Onga ompokami w’ɔlɔlɔ
1 Di’onto mbeya mpokamɛ la yambalo tshɛ, nde pombaka ndjaekiya. Dikambo sɔ nɔmbaka nto di’ɔnɛ lahokamɛ ndjala la mposa ka mbeka ndo ka kondja wahɔ oma lo kɛnɛ kahokamɛnde. Diɔ diakɔ diakatɛtɛ Yeso l’ohomba wa wɛ ‘mbidja yimba lo yoho yahokamɛyɛ.’—Luka 8:18.
2 Dui sɔ diekɔ ohomba djekoleko lam’ɔtɔso lo nsanganya ya l’etshumanelo kana lo nsanganya ya weke ya weho tshɛ. Lo waaso asɔ mbahombaso mpokamɛka la yambalo tshɛ. (Heb. 2:1) Tênde awui amɔtshi wakoka kokimanyiya dia wɛ monga ompokami w’ɔlɔlɔ lo nsanganya shɔ y’Akristo.
◼ Mbeya ohomba wa nsanganya. Yɔ yekɔ yoho yoleki dimɛna ‘y’etshamaso oma le Jehowa’ lo tshimbo y’‘ɔhɔmbɔ wa kɔlamelo.’—Is. 54:13; Luka 12:42.
◼ Ndjalɔngɔsɔlaka la ntondo. Vusola awui wayekama, ndo tohɛke mɛmba Bible kâmɛ ndo ekanda tshɛ wenyu lo mbeka.
◼ Wonya wa nsanganya, sala la wolo dia shikikɛ yimba lo kɛnɛ katɛkɛtama. Wɛ pombaka mbewɔ dia sawolaka l’anto wodjashi la yɛ kana mendaka kɛnɛ kasala ampokami akina. Aha mbekola yimba yayɛ lo kanyiya kɛnɛ kayoyosala l’ɔkɔngɔ wa losanganya kana l’awui ayɛ akina.
◼ Kana yimba la kɛnɛ kalakanyema. Yambola ɔnɛ: ‘Ngande wendanami l’awui asɔ na? Etena kakɔna kahombami kamba lawɔ na?’
◼ Fundaka awui ndo avɛsa amɔtshi w’ohomba. Kɛsɔ ayokokimanyiya dia wɛ ndeka mbidja yimba lo kɛnɛ kalakanyema ndo di’aha wɛ mbohɛ awui w’ohomba wahombayɛ ndjokamba lawɔ l’ɔkɔngɔ.
3 Etsha anayɛ dia vɔ mpokamɛka: Ana wekɔ l’ohomba wa wetshelo wa lo nyuma. (Euh. 31:12) L’atei w’ekambi waki Nzambi wa lo nshi y’edjedja, ‘wanɛ tshɛ waki l’akoka wa mpokamɛ’ wakahombaka mpokamɛ la yambalo tshɛ etena kakadiemaka awui w’oma l’Ɛlɛmbɛ. (Neh. 8:1-3) Naka ambutshi wayɛnyaka woho wayashawɔ tshɛ lo nsanganya ndo wayiyelawɔ la yambalo tshɛ, kete ana wayoyela lokolo lawɔ. Bu dimɛna ndja la tangangɔ ta tɔkɛnyɔ kana abuku wele l’esato di’ana ndjokɛnyaka lato kana ndjodiendaka wonya wa losanganya. Ndo nto, vɔ hawotohokamɛ dimɛna naka wɛ ayetetaka weteteteta otsha lo komba. Lam’ele ‘akambo w’enginya kelekama l’otema w’ɔna dikɛnda’ ambutshi la dia sala la wolo di’anawɔ mbidjasɛ kii ndo ndjelaka awui watama lo nsanganya.—Tuk. 22:15.
4 Lo monga ampokami w’ɔlɔlɔ, sho mɛnyaka dia tekɔ mɛtɛ la lomba ndo ɔnɛ sho nangaka ‘mbetshama efula.’—Tuk. 1:5.