Teyanya Lokombo la Jehowa ndo etsha ande
1 “Nyukaki [Jehowa] lusaka, nyetaki lukumbu landi, nyusanyiaki anto dia etsha andi! . . . Etema a wane watuyangaka [Jehowa], wangenangenaki!” (Osam. 105:1, 3) Omembi w’esambo ɔnɛ lakafunde ɛtɛkɛta ɛnɛ, akokaka ɔlɔ efula lamakandewoyaka anto akina akambo wendana la Jehowa ndo l’“etsha andi.” Etsha akɔna ɛsɔ na? Aha la tamu, etsha ɛsɔ wakendanaka la lowandji laki Nzambi la lotombo ndo la lokumu l’ɔlɔlɔ la “panda kandi.”—Osam. 96:2, 3; 145:11, 12.
2 Lam’ele tekɔ lo tasukana l’etena kayosalema Eohwelo ka l’ɔnɔnyi ɔnɛ wa 2001, sho kokaka mɛtɛ ngɛnangɛna lo menda etsha waki Jehowa oya le so. Lande na? Nɛ dia Dambo dia Nkumadiɔndjɔ dia Dikɔlɔ mbele lushi la l’ɔnɔnyi loleki woke le Akristo tshɛ wa mɛtɛ. Ndoko lushi lokina lɛdimi la lushi lɔsɔ lo menda ohomba la oyango alɔ, kana woho wasalema akambo lushi lakɔ. Lɔ lekɔ etena kahomba onto tshɛ l’atei aso mbohɔ kɛnɛ kakatosalɛ Jehowa nde la Yeso dia sho kondja panda. Diɔ diakɔ diele, lo nshi ya Eohwelo, sho tolongamɛka dia mɛna olimu w’esambishelo wakambema lo yoho y’efula dia mbeyanya ‘lokumu l’ɔlɔlɔ la panda’!
3 Onde wɛ ayonga ombatshi mboka wa tshanda? Lo Ngɔndɔ ka Nɛi k’ɔnɔnyi wetshi, lofulo l’anto 7644 wakayakimɔ dia kamba olimu w’ombatshi mboka wa tshanda lo Congo-Kinshasa ndo 556 lo Congo-Brazzaville. Onde ɔnɔnyi ɔnɛ hatokoke mbetɛ Ngɔndɔ ka Sato ndo ka Nɛi ngɔndɔ ya lânde yahombaso ndjasha efula l’esambishelo? Ngɔndɔ ka Sato kekɔ la Nshi ya Samalo tshanu, ndo Ngɔndɔ ka Nɛi kekɔ la Nshi ya Mingu tshanu. Lo sala ekongelo ka sambishaka efula nshi ya samalo la ya mingu, apandjudi efula wakamba lushi l’otondo wambɛna dia vɔ kokaka kamba olimu w’ombatshi mboka wa tshanda. Dia kotsha lofulo la wenya 50, ombatshi mboka wa tshanda pombaka sambisha wenya oko 12 lo lomingu. Sɛdingola dimɛna dikongelo dioshawɔ lo kiombo yele lo lɛkɛ 4. Onde ekongelo kɛmɔtshi kayonga dimɛna le yɛ? Naka kema, kete wɛ kokaka sala ekongelo kayɛ wɛmɛ kayokokimanyiya dia wɛ kamba olimu w’ombatshi mboka wa tshanda lo Ngɔndɔ ka Sato la ka Nɛi.
4 Dikumanyi pombaka tatɛ oma ko kakiye dia keketsha ndo sala di’esambishelo salema lo yoho y’efula. Ɔnɔnyi wetshi, l’etshumanelo kɛmɔtshi kele dikumanyi ndo ekambi w’olimu tshɛ wakakambe olimu w’ombatshi mboka wa tshanda, apandjudi 64 l’atei w’apandjudi 121 wa l’etshumanelo kakɔ wakakambe oko ambatshi mboka lo Ngɔndɔ ka Nɛi! Vɔ wakangɛnangɛna nto dia mɛna apandjudi wahatabatizama asamalo watatɛ la nkimɔ alapɔlɔ awɔ lo Ngɔndɔ ka Sato la ka Nɛi. Lo mɛtɛ, etena koleki dimɛna k’ana ndo eyoyo mimbola dikumanyi dia mbeya kana vɔ wambokoka tatɛ sambisha lo sɛkɛ tɔ kɛnɛ.
