Onde Wɛ Ekɔ lo Kamba la Kɛnɛ Kakayeke lo Losanganya la Distrikɛ “Embetsha w’Ɔtɛkɛta wa Nzambi”?

¹ Onto tshɛ lakɔtɔ lo losanganya lɔsɔ la l’ɔnɔnyi ɔnɛ akakoke mɛna di’ekambi wa Jehowa wekɔ l’oyango wa kotsha olimu wakawawasha wa monga embetsha w’Ɔtɛkɛta wa Nzambi. (Mat. 28:​19, 20) Etena kakayakawola la ngelo, naa wetshelo ɛmɔtshi wa lânde wakayashikikɛ dia kamba lawɔ lo lɔsɛnɔ layɛ hita ndo l’olimu w’esambishelo na?

² Afundelo Wakasambiyama Wekɔ Ɔlɔlɔ dia Mbetsha: Ɔtɛ a dui wa lushi la ntondo akalembetshiya kɛnɛ kele lo 2 Timote 3:16. Nyango dako diakɛnya ɔnɛ dia monga ‘l’Akoka Tshɛ Wahombama,’ sho pombaka mbɔsa Ɔtɛkɛta wa Nzambi la nɛmɔ di’efula, mbɔlɛmiya oleki tokanyi la mbekelo y’anto tshɛ ndo kambaka la wɔ la kɔlamelo. Sho pombaka nto nɔmbaka lushi la lushi dia nyuma k’ekila tokimanyiya l’olimu aso ndo dia monga l’olowa atɔ woleki tshɛ, mbut’ate ngandji. Sho pombaka nto mbetawɔ di’ɔlɔngɔswamelo waki Jehowa wa la nkɛtɛ tetsha dia monga ekambi oma lo tshimbo ya nsanganya ya l’etshumanelo.

³ Sawo dia tenyi sato dia Lushi la Tanu diaki l’ɔtɛ a dui ɔnɛ: “Toyaetshake Shamɛ Etena Ketshaso Anto Akina,” diakalembetshiya dia sho pombaka mbisha ɛnyɛlɔ k’ɔlɔlɔ lo (1) ndjela ɛlɛmbɛ waki Nzambi l’akambo tshɛ wendana la lɔkɛwɔ l’Okristo, (2) tetemala monga la mbekelo y’ɔlɔlɔ ya wekelo, ndo (3) minya waonga ndo akambo wa l’otema ndo wa lo yimba wakoka Satana kamba lawɔ. Oma lâsɔ, takɛnyi weho w’eshika wakokaso kokɛ nkumbo yaso oma lo wendelo w’awui wa sɔnyi wa l’andja ɔnɛ. Wakalɔmbɛ ambutshi dia mbisha ɛnyɛlɔ lo mbewɔ menda alɛdi wɛnya awui wa dieyanelo kânga lo tshanda ya tshitshɛ tsho ndo dia sɛna ɔlɔlɔ lo woho wakamba anawɔ l’Internet ndo la televiziɔ. Alako akɔna wa lo Lushi la Tanu wakayatatɛ kamba lawɔ?

⁴ Sawo dia komelo dia Lushi la Tanu diakakeketsha yɛdikɔ yaso ya ngɛnangɛnaka osase wa Jehowa, ya kakatana l’olui w’akitami waki Nzambi wa kɔlamelo ndo ya sala dia wɔladi monga l’atei w’ekambi wa Jehowa. Onde wɛ ambadia dibuku di’oyoyo diakatombe diele l’ɔtɛ ate: La prophétie d’Isaie, lumière pour tous les humains II?

⁵ Tekɔ l’Akoka Wahombama dia Mbetsha Anto Akina: Ɔsɔ mbaki ɔtɛ wa dui wa lushi la hende wakɔsama oma lo 2 Timote 2:⁠2. Lam’akayahokamɛ sawo dia tenyi sato dia la pindju ka Lushi la Samalo, onde wɛ akalembetɛ alako wakashama lo kɛnɛ kendana la woho wa (1) nyanga anto wakoka, (2) wa nomialomia nsaki yawɔ, ndo (3) wa mbaetsha dia ndjela akambo tshɛ wakadjanga Kristo? Onde wɛ ekɔ lo kamba la kɛnɛ kakayeke dia mɛnya anto wasambishayɛ kânga dikambo ɔtɔi to oma l’Afundelo ndo lo mbuta kɛnɛ kayokosha diaaso dia ndjosala wendelo w’oyoyo lo nshi yayela?

