‘Apami Wele oko Weshasha’ Namaka Ɛkɔkɔ Waki Nzambi la Lotutsha Tshɛ
1 Jehowa akakimanyiya anto la ngandji tshɛ oma lo tshimbo y’Ɔnande lo mbasha ‘apami wele oko weshasha’! (Ef. 4:8, 11, 12) Vɔ wekɔ l’ɛkɛndɛ efula, mbidja ndo wɔnɛ wa nama ɛkɔkɔ waki Nzambi l’ɔngɛnɔngɛnɔ ndo la lotutsha. (1 Pet. 5:2, 3) Sho tshɛ kondjaka wahɔ oma lo ɛlɔngɔswamelo k’ohomba efula kɛsɔ. Kânga mbele anto amɔtshi wekɔ lo pomana l’ekakatanu, wêke eyoyo l’etshumanelo, wekɔ la wɛɔdu ɛmɔtshi, kana wambotakɔ mboka, apami asɔ ndjashaka tshɛ dikambo dia wahɔ wa lo nyuma w’anto tshɛ.—Fil. 2:4; 1 Tes. 5:12-14.
2 Lam’adiɛnɛ anto l’ɔtɛ w’efukutanu ɛmɔtshi wa l’andja ɔnɛ, elami ɛsɔ mongaka oko “eshamelu uma lu lopepe, ndu ukumbo uma lu ngimbi.” Lam’akɔmɔso kana washindanɛso la wetsho ɛmɔtshi ndo lam’okaso dia tekɔ l’ohomba w’ekeketshelo, vɔ tokeketshaka ndo mongaka “uku ekedi w’ashi lu kete ya wumu” kana “uku dedi dia dive dia wuki l’usui watuhekuyaka antu.”—Is. 32:2.
3 Vɔ Keketshaka Wanɛ Wahayosambisha: Dikumanyi mbidjaka welo wa lânde dia keketsha wanɛ wahayokimɔ alapɔlɔ ngɔndɔ mɔtshi ndo wetshaka ngɔndɔ shamalo aha la sambisha. Vɔ mbakimanyiyaka dia mbɔsa tɛdikɔ takokawɔ nyomokamba nto elimu tshɛ wa l’etshumanelo. Wendelo woludi la ngandji wasala elami wakakimanyiya anto efula dia mbɔtɔka lo nsanganya ya l’etshumanelo mbala la mbala ndo keketala lo nyuma polo lo yɛdikɔ ya vɔ monga l’akoka wa nyomotetemala nto l’olimu w’esambishelo. Welo ɛsɔ tshɛ wadja dikumanyi mɛnyaka ngandji katoka Jehowa ndo woho watɔlɔmbɔla Yeso Kristo l’ɔlɔlɔ tshɛ. Nde akasha ɛnyɛlɔ ka woho wa ndjakiyanya dikambo di’ɛkɔkɔ ande tshɛ wele ondo wambonganɛ kana wamboshishɔ.—Mat. 18:12-14; Joa. 10:16, 27-29.
4 Elami mendaka tolembetelo takoka mɛnya dia kana amɔtshi wambotatɛ mbɔla lo nyuma. Anto tshɛ wɛnya tolembetelo t’ɔkɔmwɛlɔ w’otema, wanɛ wahayɔtɔ lo nsanganya mbala la mbala, kana wanɛ wosambishaka paka lo pai wekɔ mɛtɛ l’ohomba w’ekimanyielo ka lo nyuma. Dikumanyi salaka la wolo dia kimanyiya onto tshɛ lambotatɛ nanga ndɔta ndo nɔngɔsɔla demba oko as’andja ɔnɛ kana laya la dionga dia diɔnyɔ otsha l’etshumanelo. La nsaki ndo la ngandji ka mɛtɛ, emendji salaka tshɛ la lolango dia ‘kimɔ nyumu yawɔ’ dia nyanga kimanyiya anto asɔ dia vɔ nyomonga la woho wa ngandji kakawokaka Jehowa ntondo.—1 Tes. 2:8.
5 Lo nshi yakete, Akristo amɔtshi wakatshike ndja l’etshumanelo ndo wakɔlɛ yɔ̂ lo nyuma dikambo wakadiɛnɛka l’ekakatanu wendana la yônge ya demba, l’ekondjelo, kana la wotsho wa nkumbo. Aha la monga la diɔnyɔ, dikumanyi shikikɛka anto asɔ l’ɔlɔlɔ tshɛ ɔnɛ Jehowa kokɛka ɛkɔkɔ ande tshɛ ndo nde ayowasukɛ lo tena dia wolo. (Osam. 55:22; 1 Pet. 5:7) Alami w’ɛkɔkɔ wele la sso dia wolo koka mbakimanyiya dia vɔ mbeya ɔnɛ naka vɔ ‘sukana otsha le Nzambi, kete nde ayosukana oya le wɔ,’ ndo wayokondja esambelo ndo ekeketshelo.—Jak. 4:8; Osam. 23:3, 4.
6 Vɔ Nɛnyaka Wanɛ Wele la Dikɔmɔ: Elami ɛsɔ woludi la ngandji ndjakiyanyaka nto dikambo dia wanɛ wakoka mbohamamɛ. Lo tshumanelo efula, sho tanaka anto amɔtshi wele la dikɔmɔ, wele lo wa pitadi, kana wele la weho ekina w’ekakatanu. Woho wahawasambisha lokumu la Diolelo efula mbokɛmaka nɛ dia vɔ wekɔ la pâ. Ondo vɔ kondjaka diaaso dia sambisha paka etena kaya anto dia ndjowaenda, kana sambisha ɛkɔnyi ekina wele oko vɔ, kana elami w’ɛkɔnyi. Lâsɔ, kɛnɛ tshɛ kakokawɔ sala mbɔsamaka la nɛmɔ nɛ dia vɔ sukɛka olimu w’esambishelo lo tshɛ kawɔ. (Mat. 25:15) Oyadi kânga minitɛ 15 tsho mbosambishishawɔ, pombaka funda alapɔlɔ ɔsɔ ndo vɔ wayotetemala la mbadiema oko apandjudi wa Diolelo wakimɔ alapɔlɔ mbala la mbala.
7 ‘Apami wele oko weshasha’ mbidjaka yimba l’ehomba wa lo nyuma w’anangɛwɔ djekoleko l’etena kɛnɛ ka l’ɔnɔnyi, mbut’ate lo nshi ya Eohwelo. Ɔnɛ ekɔ mɛtɛ etena kakoka le dikumanyi dia vɔ mbidja welo wa lânde dia kimanyiya wanɛ tshɛ wakanganɛ dia vɔ nyomokondja ɔngɛnɔngɛnɔ ndo wɔladi wa lo yimba waya lo kamba l’etshumanelo kamɛ la waasaso tshɛ! Sho ngɛnangɛnaka lam’ɛnaso anto asɔ ‘wotɔ laso lo mbetawɔ’ lo nsanganya ya l’etshumanelo ndo watomba l’esambishelo, dia nyomoshikikɛ mbetawɔ kawɔ l’olambo wa tshungo.—Ngal. 6:10; Luka 15:4-7; Joa. 10:11, 14.