Nyɛsɔ sho tshɛ tɔlɛmiya Jehowa nde l’Ɔnande Woho wakoka anto tshɛ wayɔtɔ lo eohwelo kayonga ngɔndɔ ka nɛi 8 kondja wahɔ w’efula
1 Waa na walɛmiyama lo yoho ya lânde ɛlɔ kɛnɛ? Ekɔ wanɛ wasala akambo wa weke lo washo w’anto. Koko, mbala efula akambo wasalawɔ mbohamɛka esadi eto. Ko kayotota di’akambo wele anto tshɛ kondjaka wahɔ oma lɔkɔ na? Dikambo dioleki akambo akina tshɛ woke mbayotɔsɛdingola la yambalo tshɛ lam’ayotosala Dambo dia Nkumadiɔndjɔ dia Dikɔlɔ diayonga Ngɔndɔ ka Nɛi 8, 2001, l’ɔkɔngɔ wa ɛɔtwɛlɔ ka wonya.
2 Akɔna asungana tombɔma efula na? Bible kadimolaka ate: “Khumesu, la Nzambi kasu, we kukuki dia nungula lutumbu la kenemo la wulu, ne dia we kakatungi diango tshe.” (Eny. 4:11) Oko wende Otungi, Jehowa mbele Omboledi Waheme andja w’otondo. Nde mbasungana tombɔmaka pondjo pondjo.—1 Tim. 1:17.
3 Yeso Kristo, Ɔna Nzambi, akasale akambo w’amɛna efula wayela anto ɛtshɔkɔ wahakomɛki. Nde akokoya She tshɛ lo tshɛ. (Joa. 5:19) Okitanyiya ande wa kokele ndo olimu ande wa kɔlamelo akôkonya onto “[l]ukuki dia nungula wulu, ndu ongonyi, ndu yimba, ndu diulelu, ndu kenemo, ndu lutumbu, ndu otshoko.” (Eny. 5:12) She akawosha kɛnɛmɔ lo mbâhenya l’okudi oko Nkumekanga. (Osam. 2:6-8) Lâsɔ, sho tayokondja diaaso dia tombola Shɛso nde l’Ɔnande lam’ayotosala Dambo dia Nkumadiɔndjɔ dia Dikɔlɔ diayonga Ngɔndɔ ka Nɛi 8, 2001.
4 Lonyangu ko, lo ndjela ɔkɔndɔ w’ana w’anto, paka tɔtɔi t’anto toto mbakasha Jehowa nde l’Ɔnande lotombo lahombawɔ nongola. Lo nshi yakete, kânga ekambi waki Nzambi w’edjedja, mbut’ate ase Isariyɛlɛ wakakambɛ Jehowa olimu wa l’ɛlɔmɔ. Ɔsɔ aki mɛtɛ tshelo ya diɔnyɔ di’efula. (Mal. 1:6) Monga la dilɛmiɛlɔ di’oshika nɔmbaka dia monga l’okitanyiya wa la kɔlamelo woye oma lo ngandji la lowando lele laso l’akambo tshɛ wakatosalɛ Jehowa nde l’Ɔnande. Mbasha lotombo ndo dilɛmiɛlɔ dia ngasɔ nembetshiyaka dia sho pombaka mbokaka Nzambi wɔma, mbɔlɛmiyaka, ndo mbetawɔka dia Jehowa nde la Yeso nɔmbɔla mboka yaso tshɛ. Etshumanelo k’Akristo kekɔ l’oyango wa mbetsha ndo kimanyiya anto akina dia vɔ sala woho akɔ wamɛ.
5 Diaaso dia Lânde dia mɛnya dilɛmiɛlɔ: Eohwelo ekɔ losanganya loleki ohomba lasala ekambi waki Jehowa ɔnɔnyi tshɛ. Onto tshɛ lele la mposa ka kambɛ ndo ka nɛmiya Jehowa pombaka monga lushi lakɔ. (Luka 22:19) Tambolongamɛ dia, lâdiko dia miliyɔ 6 y’Ɛmɛnyi wa Jehowa wakimɔ alapɔlɔ, anto wayasha l’akambo wa mɛtɛ wayonyomodiya lofulo la wanɛ wayɔtɔ lo losanganya lɔnɛ dia lɔ ndekana miliyɔ 14. Ɔsɔ ekɔ mɛtɛ diaaso di’oshika dia nɛmiya Shɛso lele l’olongo! Kânga mbele Eohwelo mendanaka la Yeso, lotombo ndo dilɛmiɛlɔ diɛnyaso lo kɛnɛ kakandasale tombolaka She, ɔnɛ lakôtome.—Joa. 5:23.
