Toyasha le anto akina: —Lo ndjaɔtɔnganyiyaka la awui wotshikitanyi
1 Ɔpɔstɔlɔ Paulo akatshike ɛnyɛlɔ k’ɔlɔlɔ lo mbɔtɔnganyiyaka mbala tshɛ mbɔtwɛlɔ yande ya lokumu l’ɔlɔlɔ la mbekelo ndo la tokanyi t’ampokami ande. (1 Kor. 9:19-23) Sho pombaka ndjaketembolaka dia sala woho akɔ wâmɛ. Naka sho takanyiyisha yema la ntondo, kete sho kokaka mbɔtɔnganyiya mbala efula bɛnyɛlɔ dia mbɔtwɛlɔ diele lo Olimu aso wa Diolelo la ehomba w’anto wa lo ɛtshi kaso ka nkɛtɛ. Etena kasukanaso la soko di’onto, sho mbeyaka mɛna tolembetelo tɛnya awui wayasha ompokami lɔkɔ ndo mbidja awui akɔ lo mbɔtwɛlɔ kaso. Koko, ekɔ yoho kina yakokaso ndjaɔtɔnganyiya la awui wotshikitanyi lo esambishelo.
2 Totshikitanya mbɔtwɛlɔ kaso lo ndjela kɛnɛ kotshi ampokami: Mbala efula etena kasambishaso lokumu l’ɔlɔlɔ, sho mbokaka dimbola dimɔtshi ndo nɔmbaka ampokami dia vɔ kadimola. Ngande wɔsayɛ okadimwelo awɔ? Onde wɛ mbetawɔka tsho lâdiko di’ɛlɔmɔ ko tetemala la mbɔtwɛlɔ kakayatalɔngɔsɔdi? Kana onde kɛnɛ katayɛ mɛnyaka dia wɛ ekɔ lo mbidja yimba lo kɛnɛ kata ampokami ayɛ? Naka wɛ ndjasha l’otema ɔtɔi lo kɛnɛ kata akina, kete wɛ ayokoka kamba la ambola akina la yewo tshɛ dia mbeya kɛnɛ kele mɛtɛ lo timba tawɔ. (Tuk. 20:5) Ɔnkɔnɛ, wɛ kokaka kotola yambalo lo akambo wendana la losango la Diolelo waleka mbɔtɔnɛ la ekiyanu w’ompokami.
3 Dui sɔ nɔmbaka dia sho monga suke dia sawola awui akina lo dihole dia sawola paka awui wakatakongɛ ntondo dia kɛtshanya. Naka sho tatɛ la tɛkɛta yema lo dui dimɔ diɔtɛkɛtami lo tita nsango ndo naka ompokami ambota dui dimɔ diakatumbi lo ngelo kana dui dimɔ diokiyanya, kete ndjakiyanya kaso ka mɛtɛ dia kotsha ehomba w’ompokami ayototshutshuya dia ɔkɛtshanyelo wa lo Bible mendana paka la kɛnɛ kele ohomba le nde.—Fil. 2:4.
4 Tɔtɔnganyiya mbɔtwɛlɔ kaso: Etena konyiya ompokami dimbola dimɔ, ondo ayonga dimɛna sho ndjotetemala sawola wonya okina l’ɔkɔngɔ wa wɛ sala eyangelo lo awui akina wendana la dui diakɔ. Sho kokaka nto mbosha ekanda walembetshiya dui diakɔ dimɛna. Awui asɔ tshɛ kɛnɛmɔlaka woho wayashaso l’otema ɔtɔi dia kimanyiya anto akina dia vɔ mbeya Jehowa.—2 Kor. 2:17.