Tosale Ɔlɔlɔ ko Tayokondja Lotombo!
1 “Vɔ wekɔ la wɔladi lam’asawɔ lo yoho yahamatɛnaka le weho w’anto akina.” “Ekɔ dimɛna efula monga l’olui w’anto ɔnɛ.” Ɔsɔ ekɔ awui amɔtshi w’ɔlɔlɔ wakate wanɛ wakatendaka l’ɔkɔngɔ wa losanganya la distrikɛ l’ɔnɔnyi w’etshi, wɛnya lokumu l’ɔlɔlɔ lele laso oko ɔlɔngɔswamelo. (Tuk. 27:2; 1 Kor. 4:9) Lo weho tshɛ, Jehowa mbalongola lotombo lɔsɔ. (Mat. 5:16) Diaaso dikina dia dimɛna efula dia tombola Jehowa diekɔ kakianɛ la ntondo kaso lo Losanganya la Distrikɛ l’ɔnɔnyi ɔnɛ lele l’ɔtɛ ate “Embetsha w’Ɔtɛkɛta wa Nzambi.”
2 Ɔnɔnyi tshɛ sho nongolaka waohwelo woludi la ngandji lo kɛnɛ kendana la lɔkɛwɔ lahomba monga laso lo losanganya. Lande na? Nɛ dia lam’ele lɔkɛwɔ, ɔlɔtɔ, ndo dionga di’ase andja ɔnɛ diekɔ lo tatetemala la ndana, sho hatohombe mbokoya dionga diawɔ. Sho hatolange dia lokumu laso l’ɔlɔlɔ ndana. (Ef. 2:2; 4:17) Nyɛsɔ todje yimba lo alako wayela anɛ.
3 Tosalake Ɔlɔlɔ lo Tena Tshɛ: Sho mbeyamaka l’andja w’otondo oma lo lɔkɛwɔ laso l’ɔlɔlɔ. (1 Pet. 2:12) Oyadi lo dihole diakɔna diakokaso tanema, lo luudu l’onto ɔmɔtshi, lo makashinyi wa tshitshɛ kana lo lobingu, lɔkɛwɔ laso l’ɔlɔlɔ kokaka mɛnya anto dia sho tekɔ embetsha w’eshika w’Ɔtɛkɛta wa Nzambi. Oko watatɛmbɛ lokombo la Jehowa, tekɔ l’ɔkɛndɛ wa woke waha mbotsha lokombo lakɔ sɔnyi oyadi oma lo lɔkɛwɔ kana oma l’ɛtɛkɛta aso. Lɔkɛwɔ laso l’ɔlɔlɔ mbeyaka ndjotshutshuya anto akina dia koma atɛmɔdi wa Jehowa.—Enda lo 1 Petero 3:1, 2.
4 Wanɛ watenda mambaka efula etena kɛnawɔ loshilambo ndo okitanyiya wele l’anaso w’akɛnda. (Ef. 6:1, 2) L’ɔkɔkɔ ɔsɔ, ambutshi pombaka sɛna dimɛna lo kɛnɛ kendana la lɔkɛwɔ l’anawɔ. Vɔ wekɔ l’ɔkɛndɛ wa namaka anawɔ wonya tshɛ. Ɔsɔ ekɔ ɔkɛndɛ wakawasha Jehowa. (Tuk. 1:8) Ambutshi pombaka mbalama di’aha vɔ mbetetaka efula otsha lo nkomba wonya wasalema losanganya. Etena ka losanganya kema etena ka tɔkɛnyɔ. Vɔ pombaka mbidjasɛ suke l’ambutshi awɔ, wahokamɛ ndo weka woho wa mboka Nzambi ka mɛtɛ wɔma.—Euh. 31:12, 13.
5 Tosalake Ɔlɔlɔ oma lo Ɔlɔtɔ ndo Ɔlɔngɔswɛlɔ Aso wa Demba: L’ɔkɔngɔ wa nde ndjela losanganya la distrikɛ l’ɔnɔnyi wetshi, ofundji ɔmɔtshi wa tojurunalɛ wa la Londres akafunde ate: “Oleki diangɔ dikina tshɛ, aki ɔlɔngɔswɛlɔ waki Ɛmɛnyi wa Jehowa vamɛ mbakaleke kotola yambalo yami. Aki mɛtɛ dimɛna heyama dia mɛna anto efula wayalɔmbɔla vamɛ la kɛnɛmɔ ndo la dilɛmiɛlɔ. Wakalɔtɛ dimɛna ndo nkama ya nkumbo ya weho la weho yele la nkoho ndo dibila diotshikitanyi yakahokamɛka wetshelo wodjashi ki lo luudu latowɔkɛnyaka tɔkɛnyɔ. Dionga diawɔ diakatshikitana hakoke l’efula k’anto wokɔtɔka lo luudu la tɔkɛnyɔ lɔsɔ. Diakɔ diele, Ɛmɛnyi wa Jehowa tshikitana hakoke l’efula k’elui w’anto lo tshɛ kawɔ. Anto tshɛ wokongaka la mbekelo ka mɛna anto wele la dionga dia kɔlɔ. Koko, olui w’Ɛmɛnyi wa Jehowa wekɔ dimɛna heyama.” Nyɛsɔ tosale di’aha ɔlɔtɔ, ɔlɔngɔswɛlɔ wa demba kana dionga diaso fukutanya eongelo ka lo nyuma ka losanganya lo yoho mɔtshi. Ɔlɔtɔ aso hawohombe kɛnɛmɔla yimba kana dionga di’anto wa l’andja ɔnɛ kânga yema, koko vɔ pombaka monga nshi tshɛ ɔlɔtɔ wa kɔmba ndo washa kɛnɛmɔ. Akadiyɛso pombaka ndjashikikɛ dia ekutu kana tojipɛ tawɔ tekɔ l’etale wasungana dia todjasɛ l’esongo wele lo dihole dia losanganya. Kânga lam’alɔtaso ahɔndɔ wa la ngelo l’akɔlɔ, sho pombaka mbeyama oko wanɛ ‘woka Nzambi wɔma.’ (1 Tim. 2:9, 10) Tatotakanyake pondjo onto okina oma lo ɛnamelo kaso ka lo sɛkɛ.—Fil. 1:10.
