Naka ompokami aso tɛkɛtaka ɔtɛkɛta okina

1. Lande na kele ohomba wa tshumanelo kamba kâmɛ wekɔ lo tafulanɛ?

¹ Mbala la mbala, apandjudi wa Diolelo wa l’andja w’otondo pomanaka la anto wɛnya nsaki watɛkɛta ɔtɛkɛta wotshikitanyi la wasalema nsanganya lo etshumanelo kawɔ. Dia kimanyiya anto asɔ lo nyuma, Bɛtɛlɛ efula yakɛnyi ɔlɔlɔ dia kenga elui ndo tshumanelo dia l’ɛtɛkɛta ekina. Lam’ele ɛtɛkɛta efula kokaka tɛkɛtama lo dihole ɔtɔi, tshumanelo efula diatɛkɛta ɛtɛkɛta wotshikitanyi kokaka sambisha l’ɛtshi ka nkɛtɛ kâmɛ. Ngande wakoka tshumanelo sɔ kamba kâmɛ dia vɔ ndjashikikɛ ɔnɛ olimu w’esambishelo wekɔ lo salema lo yoho ya dimɛna?​—1 Kor. 14:33.

2. Etena kasambishaso lo soko la soko, ngande wakokaso kamba kâmɛ la olui kana etshumanelo kasalema nsanganya l’ɔtɛkɛta okina kele lo ɛtshi kaso ka nkɛtɛ?

² Okambelo wa kâmɛ: Etena kasambishaso lo toshinga kana lo tshakitudi, hatohombe mengenga dia sambisha onto tshɛ, mbidja ndo wanɛ watɛkɛta ɔtɛkɛta okina ndo mbasha ekanda l’ɔtɛkɛta wakombolawɔ mbadia. Koko, etena kasambishaso lo luudu la luudu lo bɛtshi dia nkɛtɛ diasambisha ndo olui kana etshumanelo ka l’ɔtɛkɛta okina, sho pombaka sambisha paka lo mvudu yele anto watɛkɛta ɔtɛkɛta wasalema nsanganya l’etshumanelo kaso. Etena kasambisha tshumanelo diotshikitanyi l’ɛtshi ka nkɛtɛ ɔtɔi, ekɔ ohomba salaka alapɔlɔ wa dimɛna. Emendji w’olimu pombaka sawolaka dimɛna ndo kambaka kâmɛ ndo nɔngɔsɔlaka awui lo yoho yayonga la wahɔ le anto tshɛ. (Tuk. 11:14) Koko, naka tambohomana la onto latɛkɛta ɔtɛkɛta okina etena katatasambisha lo soko la soko ndo ndoko etshumanelo kasalema nsanganya l’ɔtɛkɛta akɔ kele suke, kete sho pombaka sala la wolo dia mbosambisha ndo tetemala mbokimanyiya.

3. Kakɔna kahombaso sala etena kahomanaso l’apandjudi wa l’olui kana etshumanelo kasalema nsanganya l’ɔtɛkɛta okina wasambisha l’ɛtshi ka nkɛtɛ kasambishaso?

³ Tekɔ lo kamba olimu wâmɛ: Ngande wahomba salema akambo etena kasambisha apandjudi wa lo tshumanelo diasalema nsanganya lo ɛtɛkɛta wotshikitanyi lushi lâmɛ l’ɛtshi ka nkɛtɛ kâmɛ? Lo mɛtɛ, ngandji k’Okristo kayahemɛ etshikitanu w’ɛtɛkɛta ndo sho tshɛ tayoleka ndjakiyanya dikambo dia ehomba wa anto wa l’ɛtshi kaso ka nkɛtɛ. (Joa. 13:34, 35) Koko, emendji wayɛnya ekanelo k’ɔlɔlɔ ndo ngandji etena kashikikɛwɔ ɔnɛ olui ɔmɔtshi pombaka ntshɔ tosambisha l’ɛtshi ka nkɛtɛ kekina.​—Jak. 3:17, 18.

4. Prɔfɛsiya kakɔna kakotshama nshi nyɛ?

⁴ Bible kakewoya dia anto wa l’ɛtɛkɛta tshɛ wayohokamɛ lokumu l’ɔlɔlɔ. (Eny. 14:6, 7) Naka anto wa lo tshumanelo diakɔ tshɛ kamba kâmɛ, kete apandjudi wa lo tshumanelo dikina watɛkɛta ɛtɛkɛta wotshikitanyi hawotohomana lo soko diâmɛ ndo tayosambisha eyoyo efula lokumu l’ɔlɔlɔ, mbidja ndo wanɛ watɛkɛta ɛtɛkɛta ekina.​—Ef. 4:16.