Esambishelo ka Diolelo Kimanyiyaka dia Shimbɛ Nsɛnɔ!
1 Vɔ wekɔ olimu woleki ohomba l’andja w’otondo wakambema nshi nyɛ. Jehowa Nzambi, Yeso Kristo ndo miliyara y’andjelo wekɔ lo mbidja yimba yawɔ l’olimu akɔ. Naa olimu akɔ ɔsɔ, ndo lande na kewɔ ohomba na? Olimu akɔ ko esambishelo ka Diolelo ndo vɔ kimanyiyaka dia shimbɛ nsɛnɔ!—Romo 1:16; 10:13, 14.
2 Anto amɔtshi mbeyaka fɔnya dia tayokoka kimanyiya anto akina dimɛna naka sho pemba nɔngɔsɔla ahole wotodingi. Anto efula wekɔ lo ndjasha tshɛ dia mbidja wɔladi, kɔnɔla wa hemɔ, kana nyanga dia mbisha falanga nɛmɔ. Ko kakɔna kayoleka kimanyiya anto na?
3 Olimu w’Ohomba Efula: Losango la Diolelo lɔamɛ nembetshiyaka oyango wa lɔsɛnɔ, kiɔkɔ y’asui wele l’anto, ndo elongamelo kamɛ ka shikaa lo kɛnɛ kendana la nshi yayaye. Lokumu l’ɔlɔlɔ kimanyiyaka anto dia vɔ koma angɛnyi waki Jehowa ndo kondja “ki ka [Nzambi], kuleki yimba tshe.” (Fil. 4:7) Paka losango la Diolelo mbɛnya anto woho wa vɔ ndɔshana l’ekakatanu wa lo lɔsɛnɔ la nshi nyɛ ndo mbalembetshiya woho wakokawɔ mbika lam’ayolanyema andja wa kɔlɔ ɔnɛ. (1 Joa. 2:17) Kema sunganaka sho mbidja welo tshɛ l’esambishelo ka Diolelo?
4 Tɔshi ɛnyɛlɔ: Naa yoho yoleki dimɛna yakoka kimanyiyama ase ngelo kɛmɔtshi wele lo wâle nɛ dia baragɛ kɛmɔtshi k’ashi kayanga kongotɔ lo ngelo kawɔ, koko vɔ wekɔ paka lo djɔ? Onde nyanga dia monya ashi wa lo barajɛ kɛsɔ? Onde nɛnga ngelo kɛsɔ kele lo wâle? Ndoko! Pombaka memula ase ngelo kɛsɔ, mbaewola dikambo dia mpokoso kayanga mbakomɛ, ndo mbakimanyiya dia vɔ ndawɔ! Anto wele lo djɔ ya lo nyuma ɛlɔ kɛnɛ wekɔ lo wâle wa mamba. (Luka 21:34-36) Lam’ele dikongɛ nɛ di’akambo diayanga mbeta kem’edja, nyɛsɔ tosale la wolo dia sambisha anto efula lo ndjela akoka aso!—2 Tim. 4:2; 2 Pet. 3:11, 12.
5 Totetemale l’Olimu Ɔnɛ: Nyɛsɔ toyange toho ta ndeka sambisha anto efula wele l’etema w’ɔlɔlɔ lokumu l’ɔlɔlɔ, lo mvudu yawɔ, lo toshinga, lo telefɔnɛ ndo lo tshakitudi. Olimu wakatosha Jehowa dia kamba ekɔ olimu woleki ohomba wakokaso kamba. Naka sho mbokamba l’ohetoheto, kete ‘tayoyashimbela shamɛ ndo wanɛ watohokamɛ.’—1 Tim. 4:16.