Onde wɛ amboyalɔngɔsɔla dia mpokoso k’oma lo diangɔ diakatongama?
1. Lande na kele ekɔ dui dia lomba tayalɔngɔsɔdi la ntondo lo dikambo dia mpokoso?
1 Ɔnɔnyi tshɛ, miliyɔ y’anto wa l’andja w’otondo, mbidja ndo anangɛso la akadiyɛso efula diɛnɛka la adidimu wa nkɛtɛ, tsunami, pɛpɛ ya wolo, vɔlka, mvula ngembe ndo dola di’ashi. Lam’ele mpokoso shɔ ndjaka la shashimoya ndo koka tokomɛ sho tshɛ, ekɔ dui dia lomba dia sho tayalɔngɔsɔdi la ntondo.—Tuk. 21:5.
2. Lande na kahatahombe mbohɛ mbewoya dikumanyi dihole dieso ndo numɛlɔ yaso ya telefɔnɛ?
2 Kɛnɛ kakokaso sala la ntondo ka mpokoso salema: Mbala mɔtshi lɛɛta mbewolaka anto lo dikambo dia mpokoso kɛmɔtshi kayanga tomba. Ekɔ ohomba mbidja yimba lo ɛhɛmwɛlɔ ɛsɔ. (Tuk. 22:3) La ntondo ka dikambo dia ngasɔ, dikumanyi wayosala la wolo dia mɛnana la anto tshɛ wa l’etshumanelo dia mbakimanyiya dia vɔ ndjalɔngɔsɔla. L’ɔkɔngɔ wa mpokoso, dikumanyi wayosala la wolo nto dia mɛnana la anto tshɛ wa l’etshumanelo dia mbeya kana wekɔ tshɛ ki ndo mbeya ekimanyielo kakɔna kakoka monga ohomba. Naka dikumanyi haweye lɛnɛ atshikala ɛkɔkɔ, kete vɔ mbeyaka shisha wonya w’ohomba oshishashisha. Ɔnkɔnɛ, ekɔ ohomba diaha apandjudi mbohɛ mbewoya sekeletɛlɛ ndo omendji awɔ wa wekelo wa dibuku dihole diewɔ ndo numɛlɔ yawɔ ya telefɔnɛ.
3. Ngande wakokaso kamba kâmɛ la dikumanyi naka tekɔ l’ɛtshi ka nkɛtɛ kasalema mpokoso tena efula?
3 Naka etshumanelo kanyu kekɔ lo dihole diasalema mpokoso tena efula, kete dikumanyi kokaka nɔmba apandjudi dia mbasha nkombo ndo numɛlɔ ya telefɔnɛ ya ewotɔ awɔ la angɛnyi awɔ wanganyi yema etale la wɔ ndo wahombawɔ mbelɛ naka dikambo dia wanyandja diambotomba. Kɛsɔ ayokimanyiya dikumanyi dia vɔ mbeya ahole wele wanɛ wambolawɔ mpokoso. Dikumanyi mbeyaka nto kombola dia sala ekongelo kɛmɔtshi kɛnya kɛnɛ kayosala etshumanelo naka dikambo dia wanyandja diambotomba. L’atei w’awui akɔ mbele ndo listɛ la diangɔ diahomba monga l’onto etena katomba dikambo dia wanyandja, tɛdikɔ tendana la ndawɔ ndo woho wa kimanyiya wanɛ wele l’ohomba w’ekimanyielo ka lânde. Ekɔ ohomba ndjela tɛdikɔ t’ohomba ta la ngandji tɔsɔ.—Heb. 13:17.
4. Kakɔna kahombaso sala naka mpokoso kɛmɔtshi kambosalema l’ɛtshi kaso ka nkɛtɛ?
4 L’ɔkɔngɔ wa mpokoso salema: Kakɔna kahombayɛ sala naka mpokoso kɛmɔtshi kambosalema l’ɛtshi kanyu ka nkɛtɛ? Yashikikɛ dia ehomba wa l’emunyi w’ase nkumbo kayɛ wekɔ lo kotshama. Naka wɛ ekɔ la akoka, kete sha anto akina wohomwe mpokoso ekimanyielo kahombama. Sala la wolo dia mɛnana la omendji anyu wa wekelo wa dibuku kana ekumanyi kekina aha la tshimbatshimba. Wɛ la dia sala dui sɔ oyadi wɛ akahandwe ndo bu l’ohomba w’ekimanyielo. Naka wɛ ekɔ l’ohomba w’ekimanyielo, kete yashikikɛ dia ananyɔ wekɔ lo mbidja welo tshɛ dia kokimanyiya. (1 Kor. 13:4, 7) Ohɔ dia Jehowa mbeyaka dikambo diayɛ ndo yaɛkɛ le nde dia nde kokimanyiya. (Osam. 37:39; 62:8) Onga suke dia mbisha anto akina ekimanyielo ka lo nyuma ndo ka lo yimba. (2 Kor. 1:3, 4) Kalolɛ ekongelo kayɛ ka akambo wa lo nyuma aha la tshimbatshimba.—Mat. 6:33.
5. Oko weso Akristo, shɛngiya yakɔna yele la wâle wa mpokoso le so?
5 Kânga mbele wâle wa mpokoso wekɔ lo mbisha anto wɔma, sho kokaka nongamɛ nshi yayaye la eshikikelo tshɛ. Kema edja, mpokoso tshɛ yayoshila. (Eny. 21:4) Etena kakatakongɛ dui sɔ, sho kokaka ndjalɔngɔsɔla dimɛna dikambo dia nshi y’ofukutanu ndo y’ekakatanu nyɛ aha la shisha ohetoheto aso l’esambishelo ka lokumu l’ɔlɔlɔ.