‘Tosalake Nshi Tshɛ Kɛnɛ Kele Ɔlɔlɔ’

¹ Lɔsɛnɔ l’Okristo nɔmbaka dia ‘salɛka anto kɛnɛ kele ɔlɔlɔ nshi tshɛ.’ (1 Tes. 5:15) Lam’ɔtɔso lo nsanganya ya distrikɛ, sho kondjaka waaso efula wa salɛ anto akina dikambo dimɔtshi di’ɔlɔlɔ. Lo waaso asɔ, anto mendaka kɛnɛ kasalaso ndo anto tshɛ wahomana la so mongaka la tokanyi tɔmɔtshi tendana laso lo menda dionga diakiso otsha le wɔ. Dia sho tetemala monga la lokumu la dimɛna lele l’Ɛmɛnyi wa Jehowa, sho pombaka mɛnya oma l’etsha aso dia tekɔ anto ‘walɛmiya weho w’anto tshɛ.’ (1 Pet. 2:17) Kɛsɔ nembetshiyaka nto dia “untu l’untu, [menda aha paka] akambu andi atu, keli untu l’untu endi ndu akambu w’antu akina.” (Fil. 2:⁠4) Tende woho wendana dikambo sɔ l’olimu wa pangia anto lo nsanganya ya weke.

² Lam’atshɔwɔ lo losanganya lɔmɔtshi, Ɛmɛnyi wa Jehowa efula wekɔ la mbekelo ka ndjalɔngɔsɔlaka dia tohanga lak’anangɛwɔ wa lo nyuma. Koko, akina mbeyaka mbɔsa yɛdikɔ ya todjasɛ l’ase nkumbo yawɔ wele bu Ɛmɛnyi wa Jehowa l’oyango wa mbasambisha kana wa mbawaeta oya lo losanganya. Dikambo sɔ diekɔ dimɛna efula. (1) Oyadi laka anangɛso kana laka ewotɔ aso mbohangiso, sho pombaka mbewɔ dia mbaɛndja wotsho wamboleka. La ntondo ka sho tshɔ lo losanganya, ekɔ dimɛna sho ndjalɔngɔsɔla lo kɛnɛ kendana l’ehomba aso, oko olelo ndo akuta wa futaka mutuka naka ayonga ohomba. (2) Hatohombe nanya ɔlɔlɔ w’onto lotolongodi lo tshikala nshi efula l’ɔkɔngɔ wa losanganya. Ngasɔ mbayotɛnya dia sho mandolaka ɔlɔlɔ awɔ w’otema. (3) Sho pombaka mbohɔka dia tekɔ angɛndangɛnda, ndo hatohombe ndjaɔtshiya l’akambo w’akanga a ngelo ndo hatohombe kamba la diangɔ diawɔ aha la dikimɔ. Sho pombaka ndjela kɛnɛ katama lo Mateu 7:⁠12.

³ Tetsha Ana Woho wa Vɔ Sala Ɔlɔlɔ: Lo losanganya lɔmɔtshi, ana wakawatshike vamɛ aha l’ɛlɔmbwɛlɔ k’epalanga kombisha ɛnyɛlɔ ka dimɛna. (Tuk. 29:15) Esangɔ ɛmɔtshi, ambutshi totshikaka ana vamɛ aha la vɔ mbalama. L’ɔtɛ wa dikambo sɔ, ana amɔtshi tetetaka weteteteta wonya wa losanganya, hawoyele kɛnɛ katama ndo vɔ mbidjaka londjo wodjadja. Pombaka menda dimɛna di’aha vɔ kɛlakɛlaka efula otsha lo nkomba wonya wa losanganya. Ana pombaka monga lale ambutshi awɔ, ndo vɔ pombaka monga la Bible yawɔ hita ndo kalupɛ ya mbɔsaka nɔtɛ, kɛsɔ ayowakimanyiya dia pokamɛ ndo mbeka dia mboka Jehowa wɔma. (Euh. 31:12). Oyadi kânga lo dihole di’ohangi nkumbo k’otondo lo nshi ya losanganya, ambutshi pombaka nama ana dimɛna woho wa vɔ mɛnya lɔkɛwɔ lasungana le akɛnda w’Akristo. Kɛsɔ ayotombola lokombo laki Jehowa.

⁴ Ambutshi le, la ntondo ka losanganya, ayonga dimɛna efula nyu mbɔsa etena ka tasawudi l’ananyu dia mbaohola woho wa lɔkɛwɔ lele l’Okristo lalongamɛ anto mɛna le nde wonya tshɛ ndo l’ahole tshɛ. (Ef. 6:⁠4) Ɛnyɛlɔ, nyowaɛnya dia ngandji ka mɛtɛ k’Okristo “hatshi akambu wa fumbosonyi, hayangi paka lulangu landi, hadia akambu wa kolo.” (1 Kor. 13:⁠5) Epalanga mbeyaka keketsha ɛtɛkɛta ɛsɔ lo mbisha ɛnyɛlɔ k’ɔlɔlɔ kakoka anto tshɛ ndjela. Ana le, nyu koka salaka nshi tshɛ kɛnɛ kele ɔlɔlɔ lo kitanyiyaka ambutshi anyu, lo nɛnyaka diangɔ di’anto wonyohangisha ndo lo mongaka la dilɛmiɛlɔ le anto tshɛ wodjashi lanyu. (Kol. 3:20) Lam’asalaso sho tshɛ la wolo dia salɛ anto tshɛ ɔlɔlɔ, sho ‘nɛngaka wetshelo waki Nzambi lele Oshimbedi aso l’akambo tshɛ.’​—⁠Tito 2:⁠10.

⁵ Lɔkɛwɔ laso la dimɛna lekɔ la shɛngiya aha tsho le anto watenda lo tshɛ kawɔ, koko ndo le wanɛ watɔnyɔla. Dikambo tshɛ diayotosala lo losanganya ndo lo ngelo kasalema losanganya, oyadi lo mboka lam’atshɔso otsha lo dihole dia losanganya, lam’alɛso yangɔ kamɛ l’anangɛso, lam’asutshasutshaso demba lo lokombo l’onto lakatohangisha, kana wasambishaso lo tshakitudi lo diaaso tshɛ, asawo aso w’Okristo ndo etsha aso pombaka mɛnya dia sho nangaka salɛka nshi tshɛ anto kɛnɛ kele ɔlɔlɔ.

[Kiombo ya lo lɛkɛ 4]

Lam’alanganyu, tohɔke dia:

■ Monga la solo dia lotutsha ndo la loshilambo otsha le anangɛso ndo le anto wotohangiyisha.

■ Toyele alako washa wanɛ wele l’ɔkɛndɛ w’ɔlɔngɔswɛlɔ wa losanganya dia wahɔ w’anto tshɛ.

■ Tatolanyake ɔlɔlɔ ndo lokaho l’anto waketawɔ dia sho panga lakawɔ.

■ Tendake dimɛna kɛnɛ kasala anaso.