5 Mbidja welo efula mbelaka Ɛtshɔkɔ: Tshumanelo diayadjɛ eyango wa lânde ndo diadja welo efula kondjaka ɛtshɔkɔ efula. Tshumanelo dimɔtshi mbeyaka ndjâsha efula dia sambisha lo bɛtshi dia nkɛtɛ diahaleke kindjakindjama, ndjasha dia sala weho ekina w’esambishelo, kana dia sala esambishelo ka lo telefɔnɛ kele yoho y’oshika ya munanda wanɛ wahatanema lawakawɔ ndo wanɛ wadjasɛ l’ahole wele ekɔ wolo dia sho nkoma lɛkɔ.
6 Onde wanɛ wele la hemɔ ndo enunu w’anto kokaka nkɔmɔ otema dia ndjasha lo yoho mɔtshi y’olimu w’esambishelo lo ndjela akoka awɔ? Kema, vɔ koka ndjela kɛnɛ kasala kadiyɛso kɛmɔtshi kaya l’ɛnɔnyi 86 kele la hemɔ ka kansɛrɛ. Kânga mbakinde la pâ dia kɛndakɛnda, nde akakambe oko ombatshi mboka wa tshanda lo Ngɔndɔ ka Nɛi k’ɔnɔnyi wetshi. Esambishelo ka lo telefɔnɛ kakokimanyiya dia nde sambisha efula ndo tamanya tombola Jehowa. Dikambo sɔ diakôkeketsha ndo diakakeketsha etshumanelo.
7 Toyalɔngɔsɔlɛ dimɛna dikambo dia eohwelo: Ɔnɔnyi ɔnɛ Eohwelo kayonga lo Ngɔndɔ ka Nɛi 8. Lam’ele ayonga Lushi la Lomingu, anto efula wayonga la diaaso dia mbɔtɔ lo losanganya lakɔ. Anto wayoleka monga efula naka sho sala tshɛ dia (1) mbɔtɔ shamɛ lo losanganya lakɔ ndo (2) mbeta anto akina dia vɔ ndjɔtɔ la so lo Eohwelo. Lâsɔ, waa na wahombaso mbeta na?
8 Sɛdingola lo kalupɛ yayɛ nkombo ya wanɛ wakɛnya yema ya nsaki l’akambo wa mɛtɛ, oyadi kânga wɛ hatshu esangɔ l’esangɔ dia towaenda. Mingu hiende kana shato la ntondo ka Eohwelo, sala tshɛ dia membola wanɛ wakayasha akatshi wa leeta oya lo Eohwelo. Naka wɛ ekɔ l’akoka, kete kimanyiya wanɛ wakombola ndjɔtɔ lo losanganya lɔsɔ di’aha vɔ lihandja.
9 Tshumanelo dimɔtshi hadiokambe l’akatshi tshɛ wa leeta l’oya lo Eohwelo wakawatomɛ. Waa sekeletɛlɛ ya tshumanelo pombaka sala tshɛ dia mbisha apandjudi akatshi asɔ nshi efula la ntondo dia vɔ mbeya mbakahanya tshɛ. Wɛ kokaka funda dimɛna wonya la dihole diayosalema Eohwelo l’ɛse ka dikatshi dia leeta. Kana wɛ koka mbisha onto ndo kiatshi kina yɛnya dihole diatanema Mbalasa ka Diolelo naka lɛkɔ mbayonyosala losanganya lanyu la Eohwelo. Tambonyohola dia, esangɔ efula ndeka dimɛna onto ndamɛ tshɔ ko tashaka anto welɛnde akatshi wa leeta wa Eohwelo l’anya.
