Onde Wɛ Mbishaka Lonya di’Alapɔlɔ wa Mɛtɛ w’Olimu Fundama?

¹ Ɛkɔndɔ efula wa lo Bible wekɔ l’adatɛ wa shikaa watokimanyiya dia mbeya dimɛna kɛnɛ kakatombe. Ɛnyɛlɔ, Ngidiyɔna akalɛndja ase Midiyana l’alembe 300 ato. (Emb. 7:⁠7) Ondjelo waki Jehowa akadiake alembe w’ase Asuriya 185000. (2 Khum. 19:35) Lo Pɛntɛkɔsta ka l’ɔnɔnyi 33 T.D., anto oko 3000 wakabatizama, ndo yema tshitshɛ oma lâsɔ, lofulo l’ambetawudi lakayodɛka lo yɛdiko yele oko 5000. (Etsha 2:41; 4:⁠4) Ɛkɔndɔ ɛnɛ mɛnyaka di’ekambi waki Nzambi wa lo nshi y’edjedja wakasale la wolo dia funda alapɔlɔ wele kokele ndo shikaa.

² Ɛlɔ kɛnɛ ɔlɔngɔswamelo waki Jehowa tɔlɔmbaka dia kimɔka alapɔlɔ w’olimu w’esambishelo ngɔndɔ tshɛ. Woho wasukɛso yɛdikɔ shɔ la kɔlamelo tshɛ kimanyiyaka ɔlɔngɔswamelo ɔsɔ dia menda dimɛna woho watakɛndakɛnda olimu w’esambishelo. Alapɔlɔ mbeyaka mɛnya dia sho pombaka mbidja yimba lo dikambo dimɔtshi diendana l’olimu aso kana mɛnya dia tekɔ l’ohomba w’ekambi efula l’ɛtshi kɛmɔtshi ka mbilo. Alapɔlɔ wakimɔso l’etshumanelo kimanyiyaka dikumanyi dia vɔ mbeya wanɛ wakoka pamia olimu awɔ la wanɛ wele l’ohomba w’ekimanyielo. Ndo alapɔlɔ wendana l’ehamelo k’olimu w’esambishelo keketshaka nkumbo kaso k’otondo k’anto l’ɔnango. Onde wɛ mbishaka lonya di’etshumanelo toma alapɔlɔ wa shikaa?

³ Ɔkɛndɛ Wele Layɛ: L’ekomelo ka ngɔndɔ, onde wɛ mongaka la pâ dia mbohɔ wenya engana wakayasambisha? Ko naka ngasɔ mbediɔ, lande na kahayafundaka wenya ayɛ mbala tshɛ kasambishayɛ? Anto amɔtshi kambaka l’alamanaka kana la kalupɛ. Anto akina mɛmbaka dikatshi diafundaso alapɔlɔ w’olimu. L’ekomelo ka ngɔndɔ, kimɔ alapɔlɔ ayɛ aha la tshimbatshimba le omendji anyu wa wekelo wa dibuku. Kana, naka wɛ nangaka, ko wɛ mbidja alapɔlɔ akɔ lo shɛtɛshɛtɛ ya lo Mbalasa ka Diolelo. Naka wɛ ambohɛ kimɔ alapɔlɔ ayɛ, kete wɛ pombaka mɛnana l’omendji anyu wa wekelo wa dibuku aha la tshimbatshimba lo dihole dia wɛ konga dia paka nde ndamɛ ndjokombolawɔ. Yoho yakimɔyɛ alapɔlɔ ayɛ l’otema ɔtɔi mɛnyaka woho walɛmiyayɛ tɛdikɔ taki Jehowa ndo ngandji kele layɛ otsha le anangɛso wele l’ɔkɛndɛ wa kɔngɔlaka kana toma alapɔlɔ akɔ.​—⁠Luka 16:⁠10.

⁴ Ɔkɛndɛ Wele l’Omendji wa Wekelo wa Dibuku: Lam’ele nde ekɔ olami wakokɛ ndo wadja ɛkɔkɔ yimba, omendji wa wekelo wa dibuku ndjashaka l’olimu wakamba as’olui ande ngɔndɔ k’otondo. (Tuk. 27:23) Naka opandjudi tshɛ ekɔ lo sambisha mbala la mbala, lo yoho y’ɔlɔlɔ ndo l’ɔngɛnɔngɛnɔ, kete nde mbeyaka dikambo sɔ ndo ekɔ suke dia kimanyiya opandjudi tshɛ wahasambishisha ngɔndɔ k’otondo. Mbala efula kɛnɛ kele ohomba le onto ɔsɔ ko yema y’ekeketshelo, dako di’oshika kana mbɔlɔmba dia tomba la nde l’esambishelo.

⁵ L’ekomelo ka ngɔndɔ, omendji wa wekelo wa dibuku pombaka ndjashikikɛ di’apandjudi tshɛ wa l’olui ande wambokotsha ɔkɛndɛ awɔ wa kimɔ alapɔlɔ w’olimu dia sekeletɛlɛ mbeya la tomɛ filialɛ alapɔlɔ wa mɛtɛ w’etshumanelo k’otondo la ntondo ka ngɔndɔ kayela ndekana nshi shamalo. Oya l’ekomelo ka ngɔndɔ, omendji wa wekelo wa dibuku mbeyaka mbohola apandjudi wa l’olui ande ndo nde monga l’akatshi wa ndodja alapɔlɔ lo dihole diasalema wekelo wa dibuku. Naka apandjudi amɔtshi mbohɛka kimɔ alapɔlɔ awɔ, kete nde koka mbaohola ndo mbasha ekeketshelo kahombama.

⁶ Kimɔ alapɔlɔ aso w’olimu la wonya kimanyiyaka dia funda alapɔlɔ wa mɛtɛ wɛnya kɛnɛ kakasalema l’olimu w’esambishelo. Onde wɛ ayosha lonya lo kimɔka alapɔlɔ ayɛ w’olimu la wonya ngɔndɔ tshɛ?