Ekadimwelo Lo Wembola Anyu

◼ Ngande wahombaso kotshaka ɛkɛndɛ wa l’etshumanelo?

Welo wadjama kâmɛ mbakimanyiya di’etshumanelo k’ekambi wa Jehowa kɛndakɛnda dimɛna. (1 Kor. 14:​33, 40) Ohokanyiya kɛnɛ tshɛ kahombama salema dia losanganya ɔtɔi la l’etshumanelo salema. Lâdiko dia tshondo ya losanganya, ekɔ elimu efula wakamba anangɛso l’akadiyɛso la ntondo ndo l’ɔkɔngɔ wa losanganya. Elimu ekina wasalema aha la mɛnama lo sɛkɛ wekɔ vɔ lawɔ ohomba. Ngande wakokaso sho tshɛ mbisha lonya l’ekongelo kɛsɔ na?

Ongaka suke dia mbisha lonya. Wanɛ wetawɔ la lolango lawɔ wayonga l’olimu efula wa sala. (Osam. 110:⁠3) Toyakiyanya dikambo di’anto wele la hemɔ ndo di’esombe w’anto. Tosha lonya lo wɔmbɛlɔ wa Mbalasa ka Diolelo. Sho koka sala elimu efula w’ohomba aha l’onto tɔsɛngɔla. Sho la dia monga la nsaki ka kimanyiya.

Kamba la ndjakitshakitsha. Anto wele la ndjakitshakitsha ngɛnangɛnaka kambɛ anto akina olimu. (Luka 9:48) Ndjakitshakitsha ayotoshimba di’aha mbetawɔ ɛkɛndɛ efula wahatatokoka kotsha tshɛ. Ndo nto, ndjakitshakitsha ayotolama di’aha tamba elelo wa lotshungɔ lele laso.​—⁠Tuk. 11:⁠2.

Onga onto lakokawɔ mbɛkɛ otema le nde. Mɔsɛ akakeketshama dia sɔna ‘apami w’eshika’ dia monga l’ɛkɛndɛ l’Isariyɛlɛ w’edjedja. (Etum. 18:21) Dionga diamɛ sɔ diekɔ nto ohomba ɛlɔ kɛnɛ. Yasha tshɛ dia kotsha ɔkɛndɛ tshɛ walongolayɛ l’otema ɔtɔi. (Luka 16:10) Naka wɛ bu l’akoka wa kotsha ɔkɛndɛ ɔmɔtshi, yashikikɛ di’ɔlɔngɔswɛlɔ wa dimɛna wambosalema di’onto okina kotsha ɔkɛndɛ akɔ etena kahayatonga.

Sala tshɛ kakokayɛ sala. Akristo keketshamaka dia kamba l’anima awɔ tshɛ kânga l’elimu wa l’emunyi. (Kol. 3:​22-24) Tekɔ l’ɔkɔkɔ wa woke wa sala dikambo sɔ etena kakambaso dia tɔla ɔtɛmwɛlɔ wa mɛtɛ otsha la ntondo. Oyadi olimu ɔmɔ mɛnamaka dia wekɔ olimu w’anyanya, etshumanelo kondjaka wahɔ naka vɔ salema dimɛna.

Ɔkɛndɛ tshɛ toshaka diaaso dia mɛnya ngandji kaso otsha le Jehowa ndo otsha le anangɛso l’akadiyɛso. (Mat. 22:​37-39) Nyɛsɔ tokotshake la kɔlamelo ɔkɛndɛ tshɛ walongolaso.