Onde Wɛ Ndjaleshaka Dimɛna lo Nyuma?
1 Yokedi mɔtshi mbutaka ɔnɛ ‘yonge yaso nemanɛka la kɛnɛ kalɛso.’ Lo mɛtɛ, mbekelo yaso y’olelo yekɔ la shɛngiya lo wolo aso wa demba ndo lo yônge yaso. Lam’ele Yeso akate ate: “Untu hayala la lumu ne dia ma tu, keli ayuyala la lo ne dia aui tshe watumba uma l’unyo wa [Nzambi],” mbekelo yaso y’olelo wa mbo ya lo nyuma koka nto monga la shɛngiya y’ɔlɔlɔ kana ya kɔlɔ le so. (Mat. 4:4) Lâsɔ, onde wɛ ekɔ la mbekelo y’ɛlɔlɔ ya mbo ya lo nyuma? Onde wɛ ekɔ lɔtɔmɔ? Onde wɛ ndɛka lowango lowango? Kana onde wɛ ngɛnangɛnaka dia mbɔsa etena ka ndɛka mbo ya lo nyuma y’amɛna efula mbala la mbala ndo lo yɛdikɔ yakoka?
2 Sɛdingola Olelo Ayɛ: Jehowa ekɔ lo tosha “mbu ya nde . . . lu tena diayo” ndo “dambu dia wanu w’ololo,” oma lo tshimbo ‘y’ɔhɔmbɔ wa kɔlamelo ndo wa kɛsɔ.’ (Mat. 24:45; Is. 25:6) Dia sho kondja wahɔ efula oma lo mbo ya ndɛ shɔ yatoshawɔ la ngandji, sho pombaka mbidja welo dia ndɛ dimɛna lo nyuma.
3 Wɛ mbeyaka ndjambola wate: ‘Onde dimi mbadiaka divɛsa dia lushi ndo kɔmatɛrɛ kadiɔ lushi tshɛ? Onde dimi mbadiaka Bible lushi la lushi ndo kanaka yimba la kɛnɛ kadiami? Onde dimi nɔngɔsɔlaka nsanganya ya l’etshumanelo lo mbekaka awui akɔ la ntondo? Onde dimi lambadiaka ekanda aso wamboyokomɛ la tomba, mbidja ndo tɔvɔlimɛ ta dibuku dia La prophétie d’Isaïe, lumière pour tous les humains?’
4 Yeso akalake ate: “Wane weli la wula l’etema, weko la otshoko . . . Wane weli la ndjala la pusa ka akambu w’ololo weli la otshoko, ne dia vo wayulutshama.” (Mat. 5:3, 6) Ɔnkɔnɛ, yalesha dimɛna lo nyuma lo ndodja yimba ndo otema ayɛ l’ewo ka Nzambi ka mɛtɛ.