Sho sambishaka lokumu l’ɔlɔlɔ
1 Ande diɛsɛ dia woke diele laso dia monga amɛmbi wa “lukumu l’ololo li!” (Romo 10:15) Tekɔ la losango lɔmɔtshi latutsha asolo lahombaso mbewoya anto anɛ wasɛna l’atei w’efukutanu ndo waha l’elongamelo. Ngande wakokaso mbakimanyiya dia vɔ mbeya ɔnɛ tekɔ lo mbaɛmbɛ ‘lokumu l’ɔlɔlɔ la dui dimɔtshi dia dimɛna efula’ na?—Is. 52:7.
2 Lɔngɔsɔla asawo w’amɛna: Asawo aso wayonga l’etombelo w’ɛlɔlɔ l’esambishelo naka sho tɛkɛtaka awui wakoka keketsha onto. Omalɔkɔ, lam’alɔngɔsɔlaso sawo diaso ndo wavusolaso awui wele lo dibuku diayototosha anto, ekɔ ohomba sho mbidja dikako vɔlɛ lo akambo wayokimanyiya anto. Lam’ayotewoya anto elongamelo kaso ka lo Bible l’eshikikelo ndo la waasaso, sho kokaka nongamɛ etombelo w’ɛlɔlɔ.—Tuk. 25:11.
3 Kânga mbakokaso monga la kɛtshi wonya watɔkɔndɔlɛ anto woho wadiɛnɛwɔ l’ekakatanu wa l’andja ɔnɛ, sho pombaka mbashikikɛ ɔnɛ Diolelo dia Nzambi mbayoshidiya mɛtɛ ekakatanu wele l’anto. Kânga lam’atɛkɛtaso di’oyelo wa ‘lushi l’ɛsɔmbwɛlɔ’ laki Jehowa, tɛnya anto nganɛ wele dui sɔ di’ekɔ mɛtɛ tshondo ya “lukumu l’ololo.” (Is. 61:1, 2) Sho kokaka shikikɛ ampokami aso ɔnɛ kɛnɛ tshɛ kasala Jehowa kayoyotosha ɔngɛnɔngɛnɔ woleki tshɛ ndo etombelo woleki tshɛ ɔlɔlɔ.
4 Tosambisha akambo wa mɛtɛ l’ɔngɛnɔngɛnɔ w’oshika: Lam’atɛna anto l’elungi k’ɔngɛnɔngɛnɔ ndo watɛkɛtaso l’eshikikelo, vɔ watongaka suke dia tohokamɛ. Naka sho mɛnya l’elungi kaso dia tekɔ l’elongamelo k’ɔnɛ akambo wayɔlɔngɔsɔma lo nshi yayaye, kete ampokami aso wayɛna dia sho ‘ngɛnangɛnaka lo elongamelo’ kɛsɔ. (Romo 12:12) Ɔnkɔnɛ wayokoka mbetawɔ lokumu l’ɔlɔlɔ. Tekɔ l’ɔkɔkɔ w’oshika wa mongaka l’ɔngɛnɔngɛnɔ nshi tshɛ oyadi l’esambishelo ka luudu la luudu kana ka weho ekina.
5 Sho wanɛ wele esambisha wa lukumu l’ɔlɔlɔ, hatokomɛ tsho lo mbewoya anto awui ko pe. Esambishelo kaso mbishaka anto elongamelo ka shikaa ka lɔsɛnɔ l’oshika la nshi nyɛ ndo la lo nshi yayaye. (1 Tim. 4:8) Wonya wasambishaso onto tshɛ, ɔngɛnɔngɛnɔ aso wa lo yimba wayɛnama oma lo kɛnɛ katɛkɛtaso ndo ayokimanyiya anto dia mbetawɔ lokumu l’ɔlɔlɔ. Lo monga la yambalo lo kɛnɛ katɛkɛtaso ndo woho wakitɛkɛtaso, nyɛsɔ totshutshuya wanɛ wele l’etema wa losembwe dia mbetawɔ lokumu l’ɔlɔlɔ lɔnɛ lasambishaso!