6 Ahombaso sala dia nsukɛ diaaso dia lânde sɔ na? Sho koka kimanyiya eyoyo dia vɔ kondja wahɔ w’efula oma lo diaaso diakɔ. Tâlɔmbɛ dia vɔ mbɔtɔ lo losanganya lɔnɛ, ndo naka amɔtshi wekɔ l’ohomba w’ekimanyielo, kete tâkimanyiya l’ɔlɔlɔ tshɛ dia vɔ koma lo dihole diayosalema losanganya. Lembetshiyawɔ oyango wa dako diayoshama. Eyanyawɔ l’anto akina. Kɛnɛ kɛnawɔ ndo kokawɔ koka mbâtshutshuya dia vɔ nyanga woho wa sangana kâmɛ la so dia tombolaka Jehowa.
7 Tɔnyɔlake etombelo wakoka monga l’ekongelo kɛnɛ. Ombeki ɔmɔtshi wa l’univɛrsite akate ate: “Dimi lambɔtɔ lo Misa mbala efula l’ɔtɛmwɛlɔ ami koko, kɛnɛ kamomɛna tshikitana efula. Lambɛna dia kɛnɛ kasalanyu mbɔtɔnɛka mɛtɛ la kɛnɛ kata Bible, ndo dimi fɔnyaka dia nyu kele lo mɛtɛ.” Nde akatatɛ mbɔtɔ lo nsanganya mbala la mbala ndo akabatizama kombeta edja.
8 Tokimanyiya eyoyo dia vɔ mpama: Funda nkombo y’eyoyo woye dia ndjɔtɔ lo Eohwelo ndo kotowaembole aha la tshimbatshimba dia ntovusola la wɔ awui wakaweke ndo wakawɛnyi. Ewoyawɔ dikambo dia nsanganya kina, lɛnɛ akokawɔ nyomofudia ewo kawɔ ka Bible. Ovuswelo wa tshapita 17 ya dibuku Ewo yele l’ɔtɛ ate: “Onga la Lotui Tshitshi l’Atei w’Anto a Nzambi,” ayowaɛnya mbo ya ndɛ yotshikitanyi ya lo nyuma yatosha etshumanelo, yakokawɔ ndo vɔ lawɔ ngɛnangɛna layɔ. Lɔngɔsɔla dia vɔ menda bandɛ video Our Whole Association of Brothers (Tshunda di’Otondo di’Anangɛso) woho wa vɔ mɛna la washo awɔ vamɛ kamɛ, ɔngɛnɔngɛnɔ, ndo ohetoheto wele l’ekambi wa Jehowa!
9 Ekɔ ohomba dia wanɛ wayasha mbeka woho wakoka onto ndamɛ tombola Jehowa ndo mbôsha kɛnɛmɔ. Lembetshiyawɔ di’alɔmbɛlɔ w’oma k’ɛse otema ngɛnyangɛnyaka Jehowa ndo wekɔ wonya tshɛ kiɔkɔ y’ekeketshelo ka lo nyuma. (1 Joa. 5:14) Kamba la wekelo 8 polo lo wa 12 lo biukubuku Katɔlɔmba, dia mbalembetshiya woho wa lɔkɛwɔ lasha Jehowa kɛnɛmɔ. Lo kɛtshanya la wɔ awui wele lo biukubuku Les Témoins de Jéhovah, lɛkɛ 30-31 keketsha eyoyo dia vɔ kanyiya lo dikoka diele l’onto tshɛ dia nɛmiya Jehowa l’onto ndamɛ ndo dia mbisha lonya l’olimu w’esambishelo.
10 Lowando lele laso l’olambo waki Yeso ndo lo diɛsɛ diele laso dia kamba oko weso ambeki ande, mbishaka Shɛso kɛnɛmɔ ndo mbelaka anto akina ɛtshɔkɔ. Yeso akalake ate: “Naka untu ayunkambela ulimu, Papa ayôlemiya.”—Joa. 12:26.