Tokotsha Dɔkɔlɔkɔ Diendana la Ndjakimɔ Kaso
1 Oyadi wɛ eke esadi wa batizama kana ambobatizamaka edja, aha la tâmu wɛ akohɔ dikambo sɔ dioleki ohomba lo lɔsɛnɔ layɛ. Batismu kaso kema ekomelo, koko etatelo k’olimu wakoka tshikala pondjo wakatayakimɔ dia kamba lo lɔsɛnɔ laso l’otondo. (1 Joa. 2:17) Kakɔna kahombama dia sho kotsha dɔkɔlɔkɔ diendana la ndjakimɔ kaso?
2 Toyele Ɛnyɛlɔ Kaki Kristo: L’ɔkɔngɔ wa nde batizama, Yeso ‘akatatɛ kamba olimu ande,’ wa sambisha “lukumu l’ololo la diulelu dia [Nzambi].” (Luka 3:23; 4:43) Woho akɔ wamɛ, l’ɔkɔngɔ wa sho nongola batismu dia mɛnya ndjakimɔ kaso le Jehowa, sho takakome ekambi wa lokumu l’ɔlɔlɔ. Kânga mbele okotshelo w’ehomba aso wa l’emunyi, nɔmbaka wenya efula ndo tɔlɔmbaka dia sala la wolo, olimu woleki ohomba le so ekɔ olimu w’Okristo. (Mat. 6:33) Lo dihole dia vɔ ndjasha la wolo tshɛ l’oyangelo w’ɔngɔnyi kana wa lokumu, wanɛ wamboyakimɔ le Nzambi nyangaka dia ‘tombola olimu awɔ,’ oko wakasale ɔpɔstɔlɔ Paulo. (Romo 11:13) Onde wɛ ngɛnangɛnaka diɛsɛ diele layɛ dia kambɛ Jehowa ndo wɛ salaka tshɛ dia tombola olimu wokambɛyɛ?
3 L’ɛnyɛlɔ kaki Yeso, sho pombaka ‘shika tanga la ntondo ka Diabolo.’ (Jak. 4:7) Satana akahembe Yeso l’ɔkɔngɔ wa batismu Kande, ndo woho akɔ wamɛ mbasɔmande ekambi waki Jehowa ɛlɔ kɛnɛ. (Luka 4:1-13) Lam’ele sho dingama l’andja waki Satana ɔnɛ, sho pombaka ndjaekiya, mbewɔ oseka dikambo tshɛ diakoka ndanya yimba kana otema aso. (Tuk. 4:23; Mat. 5:29, 30) Akristo ndakemaka di’aha “nde uma lu mesa wa [Jehowa], ndu uma lu mesa w’edienge.” (1 Kor. 10:21) Dikambo sɔ tɔlɔmbaka dia sho ndjalama oma lo tɔkɛnyɔ ta kɔlɔ, oma lo lɔngɛnyi la kɔlɔ ndo oma lo wâle wa l’Internet. Dui sɔ tɔlɔmbaka nto dia sho mbewɔ akambo waki waa apɔsta. Naka sho nsɛna wolo l’akambo asɔ ndo lo toho tokina tanganyiya Satana anto, kete dui sɔ diayotokimanyiya dia kotsha dɔkɔlɔkɔ diendana la ndjakimɔ kaso.
4 Tokambe l’Ɛlɔngɔswɛlɔ Waki Nzambi: Dia tokimanyiya woho wa sho kotsha dɔkɔlɔkɔ diendana la ndjakimɔ kaso, Jehowa toshaka ekimanyielo oma lo tshimbo y’Ɔtɛkɛta ande ndo y’etshumanelo k’Akristo. Onga la mbekelo ka mbadiaka Bible ndo ka nɔmbaka Jehowa lushi la lushi. (Jas. 1:8; 1 Tes. 5:17) Tɔngɛnangɛnake nsanganya ya l’etshumanelo. (Osam. 122:1) Tekesane la wanɛ woka Jehowa wɔma ndo walama wadjango ande.—Osam. 119:63.
5 Oma l’ekimanyielo kaki Jehowa, sho kokaka kotsha dɔkɔlɔkɔ diaso diendana la ndjakimɔ kaso le nde ndo monga l’ɔngɛnɔngɛnɔ wa mbokambɛka pondjo pondjo.—Osam. 22:26, 27; Fil. 4:13.