Esambishelo ekɔ olimu wakɛnɛmɔla kɛtshi kokaso anto
1 Yeso akɛnyi dia olui w’anto wakahokamɛka losango lande “wakahenyahenyama, ndu kundjala la ekimanyelu, [ndo waki] uku ekoko waha la ulami.” (Mat. 9:36) La kɛtshi ndo la ngandji tshɛ, nde akawaetsha wadjango waki Jehowa, akâkeketsha ndo akakotsha ehomba awɔ wa lo nyuma. Lam’akanaso yimba lo kɛnɛ kakasale Yeso kɛsɔ, sho ndjokomaka dia kanyiya oko nde, ndjaoka oko akandayaoke ndo kɛnɛmɔla kɛtshi l’olimu aso w’esambishelo.
2 Tokanyiya yema lo kɛnɛ kakasalaka Yeso etena kakayaka anto waki l’ohomba w’efula w’ekimanyielo le nde. (Luka 5:12, 13; 8:43-48) Nde akakanɛka wanɛ waki l’ehomba wa lânde. (Mako 7:31-35) Nde akeyaka woho wakayaokaka anto akina ndo akayakiyanya dikambo diawɔ. Nde kondekaka mbidja yimba lo ɛnamelo kele l’onto. (Luka 7:36-40) Aha la tâmu, Yeso akakɛnɛmɔla dionga dia kɛtshi diele la Nzambi lo yoho ya kokele.
3 “Akawauki ketshi”: Yeso kokambaka olimu ande paka l’ɔtɛ w’ɔnɛ ekɔ didjango. Nde ‘akokaka anto kɛtshi.’ (Mako 6:34) Ndo ɛlɔ kɛnɛ, aha mɛmba tsho mɛmbɛso anto losango la Diolelo, koko sho nyangaka dia shimbɛ nsɛnɔ yawɔ. Toyange dia mbeya lande na katona anto losango laso. Lande na kayakiyanyawɔ? Onde alami wa l’ɛtɛmwɛlɔ wa kashi mbanyaka yimba ndo mbakesaka? Naka sho ndjasha l’otema ɔtɔi le anto akina, kete dui sɔ koka mbâtshutshuya dia vɔ mpokamɛ lokumu l’ɔlɔlɔ.—2 Kor. 6:4, 6.
4 Dionga dia kɛtshi munandaka etema. Ɛnyɛlɔ: Mama kɛmɔtshi aki la kandji k’efula l’ɔkɔngɔ wa nde mvusha ɔnande la womoto laki la ngɔndɔ shato. Etena kakakɔkɔla akadiyɛso ahende lo soko diande, nde akawaɔtshiya la kanyi ya tona okadimwelo tshɛ wayowowosha lo dimbola diendana la woho watshika Nzambi asui. Koko, mama kɛsɔ akayotaka l’ɔkɔngɔ ate: “Vɔ wakampokamɛ la kɛtshi tshɛ ndo lam’akawate dia wotatshu, dimi lakayaoke dimɛna efula ndo laketawɔ dia vɔ nyomoyomenda nto.” Onde wɛ salaka tshɛ dia kɛnɛmɔla dionga dia kɛtshi le onto tshɛ lahomana la yɛ l’olimu w’esambishelo?
5 Monga la kɛtshi ayotokimamyiya dia sho keketsha anto akina. Lo sala ngasɔ, sho tombolaka Jehowa, “Shesu ka ketshi.”—2 Kor. 1:3.