Tokoya Jehowa ‘Nzambi kaso k’ɔngɛnɔngɛnɔ’
1 Jehowa nangaka mɛtɛ dia ekambi ande monga la ɔngɛnɔngɛnɔ. Bible tolodiaka la elongamelo kendana la ɛtshɔkɔ wa diambo wakombɛ Jehowa anto. (Is. 65:21-25) Anto akina pombaka mɛna dia tekɔ la ɔngɛnɔngɛnɔ etena kasambishaso “lukumu l’ololo la lutumbu la [Nzambi]” k’ɔngɛnɔngɛnɔ. (1 Tim. 1:11) Woho wewoyaso anto losango la Diolelo pombaka mɛnya woho walangaso akambo wa mɛtɛ ndo mɛnya dia sho ndjakiyanyaka mɛtɛ dikambo di’anto wasambishaso.—Romo 1:14-16.
2 Koko, mbala mɔtshi ekɔ wolo efula tetemala monga la ɔngɛnɔngɛnɔ. Lo bɛtshi dia nkɛtɛ dimɔtshi, hatoleke tana anto wetawɔ losango la Diolelo. Ndo tena dimɔtshi sho mbeyaka ndɔshana la ekakatanu wa wolo. Dia sho tetemala monga la ɔngɛnɔngɛnɔ, sho pombaka mbeya dia anto wa lo ɛtshi kaso ka nkɛtɛ wekɔ l’ohomba wa mboka lokumu l’ɔlɔlɔ la Diolelo lasambishaso. (Romo 10:13, 14, 17) Kana yimba lo dikambo sɔ ayotokimanyiya dia sho tetemala mbeyanya l’ɔngɛnɔngɛnɔ tshɛ tɛdikɔ takɔshi Jehowa la kɛtshi tshɛ dia panda kaso.
3 Toleke tɛkɛta di’awui w’ɛlɔlɔ wayaye: Sho pombaka mbidjaka yimba lo kɛnɛ keso lo mbuta. Sho pombaka mbewɔ dia ndeka tɛkɛta di’awui wa kɔlɔ kânga mbele sho mbeyaka tatɛ la mbuta okakatanu kana losango lɔmɔtshi leya anto dimɛna. Ɔkɛndɛ aso ele wa mɛmbɛ anto ‘lokumu l’ɔlɔlɔ la dikambo dimɔtshi dia dimɛna.’ (Is. 52:7; Romo 10:15) Lokumu l’ɔlɔlɔ lɔsɔ lekɔ losango lohikami lo alaka waki Nzambi wendana la nshi yayaye y’amɛna. (2 Pet. 3:13) La dui sɔ lo yimba, tokambe la Afundelo dia “nkonoya akanga w’etema wambate.” (Is. 61:1, 2) Dui sɔ diayotokimanyiya dia sho mongaka tena tshɛ l’ɔngɛnɔngɛnɔ ndo mɛnaka akambo la sso di’ɔlɔlɔ.
4 Anto wayɛna mɛtɛ woho weso l’ɔngɛnɔngɛnɔ etena kasambishaso. Oma lɔkɔ, nyɛsɔ tɔkɛnɛmɔlake nshi tshɛ waonga wa ‘Nzambi kaso k’ɔngɛnɔngɛnɔ,’ etena kasambishaso anto wa lo ɛtshi kaso ka nkɛtɛ lokumu l’ɔlɔlɔ la Diolelo.