Tokake Wɔma dia Nsambisha!
1 Lam’ongaso suke dia ntshɔ tosambisha lo luudu la luudu, okakatanu woleki woke wonga laso ele wa tshika luudu laso ko tshɔ tosambisha. Woho wayaokaso oko sho kema l’akoka kokaka tokiya wɔma di’aha sho tshɔ tewoya akambo wa mɛtɛ le “antu tshe.” (1 Tim. 2:4) Koko sho hatohombe mboka wɔma dia nsambisha lokumu l’ɔlɔlɔ. Lande na kahatakoke mboka wɔma na?
2 Lɔ Lekɔ Losango Laki Jehowa: Jehowa akewoya ɔtɛkɛta ande lo Bible. Lam’atatɛmbɛ anto akina losango lɔnɛ, tokanyi tande mbatatawaewoya koko aha takiso. (Romo 10:13-15) Naka anto wayotona losango la Diolelo, kete mɛtɛ Jehowa mbatonawɔ. Lâsɔ, sho hatohombe kɔmɔ alemba. Tekɔ l’eshikikelo ɔnɛ losango lɔnɛ layonga l’etombelo w’ɔlɔlɔ l’etema w’anto wakombola di’awui wa l’andja ɔnɛ tshikitana ndo weya ehomba awɔ wa lo nyuma.—Ezek. 9:4; Mat. 5:3, 6.
3 Jehowa Ekɔ lo Kotola Anto: Onto lakatone tohokamɛ mbala kakete mbeyaka ndjotohokamɛ ɛlɔ kɛnɛ dikambo awui ande wa lo lɔsɛnɔ mbeyaka ndjotshikitana ko nde ndjɔlɛmba otema. Etena kɛsɔ Jehowa mbeyaka ndjɛnya onto otema ande w’ɔlɔlɔ ko ‘mbokotola.’ (Joa. 6:44, 65) Lam’asalema dikambo dia ngasɔ, sho pombaka monga suke dia Jehowa kamba laso ndo ndjela ɛlɔmbwɛlɔ k’andjelo dia sho tana weho w’anto wa ngasɔ.—Eny. 14:6.
4 Nzambi Toshaka Nyuma Kande: Nyuma k’ekila tokimanyiyaka dia sho tɛkɛta ‘la dihonga oma lo wolo waki Jehowa.’ (Etsha 14:1-3) Naka tayohɔ dia nyuma kɛsɔ kekɔ lo tosukɛ la wolo tshɛ l’olimu aso, kete hatotengenga dia mbewoya asukanyi aso, asekaso wa l’olimu, wa la kalasa, ewotɔ aso, ambewi wa mukanda kana akanga w’ɛngɔnyi akambo wa mɛtɛ.
5 Yeso Akatetsha Woho wa Nsambisha: Yeso akakambaka la wembola watshutshuya onto dia kana yimba, la wɛɛla kana bɛnyɛlɔ dia wɔdu, nde akakanaka l’anto yimba oma l’Afundelo. Nde akalembetshiyaka anto akambo wa mɛtɛ lo yoho ya wɔdu ndo yangɛnyangɛnya anto, oma l’atei w’otema ande. Ɔsɔ mbele toho toleki amɛna ta sho ndjela ɛlɔ kɛnɛ. (1 Kor. 4:17) Awui watokomɛ l’esambishelo mbeyaka tshikitana, koko losango la Diolelo lele la nkudu lasambishaso halotshikitana.
6 Tekɔ la diɛsɛ dia Jehowa kamba laso dia sho kimanyiya anto lo yoho ya lânde ndo y’ohomba. Aha sho mboka wɔma! Sho kokaka monga la dihonga ndo mbisha Jehowa diaaso dia nde “ntudihwela lukuki” woho wakokaso nsambisha anto akina lokumu l’ɔlɔlɔ.—Kol. 4:2-4.