“Lakatshikala Nge! Lakatshikala Nge! Lakatshikala Nge!”
1 Ɛtɛkɛta ɛsɔ w’Okristo ɔmɔtshi wa kɔlamelo wakahandɔ oma l’etena kakawamanaka anto oshiki (Holocauste) mɛnyaka yɛdikɔ yakɔshi nunu di’Ɛmɛnyi wa Jehowa oyadi wanɛ weke la lɔsɛnɔ kana wakavu, wakayashikikɛ di’aha tshika dietawɔ diawɔ kânga la ntondo k’akambo w’esehe wakasalaka ase Nazi. (Ef. 6:11, 13) Ɔkɔndɔ awɔ washa ekeketshelo wɛnya dihonga ndo otshumba wakawadje kɔndɔma lo bandɛ vidɛo kahahanya nd’otema kele l’ɔtɛ a dui ɔnɛ: La fermeté des Témoins de Jéhovah face à la persécution nazie. Ase etshumanelo tshɛ nɔmbamaka dia menda bandɛ kɛnɛ woho wa vɔ ndjewoya anto akina shɛngiya yakonge la bandɛ kɛsɔ le wɔ.
2 Nyokane yimba la wembola ɛnɛ: (1) Ɛkɔkɔ akɔna wakatshutshuya Ɛmɛnyi wa Jehowa dia nshika ntanga la wolo tshɛ la ntondo k’aseka Nazi? (2a) Naa kanyi yotshikitanyi yaki l’anto lo kɛnɛ kendana la woho ɔmɔtshi wa mɔyɔ, ndo lande na? (2b) Ngande wakanandema nkumbo y’Ɛmɛnyi wa Jehowa la dikambo sɔ? (3) Ɛmɛnyi wa Jehowa engana wakatomama lo pango ya nkanu, ngande wakaweyamaka lɛkɔ, ndo apulushi wakawelɛka Gestapo (police secrète) ngande wakawasalaka la wɔ? (4) Kakɔna kakatone anangɛso dia futa woho wa vɔ kondja lotshungɔ? (5a) Ngande ndo etena kakɔna kakatɛkɛta Ɛmɛnyi wa Jehowa la wolo tshɛ lo kɛnɛ kendana l’akambo wa kɔlɔ wakasalemaka lo lowandji laki Hitler? (5b) Ngande wakasale Hitler? (6) Ngande wele woho wakakimanɛ ekambi waki Jehowa akonge tshondo y’ekokelo le wɔ ndo le anto akina, oyadi l’emunyi kana lo nyuma na? (7) Naa osambo wa Diolelo wakafundama lo pango ka lokanu? (8) Naa bɛnyɛlɔ di’apami, wamato ndo ɛlɔngɔlɔngɔ wa kɔlamelo diakotshutshuya dia nama kɔlamelo yayɛ otsha le Jehowa oyadi kɛnɛ tshɛ kokoki ntomba? (Enda ndo lo Annuaire 1999, lɛkɛ 144-147.) (9) Oko weyɛ Ɔmɛnyi ɔmɔtshi wa Jehowa, ngande wamboyaoka lo kɛnɛ kendana la ndjakakitola l’andja ɔnɛ l’ɔkɔngɔ wa wɛ menda bandɛ vidɛo kɛnɛ na?
3 Bɛnyɛlɔ di’amɛna ndo diasha ekeketshelo di’Ɛmɛnyi wa Jehowa diele lo bandɛ vidɛo Fermeté koka kimanyiya ɛlɔngɔlɔngɔ, oyadi kânga wanɛ wele bu Ɛmɛnyi wa Jehowa dia ndɔshana la weho w’akambo w’ohomba wele oko: woho wahayokikɛ anto akambo, tɔsɛngiya t’oma le angɛnyi, ndo akambo wendana la nkum’otema k’onto. Naka wɛ ekɔ ɔlɔngɔlɔngɔ kana osekaseka wɔtɔ lo kalasa ya weke kana ya sekɔndɛrɛ, onde hakoke wɛ nɔmba embetsha ayɛ dia vɔ menda bandɛ kɛnɛ lo kalasa? Ondo wɛ kokaka mbasha bandɛ vidɛo kɛmɔtshi ko mbalembetshiya dia tɔ kekɔ l’ɔkɔndɔ ɔmɔtshi wahaleke anto mbeya kana ɔnɛ tɔ kekɔ l’akambo amɔtshi washa wetshelo lo kɛnɛ kendana la lɔkɛwɔ.
4 Bandɛ vidɛo Fermeté ekɔ ehomɔ ka dimɛna efula katɛnya woho watosha wetshelo waki Nzambi wolo wa lo nyuma dia ngɛnyangɛnya Nzambi lo tshikala nge lo kɛnɛ kele ɔlɔlɔ. (1 Kor. 16:13) Ɛnya akambo wa lo bandɛ kɛnɛ le anto tshɛ wele la nsaki k’akambo wa mɛtɛ.