⁶ Etenyi ka l’ɔkɔngɔ a midi kakake epole ɔsɛkɛ l’ohomba wa mbokoya Ombetsha wa Woke, Yeso. Lo toho takɔna tasalayɛ la wolo dia nyomoleka monga oko nde na? Lo ndjela kɛnɛ kakayoke lo sawo dia hende diaki la tenyi sato dia lushi lɔsɔ, ngande wafɔnyayɛ wakokayɛ “Kondja Wahɔ Efula oma lo Wetshelo wa Teokrasi”? Alako akɔna wakakambe layɛ dia nyomoleka monga la yambalo etena kasalayɛ wekelo w’onto ndamɛ kana lo nsanganya ya l’etshumanelo?

⁷ Aha la tamu, dibuku di’oyoyo diayaye di’ele l’ɔtɛ a dui ɔnɛ: Tokondja Wahɔ oma lo Kalasa k’Olimu wa Teokrasi diayotokimanyiya dia pamia akoka aso w’atɛkɛtshi ndo w’embetsha w’Ɔtɛkɛta wa Nzambi. Wayokotola yambalo efula lo akoka wa mbeya tɛkɛta wakatshikitanyaka ekambi waki Nzambi wa kɔlamelo wa lo nshi yakafundamaka Bible l’anto akina. Wekelo tshɛ wa lo dibuku di’oyoyo sɔ wekɔ la tokombokombo tɛnya lo tshena pe kɛnɛ kahombaso sala, lande na kele dui diakɔ ohomba ndo woho wahombama disala. Ekambelo w’ohomba efula wekɔ lo wekelo akɔ. Akadiyɛso wayonga l’akongɛ (cadres) 29 wayowɔsɔnaka etena kayowoshaka asawo awɔ. L’edjedja ka wonya, etshikitanu wakatama wayosalema lo kɛnɛ kendana l’okongelo wa kalasa. Onde wɛ ekɔ la mbekelo ka dimɛna ka wekelo ndo k’ɔlɔngɔswɛlɔ woho wa kondja wahɔ w’efula oma lo Kalasa k’Olimu wa Teokrasi lomingu tshɛ lɔkɔ?

⁸ Tonge Embetsha lo Menda Etena Kambeta: Ɔtɛ wa dui wa Lushi la Lomingu ɔnɛ wakɔsama oma lo Heberu 5:12. Sawo dia tenyi sato dia la pindju diaki l’ɔtɛ a dui ɔnɛ: “Prɔfɛsiya ka Malaki Tɔlɔngɔsɔlaka lo Kɛnɛ Kendana la Lushi la Jehowa,” diakatokeketsha dia mbisha Nzambi kɛnɛ koleki dimɛna ndo petsha weho tshɛ wa lokeso dia sho ndjoka lo lushi la woke ndo la wɔma laki Jehowa. Dramɛ diaki l’ɔtɛ a dui ɔnɛ: “Tɔlɛmiya Lowandji la Jehowa,” diakɛnya ɔlɔlɔ dia lotamanya, saki la lokumu, kandjema, ndo kɔlamelo ya kɔlɔ yaki la Kɔra ka lo nshi y’edjedja nde l’asekande akayakonya dia vɔ tɔmbɔkwɛ Jehowa. Sawo diakayele diakɛnya dia ɛlɔ kɛnɛ ohomba wa kitanyiya lowandji laki Nzambi l’atei wa nkumbo ndo w’etshumanelo. Sawo dia lo Sɛkɛ diaki l’ɔtɛ a dui ɔnɛ: “Waa Na Wetsha Wedja Tshɛ Akambo wa Mɛtɛ?” diakɛnya di’Ɛmɛnyi wa Jehowa wekɔ lo sala dikambo sɔ otshikitanyi l’ase Lokristokristo wasɛma lâdiko di’ɛlɔmɔ ɔnɛ vɔ mbetshaka akambo wa mɛtɛ w’oma lo Bible.

⁹ Mbokɛmaka hwe dia Jehowa ekɔ lo tetsha dia sho monga embetsha w’eshika w’Ɔtɛkɛta ande. Tokambe la kɛnɛ kakateke, lo ‘ndjalamaka shamɛ ndo lo namaka wetshelo aso, woho wa shamɛ ndo wanɛ watohokamɛ kondja panda.’​—⁠1 Tim. 4:⁠16.