Wɛ kokaka ngɔna lo nyuma!
1. Lande na ekɔ ohomba kana yimba dia kamba oko ombatshi mboka wa pondjo?
1 Onde wɛ nyangaka ɔngɛnɔngɛnɔ w’efula lo lɔsɛnɔ layɛ? Onde wɛ mongaka la ɔngɛnɔngɛnɔ ndo l’ɔlɔ lo kimanyiya anto akina? Onde wɛ kombolaka nyomohamia olimu wakambɛyɛ Jehowa? Naka eelo, kete wɛ kokaka kana yimba dia kamba olimu w’ombatshi mboka wa pondjo. Ekɔ mɛtɛ dia ɛkɛndɛ wa lo nkumbo ndo w’oma lo Afundelo kâmɛ ndo yônge ya demba la ekakatanu ekina mbeyaka mbidjɛ onto wekamu dia kamba oko ombatshi mboka.
2. Shila ɛngɔnyi ɛmɔtshi wa lo nyuma wakondja ambatshi mboka wa pondjo.
2 Efundelo wakasambiyama oma le Nzambi waki Sɔlɔmɔna kakatanyaka ɛtshɔkɔ waki Jehowa la ɛngɔnyi wa l’emunyi. (Tuk. 10:22) Ɛlɔ kɛnɛ, ɔtshɔkɔ waki Jehowa ngɔnyaka onto ntondotondo lo nyuma. Ambatshi mboka wa pondjo mongaka la ɛngɔnyi ɛsɔ efula. Ɛnyɛlɔ, vɔ mongaka l’ɔngɛnɔngɛnɔ w’efula waya oma lo mbisha anto akina lo ‘ndjatshungwɛ etena’ ka sambisha lo dihole dia kamba la tɔ dikambo dia eyango awɔ. (Kol. 4:5; Etsha 20:35) Jehowa mɛnaka ndo ngɛnangɛnaka olimu wakambawɔ la ngandji. ‘Diangɔ dia nɛmɔ dia l’olongo’ sɔ hashilaki nɛmɔ pondjo. (Mat. 6:20; Heb. 6:10) Ndo nto, diɔtɔnganelo diasa ambatshi mboka la Jehowa keketalaka etena kongawɔ la ‘sso di’ɔsɛlɛngɛ’ ndo kayaɛkɛwɔ le nde dia nde kotsha ehomba awɔ.—Mat. 6:22, 25, 32; Heb. 13:5, 6.
3. Otshikitanu akɔna wele lam’asa mbesa ɛngɔnyi wa lo nyuma la mbesa ɛngɔnyi wa l’emunyi?
3 Mbesa ɛngɔnyi wa l’emunyi konyaka mbala efula “lu saki ya dinginya yatutshelaka antu kolo.” (1 Tim. 6:9, 10; Jak. 5:1-3) Ɛtshɔkɔ waki Jehowa hongaka ngasɔ. Woho wetsha ambatshi mboka wa pondjo wenya awɔ efula lo esambishelo mbakimanyiyaka dia vɔ monga la wɛdimo wa lo nyuma ndo dia vɔ mbika washo lo akambo woleki ohomba. (Fil. 1:10) Ɔnangɛso ɔmɔtshi laki ɛjɛniɛrɛ akatshike olimu ande wakawɔsɛka wenya efula dia kamba olimu w’ombatshi mboka. Nde akate ate: “Olimu ami wa l’emunyi wakanɛndjaka efula, koko olimu w’ombatshi mboka hanɛndja ngasɔ. Kakianɛ lekɔ lo kimanyiya anto ndo lekɔ lo mbaetsha akambo wa mɛtɛ. Dui sɔ diamboleka mbishami ɔngɛnɔngɛnɔ.”
4. Ngande watshɔkwama ambatshi mboka wa pondjo lo kimanyiya anto akina?
4 Ɔtshɔkɔ le anto akina: Ɛlɔ kɛnɛ, oseka onto tshɛ ekɔ lo diɛnɛ la ‘tena dia pâ dia wolo mbikikɛ.’ (2 Tim. 3:1) Anto wa l’ahole tshɛ wekɔ l’ohomba w’efula w’elongamelo. Apandjudi wa Diolelo ngɛnangɛnaka etena kakimanyiyawɔ anto waha la elongamelo dia vɔ mbeka ndo mbetawɔ lokumu l’ɔlɔlɔ. Ande ɔngɛnɔngɛnɔ wele l’ambatshi mboka wa pondjo wetsha wenya ndekana 800 ɔnɔnyi tshɛ l’olimu washimbɛ nsɛnɔ ɔsɔ lee!—1 Tim. 4:16.
5, 6. Kakɔna kakoka kokimanyiya dia wɛ koma ombatshi mboka wa pondjo?
5 Onde wɛ ambokanaka yimba dimɛna dikambo di’olimu w’ombatshi mboka wa pondjo? Dui sɔ mbeyaka kɔlɔmba dia wɛ ‘ndjatshungwɛ etena k’ɔlɔlɔ’ oma lo awui wele bu ohomba efula. (Ef. 5:15, 16) Anto efula wambosalaka dikambo sɔ ndo wambotshikitanyaka nsɛnɔ yawɔ ndo dui sɔ diakawasha akoka wa vɔ kitshakitsha wenya wetshawɔ lo elimu wa l’emunyi dia ndeka ndjasha dikambo dia wahɔ wa Diolelo. Onde wɛ kokaka sala etshikitanu ɛmɔtshi dia ndjela lokolo lawɔ?
6 Lɔmba Jehowa dia nde kosha lomba la wɛ sala ekongelo ka dimɛna. (Jak. 1:5) Ɛtshɔkɔ akɔna wayoyokondja na? Wɛ ayokondja ɛngɔnyi efula wa lo nyuma! Jehowa ayokosha nto diangɔ dia l’emunyi dieyɛ ladiɔ ohomba. (Mat. 6:33) Wanɛ wadja Jehowa lo ohemba lo yoho shɔ wayokondja “otshoko wuhu wahaweyi nkuka lu luudu.”—Mal. 3:10.