Toyasha le anto akina:—Lo mbokaka ambola ndo lo mpokamɛka
1 Anto efula ngɛnangɛnaka mbisha tokanyi tawɔ hita koko tonaka dia mingwama kana nomboshama. Ɔnkɔnɛ, oko weso ekambi w’Akristo, sho pombaka mbeka woho wa monga tomanyi lo kamba la ambola dia mbeya kɛnɛ kele lo etema w’anto.—Tuk. 20:5.
2 Ambola aso pombaka tshutshuya onto dia kana yimba koko aha dia mɛnya di’oko tokanyi tande tekɔ kɔlɔ. Etena kasambishande lo luudu la luudu, ɔnangɛso ɔmɔtshi mumbolaka ɔnɛ: “Onde wɛ fɔnyaka dia okonga etena kɛmɔtshi kayɔsaka anto asekawɔ la lokumu ndo la nɛmɔ?” Lo ndjela okadimwelo w’onto, nde tetemalaka mbuta ɔnɛ: “Akanyiyayɛ ahombama salema dia dui sɔ kotshama?” kana “Lande na kafɔnyayɛ ngasɔ?” Etena kasambishande lo tshakitudi ndo lo ahole w’anto tshɛ, ɔnangɛso okina mumbolaka wanɛ wele l’ana ɔnɛ: “Kakɔna kangɛnangɛnayɛ efula lo monga ombutshi?” Oma lâsɔ, nde mumbolaka ɔnɛ: “Kakɔna kaleka kokiyanya?” Teye dia ambola asɔ kimanyiyaka anto dia vɔ mbisha tokanyi tawɔ aha la mbaotsha wɔma kana mbadja l’okandokando. Lam’ele awui tshikitanaka, sho mbeyaka tshikitanyaka asawo ndo yoho ya mboka ambola aso dia ndjaɔtɔnganyiyaka l’anto wa lo ɛtshi kaso ka nkɛtɛ.
3 Teye kɛnɛ kele l’etema w’anto: Naka anto wekɔ suke dia kotɛ tokanyi tawɔ, kete hokamɛwɔ la lotutsha tshɛ aha la mbahembola ɔtɛkɛta tshanana. (Jak. 1:19) La ɔlɔlɔ tshɛ etawɔ tokanyi tawɔ. (Kol. 4:6) Wɛ mbeyaka mbuta tsho ɔnɛ: “Ekɔ dimɛna. Losaka lo woho wamboyombutɛ dikambo sɔ.” Naka kokaka andolawɔ la otema ɔtɔi. La ɔlɔlɔ tshɛ mbolawɔ ambola akina wa lâdiko dia mbeya kɛnɛ kakanyiyawɔ ndo lande na kakanyiyawɔ ngasɔ. Yanga dikambo dimɔtshi diasanganyu lolemi. Etena kalangayɛ kotola yambalo yawɔ lo divɛsa dimɔtshi, wɛ mbeyaka mbuta ɔnɛ: “Onde wɛ ambokanaka yimba la kanyi ya ngasɔ?” Ewɔ dia mbetawoya anto awui la wolo kana monga onto lalanga ewanu.—2 Tim. 2:24, 25.
4 Woho wayokadimola anto akina lo ambola aso mbeyaka nemanɛ efula la woho wahokamɛso. Anto kokaka ndjambola kana sho mpokamɛka la otema ɔtɔi. Omendji ɔmɔtshi w’eteta akate ate: “Etena keyɛ suke dia mpokamɛ anto la lotutsha tshɛ, ekɔ yoho ya dimɛna ya kotola anto ndo yoho ya diambo ya mɛnya dia sho ndjashaka lewɔ la wasaso tshɛ.” Mpokamɛ akina mbashaka nɛmɔ ndo mbeyaka mbatshutshuya dia mpokamɛ lokumu l’ɔlɔlɔ layangaso mbasambisha.—Romo 12:10.