10 Tatohɛke wanɛ wahayotomba l’esambishelo: Tongaka dikambo di’ɔngɛnɔngɛnɔ efula etena kayakimɔ ombeki ɔmɔtshi wa Bible le Jehowa ndo kɛnyande dikambo sɔ lo batizama l’ashi. Koko, ɔnɔnyi tshɛ, amɔtshi wa l’atei aso tshikaka dia kakatana kâmɛ laso ndo dia mbewoya anto akina awui wendana la lokombo la Jehowa ndo etsha ande. Dikambo sɔ mɛtɛ kokaka tokiyanya. Kânga mbele efula ka wanɛ wetsha ngɔndɔ mɔtshi aha la sambisha watatone akambo wa mɛtɛ, ondo vɔ hawoyosambisha l’ɔtɛ wa dikambo dimɔtshi diambâkɔmɔla otema, l’ɔtɛ w’ekakatanu kana w’ekiyanu ekina wa lo lɔsɛnɔ. (Mat. 13:20-22) Akina wanɛ wambɔla lo nyuma wekɔ l’ohomba w’ekimanyielo dia kakatana l’etshumanelo la ntondo k’andja ɔnɛ waki Satana ndjowaɔsa. (1 Pet. 5:8) L’etena ka Eohwelo kɛnɛ, sho nangaka mbidja welo wa lânde dia kimanyiya anto tshɛ wahayosambisha ngɔndɔ mɔtshi dia vɔ nyomoyasha nto l’esambishelo ka lokumu l’ɔlɔlɔ.
11 Sekeletɛlɛ k’etshumanelo pombaka mbisha ɛnɔmbɔdi wa wekelo wa dibuku nkombo y’anto tshɛ wahayosambisha ngɔndɔ mɔtshi watanema l’elui awɔ. Kɔmite k’Olimu ka l’Etshumanelo kalɔngɔsɔlɛ woho w’anto tshɛ wahayotomba l’esambishelo membɔma oma le dikumanyi. Naka ambɛnama dia ekɔ ohomba nɔmbɔla wekelo wa Bible le ɔmɔtshi, kete kɔmite k’olimu ayɔsɔna onto lakoka nɔmbɔla wekelo ɔsɔ. Kânga mbele wekelo ɔsɔ hahombe nɔmbɔma l’etena k’otale efula, ɔnɛ layowosha ɔkɛndɛ wa nɔmbɔla wekelo akɔ kokaka mbɔsa wenya, waendelo w’eyoyo, ndo mbadia onto ɔsɔ oko ombeki wa Bible.
12 Lo Ngɔndɔ ka Nɛi k’ɔnɔnyi wetshi, kadiyɛso kɛmɔtshi kakatasambishaka lo luudu la luudu akasha ɔlɔngɔlɔngɔ ɔmɔtshi wakahomana la nde lo shinga periodikɛ. Ɔlɔngɔlɔngɔ akɔ akawotɛ ate wadɛnde ekɔ Ɔmɛnyi wa Jehowa koko nde aya bu la waasaso l’esambishelo. Nde akambola lɛnɛ atanema Mbalasa ka Diolelo ndo akalɔmbɛ kadiyɛso dia nde ndjowenda nde la wadɛnde la ngelo. Etombelo wakayongaka ko, atshukanyi asɔ wakayɔtɔka lo losanganya lakayele oma lâsɔ ndo waketawɔ wekelo wa Bible.
13 Tonge suke dia nyomoleka nsambisha! Omembi w’esambo ɔnɛ lakate dia sho pombaka mbeyanya lokombo la Jehowa ndo etsha ande akate nto ate: “Nyuwimbelaki esambu, nyuwandulaki nyutaki dia elimu andi wa mamba! Nyongenangenaki lu lukumbu landi l’ekila.” (Osam. 105:2, 3) Nyɛsɔ tɛnya woho wayakiyanyaso dikambo dia lokombo la Jehowa ndo di’“elimu andi wa mamba” lo nyomoleka mbidja welo dia sambisha efula, lo mbetɛ etena ka Eohwelo kɛnɛ etena koleki tena dikina tshɛ!
[Caption on page 4]
[Box on page 4]
Toho Totshikitanyi t’Ombatshi Mboka wa Tshanda Kotsha Wenya 12 lo Lomingu
Lushi Wenya
L’Ɔtɔi 1 2 - -
La Hende 1 - 3 -
La Sato 1 2 - 5
La Nɛi 1 - 3 -
La Tanu 1 2 - -
La Samalo 5 4 3 5
La Lomingu 2 2 3 2
Tshɛtshɛ: 12 12 12 12
Onde ekɔ ekongelo kɛmɔtshi lanɛ kayonga dimɛna le yɛ? Naka kema, kete sala kakiyɛ wɛmɛ.