntshɔ l’ɛndɛksɛ wele l’ekomelo ka dibuku. Kam’atanaso awui wele ohomba, ko sho mbadiɛ onto akɔ mbala kakɔ ɔtɔi oma lo dibuku. Naka tekɔ lo kɛtshanya dia divɛsa dimɔtshi dia shikaa, kete sho mbeyaka tana kɛnɛ kele laso ohomba lo lɛkɛ 445 l’ɛse k’ɔtɛ adui wata ɔnɛ: “Textes bibliques souvent mal compris.”
5. Naa toho tokina t’ɛlɔlɔ takokaso kamba la dibuku Comment raisonner na?
5 Toho tokina takamba la diɔ: Apandjudi amɔtshi mombaka dibuku Comment raisonner lo dihole diawɔ di’olimu kana la kalasa dia ndjokamba la diɔ dia kadimola ambola wele oko: ‘Lande na kahanyasale waa fɛtɛ?’ Ɛlɔngɔlɔngɔ l’esekaseka wakɛnyi dia awui wofundami l’ɛse k’ɔtɛ a dui: “ Création ” ndo “ Évolution ” mbakimanyiyaka efula etena kalɔngɔsɔlawɔ alapɔlɔ ɛmɔtshi wa la kalasa. Onde tayanga ntshɔ dia tembola onto ɔmɔtshi lele la hemɔ kana lakavusha lakinde ɔmɔtshi la ngandji? Naka eelo, kete awui wele l’ɛse k’ɔtɛ a dui: “ Encouragement ” mbeyaka tokimanyiya dia tana avɛsa wakeketsha. Dibuku Comment raisonner diekɔ nto l’awui w’ohomba efula le wanɛ walɔngɔsɔla asawo ndo walɔmbɔla nsanganya y’otsha l’olimu w’esambishelo.
6. Oyango akɔna wele laso etena kasambishaso?
6 Etena kasambishaso, oyango aso kema wa mana l’anto, koko wa mbasambiyɛ awui wele laso. Sho nangaka kana l’anto yimba dimɛna oma l’Afundelo. Etena kakambaso dimɛna la dibuku Comment raisonner, sho mɛnyaka dia sho tetemalaka mbidja yimba lo wetshelo aso.—1 Tim. 4:16.