6 Tosalake Ɔlɔlɔ lo Kimanyiya Wanɛ Wele lo Dihombo: Alapɔlɔ wakatalongola mɛnyaka di’anangɛso l’akadiyɛso amɔtshi kɔmbɔtɔ lo nsanganya ya weke yakasalema l’ɛnɔnyi engana wêke kambeta ɛnɛ l’ɔtɛ wakiwɔ komonga l’ahɔndɔ wasungana. Koko, oyadi ahɔndɔ wa ngande wakoka monga laso, sho pombaka sala la wolo dia mbɔtɔ lo losanganya la woke. Kɛnɛ kele ohomba ele ndeshama ndo keketshama lo nyuma. Naka as’etshumanelo amɔtshi wekɔ paka lo dihombo, dikumanyi wayohomba menda kɛnɛ kakoka salema dia kimanyiya anto asɔ. Lo mɛtɛ, sho kombolaka di’ose etshumanelo tshɛ kondja wahɔ oma lo losanganya la woke. Jakoba 2:15-17 toshaka dako lo woho wahombaso sɛna l’anyaso Akristo wele lo dihombo di’efula. Naka hatokoke mbasha ahɔndɔ w’eyoyo, onde hatokoke mbatanɛ kanga ahɔndɔ amɔtshi wambotɔlɔtaka kana mbawadja ahɔndɔ aso amɔtshi?
7 Tosalake Ɔlɔlɔ Lam’alongolaso Batismu: Wanɛ wahomba batizama wayohomba mbɔsa diaso sɔ la nɛmɔ di’efula. Naka vɔ monga l’ahɔndɔ w’amɛna wa mbɔtɔ lawɔ lashi, kete wayɛnya dia vɔ mbɔsaka diaaso sɔ di’ekila la nɛmɔ. Ayonga dimɛna efula le anɔmbɔdi wa wekelo wa Bible dia vɔ mvusola kamɛ l’ambeki awɔ la ntondo ka mbɔtɔ lo losanganya, “Wembola w’oma le Ambadi” wele lo Tshoto y’Etangelo ya Ngɔndɔ ka Nɛi 1, 1995.
8 Tosalake Ɔlɔlɔ oma lo Ditshelo Diaso di’Ɔlɔlɔ: Ditshelo di’ɔlɔlɔ mendanaka l’awui tshɛ wa lo lɔsɛnɔ laso. Lam’ashila losanganya ndo wɔsaso mituka dia kawola otsha la ngelo, sho mɛnyaka ditshelo diaso di’ɔlɔlɔ lo mbewɔ dionga dia lokaki, lo tshikɛ epalanga, akadiyɛso wele l’ana ndo ana wa totshitshɛ diaaso dia tokɔtɔ ntondo. Sho mɛnyaka nto ditshelo di’ɔlɔlɔ lo mbisha lonya dia tshika sɛkɛ dia losanganya pudipudi. Naka takakɔshisha mindo mɔtshi lam’akatalɛki lo wonya wa diomuyelo, kana tambɛna bɛtshi di’akatshi la nkɛtɛ, pudipudi kaso k’ Akristo ayototshutshuya dia ditɔngɔna ko mbadja lo dihole diadjawɔ diangɔ dia mindo. Ndo ambutshi vɔ lawɔ pombaka mbetsha anawɔ dia vɔ mbisha lonya dia mbetɛ dihole diaso di’ɔtɛmwɛlɔ pudipudi.
9 Loshilambo ndo lɔkɛwɔ laso la dimɛna mɛnyaka mbetawɔ kaso k’Okristo ndo mbishaka anto wele l’etema w’ɔlɔlɔ diaaso dia vɔ mbishola akambo wa mɛtɛ esadi eto. Lâsɔ, nyɛsɔ ‘totetemale la salaka ɔlɔlɔ’ ndo kondja lotombo etena kayotɔtɔ lo Losanganya la Distrikɛ lele l’ɔtɛ a dui ɔnɛ: “Embetsha w’Ɔtɛkɛta wa Nzambi.”—Romo 13:3.