Totetemale sambisha
1 Tekɔ lo sɛna lo tena dia wolo. Ata wa lam’asa ase wodja kana waoho, mpokoso y’oma lo diangɔ diakatongama ndo awui akina wa kɔlɔ efula wekɔ lo salema lo ahole tshɛ. Ɛlɔ kɛnɛ oleki tena dikina diakete, nkumbo k’anto kekɔ la ohomba wa nkumu y’ɛlɔlɔ. Koko, wendjodi wendana la akambo wa lo nyuma wekɔ lo takokanɛ. Lo ahole amɔtshi, mbeyaka monga wolo tana anto lawakawɔ ndo tana anto wayotohokamɛ kana wayolanga mbeka Bible. Kânga mbediɔ ɔsɔku, ekɔ ohomba sho tetemala sambisha lokumu l’ɔlɔlɔ la Diolelo dia Nzambi diamboshikikɛmaka.—Mat. 24:14.
2 Ngandji otsha le anto: Esambishelo kaso kotolaka yambalo ya anto lo ngandji ka Jehowa otsha le wɔ. “Ndi halangi nduku omotshi nshisho, keli ndi nangaka tshe wakadimuli etema.” (2 Pet. 3:9; Ezek. 33:11) Omalɔkɔ, oko wakate Yeso, nde akadjanga dia “lukumu l’ololo nsambishama ntundu lu wedja tshe.” (Mako 13:10, sho mbɛnganyisha alɛta ango.) Nzambi nɔmbaka anto dia kadimɔ le nde dia pandɔ elombwelo kayaye ka andja waki Satana. (Joe. 2:28, 29, 32; Zef. 2:2, 3) Shi tekɔ la lowando lo woho ɔnɛ wakatosha Jehowa diaaso sɔ?—1 Tim. 1:12, 13.
3 Alapɔlɔ wa l’andja w’otondo mɛnyaka dia lo ɔnɔnyi w’olimu 2004, ngɔndɔ tshɛ yɛdikɔ ya l’atei atei y’anto wakeke laso Bible lawakawɔ yaki oko anto 6085387 ndo lomingu tshɛ yɛdikɔ ya ambeki w’eyoyo oko 5000 wakabatizamaka. L’atei w’anto asɔ waki weke ka nongola batismu, amɔtshi wakatanema nɛ dia Jehowa akatshɔkɔla welo wakadje apandjudi dia sambisha onto tshɛ la lo ɛtshi kawɔ ka nkɛtɛ. Dui sɔ diakasha ɔngɛnɔngɛnɔ wa mamba l’atei wa tshumanelo. Ande diɛsɛ dia monga ekambi kâmɛ la Nzambi lo olimu ɔsɔ washimbɛ nsɛnɔ lee!—1 Kor. 3:5, 6, 9.
4 Totombolake lokombo la Nzambi: Sho tetemalaka sambisha dia tombola Jehowa lo sɛkɛ ndo dia kidia lokombo lande la ntondo k’anto tshɛ. (Heb. 13:15) Satana ambonganyiya “wa la kete tshe” dia vɔ mbetawɔ dia Nzambi kema la wolo wa kandola ekakatanu w’anto, ndo ɔnɛ nde hadje yimba lo asui awɔ, kana tsho ɔnɛ nde kema. (Eny. 12:9) Sho mamɛka mɛtɛ kendana la Shɛso ka diambo lele l’olongo oma lo esambishelo kaso. Nyɛsɔ totombolake lokombo lande kakianɛ ndo pondjo pondjo.—Osam. 145:1, 2.